FIANARAN̈A 14

Ankamafisa Hevitry Maventy

Hebreo 8:1

RAHA MILA ATAO: Ampia olo haharaka kabaronao. Ataova mazava ino hifandraisany hevitry maventy tsiaraikiraiky, amy tanjon̈onao ndreky fotokevitry.

Manàn̈a tanjon̈o. Diniha, ino tanjon̈o amy kabaronao io. Fan̈azavan̈a raha sa fandresen̈a lahatra sa, handrisiky olo han̈ano raha. Ataova hita tsarabe tanjon̈onao io isaka anao mikoran̈a hevitry maventy.

Iritrireta ty: ‘Ino raha mety han̈itikitiky sain̈inolo amy fotokevitry ty? Ino aby raha mety han̈ontaniany momba izio? Ino koa raha mety tsy hikeny?’ Alahara mifan̈araka amy zen̈y amy zay hevitry hikoran̈inao, ke ho arany tsarabe ndreky ho azony, baka io handresy lahatra izy.
Ankamafisa fotokevitry koa fa man̈ano kabaronao io. Ampodiana matetiky volan̈a hitanao fa mila aboaka tsarabe amy fotokevitry io, na mampiasà volan̈a mitovy hevitry aminany.
Ataova mazava ndreky tsy be loatra hevitry maventy. Hevitry maventy mifandray amy fotokevitrinao fo fidiana, ndreky lan̈iany vitanao an̈atiny fotoan̈a namian̈a. Asia erany isany baka ho voazava tsarabe. Mijanona hely isaka anao hifindra aminy hafa. Ataova hita fa mifampitohy amy hevitry maventy man̈araka izio.

Vo manomboko kabaronao io, efa mety koran̈inao hevitry maventy tsiaraikiaraiky baka olo haharaka tsarabe fan̈azavan̈anao. Na koa mety volan̈inao ndraiky iro io amy farany, baka ho azondro onon̈o.