Tsarova Vadiny Lota

Lota ndreky Abrahama niaraka nipetraka ta Kanana tao. Lota asidiny Abrahama. Nahaimaro biby nitarimindro ke nanjary tsy tandry iro eky tany nipitrahandro. Ho Abrahama tamy Lota: ‘Efa tsy tandry atsika eky eto, ke atsika hisaraka. Mifidiana tany tianao imboan̈a, zay tsy handihananao handihanako.’ Abrahama tsy tia ten̈a, tsy zen̈y?

Nisy tany tsara hitany Lota. Tsy lavitry Sodoma tany io. Feno rano ndreky raha maniry tao. Tan̈y nifidiny Lota. Nindesiny nifindra tan̈y vadiny ndreky zanany.

Feno olo ratsy toetry ta Sodoma ndreky Gomora tanàna narikitry tio. Jehovah tihandravan̈a tanàna aby io. Tihan̈avotro Lota ndreky fianakavian̈anany koa Jehovah, ke izy nandefa anjely aroe hivolan̈a tamindro: ‘Mindao malaky milefa, fa Jehovah handravan̈a tanàna ty!’

Lota tsy direkty nandeha. Izy mbala varian̈a. Nantsoritindro anjely aby io tamy tan̈ana izy, vadiny, ndreky zanany viavy aroe, ke nindesindro niboaka. Iro koa fa tafiboaka, volan̈indro: ‘Milomahiza! Aza mitoditodiky afara foeky, anaro koa mitodiky hofoaty e!’

Iro koa fa navy ta Zoara. Jehovah nandatsaka motro ndreky solifara, mira mahalen̈y. Ravan̈a Sodoma ndreky Gomora. Vadiny Lota tsy nan̈araka volan̈a Jehovah ke nitodiky tafara. Nivadiky bolongantsira izy! Lota ndreky zanany tsy naty, fotony iro nan̈araka volan̈a Jehovah. Misora nalahelo mare iro mamandro tsy nitandren̈y volan̈a Jehovah! Tsara fo dikanizen̈y mitandren̈y raha volan̈iny Jehovah.