Nisazin̈y Panjakavavy Ratsy Fan̈ahy

Nisy lelahy araiky, Nabota an̈arany, nanan̈a taniny rezain, ta Jezirela tao. Tazan̈a baka amy lafenaitarany tran̈ony Panjaka Ahaba raha io, ke tiany vangain̈a. Nabota tsy nan̈eky hivarotro raha io taminany, fotony Lalàn̈any Jehovah tsy nan̈omba olo hivarotro lova. Neloko mare Ahaba, ke izy tsy nety niboaka tamy tran̈o fandriany tao, sady tsy nety nihina.

Jezebela vadiny Ahaba nivolan̈a: ‘Anao kony panjakany Israely e! Mety halainao aby kila raha tianao alain̈a. Ataoko raha hazahoanao izio.’ Nandefa taratasy taminy antipan̈ahy tamy tanàna tao Jezebela, nan̈iraka iro hivolan̈a fa Nabota zen̈y nan̈asaha Zan̈ahary ke tokony hitoran̈a vato, firaka izy maty. Iro antipan̈ahy aby io nan̈araka volan̈a Jezebela io. Jezebela amy zay nivolan̈a taminy Ahaba: ‘Nabota zen̈y efa maty, ke aleva ninao taniny rezain io.’

Efa maro olo tia Jehovah nivoneny Jezebela, fa tsy Nabota zaraiky fo. Nanompo sampy koa Jezebela, baka io nan̈ano raha ratsy maro. Hitany Jehovah aby raha ratsy nataony io. Hataony Jehovah karakory eky izy?

Koa fa naty Ahaba, Jorama zanany loso panjaka. Jehovah nan̈iraka lelahy araiky, Jeho an̈arany, han̈asazy Jezebela ndreky ry havany.

Nitenginy kalesinany Jeho nandeha ta Jezirela, tamy Jezebela tan̈y. Nitenginy kalesy koa Jorama nitsena Jeho. Ho Jorama: ‘Kamaradinaka ma anao?’ Jeho nivolan̈a: ‘Atsika tsy kamarady foeky, izikoa Jezebela mamanao mbala man̈ano raha ratsy karaha io fo.’ Naviliny Jorama kalesinany, izy nilefa. Nitifiriny Jeho tamy lafilesidaoronany izy, ke naty.

Jeho baka tio nandeha tamy Jezebela tan̈y. Koa fa hainy Jezebela fa ho avy Jeho, nan̈ano makiazy izy. Namboariny fan̈evanany, baka io izy niambin̈y tamy lafenaitara tran̈onany tan̈abo etazy. Jeho koa fa navy, Jezebela nan̈asiaka izy. Ho Jeho tamy piasa nitsangana narikitry Jezebela: “Alatsaha an̈y izy.” Nalatsakandro tamy tany baka tamy lafenaitara izy, ke naty.

Nivoneny Jeho koa zanaka Ahaba 70 lahy, baka io nadosony fivavahan̈a jiaby tamy Bala. Hitany Jehovah raha ratsy jiaby ataonolo. Koa fa fotoan̈a hitany mety, saziny zay olo man̈ano raha ratsy.