Olo Valo Fo Tsy Naty!

Ry Noa ndreky biby aby io koa fa tafiditry tan̈aty sambofiara tao, nigadrany Jehovah varavaran̈a raha io. Navy mare mahalen̈y. Ke nanomboko niefon̈o sambo io. Nanjary dobo tany jiaby. Naty olo ratsy jiaby tambelan̈a sambo io. Iry Noa fo tsy naty. Misora ravoravo iro nan̈araka volan̈a Jehovah!

Nilatsaka 40 andra ndreky 40 alin̈y mahalen̈y, zay vo nijanon̈o. Nihen̈y moramora rano. Sambo in̈y amy zay tavela tan̈abony bongo. Rano mbala tsendriky honohono ho ritry foeky, ke ry Noa mbala tsendriky nety niboaka.

Koa fa ela ny ela, ritry rano. Nandilatra taon̈o araiky ry Noa tan̈aty sambo tao. Jehovah baka tio nan̈iraka ry Noa niboaka tamy sambo tao. Efa nira donia vaovao tamy zen̈y, tsisy olo ratsy foeky. Iro nan̈ano mersy Jehovah namonjy iro, ke nan̈ano fan̈atitry.

Ravoravo Jehovah. Izy nivolan̈a tamindro fa tsy han̈ano safodrano karaha in̈y eky ambony tany. Akory ahaizantsika zen̈y? Nasiany sobeha tamy lan̈itry tarỳ. Zen̈y sobeha voanalohany. Anao efa nahita sobeha?

Jehovah nan̈iraka Noa ndreky zanany aby io hiteraka, hameno tany ty.