Niteraka iro Tamy Farany!

Tan̈atiny taon̈o maro vadian̈any Abrahama ndreky Saraha. Nialandro tran̈ondro tsara ta Ora. Iro nipetraka tamy tran̈olay. Saraha ndraiky tsy nitarain̈y fotony izy natoky Jehovah.

Tihahazo zanaka mare Saraha. Hoizy taminy Abrahama: ‘Ataova vady Hagara piasanaka, izikoa anaro miteraka mbala karaha zanako fo zen̈y.’ Niteraka tsaiky lelahy Hagara. Ismaela an̈arany.

Taon̈o maro tafara, taminy Abrahama 99 taon̈o ndreky Saraha 89 taon̈o, nisy olo telo navy namangy iro. Nikahiny Abrahama hihina ndreky hangala kajo tamy vodikakazo iro. Anjely iro olo aby io! Ho iro taminy Abrahama: ‘Amy taon̈o hoavy karaha izioty, anao ndreky vadinao hahazo zanaka lelahy.’ Saraha nitandren̈y koran̈andro tan̈aty tran̈olay tao. Tafitokiky izy, ke izy nieritreritry: ‘Zaho fa matoe ty mbala mety hiteraka?’

Taon̈o nan̈araka, niteraka tsaiky lelahy ankitin̈y Saraha. Nataony Abrahama Isaka an̈arany zanany io, dikanizio “Tokiky.”

Koa fa kadiriny dimy taon̈o Isaka, hitany Saraha Ismaela nan̈ambanimbany Isaka. Tiany harovan̈a zanakanany, ke loso izy nivolan̈a taminy Abrahama, fa mila hiroasin̈y Hagara ndreky Ismaela. Tamy voanalohany, Abrahama tsy nety. Ho Jehovah taminy Abrahama: ‘Tandrin̈esa volan̈a Saraha. Ismaela hikarakaraiko. Baka aminy Isaka fo hampatanteraka raha aby nambarako anao in̈y.’