Nifanta Tamy Jehovah Jefta

Nanompo zan̈ahary hafa ndraiky Israelita aby io tafara tatỳ. Tsy nan̈ampy iro aby zan̈ahary aby nitompoendro io, koa fa niady tamindro Amonita aby io. Tan̈atiny taon̈o maro iro nijaly mare. Farany iro nivolan̈a tamy Jehovah: ‘Zahay nanota ankitin̈y. Azafady kony zahay vonjia fa mampijaly zahay fahavalonay!’ Nipotehindro Israelita aby io sampindro jiaby, ke nivavaka tamy Jehovah ndraiky iro. Nahinakinaka mare iro Jehovah.

Jefta maramila voafidy hitariky Israelita aby io hiady taminy Amonita aby io. Izy nifanta tamy Jehovah karaha ty: ‘Anao koa man̈ampy zahay ke mandresy zahay, hamiako anao zay olo miboaka voanalohany mitsena zaho baka antran̈onay.’ Nitandrin̈esany Jehovah vavaka nataony Jefta io, ke nampiany handresy Jefta.

Mba azovy eky olo voanalohany nitsena Jefta, izikoa izy fa nody? Zanany man̈angy. Izio zaraiky koa zanany aminio! Nitsinjaka tsaiky viavy io sady namely amponga. Akory eky ho Jefta? Tsaroany Jefta direkty volan̈a nataony, ke hoizy: ‘A zanako o! Namparary fonaka eky anao ty e. Zaho io efa nifanta tamy Jehovah. Ke anao tsy maintsy halefako manompo izy amy tran̈olay masin̈y a Silo an̈y.’ Zanany io nivolan̈a taminany: ‘Koa fa zen̈y volan̈a nataonao tamy Jehovah papa, zaho handeha. Fa alohany handihanako fo, zaho ndreky tsaiky man̈angy aby namako aby io hiaraka hely amy bonga an̈y fanjava aroe. Baka io zaho mandeha.’ Nanompo Jehovah tamy tran̈olay masin̈y tao fo zanaka Jefta man̈angy io firaka izy naty. Isaka taon̈o, nandeha namangy izy tan̈y kamaradiny aby io.