Azovy Ma Zan̈ahary Zen̈y?

1, 2. Ino raha matetiky an̈ontanianolo?

TSAIKY farandraha tia man̈ontany eky. Anao ndray efa mifen̈y man̈azava, iro mbala man̈ontany karaha ty fo: ‘Nan̈ino ma?’ Anao mbala mamaly fan̈ontanian̈a araiky, iro efa man̈ontany raha hafa.

² Ndray tsaiky ndray olobe, samy tia man̈ontany. Atsika mety man̈ontany momba raha hoanintsika, lamba hisikinintsika, raha hividintsika. Mety man̈ontany raha maventy koa atsika, an̈atinizen̈y momba fiain̈anantsika ndreky ny amaraintsika. Kanefa atsika koa fa tsy mahita valiny mahafapo amy fan̈ontanian̈a aby io, atsika mety efa tsy hitady valiny eky.

3. Nan̈ino maro olo mieritreritry fa tsy ahitan̈a valiny foeky fan̈ontanian̈andro?

³ Izio ma voavaliny Baiboly firaka fan̈ontanian̈antsika maventy? Olo sasany mieritreritry fa ao marin̈y valiny, fa iro mihevitry fa sarotro hay Baiboly io. Papianatra na pitariky fivavahan̈a aby io fo volan̈indro mahavaly fan̈ontanian̈a momba Baiboly. Olo sasany ndraiky men̈atra, fotony tsy mahay valiny. Akory ndraiky hevitrinao?

4, 5. Ino aby fan̈ontanian̈a maventy mety ho tianao hay valiny? Nan̈ino ma anao tokony hitady valiny fan̈ontanian̈a aby io fo?

⁴ Anao mety efa nitady valiny fan̈ontanian̈a karaha ty: Nan̈ino ma zaho ty velon̈o? Han̈ano akory ma zaho ty koa fa maty? Mba karakory eky Zan̈ahary zen̈y? Misy Papianatra malaza araiky, Jesosy an̈arany. Nivolan̈iny: “Anaro koa tsy voly mangataka, hahazo. Anaro koa tsy voly mitady, hahita. Anaro koa tsy voly mikonkon̈o, hibiafin̈y.” (Matio 7:7) Ke anao aza malemy troko, fa mbala ho hitanao fo valiny mahafapo amy fan̈ontanian̈anao!

⁵ Izikoa anao “tsy voly mitady” amy Baiboly ao, ho hitanao valiny fan̈ontanian̈a aby io. (Ohabolana 2:1-5) Izio tsy raha farany sarotro hay zen̈y. Baka amy raha ianaranao amy Baiboly hahavy anao ho sambatra rango izioty, ndreky han̈anten̈a raha tsara aminy amaray an̈y. Alo zahavantsika valiny fan̈ontanian̈a mampijaly jerinolo maro.

KAFIRY AMINTSIKA MA ZAN̈AHARY SA MIJERY ATSIKA?

6. Nan̈ino olo sasany mihevitry fa Zan̈ahary tsy mijery iro?

⁶ Maro olo mihevitry fa Zan̈ahary tsy mijery atsika. Ho iro, izikoa Zan̈ahary mijery atsika, tsy tokony ho karaha ty fiain̈ana. Tany feno ady, olo tsy fankatia, baka io maro koa olo masikiny. Olo mbala marary, mijaly, ndreky maty. Ke olo sasany mivolan̈a: ‘Izikoa Zan̈ahary mijery atsika, nan̈ino tsy sakanany jaly io?’

7. a) Akory ampianarandro pitariky fivavahan̈a aby io olo fa Zan̈ahary kafiry? b) Nan̈ino atsika matoky fa Zan̈ahary tsy tokony hamian̈a tsin̈y, koa fa misy raha ratsy?

⁷ Baka amy pitariky fivavahan̈a koa ndraikindraiky mahavy olo mivolan̈a fa Zan̈ahary io kafiry amintsika. Izikoa fa misy raha ratsy mandalo, iro mivolan̈a fa zen̈y lahatra Zan̈ahary. Dikanizen̈y, tiany Zan̈ahary mahita raha ratsy. Olo mivolan̈a karaha zen̈y man̈amia tsin̈y Zan̈ahary. Baiboly ndraiky mampianatra fa tsy baka amy Zan̈ahary foeky raha ratsy jiaby. Koran̈iny Jakoba 1:13 fa Zan̈ahary tsy mitsapa jery na azovy na azovy amy raha ratsy. Volan̈iny: “Izikoa fa misy raha ratsy mahazo anaro, aza mivolan̈a fa ‘Zan̈ahary mitsapa jery zaho fo io’, fotony Zan̈ahary tsy mety atao ratsy, sady izy koa tsy man̈ano ratsy olo foeky, na azovy izy na azovy.” Ndray tsy sakanany Zan̈ahary raha ratsy mandalo, izio tsy baka aminany foeky. (Vakia Joba 34:10-12.) Atsika hangala ohatra araiky.

8, 9. Nan̈ino atsika tsy tokony han̈amia tsin̈y Zan̈ahary amy raha manahiran̈a atsika? Ino ohatra han̈azavanao zen̈y?

⁸ Ohatra, misy tsaiky lelahy araiky tarimìny babany ndreky reniny. Babany io ten̈a tia izy, sady nampianatra izy hahay hanapakevitry tsara. Koa fa be izy, nirain̈any babany io, ke izy niala tamindro tao. Nan̈ano adalan̈a izy tan̈y, ke sahiran̈a mare. Hamianao tsin̈y ma babany tsaiky io, fotony izy nan̈ambela zanany io niala tamindro tao? Tsy babany foeky tokony hamian̈a tsin̈y! (Lioka 15:11-13) Zan̈ahary koa tsy misakana olo hifidy han̈ano raha ratsy. Ke izikoa fa misy raha ratsy, aza adin̈a fa tsy baka amy Zan̈ahary mahavy zen̈y. Ke atsika tsy tokony han̈amia tsin̈y izy foeky.

⁹ Misy antony tsara mahavy Zan̈ahary tsy misakana raha ratsy. Hianarantsika amy Toko faha-11 raha koran̈iny Baiboly momba zen̈y. Matokisa fo fa Zan̈ahary ten̈a tia atsika, ke izy tsy tokony hamian̈a tsin̈y foeky amy raha manahiran̈a atsika. Ny marin̈y aminany, Zan̈ahary zaraiky fo mahavita man̈adoso jaly io.—Isaia 33:2.

10. Nan̈ino atsika matoky fa Zan̈ahary han̈adoso raha ratsy jiaby?

¹⁰ Zan̈ahary io masin̈y. (Isaia 6:3) Atsika mety matoky izy tsarabe, fotony tsisy tsin̈y, madio ndreky tsara aby raha jiaby ataony. Tsy karaha zen̈y olombelon̈o. Iro mety ho tafan̈ano raha tsy mety. Ndray pitondra araiky tia raha marin̈y, tsisy angovo han̈adosoan̈a jaly baka amy raha ataonolo ratsy fan̈ahy. Tsisy olo manan̈a angovo mira Zan̈ahary. Izy mahavita man̈adoso jaly baka amy raha ataonolo ratsy fan̈ahy. Zen̈y edy raha handeha hataony. Hadosony raha ratsy jiaby, ke tsy ho hisy eky.—Vakia Salamo 37:9-11.

KARAKORY FAHITANY ZAN̈AHARY JALINOLO?

11. Karakory fahitany Zan̈ahary raha iaretanao?

¹¹ Karakory fahitany Zan̈ahary raha mandalo erantany ndreky raha iaretanao? Ampianariny Baiboly fa Zan̈ahary “tia rariny.” (Salamo 37:28) Dikanizen̈y, jireny raha jiaby mandalo ambony tany eto, na tsara izio na ratsy. Mahinakinaka izy mahita olo mijaly. Koran̈iny Baiboly fa taloha tan̈y ‘nalahelo fonany’, izy koa fa nahita tany feno olo nan̈ano raha ratsy. (Genesisy 6:5, 6) Zan̈ahary tsiary niova. (Malakia 3:6) Baiboly mivolan̈a fa Zan̈ahary ten̈a mijery anao.—Vakia 1 Petera 5:7.

12, 13. a) Ino mahavy atsika tia ndreky mikarakara olo, baka io karakory ataontsika koa fa mahita jalinolo erantany? b) Nan̈ino atsika afaka matoky fa mbala hadosony Zan̈ahary jaly jiaby ndreky raha tsy rariny jiaby?

¹² Koran̈iny Baiboly koa fa atsika nataony Zan̈ahary mira sora aminany. (Genesisy 1:26) Dikanizen̈y, atsika nataony mira toetry aminany. Malahelo anao, koa fa mahita olo tsy manantsin̈y mijaly. Zan̈ahary koa malahelo mandilatra zen̈y, koa fa mahita olo mijaly. Ino mahavy atsika mivolan̈a zen̈y?

¹³ Ampianariny Baiboly atsika fa “Zan̈ahary io fitiavan̈a.” (1 Jaona 4:8) Amy raha jiaby ataony, fitiavan̈a fo mandrisiky izy. Manan̈a fitiavan̈a koa atsika, fotony Zan̈ahary io fitiavan̈a. Diniha hely baka ty: Anao koa nanan̈a angovo han̈adosoan̈a raha tsy rariny ndreky jalinolo erantany, nadosonao fotony anao tia olo. Karakory fo Zan̈ahary? Izy manan̈a angovo, baka io koa izy tia atsika. Hadosony jaly jiaby ndreky raha tsy rariny jiaby. Matokisa fa tsy vandy raha jiaby handeha hataony Zan̈ahary, hitantsika amy voanalohany amy boky ty! Anao mila mianatra raha maro momba Zan̈ahary, baka atokisanao tsarabe raha volan̈iny aby zen̈y.

ANAO TIANY ZAN̈AHARY HAHAY IZY

14. Azovy an̈aran̈a Zan̈ahary, baka io akory ahaizantsika fa tokony hampiasaintsika izio?

¹⁴ Koa misy olo tianao hatao kamarady, ino matetiky raha voanalohany ambaranao izy? An̈aranao. Ke Zan̈ahary ma misy an̈aran̈a? Maro fivavahan̈a mivolan̈a fa Zan̈ahary na Tompo zen̈y. An̈aran̈a fan̈ajan̈a fo zen̈y, karaha “panjaka” na “prezidan”, fa tsy ten̈a an̈aran̈a. Zan̈ahary mivolan̈a fa Jehovah an̈arany. Koran̈iny Salamo 83:18: “Baka olo jiaby mahay fa anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Iro panoratra Baiboly nampiasa an̈aran̈a Jehovah io mandilatra andrivony aby. Tiany Jehovah anao hahay an̈aranany io ndreky hampiasa izio. Nambarany an̈aranany, baka anao hanjary kamaradiny.

15. Ino ma dikany an̈aran̈a Jehovah zen̈y?

¹⁵ Misy dikany maventy an̈aran̈a Jehovah zen̈y. Dikanizio, zay raha ampan̈antinainy ndreky tiany hatao, tsy maintsy vitany fo. Tsisy raha mahasakana izy. Jehovah zaraiky fo mahatondra an̈aran̈a io.a

16, 17. Ino ma dikany: a) “Farany Mahery”? b) “Panjakany mandrakizay”? d) “Pamoron̈o”?

¹⁶ Salamo 83:18 nivakintsika in̈y mivolan̈a karaha ty momba Jehovah: “Anao zaraiky fo Farany An̈abo.” Aminy Apokalypsy 15:3 koa mivolan̈a: “Jehovah, Zan̈ahary Farany Mahery, be ndreky ten̈a mahalany fan̈ahy raha niasainao. Anao Panjakany Mandrakizay, raha jiaby ataonao marin̈y fo.” Ino ma dikany an̈aran̈a fan̈ajan̈a Jehovah “Farany Mahery” io? Dikanizio, tsisy manan̈a angovo mandilatra izy. Dikany “Panjakany mandrakizay” zen̈y, izy efa nisy fo letrizay. Hazavainy Salamo 90:2 ao fa izy efa nisy fo letrizay ndreky mandrakizay. Mahagaga kony!

¹⁷ Jehovah zaraiky fo Pamoron̈o. Aminy Apokalypsy 4:11 mivolan̈a: “Anao zaraiky fo Jehovah man̈eva hahazo voninahitry, fan̈ajan̈a ndreky angovo, fotony anao niasa raha jiaby. Izikoa tsy anao, raha jiaby io tsisy.” Jehovah niasa anjely andan̈itry an̈y, lakintan̈a, voany kakazo ndreky loko, ndreky raha jiaby!

AKORY HAHAVY ANAO HANJARY KAMARADINY JEHOVAH?

18. Ino mahavy olo sasany mieritreritry fa iro tsy mety hanjary kamaradiny Zan̈ahary? Ino raha volan̈iny Baiboly momba zen̈y?

¹⁸ Olo sasany koa fa mandiniky toetriny Jehovah aby io, iro mavozo. Iro mivolan̈a: ‘Zan̈ahary zen̈y mahery, an̈abo, ndreky lavitry mare, ke izy tsy mety hijery zaho.’ Akory fahitany Jehovah zen̈y? Tsy tiany anao hieritreritry karaha zen̈y, fotony tiany atsika hanjary kamaradiny. Baiboly mivolan̈a fa “izy tsy lavitry atsika tsiaraikiaraiky.” (Asan’ny Apostoly 17:27) Tiany Jehovah anao han̈aton̈o izy. Anao koa man̈ano zen̈y, ‘izy han̈aton̈o anao.’—Jakoba 4:8.

19. a) Akory mety hahavy anao hanjary kamaradiny Zan̈ahary? b) Ino toetriny Jehovah ten̈a tianao?

¹⁹ Akory mety hahavy anao hanjary kamaradiny Zan̈ahary? Jesosy nivolan̈a: “Baka iro ho velon̈o tsisy farany, iro mila mianatra momba anao, Zan̈ahary tokana sady marin̈y, ndreky Jesosy Kristy irakanao.” (Jaona 17:3) Tohiza fo fianaranao Baiboly, baka anao mahay Jehovah ndreky Jesosy. Mety hahazo fiain̈ana tsisy farany koa anao, koa man̈ano zen̈y. Ohatra, efa nianarantsika fa “Zan̈ahary io fitiavan̈a.” (1 Jaona 4:16) Mbala maro koa toetry tsara anan̈any. Koran̈iny Baiboly fa Jehovah io ‘mamindra fo, tsara fan̈ahy, tsy mora meloko, be fitiavan̈a tsy miovaova ndreky fahamarin̈ana.’ (Eksodosy 34:6) Jehovah “tsara toetry ndreky von̈ono hamafa heloko.” (Salamo 86:5) Izy koa maharidraha sady tsy mivadiky. (2 Petera 3:9; Apokalypsy 15:4) Anao koa mazoto mamaky Baiboly, ho maro toetriny Jehovah ho hainao.

20-22. a) Akory hataontsika hanjary kamaradiny Zan̈ahary, ndray izy tsy hitantsika? b) Karakory tokony hataonao, izikoa misy olo misakana anao hianatra Baiboly?

²⁰ Akory hahavy anao hanjary kamaradiny Zan̈ahary, kanefa anao tsy mahita izy? (Jaona 1:18; 4:24; 1 Timoty 1:17) Anao koa mamaky raha momba Jehovah amy Baiboly ao, ho hainao fa misy ankitin̈y izy. (Salamo 27:4; Romanina 1:20) Arakaraka ahaizanao Jehovah hahavy anao ho tia izy mare ndreky hanjary kamaradiny.

²¹ Hazava aminao koa antony ivolan̈ana fa Jehovah io Babantsika. (Matio 6:9) Mira baba araiky tia zanaka in̈y, izy nan̈amia atsika fiain̈ana, ke tiany atsika hanan̈a fiain̈ana ten̈a tsara. (Salamo 36:9) Baiboly mampianatra fa anao koa mety hanjary kamaradiny Jehovah. (Jakoba 2:23) Mba iritrireta hely baka! Jehovah, Pamoron̈o raha jiaby, tia anao hanjary kamaradiny!

²² Olo sasany mety tsy ho tia anao hanohy fianaranao Baiboly, fotony iro mavozo tsao anao hiova fivavahan̈a. Aza man̈eky, izikoa misy olo misakana anao tsy hanjary kamaradiny Jehovah. Izy zaraiky fo Naman̈a ten̈a tsara.

23, 24. a) Nan̈ino ma anao tokony han̈ontany fo? b) Ino raha ho hitantsika amy toko fan̈araka ty?

²³ Anao koa fa mianatra Baiboly, mety hisy raha tsy hazava aminao. Aza men̈atra man̈ontany. Jesosy nivolan̈a fa atsika tokony hanetry ten̈a, karaha tsaiky madiniky aby io. (Matio 18:2-4) Haintsika fa tsaiky zen̈y tsy lany fan̈ontanian̈a. Tiany Zan̈ahary ho hitanao valiny fan̈ontanian̈anao. Ke ianara tsarabe Baiboly io, baka anao matoky fa marin̈y raha ianaranao.—Vakia Asan’ny Apostoly 17:11.

²⁴ Fianaran̈a Baiboly fomba ten̈a tsara ahaizan̈a Jehovah. Ho hitantsika amy toko fan̈araka ty raha ivolan̈ana fa Baiboly io tsy mitovy boky hafa.