Jonatana Tsy Navozovozo Sady Tsy Nivadiky

Jonatana io talan̈olony Panjaka Saoly. Maramila izy sady tsy navozovozo. Davida nivolan̈a fa Jonatana io mandeha malaky mandilatra voromahery, matanjaka mandilatra lion. Tandraraiky, Jonatana nahatazan̈a maramila filistiny 20 tan̈abony bongo. Ho izy taminolo pitondra raha findesiny miady: ‘Iro koa mikaiky atsika, hitafihintsika iro. Zen̈y ahaizan̈a fa han̈ampy atsika Jehovah.’ Filistiny aby io nandronton̈o: ‘Avia hiady aminay!’ Iro roe lahy nanonga tamy bongo io, ke resindro iro Filistiny aby io.

Jonatana tokony panjaka handimby Saoly, fotony izy talan̈olo. Efa hainy Jonatana fa Davida nifidiny Jehovah ho panjakany Israely, fa izy tsy be fô Davida foeky. Nanjary kamarady mare iro, ke nifanta fa hifan̈ampy fo. Davida namiany Jonatana lamba, sabatra, lafilesidaoro, ndreky sentiry.

Davida koa fa nilefa Saoly in̈y, nandeha taminany tan̈y Jonatana. Hoizy: ‘Mahireza! Aza mavozo! Anao efa nifidiny Jehovah ho panjaka. Na babako mahay raha zen̈y.’ Asa mba tianao hanan̈a naman̈a tsara karaha Jonatana?

Matetiky Jonatana nirisiky niaro Davida. Hainy Jonatana fa Saoly tihamono Davida. Hoizy tamy papany: ‘Diso anao koa mamono Davida. Izy tsisy raha ratsy nataony!’ Neloko mare tamy Jonatana Saoly. Taon̈o vitsivitsy tafara, naty taminy ady Saoly ndreky Jonatana.

Jonatana koa fa naty, Davida nitady Mefiboseta zanaka Jonatana. Ho Davida taminany: ‘Babanao tsy nan̈ary zaho, ke anao tsy hariako firaka anao maty. Alaiko hipetraka amy lapanaka an̈y anao, hihina amy latabatranaka.’ Davida tsy nan̈adin̈a Jonatana foeky.