Nanan̈a Finoan̈a Ankitin̈y Abrahama

Isaka nampianariny Abrahama ho tia Jehovah, ke hatoky raha jiaby nampan̈antinainy. Isaka koa fa kadiriny 25 taon̈o, nisy raha sarotro nirahiny Jehovah hataony Abrahama. Ino eky?

Ho Zan̈ahary taminy Abrahama: ‘Indesa azafady, zanakanao araiky tokana io, ke ataova soron̈o amy bongo a Moria an̈y.’ Tsy hainy Abrahama foeky nan̈ino Jehovah nan̈iraka izy han̈ano zen̈y fa nataony fo.

Maraindrain̈y be, Abrahama ndreky Isaka, baka io panomponany aroe nandeha ta Moria. Afaka telo andra, tazan̈andro baka lavitry bongo io. Nadokony Abrahama panomponany aby io, fa izy ndreky Isaka nandeha nan̈ano soron̈o io. Isaka nampitondrasiny Abrahama hazomaty. Abrahama nitondra meso. Ho Isaka tamy papany: ‘Aia fo biby hataontsika soron̈o?’ Abrahama nivolan̈a: ‘Jehovah fo, zanako, han̈amia zen̈y.’

Iro koa fa navy tamy bongo io, iro niasa alitara. Tan̈ana ndreky vitiny Isaka baka tio nifiheziny Abrahama. Baka io izy nataony tan̈abony alitara.

Nangala meso Abrahama. Taminio, nisy anjeliny Jehovah nikaiky baka tandan̈itry: ‘Abrahama! Aza vonen̈a tsaiky io! Haiko izioty fa anao olo mino Zan̈ahary ankitin̈y, fotony anao von̈ono han̈ano soron̈o zanakanao.’ Nisy ondrikondriky narikitry tio. Nivahany malaky Isaka, ke ondrikondriky io nataony soron̈o fa tsy Isaka.

Nanomboko taminio, Jehovah nikaiky Abrahama kamaradinany. Hainao antony? Abrahama nan̈ano zay raha tiany Jehovah, ndray tsy hainy nan̈ino Jehovah nan̈iraka izy nan̈ano zen̈y.

Jehovah nimpody nivolan̈a taminy Abrahama: ‘Hitahy anao zaho, ke hataoko ho maro taranakanao.’ Hitahy olo tsara fan̈ahy jiaby Jehovah baka amy taranaka Abrahama.