LESON 30
Mbala ho Velon̈o Ndraiky iro Havanao Tsy Foenao In̈y!
Malahelo mare atsika koa fa misy havantsika maty. Zen̈y mahavy Baiboly mivolan̈a fa fahafatesan̈a io fahavalo. (1 Korintianina 15:26) Efa nianaranao tamy Leson 27 fa Jehovah handresy fahavalo io. Ke karakory fo iro olo aby efa naty in̈y? Ho hitanao amy leson ty fa misy fampan̈antinan̈a tsara baka amy Jehovah nindro in̈y. Jehovah hamelon̈o olo antapitrisany, ke iro hankafy fiain̈ana tsisy farany! Ten̈a ho hisy ankitin̈y ma raha zen̈y? Iro io ma hivilomin̈y handeha andan̈itry an̈y sa ambony tany eto fo?
1. Tiany Jehovah hatao karakory iro havantsika aby efa naty in̈y?
Jehovah mbala hamelon̈o havantsika naty aby in̈y. Joba lelahy tsy nivadiky natoky tsarabe fa Zan̈ahary tsy han̈adin̈a izy foeky, izikoa izy maty. Ho izy tamy Zan̈ahary: “Anao hikaiky, zaho hanoin̈y [baka ampasan̈a ao].”—Vakia Joba 14:13-15.
2. Akory hahaizantsika fa mbala hivilomin̈y ankitin̈y olo maty?
Tamy Jesosy tambony tany teto, Zan̈ahary nan̈amia izy angovo hahavitany mamelon̈o olo maty. Jesosy namelon̈o tsaiky man̈angy hely 12 taon̈o. Izy koa namelon̈o tsaiky lelahy zanakany man̈angy maty vady. (Marka 5:41, 42; Lioka 7:12-15) Tafaranizen̈y koa, naty Lazarosy kamaradiny Jesosy. Natsangany Jesosy izy, nata efa efatra andra nandivenan̈a izy. Jesosy koa fa baka nivavaka tamy Jehovah, izy nandronton̈o mare karaha ty tamy fasan̈anany tio: “Lazarosy, miboaha!” Ke ‘niboaka lelahy efa naty in̈y.’ Velon̈o izy! (Jaona 11:43, 44) Mba iritrireta hely baka haravoan̈any havany Lazarosy ndreky iry kamaradiny!
3. Ino fan̈antinan̈antsika momba iro havantsika naty aby in̈y?
Baiboly mampan̈anten̈a: “Olo marin̈y ndreky tsy marin̈y samby mbala hivilomin̈y.” (Asan’ny Apostoly 24:15) Olo jiaby nivilominy Jesosy taloha tan̈y in̈y tsy loso tandan̈itry tan̈y. (Jaona 3:13) Haravoan̈a tsisy ambaka izy nindro, iro koa fa nivilomin̈y tambony tany teto. Mira zen̈y koa hataony Jesosy tsy ho ela. Izy hamelon̈o olo antapitrisany hankafy fiain̈ana tsisy farany amy paradisa ambony tany eto. Hivilomin̈y ho Jesosy lan̈iany olo amy fahatsiarovany Zan̈ahary, firaka olo efa tsy tsaroanolo.—Jaona 5:28, 29.
ALEVA ONON̈O
Zahava amy Baiboly nan̈ino atsika matoky fa Jesosy manan̈a angovo hamiloman̈a olo maty avio ten̈a han̈ano zen̈y ankitin̈y izy. Diniha koa nan̈ino familoman̈a olo maty io hankahery anao ndreky han̈amia fan̈antinan̈a anao.
4. Naboakany Jesosy fa vitany mamelon̈o olo maty
Zahava akory nataony Jesosy tamy Lazarosy kamaradinany in̈y. Vakia Jaona 11:14, 38-44, avio iaraha dinihin̈y fan̈ontanian̈a aby ty:
Ino ahaizantsika fa Lazarosy in̈y naty ankitin̈y?—Zahava andininy 39.
Araka hevitrinao, izikoa Lazarosy in̈y loso tandan̈itry tan̈y, Jesosy ma namelon̈o izy tambony tany teto?
5. Maro olo hivilomin̈y!
Vakia Salamo 37:29, baka io iaraha dinihin̈y fan̈ontanian̈a ty:
Hipetraka aia ma olo antapitrisany hivilomin̈y io?
Maro koa olo tsy manompo Jehovah hivilominy Jesosy. Vakia Asan’ny Apostoly 24:15, avio iaraha dinihin̈y fan̈ontanian̈a ty:
Azovy tianao ho hita lera avy familoman̈a olo maty?
Iritrireta hely ty: Tsy sarotro amy Jesosy mamelon̈o olo maty, mira babany tsaiky mamoha zanany mandry in̈y
6. Familoman̈a olo maty io mankahery ndreky mampisy fan̈antinan̈a
Tantarany Baiboly momba namiloman̈a tsaiky man̈angy zanaka Jairo in̈y ten̈a mankahery ndreky man̈amia korazy olo maro naty havan̈a. Vakia tantara ten̈a nisy io amy Lioka 8:40-42, 49-56.
Talohany Jesosy namelon̈o tsaiky man̈angy zanaka Jairo in̈y, ho Jesosy tamy babany tsaiky io: “Anao aza mavozo, minoa fo.” (Zahava andininy 50.) Nan̈ino fan̈antinan̈a familoman̈a olo maty io han̈ampy anao...
lera misy havanao maty?
lera anao tojy raha mety hahafaty?
Alifasa VIDEO io, avio iaraha dinihin̈y fan̈ontanian̈a ambany io.
Nan̈ino fan̈antinan̈a familoman̈a olo maty ten̈a nankahery ndreky nan̈amia korazy raimandreniny Phelicity?
MISY OLO MIVOLAN̈A: “Raha mba ho hisy edy familoman̈a olo maty zen̈y va?”
Akory hevitrinao?
Ino andininy mety hampiasainao han̈aporofoanao fa ten̈a ho hisy marin̈y familoman̈a olo maty?
INO RAHA NIANARANAO TATO?
Baiboly mampan̈anten̈a fa hivilomin̈y olo antapitrisany naty aby in̈y. Tiany Jehovah ho velon̈o iro, ke namiany angovo Jesosy hamelon̈o iro.
Fan̈ontanian̈a Fameren̈ana
Akory fihetsehampony Jehovah ndreky Jesosy momba familoman̈a olo maty?
Hipetraka aia ma olo antapitrisany hivilomin̈y io, andan̈itry an̈y sa ambony tany eto? Nan̈ino anao mivolan̈a zen̈y?
Ino mahavy anao resy lahatra fa mbala hivilomin̈y ankitin̈y olo maty?
ZAHAVA
Zahava ino aby raha mety hatao baka hampahivankivan̈a alahelo.
“Akory Tokony Hataonao Baka Hampahivankivan̈a Alahelonao?” (Mifohaza! No. 3 2018)
Ten̈a afaka man̈ampy olo naty havan̈a ma toro lalan̈any Baiboly?
Akory atao mankahery tsaiky izikoa misy olo tsy foendro naty?
Misy olo ma hivilomin̈y handeha andan̈itry an̈y? Azovy ma olo tsy hivilomin̈y?
“Karakory ma Familoman̈a Olo Maty Zen̈y?” (Lahatsoratra aminy Internet)