LESON 28

Ankasitraha Raha Nataony Jehovah Ndreky Jesosy Taminao

Atao Mira Sary

Karakory haravoan̈anao izikoa misy kamaradinao man̈amia anao kadô tsara? Misora ravoravo mare anao, avio ataonao hainy fa ten̈a tianao kadô namiany io. Jehovah ndreky Jesosy koa nan̈amia atsika kadô farany tsara. Ino ma raha zen̈y, baka io akory han̈aboahantsika fa atsika ten̈a mankasitraka kadô io?

1. Akory han̈aboahantsika fa atsika mankasitraka raha nataony Jehovah ndreky Jesosy tamintsika?

Baiboly mampan̈anten̈a fa “lan̈iany olo man̈aboaka fa mino izy [Jesosy]” hahazo fiain̈ana tsisy farany. (Jaona 3:16) Ino ma dikany man̈aboaka finoan̈a zen̈y? Tsy vitany mivolan̈a mino Jesosy fo fa, mila aboaka amy safidy ndreky raha ataontsika koa fa atsika mino Jesosy. (Jakoba 2:17) Hahaifatatra fihavan̈antsika amy Jesosy ndreky Jehovah, izikoa aboakantsika amy raha volan̈intsika ndreky amy raha ataontsika finoan̈antsika.—Vakia Jaona 14:21.

2. Ino fotoan̈a manokan̈a mila tsarovantsika han̈aboahan̈a fa atsika mankasitraka raha nataony Jehovah ndreky Jesosy?

Taminy alin̈y talohany nifatesany, Jesosy nan̈ambara pianatranany fomba hafa han̈aboahan̈a fankasitrahan̈a soron̈o hataony. Izy nan̈ano fankalazan̈a manokan̈a niaraka tamindro. “Sakafo Harivany Tompo” na Fahatsiarovan̈a nifatesany Kristy ivolan̈ana izio. (1 Korintianina 11:20) Tsy iro apostolinany aby io fo nirahiny hahatsiaro nifatesany io fa Kristianin̈y jiaby koa. Ho izy: “Ataova fo ty hahatsiarovanaro zaho.” (Lioka 22:19) Anao koa man̈aton̈o Fahatsiarovan̈a, zen̈y an̈aboahanao fa anao mankasitraka fitiavan̈a maventy naboakany Jehovah ndreky Jesosy tamintsika.

ALEVA ONON̈O

Diniha koa fomba hafa han̈aboahanao fa anao mankasitraka fitiavan̈a maventy naboakany Jehovah ndreky Jesosy. Zahava nan̈ino ma ten̈a raha maventy Fahatsiarovan̈a nifatesany Jesosy io.

3. Akory an̈aboahantsika fa atsika mankasitraka soron̈o nataony Jesosy?

Ohatra izioty anao dobo an̈aty rano, ke misy olo araiky nan̈avotro anao. Ho adin̈anao karaha io fo izy? Sa haboakanao izy fa anao mankasitraka izy mare?

Afaka hahazo fiain̈ana tsisy farany atsika fotony Jehovah tsara fan̈ahy amintsika. Vakia 1 Jaona 4:8-10, avio iaraha dinihin̈y fan̈ontanian̈a aby ty:

Nan̈ino ma ten̈a fan̈amezan̈a miavaka soron̈o nataony Jesosy io?
Ino raha tsapanao baka tamy raha nataony Jehovah ndreky Jesosy taminao?

Akory mety han̈aboahantsika amy Jehovah ndreky Jesosy fa atsika mankasitraka raha nataondro tamintsika? Vakia 2 Korintianina 5:15 ndreky 1 Jaona 4:11; 5:3. Isaka baka mamaky andininy, iaraha dinihin̈y fan̈ontanian̈a ty:

Izikoa andininy io zahan̈a, akory mety han̈aboahantsika fankasitrahantsika soron̈o nataony Jesosy?

4. Aleva tahaka Jesosy

Mankasitraka soron̈o nataony Jesosy koa atsika izikoa mangala tahaka izy. Vakia 1 Petera 2:21, avio iaraha dinihin̈y fan̈ontanian̈a ty:

Akory aby fomba mety han̈arahanao marikitry diany Jesosy?

Jesosy mamaky horon̈ana misy Volan̈a Zan̈ahary. — Jesosy tia Volan̈a Zan̈ahary, nitory vaovao tsara, avio nan̈ampy olo

Jesosy mikoran̈a amy man̈angy samaritanin̈y amy vôvo. — Jesosy tia Volan̈a Zan̈ahary, nitory vaovao tsara, avio nan̈ampy olo

5. Man̈aton̈a Fahatsiarovan̈a nifatesany Kristy

Koa tianao ho hay akory nan̈anovan̈a fankalazan̈a Sakafo Harivany Tompo voanalohany, vakia Lioka 22:14, 19, 20. Avio iaraha dinihin̈y fan̈ontanian̈a aby ty:

Akory nan̈anovan̈a Sakafo Harivany Tompo?
Man̈ambara ino mofo ndreky divain io?—Zahava andininy 19 ndreky 20.

Tiany Jesosy hankalazainy pianatranany indraiky isaka taon̈o Sakafo Harivany Tompo io, fananjo amy ladaty nifatesany. Karaha zen̈y ataony Vavolombelon̈o Jehovah izioty. Iro mivory indraiky isaka taon̈o mahatsiaro nifatesany Kristy. Mifan̈araka amy raha nirahiny Jesosy in̈y fo an̈anovandro izio. Izikoa tianao hahay raha momba fivorian̈a maventy io, alifasa VIDEO io. Avio iaraha dinihin̈y fan̈ontanian̈a ambany io.

VIDEO: Tsarova Nifatesany Jesosy (1:41)

Sary amy video ‘Tsarova Nifatesany Jesosy.’ Vavolombelon̈o Jehovah man̈ano Sakafo Harivany Tompo.

Ino ma raha atao amy Fahatsiarovan̈a io?

Kapila misy mofo tsisy levira ndreky vera misy divain.

Mofo io man̈ambara vatan̈any Jesosy lavorary nataony soron̈o nintsika. Divain io ndraiky man̈ambara lionany

Divainy Fahatsiarovan̈a atao pasipasy lera Sakafo Harivany Tompo.

MISY OLO MIVOLAN̈A: “Anao koa fa mino Jesosy, anao fa voavonjy edy.”

Akory hampiasanao Jaona 3:16 ndreky Jakoba 2:17 han̈azavan̈a aminolo io ino koa raha hafa tokony hataony?

INO RAHA NIANARANAO TATO?

Mankasitraka raha nataony Jesosy tamintsika atsika izikoa man̈aboaka fa mino izy ndreky man̈aton̈o Fahatsiarovan̈a nifatesany.

Fan̈ontanian̈a Fameren̈ana

Karakory ma man̈aboaka finoan̈a Jesosy zen̈y?
Akory han̈aboahanao fa anao mankasitraka raha nataony Jehovah ndreky Jesosy taminao?
Nan̈ino ma anao mila man̈aton̈o Fahatsiarovan̈a nifatesany Jesosy?

Daty nivitany leson ty:

Ataova Ty

Man̈aton̈a Fahatsiarovan̈a nifatesany Kristy. An̈ontania olo mampianatra Baiboly anao ombian̈a izio, avio sorata amy raha mora ahatsiarovanao izy ladaty ambarany anao.

Raha hafa:

Tanjon̈onao hafa koa

ZAHAVA

Mandrisiky atsika han̈ino nifatesany Kristy in̈y?

Nampiasainy Han̈amezan̈a Voninahitry Jehovah Vatan̈anany (9:28)

Diniha raha momba finoan̈a io avio akory han̈aboahantsika fa atsika manan̈a finoan̈a.

“Aboaha fa Anao Mino Fampan̈antinan̈any Jehovah” (Tilikambo Fiambesan̈a Oktobra 2016)

Zahava amy tantarany man̈angy araiky ty fa nankatsara fiain̈ananany fahaizany soron̈o nataony Jesosy in̈y. Titranany io “Sambatra Zaho Fotony Tsy Mahatsiaro Tsisy Dikany Eky.”

“Man̈ova Olo Baiboly” (Tilikambo Fiambesan̈a 1 Aoty 2011)

Diniha nan̈ino vitsy fo olo mihina mofo ndreky migiaka divain amy Fahatsiarovan̈a.

“Nan̈ino ma Fankalazan̈a Sakafo Harivany Tompo Ataony Vavolombelon̈o Jehovah Tsy Mitovy Niny Fivavahan̈a Hafa?” (Lahatsoratra aminy Internet)