Jesosy Nan̈amia Hanin̈y Olo Andrivony

Taon̈o 32 tamy zen̈y, sady efa marikitry ho avy Pasky. Iro apostoly aby io kajo navy nitory baka lavitry. Nirahiny Jesosy nandeha sambo niaraka taminany nandeha ta Betsaida iro, hangala kajo hely. Sambo io koa fa ho tody, hitany Jesosy fa efa nisy olo maro niambin̈y iro. Jesosy mba tihangala kajo hely niaraka tamy pianatranany, fa mbala niraisiny tsarabe iro olo aby io. Nitahany olo narary, baka io iro nampianariny momba Fanjakan̈any Zan̈ahary, firaka andra hariva. Andra koa fa tsofotro, apostoly aby io nivolan̈a taminany: ‘Mosary mare kony olo aby io e, ke iraha mody iro mizaha hanin̈y.’

Jesosy nivolan̈a: ‘Aza irahin̈y mody iro, fa ameza hanin̈y.’ Apostoly aby io nan̈ontany: ‘Zahay ma handeha hivanga hanin̈y hoanindro?’ Ho Filipo, araiky tamindro apostoly aby io: ‘Sady atsika ndray nisy vola, iô tsisy mofo mahavoky olo marobe io.’

Ho Jesosy: ‘Ino fo raha mety hoanin̈y aminaro?’ Andrea nivolan̈a: ‘Mofo dimy ndreky laoko madiniky aroe, fa zen̈y tsy mahampy.’ Ho Jesosy: ‘Indesa atỳ zen̈y!’ Nirahiny nipetraka nitsitokotoko tamy bozaka olo aby io, nisy 50 isany, nisy 100. Nalainy Jesosy amy zay mofo ndreky laoko aby io, ke nisan̈andra lan̈itry izy nivavaka. Natondrony taminy apostoly aby io hanin̈y in̈y, baka io nirasaindro tamy lelahy 5 000 ndreky man̈angy, baka io tsaiky. Nihina iro, firaka iro jiaby voky. Navorindro apostoly aby io lambiny hanin̈y io baka tio, ke nahafeno tanty 12! Fahagagan̈a ankitin̈y izio, tsy zen̈y?

Lany fan̈ahy olo, ke tiandro hatao panjaka Jesosy. Hainy Jesosy fa mbala tsy tamy zen̈y fotoan̈a tiany Jehovah han̈anovan̈a izy panjaka. Nirahiny nandeha vahoaka aby io, fa iro apostoly aby io ndraiky nirahiny nandeha tandaforeny Ranomasin̈y Galilia. Nandeha sambo iro, fa Jesosy ndraiky nandeha tamy bongo tan̈y. Hainao antony? Tihivavaka tamy Babany izy. Ndray maro raha nataony Jesosy, izy nanokan̈a fotoan̈a hivavahan̈a fo.