Akory Hampasambatra Fianakavian̈anao?​—Fizaran̈a 2

Zanaka io kadô baka amy Jehovah. Tiany izikoa raimandreny mikarakara tsarabe kadô namiany iro io. Jehovah man̈amia torohevitry feno fahendrena han̈ampian̈a iro amy zen̈y. Torohevitry io koa hahavy iro tsaiky aby io han̈ano raha hampasambatra fianakavian̈andro.

1. Ino ma torohevitriny Jehovah handeha amy raimandreny?

Tiany Jehovah iro raimandreny aby io ho tia zanaka ndreky hanokana fotoan̈a be hiarahan̈a amindro. Tiany koa iro hiaro zanakandro amy raha mety handrobaka iro, avio hampiasa toro lalan̈a Baiboly hitarimian̈a iro. (Ohabolana 1:8) Ho izy amindro lelahy mananjanaka aby io: “Tarimia mifan̈araka amy toro lalan̈any Jehovah iro.” (Vakia Efesianina 6:4.) Ravoravo Jehovah izikoa raimandreny niteraka iro fo mitarimy zanakandro, fa tsy amiandro olo hafa.

2. Ino torohevitriny Jehovah handeha amy tsaiky?

Ho Jehovah: “Areha volan̈a raimandreninaro.” (Vakia Kolosianina 3:20.) Ho ravoravo Jehovah ndreky raimandreny, izikoa tsaiky man̈araka volan̈a raimandreny ndreky man̈aja iro. (Ohabolana 23:22-25) Ten̈a tsara izikoa tsaiky man̈araka raha nataony Jesosy, taminizy mbala hely. Izy ndray lavorary, izy nan̈araka volan̈anolobeny fo ndreky nan̈aja iro.​—Lioka 2:51, 52.

3. Akory ataonaro jiaby tran̈o araiky hihavan̈a tsarabe amy Jehovah?

Anao koa mananjanaka, tianao zanakanao ho ten̈a tia Jehovah, karaha ataonao koa. Akory hahatakaranao tanjon̈onao zen̈y? Ataova raha koran̈iny Baiboly ty: “Baka io ampidira tsihelihely an̈aty sain̈iny zanakanao ao zen̈y [volan̈a Jehovah], koràn̈a amindro, na anao mipetraka antran̈o, na mandeha amy lalan̈a.” (Deoteronomia 6:7) Dikany ‘mampiditry tsihelihely’ zen̈y, mampianatra ke man̈ampodimpody raha. Safe mila ampodimpodinaro amy zanakanaro raha ampianarinaro iro, baka tsaroandro. Ke dikany andininy io, anaro tokony hizaha fotoan̈a tsy tapaka, hikoran̈ana raha momba Jehovah amy zanakanaro. Tsara izikoa anaro manokana fotoan̈a isaka herin̈iandra miaraka mianatra Baiboly. Anaro koa tsy mananjanaka, tsara fo anaro fivadiany miaraka mianatra Soratra Masin̈y isaka herin̈iandra.

ALEVA ONON̈O

4. Mila manan̈a fitiavan̈a anaro amy fitarimian̈a zanakanaro

Mety ho sarotro fitarimian̈a tsaiky io. Ino torohevitriny Baiboly mety han̈ampy anaro? Vakia Jakoba 1:19, 20, avio iaraha dinihin̈y fan̈ontanian̈a aby ty:

• Nan̈ino mila be fitiavan̈a raimandreny izikoa fa mikoran̈a amy zanakandro?

• Nan̈ino raimandreny tsy tokony han̈anatra tsaiky foeky izikoa mbala meloko?a

5. Arova zanakanaro

Baka hiarovan̈a zanakanaro, anaro raimandreny tsy maintsy mampianatra zanakanaro raha momba firaisan̈a. Mety tsy ho mora aminaro man̈ano zen̈y. Alifasa VIDEO io, avio iaraha dinihin̈y fan̈ontanian̈a aby ambany io.

VIDEO: Ampianara Hiaro Ten̈a Zanakanao (2:58)

• Nan̈ino ma sarotro amy raimandreny sasany mikoran̈a amy tsaiky raha momba firaisan̈a?

• Karakory nataony raimandreny sasany nan̈azava izio tamy zanakandro?

Efa nambarany faminanian̈a amy Baiboly fa doniany Satana ty hahairatsy fo. Vakia 2 Timoty 3:1, 13, avio iaraha dinihin̈y fan̈ontanian̈a ty:

• An̈isanolo ratsy fan̈ahy koran̈iny andininy 13 io iro olo man̈olan̈a tsaiky. Ke nan̈ino raimandreny mila mampianatra zanakandro momba firaisan̈a ndreky akory ataondro hiaro ten̈a?

Asa mba hainao?

Manan̈a fitaovan̈a maro Vavolombelon̈o Jehovah han̈ampian̈a raimandreny hampianatra zanakandro momba firaisan̈a ndreky hampianaran̈a iro hiaro ten̈a. Ohatra, zahava:

• Arova Zanakanao (video)

• Mianara Amin’ilay Mpampianatra Lehibe, toko 10 ndreky 32

• “Karakory Atao Mikoran̈a amy Zanaka Raha Momba Firaisan̈a?” (Mifohaza! No. 5 2016)

6. Hajà raimandreninao

VIDEO: Akory Ataoko Hikoran̈a amy Papa Ndreky Mama? (2:19)

• Nan̈ino ma tsaiky ndreky tanora aby io tokony han̈aja tsarabe izikoa fa mikoran̈a amy raimandrenindro?

• Karakory ataony tanora han̈aja raimandreny, iro koa fa mikoran̈a amindro?

Vakia Ohabolana 1:8, avio iaraha dinihin̈y fan̈ontanian̈a ty:

• Akory tokony hataony tanora, izikoa raimandrenindro man̈ambara iro raha tokony hataondro?

7. Miaraha manompo Jehovah

Isaka herin̈iandra, fianakavian̈a Vavolombelon̈o Jehovah, manokan̈a fotoan̈a hiarahan̈a manompo Jehovah. Karakory ma fan̈anovan̈a zen̈y? Alifasa VIDEO io, avio iaraha dinihin̈y fan̈ontanian̈a aby ambany io.

VIDEO: Fotoampivavahan̈any Fianakavian̈a: Raha Manahiran̈a Ndreky Hatsaran̈a Azo (8:04)

• Akory hahavy fianakavian̈a hanan̈a programo tsy miovaova han̈anovan̈a fotoampivavahan̈any fianakavian̈a?

• Ino raha tokony hataony raimandreny baka fotoampivavahan̈any fianakavian̈a hamparavoravo ndreky mifan̈araka amy raha ilainy fianakavian̈a?​—Zahava sary voanalohany amy leson ty.

• Ino raha hitanao mampasarotro fan̈anovanaro fotoampivavahan̈a?

Tamy faha Israelita taloha tan̈y, Jehovah nan̈iraka fianakavian̈a hiaraka hikoran̈a tsy tapaka momba Soratra Masin̈y. Vakia Deoteronomia 6:6, 7, avio iaraha dinihin̈y fan̈ontanian̈a ty:

• Akory mety han̈arehanao toro lalan̈a io?

Raha mety atao amy fotoampivavahan̈any fianakavian̈a:

• Man̈oman̈a fivorian̈a.

• Mamaky ndreky miaraka midiniky tantara araiky tianaro amy Baiboly ao.

• Izikoa anaro mananjanaka mbala hely, aleva na ataova printy kilalaontsain̈y amy jw.org ao.

• Izikoa ndraiky tanora zanakanaro, iaraha dinihin̈y iro lahatsoratra momba tanora amy jw.org.

• Miaraka misoma tantara amy Baiboly.

• Mizaha video amy jw.org, avio miaraka mandiniky izio.

INO RAHA NIANARANAO TATO?

Tiany Jehovah raimandreny ho tia zanaka, hampianatra, ndreky hiaro iro. Tiany koa tsaiky han̈aja raimandreny. Tiany Jehovah fianakavian̈a miaraka manompo izy.

Fan̈ontanian̈a Fameren̈ana

• Karakory hataony raimandreny hampianatra ndreky hiaro zanakandro?

• Akory ataony tsaiky man̈aja raimandreny?

• Ino mahatsara fianakavian̈a manokana lera isaka herin̈iandra han̈anovan̈a fotoampivavahan̈a?

ZAHAVA

Ino aby raha tianao hampianarin̈y zanakanao firaka izy be?

“Raha Tsiota Mila Ampianarin̈y Tsaiky” (Mifohaza! No. 2 2019)

Diniha torohevitry baka amy Baiboly momba fikarakaran̈a raimandreny matoe.

“Ino ma Raha Volan̈iny Baiboly Momba Fikarakaran̈a Raimandreny Matoe?” (Lahatsoratra aminy Internet)

Zahava akory nataony lelahy araiky nanjary nahay nitarimy tsaiky.

Jehovah Nampianatra Zahay Hahay Hitarimy Zanakanay (5:58)

Diniha ino raha mety hataony babany tsaiky baka zanakandro ho tia Jehovah.

“Akory Hataony Lelahy Hifankazatra Tsarabe amy Zanany Lelahy?” (Tilikambo Fiambesan̈a 1 Novambra 2011)