TOKO 11
Nan̈ino ma Jaly Mahaimare Fo?
1, 2. Ino raha an̈ontanianolo maro?
NISY ranobe nandalo, tanàna araiky ravan̈a. Nisy lelahy araiky nan̈apoaka bomby tamy leglizy, ke naro olo naratra ndreky naty. Tsaiky dimy nanjary kamboty, fotony mamandro natiny kansera.
2 Izikoa misy raha karaha zen̈y miboaka, maro olo man̈ontany karaha ty: “Raha nan̈ino loatra?” Maro olo man̈ontany nan̈ino tany ty feno olo tsy fankatia ndreky feno jaly. Asa anao mba efa nan̈ontany karaha zen̈y?
3, 4. a) Ino aby fan̈ontanian̈any Habakoka? b) Akory nivolan̈iny Jehovah taminany?
3 Ianarantsika amy Baiboly ao fa misy olo ten̈a mino Zan̈ahary koa mba nan̈ontany karaha zen̈y. Ohatra, paminan̈y Habakoka nan̈ontany Jehovah karaha ty: “Nan̈ino ma zaho ampahitanao raha ratsy, karaha zahanao fo raha ratsy mandalo io? Nan̈ino ma olo mamono olo ndreky olo mandrava fo man̈odidin̈y zaho, baka io nan̈ino koa misy olo mankany ndreky mimalo?”—Habakoka 1:3.
4 Aminy Habakoka 2:2, 3 atsika mamaky raha nivolan̈iny Jehovah taminy Habakoka. Izy nampan̈anten̈a fa mbala han̈adoso raha ratsy jiaby. Jehovah ten̈a tia olo. Baiboly mivolan̈a karaha ty: “Izy mikarakara anaro.” (1 Petera 5:7) Jehovah ten̈a tsy tia jaly io mandilatra atsika. (Isaia 55:8, 9) Zen̈y mahavy atsika han̈azava valiny fan̈ontanian̈a ty: Nan̈ino ma tany ty feno jaly?
NAN̈INO JALY MAHAIMARE FO?
5. Ino ma raha volan̈indro pitariky fivavahan̈a aby io momba jaly? Ino ma raha ampianariny Baiboly?
5 Matetiky iro pitariky fivavahan̈a aby io mampianatra fa jaly io efa lahatra Zan̈ahary. Sasany mety hivolan̈a fa raha jiaby mavoa olo, an̈atinizen̈y sikilony ndreky ranobe io efa nalahatra Zan̈ahary, ke tsy mety hazava amintsika raha momba izio. Sasany baka efa mivolan̈a foeky fa izikoa misy olo maty, na tsaiky madiniky maty, iro zen̈y nalainy Zan̈ahary aminany andan̈itry an̈y. Tsy marin̈y zen̈y. Jehovah tsiary nan̈ano ny ratsy. Baiboly mivolan̈a: “San̈atria araiky ten̈a Zan̈ahary io han̈ano ny ratsy. San̈atria izy Farany Mahery io han̈ano raha tsy marin̈y!”—Joba 34:10.
6. Nan̈ino ma olo maro man̈amia tsin̈y Zan̈ahary amy raha ratsy misy amy donia ty?
6 Maro olo man̈amia tsin̈y Zan̈ahary amy ratsy jiaby mandalo amy donia ty, fotony iro mieritreritry fa Zan̈ahary manjaka amy donia ty. Efa nianarantsika tamy Toko faha-3 fa mbala Satana Devoly manjaka amy donia ty.
7, 8. Ino aby antony mahavy jaly mahaimare fo erantany?
7 Baiboly man̈ambara amintsika fa “donia misy atsika ty ndraiky ambany fahifan̈any araiky ratsy in̈y.” (1 Jaona 5:19) Satana manjaka amy donia ty, ke izio ratsy fan̈ahy ndreky kafiry. Izy “mamitaka tany jiaby misy olo.” (Apokalypsy 12:9) Maro olo man̈araka jerinany. Zen̈y an̈isany mahavy tany ty feno olo mavandy, tsy fankatia ndreky kafiry.
8 Mbala misy antony hafa koa mahavy jaly erantany io. Adama ndreky Eva koa fa tsy nan̈araka volan̈a Zan̈ahary, iro namindra fahotan̈a tamy taranakandro jiaby. Baka amy fahotan̈a io nahavy olo mampijaly naman̈a. Matetiky olo tsy man̈eky atao ambaniny naman̈a. Zen̈y mahavy ady ndreky fampijalian̈a olo io. (Mpitoriteny 4:1; 8:9) Olo sasany ndraiky mijaly, fotony “mety ho voa raha amy fotoan̈a tsy ampoizin̈y.” (Mpitoriteny 9:11) Olo jiaby mety ho voa raha, na aksidan zen̈y na raha ratsy, amy fotoan̈a tsy ampoizin̈y.
9. Nan̈ino ma atsika matoky fa tsy maintsy misy antony tsara fo mahavy Zan̈ahary mbala tsy man̈adoso jaly io?
9 Tsy baka amy Jehovah foeky jaly io. Izy tsy tokony hamian̈a tsin̈y aminy ady, famonoan̈a olo ndreky fampijalian̈a olo. Tsy baka amy Zan̈ahary horohorontany, sikilony, ndreky ranobe. Anao mety hivolan̈a karaha ty: ‘Izikoa Jehovah Zan̈ahary farany mahery amy raha jiaby, nan̈ino mbala ambelany mitohy fo jaly io fa tsy sakanany?’ Haintsika fa Zan̈ahary io ten̈a tia atsika tsiaraikiaraiky. Dikanizen̈y, tsy maintsy misy antony tsara fo mahavy izy mbala tsy man̈adoso jaly io.—1 Jaona 4:8.
NAN̈INO TSENDRIKY ADOSONY ZAN̈AHARY JALY IO
10. Karakory nataony Satana nankaratsy Jehovah?
10 Devoly namitaka Adama ndreky Eva, tamy zaridain̈y Edena tan̈y. Satana nivolan̈a fa Zan̈ahary io tsy mahay mitondra. Izy nivolan̈a fa misy raha tsara tsy namiany Zan̈ahary Adama ndreky Eva. Tiany Satana iro hino fa izy ten̈a mahay mitondra fa tsy Jehovah, ke iro tsy mila Jehovah eky.—Genesisy 3:2-5; zahava Fan̈azavan̈a 27.
11. Ino fan̈ontanian̈a mila valintsika?
11 Adama ndreky Eva tsy nan̈araka volan̈a Jehovah, ke iro nivadiky taminany. Iro nieritreritry fa iro fo efa mahavita manapakevitry amy raha tsara ndreky ratsy, ke tsy mila Zan̈ahary eky. Akory nataony Jehovah nahitan̈a fa diso Adama ndreky Eva, ke izy zaraiky fo mahay raha ten̈a mahatsara atsika?
12, 13. a) Nan̈ino tsy niaraka Adama ndreky Eva nanota efa nivoneny Zan̈ahary edy? b) Nan̈ino Jehovah nan̈ambela Satana hanjaka amy donia ty, ndreky nan̈ambela olo hifampitondra?
12 Tsy niaraka Adama ndreky Eva nanota efa nivoneny Jehovah edy. Nambelany iro hiteraka maro. Jehovah amy zay nampifidy taranaka Adama ndreky Eva azovy tiandro hitondra iro. Tiany Jehovah tany ho feno olo lavorary, ke na ino na ino raha hataony Devoly, izio tsy maintsy ho tanteraka fo.—Genesisy 1:28; Isaia 55:10, 11.
13 Anjely antapitrisany nahita Satana nankaratsy Jehovah. (Joba 38:7; Daniela 7:10) Ke Jehovah nan̈ambela Satana han̈aporofo vandinany in̈y. Nambelany koa Satana mitariky olombelon̈o hifampitondra, ahitan̈a asa izy mahay mitondra tsisy fan̈ampiany Zan̈ahary zen̈y.
14. Ino raha hita tsarabe izioty?
14 Efa andrivony taon̈o maro olombelon̈o nifampitondra, fa olo mbala mijaly fo. Hita tsarabe fa Satana pavandy. Olombelon̈o ten̈a mila Zan̈ahary man̈ampy. Marin̈y raha nivolan̈iny paminan̈y Jeremia ty: “Haiko tsarabe izioty Jehovah fa olombelon̈o tsy mahay lalan̈a imboany. Olo koa tsy natao hitondra fiain̈ananany manokan̈a.”—Jeremia 10:23.
NAN̈INO MA JEHOVAH MBALA MIAMBIN̈Y ELA?
15, 16. a) Nan̈ino ma banjainy Jehovah mitohy ela be jaly io? b) Nan̈ino Jehovah tsy man̈arin̈y raha manahiran̈a baka amy raha tsy mety ataony Satana?
15 Nan̈ino ma banjainy Jehovah mitohy ela be jaly io? Nan̈ino tsy sakanany raha ratsy jiaby mandalo? Mila fotoan̈a lava han̈aporofoan̈a fa Satana io tsy mahay mitondra. Olo efa nan̈ano karazan̈a fitondrasan̈a jiaby, fa tsisy nahomby. Siansy ndreky teknolozy mandroso, fa mbala mahaimaro fo olo tsy man̈araka lalàn̈a, olo masikiny, olo mamono olo, ndreky olo miady. Atsika tsy mety hahomby izikoa tsy miankiny amy Zan̈ahary.
16 Jehovah tsy man̈arin̈y raha manahiran̈a baka amy raha tsy mety ataony Satana. Izy koa man̈ano zen̈y, mira miaraka mitondra amy Satana fo. Jehovah tsy mety han̈ano zen̈y. Izikoa Jehovah efa man̈ano raha izioty, olo hivolan̈a fa olombelon̈o fo mahavita ten̈a. Vandy zen̈y, ke Jehovah tsy mety hitatahy olo mavandy. Izy tsiary mavandy.—Hebreo 6:18.
17, 18. Hataony Jehovah karakory han̈arin̈y raha ratsy jiaby nataony Satana?
17 Mbala ho vitany Jehovah fo han̈arin̈y raha ratsy nataony Satana ndreky olombelon̈o? Ia, vitany. Zan̈ahary tsisy raha tsy hainy. Hainy Jehovah fotoan̈a ten̈a mety amalian̈a fankaratsian̈a nataony Satana. Hivoany hanjary paradisa amy zay tany jiaby. Olo “jiaby ampasan̈a an̈y” hivilominy. (Jaona 5:28, 29) Olo tsy harary ndreky tsy hofoaty eky. Jesosy han̈arin̈y raha ratsy nataony Satana. Jehovah hampiasa Jesosy “handravan̈a asany Devoly.” (1 Jaona 3:8) Mankasitraka Jehovah atsika, fotony izy maharidraha. Nambelany atsika hahay ny marin̈y momba izy ndreky afaka mifidy izy hitondra atsika. (Vakia 2 Petera 3:9, 10.) Atsika ndray mijaly, Zan̈ahary man̈ampy atsika hiaritry.—Jaona 4:23; vakia 1 Korintianina 10:13.
18 Jehovah tsy manery atsika hifidy izy. Ambelany olo hifidy zay tiany. Atsika handiniky kado tsara namiany Jehovah atsika io.
AKORY HAMPIASANAO SAFIDINAO?
19. Ino kado ten̈a tsara namiany Jehovah atsika? Nan̈ino atsika tokony hankasitraka izy amy zen̈y?
19 Kado tsara namiany Jehovah atsika io ten̈a tsy itovizantsika amy biby. Iro tsy nataony Zan̈ahary mahay mifidy zen̈y. Atsika fo mahay mifidy raha tiantsika hitondrasan̈a ain̈intsika, ndreky mifidy han̈ano raha mamparavoravo Jehovah. (Ohabolana 30:24) Atsika io koa tsy mira lamasiny, fotony raha ampan̈anovin̈y izy fo hainy. Atsika mahavita mifidy olo tiantsika halain̈y tahaka, mifidy olo hataontsika kamarady, ndreky mifidy raha tiantsika hatao amy fiain̈anantsika. Tiany Jehovah atsika hankafy fiain̈ana.
20, 21. Akory ten̈a tsara ampiasanao safidinao io izioty?
20 Tiany Jehovah atsika ho tia izy. (Matio 22:37, 38) Izy mira babany tsaiky araiky ravoravo maharen̈y zanany mivolan̈a aminany karaha ty: “Tiako anao papa e.” Baka amy fony tsaiky io volan̈a io, fa tsy nitireny papany izy vo mivolan̈a zen̈y. Jehovah koa nan̈ano atsika mahavita mifidy hanompo izy na tsy hanompo izy. Satana, Adama ndreky Eva tsy nifidy Jehovah. Akory fo hampiasanao safidinao?
21 Ampiasà tsara safidinao, ke manompoa Jehovah. Misy olo antapitrisany tapakevitry han̈ano raha mamparavoravo Zan̈ahary, ke iro manohitry Satana. (Ohabolana 27:11) Ino raha mety hataonao rango izioty, baka anao mba ho tafita amy donia vaovao, Jehovah koa fa man̈adoso olo jiaby ratsy fan̈ahy? Amy toko fan̈araka ty atsika mamaly fan̈ontanian̈a zen̈y.