Antambo Fahafolo

Mosesy nivolan̈a tamy Farao fa izy tsy ho avy aminany an̈y eky. Talohany nialany tamy Farao, izy nivolan̈a: ‘Hofoaty talan̈olony Ezipsianin̈y jiaby, sasakalin̈y an̈y, rango amy zanaka Farao firaka amy zanaka andevo.’

Nisy hanin̈y manokan̈a nirahiny Jehovah nikarakarainy Israelita aby io. Nivolan̈iny: ‘Samia mamono ondrikondriky lahy na bengy taon̈o araiky, baka io hisora an̈abony varavaran̈anaro lionany. Asalia henanizio, baka io ahana miaraka mofo tsisy levira. Misikìna, man̈anova kiraro, mivon̈osa handeha, fa alin̈y ty zaho han̈adoso anaro hiala eto.’ Misora ravoravo mare iro Israelita aby io naharen̈y zen̈y!

Koa fa sasakalin̈y, nisy anjeliny Jehovah nitety tran̈o tsiaraikiaraiky ta Ezipta. Lan̈iany tran̈o tsisy lio tan̈abony varavaran̈a, naty tsaiky talan̈olo tao. Nidinganiny anjely io lan̈iany tran̈o nisy varavaran̈a nisoran̈a lio. Ezipsianin̈y jiaby, ndray pan̈arivo ndray masikiny, naty zanaka aby. Zanakandro Israelita aby io ndraiky tsisy naty.

Naty koa zanaka Farao. Tsy din̈iny Farao eky zen̈y. Izy direkty nivolan̈a tamy Mosesy ndreky Arona: ‘Mindao. Mialà eto. Mindao manompo Zan̈aharinaro. Indesa koa bibinaro jiaby, ke mandihana!’

Fanjava bory tamy zen̈y, Israelita aby io nan̈ano diabe niala ta Ezipta tao. Iro nitambatambatra isaka fianakavian̈a ndreky foko, sady nilamin̈y. Nisy lelahy 600 000, baka io man̈angy maro ndreky tsaiky. Olo hafa maro koa nan̈araka iro. Iro mba tihanompo Jehovah koa. Tsy handevo eky Israelita!

Isaka taon̈o Israelita aby io nan̈ano hanin̈y manokan̈a karaha in̈y, baka azondro onon̈o fo fa Jehovah namonjy iro. Pasky fikahian̈a izio.