Taratasy Baka amy Filankevipitantan̈ana

Anaro Piaramanompo Tianay,

Nohony atsika pivavaka amy Jehovah tiantsika Volan̈anany, na Baiboly io. Atsika matoky mare fa marin̈y ankitin̈y tantara jiaby ao, baka io mety arehan̈a taridalan̈a amianizio. Hita amy Baiboly koa fa ten̈a tia atsika Jehovah. (Salamo 119:105; Lioka 1:3; 1 Jaona 4:19) Ten̈a tianay han̈ampy olo hahay ny marin̈y amy Volan̈a Zan̈ahary ao, ke zen̈y nahavy zahay nan̈aboaka boky ty: Alo Atsika Hianatra Tantara amy Baiboly. Alo baka hizavantsika hely raha ho hita ato!

Natao niny tsaiky boky ty. Kanefa, mety han̈ampian̈a olobe koa izy ty, izikoa izy tihahay tantatra maro amy Baiboly. Volan̈a Zan̈ahary natao ninolo jiaby. Dikanizen̈y, hahatsara atsika sady han̈ampy atsika ho sambatra fianaran̈a izy ty.

Baka amy Baiboly tantara an̈aty ato, baka io koran̈iny ato fomba namoron̈ana olombelon̈o ndreky raha nandalo rango tamy zen̈y. Natao tsotra ndreky mora azo tantara aby ato, baka io natao milahatra arakaraka fotoan̈a niboahany, eraka ny mety natao.

Tsy koran̈a momba tantara amy Baiboly fo raha ho hita amy boky ty. Misy sary ndreky tantara koa ato han̈ampy atsika hangala onon̈o tsarabe raha nisy tamy zen̈y ndreky hahatsapa fihetsehamponolo voakoran̈a ato.

Hitantsika amy boky ty fa raha ten̈a nisy ankitin̈y olo aby koran̈iny Baiboly io. Tao ny nan̈araka volan̈a Jehovah, fa nisy koa ny tsy nan̈araka volan̈anany. Mandrisiky atsika hangala fianaran̈a baka aminolo aby io boky ty. (Romanina 15:4; 1 Korintianina 10:6) Misy fizaran̈a 14 izy ty, baka io fintin̈iny amy voanalohany fizaran̈a tsiaraikiaraiky, fianaran̈a ndreky raha mila alen̈a onon̈o.

Izikoa anao mananjanaka, anao mety mamaky fianaran̈a araiky aminizy ty amy zanakanao, miaraka mandiniky sary, baka io anaro mety mamaky andininy amy Baiboly misy tantara io. Ampia zanakanao hahita ino ifandraisany tantara amy Baiboly io ndreky fianaran̈a amy boky ty. Karaha zen̈y koa mety hatao izikoa fa man̈ampy olobe tihahay tsarabe raha koran̈iny Baiboly.

Zahay matoky fa han̈ampy olo tsopo marobe boky ty, na tsaiky izy na olobe, han̈araka raha ianarany baka amy Volan̈a Zan̈ahary. Zen̈y hahavy iro ho tia Jehovah ndreky hivavaka aminany, baka io hanjary ho an̈isany fianakavian̈anany.