Nahaimaro Olo Nanjary Kristianin̈y

Nitory tamy tany jiaby iro apostoly aby io, fotony zen̈y raha nan̈irahany Jesosy iro. Tamy taon̈o 47, iro rahalahy ta Antiokia tan̈y nifidy Paoly ndreky Baranabasy nandeha nitory tamy tany maro. Nazoto mare iro nandeha nitety tanàna jiaby ta Azia Minora tan̈y, karaha ataony Derbe, Lystra ndreky Ikonioma.

Paoly ndreky Barnabasy nitory taminolo jiaby, na olo pan̈arivo, na olo masikiny, na tanora, na matoe. Maro olo nan̈eky ny marin̈y momba Kristy. Iro fo koa fa nitory tamy Sergio Paolo, governerany Sypra, nisy lelahy pan̈ano aody zay tao nisakana iro. Ho Paoly taminany: ‘Hisaziny Jehovah anao.’ Tio fo lelahy io nivadiky gila. Governera in̈y koa fa nahita zen̈y, izy nanjary Kristianin̈y.

Paoly ndreky Barnabasy nitory tamy zay tany nahitandro olo. Iro nitory tantran̈onolo, ta bazary, tamy lalan̈a ndreky tamy synagoga. Nisy lelahy nalemy zay ta Lystra nitahandro, ke nahavita nandeha. Iro olo aby io koa fa nahita izin̈y, iro nivolan̈a fa Paoly ndreky Barnabasy io Zan̈ahary, ke nitadiavindro ivavahan̈a, fa Paoly ndreky Barnabasy fo tsy nan̈eky. Ho iro: ‘Zahay olo mira anaro fo. Zan̈ahary zaraiky fo ivavaha!’ Nisy Jiosy sasany nitaon̈o olo aby io hanohitry Paoly. Nantsoritindro nandeha tambelan̈a tanàna tan̈y izy, nitorahandro vato. Lera izy fa sambarandro naty vo nambelandro. Paoly tsy naty! Navy amy zay iro Kristianin̈y aby io nangala Paoly, ke nindesindro niditry tantanàna izy. Tafaranizin̈y Paoly nimpody ta Antiokia.

Tamy taon̈o 49 dia faharoe nataony Paoly. Izy koa fa baka ta Azia Minora, izy nitory vaovao tsara ta Eropa. Izy nandeha ta Atena, Efesosy, Filipy, Tesalonika ndreky tantany hafa koa. Tamy dianany io, nan̈araka izy ry Silasy, Lioka ndreky Timoty. Niaraka niasa iro nampisy fiangonan̈a kristianin̈y tan̈y ndreky nampianatra iro rahalahy aby tan̈y. Taon̈o araiky sy tapany Paoly nidoko ta Korinto, ke nankahery iro rahalahy tan̈y. Izy nitory, nampianatra, ndreky nanoratra taratasy nandeha tamy fiangonan̈a maro. Nanjaitry tran̈olay asanany tan̈y. Koa fa elaela, izy nimpody ta Antiokia ndraiky koa.

Tamy taon̈o 52 dia fahatelo nataony Paoly. Baka ta Azia Minora izy, nan̈avaratra nandeha ta Filipy, baka io nijotso firaka izy navy ta Korinto. Nahadin̈y taon̈o maro Paoly ta Efesosy nampianatra, nitaha olo ndreky nikarakara fiangonan̈a. Izy koa nan̈ano kabaro baka tamy Soratra Masin̈y taminolo jiaby, tamy tran̈o maventy tamy lekoly, ke maro tamindro nitandren̈y izy nanjary Kristianin̈y. Paoly koa fa nahavita nitory vaovao tsara tamy tany maro, izy nandeha ta Jerosalema.