Niaro Hezekia Anjeliny Jehovah

Resiny Asyrianin̈y aby io fanjakan̈any foko folony Israely. Tihalainy Sankeriba panjakany Asyria koa fanjakan̈any foko aroe ta Joda tao. Resiny aby tanànany Joda jiaby, fa Jerosalema ten̈a tiany ho azo. Raha tsy hainy fo Jehovah niaro Jerosalema.

Hezekia panjakany Joda tamy zen̈y. Namiany vola maro Sankeriba baka tsy hanafiky Jerosalema. Nalainy Sankeriba vola aby io, fa mbala nalefany nanafiky Jerosalema fo maramilanany. Navozo mare olo tao fotony nahainan̈aton̈o Asyrianin̈y aby io. Hezekia nivolan̈a: ‘Aza mavozo fa atsika hataony Jehovah matanjaka mandilatra Asyrianin̈y aby io.’

Sankeriba nan̈iraka Rabsake han̈ambanimbany olo ta Jerosalema tao. Namango izy nandronton̈o baka tambelan̈a tanàna: ‘Anaro aza man̈eky hifitahiny Hezekia fa Jehovah zen̈y tsy mahavita man̈ampy anaro. Iô tsisy Zan̈ahary mahavita miaro anaro tsy ho resinay zen̈y!’

Hezekia nan̈ontany Jehovah ino raha tokony hataony. Jehovah nivolan̈a: ‘Aza mavozo volan̈a Rabsake, fa tsy ho resiny Sankeriba zen̈y Jerosalema.’ Sankeriba baka tio nandefa taratasy taminy Hezekia. Volan̈iny tao: ‘Tsy sitrany anao man̈eky resy? Jehovah zen̈y tsy hamonjy anao!’ Hezekia nivavaka: ‘Mba vonjia zahay Jehovah, baka ho hainolo jiaby fa anao zaraiky fo ten̈a Zan̈ahary.’ Ho Jehovah taminany: ‘Panjakany Asyria zen̈y tsy ho tafiditry a Jerosalema ao, fa zaho hiaro tanàna io.’

Natoky mare Sankeriba fa ho azony amy zay Jerosalema. Kanefa, alin̈izio Jehovah nandefa anjely araiky namono maramila asyrianin̈y 185 000 tamy tany nitobiandro maramila aby io! Tsisy maramila matanjaka eky Panjaka Sankeriba. Ke nody foeky izy fotony resy. Ten̈a niaro Hezekia ndreky tanànany Jerosalema marin̈y Jehovah. Izikoa anao ta Jerosalema, natoky Jehovah koa ma anao?