Zan̈ahary Niasa Lelahy Ndreky Man̈angy

Niasa zaridain̈y araiky Jehovah. Edena an̈aranizio. Nisy folera, vodindraha ndreky biby marobe tao. Jehovah baka tio niasa Adama, lelahy voanalohany tambony tany teto. Baka tamy fotaka nan̈amboarany izy, baka io nampidiriny tsiko taminy oron̈onany tao ke velon̈o izy baka tio. Nirahiny Jehovah izy nikarakara zaridain̈y io, ndreky nan̈amia an̈aran̈a biby jiaby.

Nisy didy araiky namiany Jehovah Adama. Hoizy: ‘Mety hahaninao aby voany kakazo jiaby, koa tsy araiky fo. Anao koa mihina voany kakazo io, hofoaty edy.’

Tafara tatỳ, ho Jehovah: ‘Zaho hiasa olo araiky han̈ampy Adama.’ Nataony nandry mare Adama baka tio. Nalainy taolan̈a araiky tamy tritriny Adama, nan̈amboarany olo atao vadiny Adama. Eva an̈arany man̈angy io. Adama ndreky Eva fianakavian̈a voanalohany tambony tany teto. Ravoravo mare Adama, ke hoizy: ‘Mahay raha Jehovah e, niasany naman̈a zaho baka tamy tritrinaka!’

Nirahiny Jehovah niteraka Adama ndreky Eva baka ho feno olo tany. Tiany iro han̈ova tany jiaby paradisa. Zaridain̈y tsara paradisa zen̈y, mira zaridain̈y Edena. Kanefa tsy nanjary paradisa tany ty. Nan̈ino? Ho hitantsika amy toko fan̈araka zen̈y.