Jehovah Nankahery Elia

Ren̈iny Jezebela fa naty aby paminan̈iny Bala jiaby. Neloko mare izy, ke nan̈iraka olo nivolan̈a taminy Elia: ‘Tsy maintsy hofoaty karaha iro in̈y koa anao amaray.’ Elia navozo mare, ke izy nilefa tamy tany paiky tan̈y. Izy nivavaka: ‘Jehovah, efa tsy din̈iko eky ty, ke sitrany zaho maty e.’ Kajo mare Elia ke izy tafandry tambany vodikakazo.

Nisy anjely namoha Elia. Tsara fan̈ahy taminany anjely io, hoizy: ‘Mifohaza, baka io mihìnana.’ Nahita mofo boribory tan̈abony vato may Elia, baka io rano tan̈aty sajoa. Nihina izy, baka tio nimpody nandry ndraiky. Namoha izy ndraiky anjely io, baka io nivolan̈a: ‘Mihìnana fa anao mbala handeha lavitry.’ Nihina ndraiky Elia. Nandeha 40 andra ndreky 40 alin̈y izy baka tio, firaka tamy Bongo Horeba. Niditry tan̈aty lavabato araiky izy nandry. Ho Jehovah taminany: ‘Elia, ino raha ataonao atỳ?’ Ho Elia: ‘Nivadiky taminao Israelita, nirobatiny alitaranao, baka io nivoneny paminan̈inao. Zaho koa mbala tihivonendro.’

Ho Jehovah taminany: ‘Mitsangàna an̈abony bongo iô.’ Nisy tsiko maresaka, baka io horohorontany ndreky motro. Nisy feo moramora ren̈iny Elia. Nirakofany tamy lambanany soranany, baka io izy nitsangana tambelan̈a lavabato io. Jehovah nan̈ontany izy nan̈ino izy nilefa. Ho Elia: ‘Zaho fo mbala manompo anao.’ Jehovah ndraiky nivolan̈a: ‘Tsy anao zaraiky fo, fa mbala misy Israelita 7 000 manompo zaho. Mindao fidia hatao paminan̈y hisolo anao Elisa.’ Elia direkty nandeha nan̈ano zen̈y. Lera Jehovah man̈iraka anao, mino ma anao fa han̈ampy anao izy? Matokisa fa han̈ampy anao izy. Atsika hizaha raha nandalo tan̈atiny haintany io.