Josia Tia Lalàn̈any Zan̈ahary

Nanjary panjakany Joda Josia taminizy valo taon̈o. Nisoma aody olo tamy zen̈y, sady nanompo sampy. Josia koa fa 16 taon̈o, tiany ho hay karakory fomba tokony hivavahan̈a amy Jehovah. Niravan̈iny sampy ndreky alitara jiaby ta Joda tao, taminizy 20 taon̈o. Taminizy 26 taon̈o, nirahiny namboarin̈y raha robaka jiaby tamy tempoliny Jehovah.

Hitany Hilkia pisoron̈obe tamy tempoly tao horonamboky misy Lalàn̈any Jehovah. Mety horonamboky nisoratiny Mosesy izio. Nindesiny Safana sekreterany panjaka tamy Josia tan̈y horonamboky io, baka io nivakiny mare taminany. Nanjary hainy Panjaka Josia fa efa ela mare vahoaka aby io tsy nan̈araka volan̈a Jehovah. Hoizy taminy Hilkia: ‘Jehovah zioty meloko mare amintsika, ke mindao an̈ontania izy ino raha tokony hataontsika.’ Jehovah nan̈iraka Holda paminan̈ivavy nivolan̈a: ‘Hisaziko vahoaka a Joda ao, fotony iro tsy nijery zaho. Tsy ataoko aminandrany Josia fo izio, fotony izy manetry ten̈a.’

Josia koa fa naharen̈y zen̈y, izy nandeha tamy tempoly tan̈y, baka io olo jiaby koa nirahiny nivory tan̈y. Nivakiny mare tamy vahoaka Lalàn̈any Jehovah. Josia ndreky vahoaka aby io nifanta fa han̈araka volan̈a Jehovah amy fondro jiaby.

Efa ela mare tsy nankalaza Pasky olo ta Joda taminio. Nivakiny Josia tamy Lalàn̈a tao, fa isaka taon̈o iro tokony hankalaza fetiny Pasky. Hoizy tamy vahoaka: ‘Alo atsika hankalaza Pasky niny Jehovah.’ Josia amy zay nan̈amia biby maro hatao soron̈o, baka io nasiany pihira tamy tempoly tao. Vahoaka amy zay nan̈ano fetiny Pasky, baka io Fetiny Mofo Tsisy Levira, tan̈atiny fito andra. Rango nifatesany Samoela, mbala tsiary nisy Pasky nira zen̈y. Ten̈a tia Lalàn̈any Jehovah ankitin̈y Josia! Anao ma mba tia mianatra raha momba Jehovah?