“Man̈ataon̈a Zan̈ahary”
“Man̈ataon̈a Zan̈ahary anarô, fa izy han̈aton̈o anarô.”—JAKOBA 4:8.
1, 2. a) Ino ma raha matetiky volan̈in’olo? b) Ino torohevitrin’i Jakoba, aviô nan̈ino raha zen̈y nilain̈a?
“ZAN̈AHARY miaraka amintsika.” Zen̈y ataon’ny firenena sasany saimbolan̈a ndreky firaka amy sanjin’ny lambandrô maramila aby io. Vola maro koa iziôty misy soratra “Zan̈ahary atokisanay.” Hita baka amy zen̈y fa maro olo miaboko mifandray amy Zan̈ahary. Fa asa anao man̈eky fa olo mifandray marikitry amy Zan̈ahary zen̈y tsy basiny mivolan̈a zen̈y fo fa mila man̈ano raha beben’izen̈y koa?
2 Baiboly mivolan̈a fa atsika mety mifandray amy Zan̈ahary. Mila mifen̈y atsika vo mahavita zen̈y. Nata irô Kristianin̈y voahosotro tamy taonjato voanalohany nila nankafatatra fifandraisan̈andrô tamy Jehovah Zan̈ahary. I Jakoba, mpiandraikitry kristianin̈y tamy zen̈y nila nampitandrin̈y olo sasany tamy fiangonan̈a, fôtony irô tia nan̈atanteraka fan̈irian̈an’ny nôfotro ndreky tsy nadio ara-pan̈ahy eky. Izy nandrisiky mare irô karaha ty: “Man̈ataon̈a Zan̈ahary anarô, fa izy han̈aton̈o anarô.” (Jakoba 4:1-12) Ino ma tian’i Jakoba koran̈iny amy “man̈ataon̈a” zen̈y?
3, 4. a) Mampatsiaro irô Jiosy aby io ino ma “man̈ataon̈a Zan̈ahary” zen̈y? b) Nan̈ino atsika matoky fa azo atao man̈aton̈o Zan̈ahary?
3 Nampiasa volan̈a hain’olo maro tamy fotoan̈an’izen̈y Jakoba iô. Lalàn̈an’i Mosesy nan̈amia toromariky voafaritry tsarabe irô mpisôron̈o nisolo ten̈a vahoakanany, baka irô “han̈aton̈o marikitry” na han̈aton̈o Jehovah. (Eksodosy 19:22) Ke irô olo namaky taratasin’i Jakoba aby io koa fa nahita volan̈a io, nampatsiaro irô raha zen̈y fa tsy mandeha ho azy fan̈ataon̈ana Jehovah io. Jehovah baka faran’ny mahery amy raha jiaby.
4 Fa kanefa misy manam-pahaizan̈a momba Baiboly mivolan̈a fa “torohevitry [amy Jakoba 4:8] io zen̈y faran-draha mampisy fan̈antinan̈a eky.” Hain’i Jakoba fa Jehovah be fitiavan̈a fo, ke izy tsy vôly mikaiky olo tsy lavorary han̈aton̈o izy. (2 Tantara 15:2) Sôron̈o nataon’i Jesosy in̈y nan̈abian̈a lalan̈a han̈ataon̈ana izy tsarabe. (Efesianina 3:11, 12) Efa mandeha an-tapitrisany olo man̈aton̈o Zan̈ahary io amy ziôty! Akôry ataonao baka hifandray tsara aminany? Atsika handiniky raha telo mila ataontsika, baka atsika han̈aton̈o Jehovah Zan̈ahary.
‘Mianara’ raha momba Zan̈ahary fo
5, 6. Izikoa ohatran’i Samoela hely in̈y zahan̈a, karakôry ‘mahay’ Zan̈ahary zen̈y?
5 Karaha ty nivolan̈in’i Jesosy amy Jaona 17:3: “Izikoa irô tihahazo fiainan̈a tsisy farany, irô mila mianatra baka hahay anao, Zan̈ahary taokan̈a sady marin̈y, ndreky Jesosy Kristy, araiky nirahinao.” Maro fandikan-teny tsy mira amy Fandikan-tenin’ny Tontolo Vaovao izikoa fa mandika andininy io. Nindrô tsy mivolan̈a “mianatra” fa “mahay” Zan̈ahary fo. Fa kanefa, maro manam-pahaizan̈a mivolan̈a fa dikan’ny volan̈a griky nandikan̈a izio tamy voanalohany, man̈ano raha mitohy baka hifandray marikitry amin’olo io.
6 Tsy vaovao tamin’olo tamy faha Jesosy mifandray marikitry amy Zan̈ahary zen̈y. Amy Soratra Hebreo, ohatra, mivolan̈a fa tamy Samoela mbala hely, izy “mbala tsendriky nahay Jehovah tsarabe.” (1 Samoela 3:7) Zen̈y ma mivolan̈a fa hely fo raha hain’i Samoela momba Zan̈aharinany io? Ehe. Raimandreninany ndreky irô mpisôron̈o aby io nampianatra izy raha maro. Fa volan̈a hebreo nampiasain̈y amin’ny andininy io volan̈in’ny manam-pahaizan̈a araiky zay, “ivolan̈ana olo efa fankazatra mare.” Ke Samoela mbala tsendriky nifandray marikitry tamy Jehovah, talohan’izy nanjary mpivolan̈a hafatra baka tamy Jehovah. Fa Samoela koa fa be, izy nahay tsarabe Jehovah, ke nifandray marikitry taminany.—1 Samoela 3:19, 20.
7, 8. a) Nan̈ino atsika tsy tôkony havozo hianatra fahamarin̈ana lalin̈y? b) Ino aby fahamarin̈ana lalin̈y ke tsara hianarantsika amy Baiboly ao?
7 Asa anao iziôty mianatra momba Jehovah, baka anao hifandray marikitry aminany? Baka hahavitan̈a zen̈y, anao mila “man̈iry mare” hanin̈y ara-pan̈ahy amezan’ny Zan̈ahary. (1 Petera 2:2) Aza mijanon̈o amy fampianaran̈a fôtotro fa ianara fahamarin̈ana lalin̈y amy Baiboly ao. (Hebreo 5:12-14) Karakôry fo izikoa anao mieritreritry fa sarotro mare aminao raha zen̈y? Aza adin̈a fa Jehovah “Mpampianatra Be Voninahitry.” (Isaia 30:20) Hainy mampiditry fahamarin̈ana lalin̈y io amy jerin’olo tsy lavorary. Tsy basin’izen̈y fa anao koa mifen̈y hahay raha ampianariny, izy hitahy anao.—Salamo 25:4.
8 Tsara izikoa dinihinao ino aby “raha lalin̈y momba Zan̈ahary”? (1 Korintianina 2:10) Izio tsy foto-kevitry aby mampimalo irô theologiens ndreky mpitariky fivavahan̈a aby io. Izio fahatakaran̈a fomba fisain̈an’ny Zan̈ahary ndreky fihetseham-pôn’ny Babantsika be fitiavan̈a io. Ohatra, vidim-pan̈avotan̈a, “sekire masin̈y” ndreky irô fifan̈ikian̈a isan-karazany nampiasain’i Jehovah nitahian̈a olonany ndreky han̈atantirahany fikasanany. Irô io ndreky foto-kevitry hafa miramira amindrô io tsara han̈anaovan̈a fikarohan̈a ndreky fianaran̈a manokan̈a.—1 Korintianina 2:7.
9, 10. a) Nan̈ino ma ratsy poerapoera io, aviô akôry hialan̈a amy zen̈y? b) Nan̈ino ma atsika mila manetry ten̈a fo izikoa fa mianatra raha momba Zan̈ahary?
9 Fa mitandrema izikoa fa maro raha hainao momba fahamarin̈ana lalin̈y io, tsao anao hanjary hipoerapoera. (1 Korintianina 8:1) Ratsy izio, fôtony mankalavitry atsika amy Zan̈ahary. (Ohabolana 16:5; Jakoba 4:6) Aza adin̈a fa tsisy olo tôkony ho poerapoera izikoa fa mahay raha. Hangala ohatra baka atsika. Diniha baka raha volan̈in’ny fampidiran̈a amy boky momba fandrosoan’ny siansy ty: “Arakarakan’ny hahaizantsika raha maro, ho hitantsika fa hely fo raha haintsika. ... Raha jiaby haintsika io mbala tsisy dikany ankilan’ny raha mbala mila hianarantsika.” Tsara manetry ten̈a karaha zen̈y. Mira zen̈y koa amy fianaran̈a momba Jehovah Zan̈ahary. Izio fianaran̈a ten̈a maventy, ke mahavy atsika mila manetry ten̈a. Nan̈ino?
10 Aleva onon̈o baka raha aby koran̈in’ny Baiboly momba Jehovah ty. “Ten̈a lalin̈y fisain̈ananao.” (Salamo 92:5) “Tsisy farany fahaizan̈anany.” (Salamo 147:5) “Fahaizan̈anany tsy takatra jery.” (Isaia 40:28) “Lalin̈y ankitin̈y harian̈an’ny Zan̈ahary ndreky fahendrenanany ndreky fahaizan̈anany!” (Romanina 11:33) Hita baka amy zen̈y fa atsika tsy hahay raha jiaby momba Jehovah. (Mpitoriteny 3:11) Maro tsara raha efa nampianariny atsika, fa tsy mety lany raha ianarantsika momba izy. Tsy mahavy atsika havozo izy ndreky hanetry ten̈a ma zen̈y? Ia! Ke irarian̈a atsika koa fa mianatra, hampiasa fahaizan̈antsika io han̈ataon̈ana Jehovah ndreky han̈ampian̈a olo han̈aton̈o izy, fa tsy hampipoerapoera atsika amin’olo hafa.—Matio 23:12; Lioka 9:48.
Aboaha fa anao tia Jehovah
11, 12. a) Ino tôkony ho vokatran’ny fahaizantsika Jehovah? b) Akôry hahaizan̈a olo ten̈a tia Jehovah?
11 Apostoly Paoly nampifandray fahaizan̈a ndreky fitiavan̈a. Karaha ty ho izy: “Ke zaho tsy vôly mivavaka baka fitiavan̈anarô hahaihitombo fo, aviô ho hainarô tsara sady hazava aminarô tsarabe sitrapôn’ny Zan̈ahary.” (Filipianina 1:9) Lan̈iany raha tsiaraikiaraiky haintsika momba Jehovah ndreky fikasan̈anany tôkony hampitombo fitiavantsika Babantsika an-dan̈itry an̈y, fa tsy tôkony hampipoerapoera atsika.
12 Hitantsika baka amy zen̈y fa maro amin’olo mivolan̈a tia Zan̈ahary tsy ten̈a tia izy aby. Finoandrô Zan̈ahary mety hahavy irô hanan̈a fihetseham-pô lalin̈y mare. Tsara raha zen̈y, ke vain̈y derain̈a irô, izikoa zen̈y mifan̈araka amy fahaizan̈a ny marin̈y. Fa zen̈y mbala tsy ten̈a fitiavan̈a izy. Nan̈ino? Zahava tsara baka dikan’ny fitiavan̈a Zan̈ahary zen̈y amy Baiboly. Ho izy ao: “Dikan’ny tia Zan̈ahary zen̈y mitandrin̈y didinany, fa didinany io fo tsy mavesatra.” (1 Jaona 5:3) Ke olo ten̈a tia Jehovah zen̈y volan̈iny iô mila man̈araka volan̈anany.
13. Nan̈ino ma hifandray marikitry amy Jehovah atsika izikoa mavozo izy?
13 Atsika koa mavozo Zan̈ahary, atsika man̈araka volan̈anany. Havozo Zan̈ahary ndreky han̈aja izy mare atsika izikoa mianatra momba izy ndreky toetrinany karaha ataon’ny fahamasin̈any, voninahitrinany, angôvonany, fahendrenanany ndreky fitiavan̈anany. Ten̈a ilain̈a tahotro karaha zen̈y izikoa tiantsika han̈aton̈o izy. Zahava baka raha koran̈in’ny Salamo 25:14 ty: “Lan̈iany mavozo Jehovah fo manjary kamaradinany marikitry.” Ke izikoa atsika mavozo tsao tsy hamparavoravo Zan̈ahary Babantsika an-dan̈itry an̈y ten̈a tiantsika io, hahavita han̈aton̈o izy atsika. Atsika koa mavozo Zan̈ahary koa, atsika han̈araka torohevitrinany amin’ny Ohabolana 3:6 ty: “Iritrireta izy amy raha jiaby ataonao, ke hataony mandeha mahitsy fiain̈ananao.” Ino ma dikan’izen̈y?
14, 15. a) Ino fanapahan-kevitry sasany raisintsika isan’andra? b) Akôry han̈aboahantsika amy fanapahan-kevitrintsika fa atsika mavozo Zan̈ahary?
14 Mila manapa-kevitry anao isan’andra na amy raha madiniky na maventy. Ohatra, ino koran̈a hataonao amin’olo fiasan̈a araiky aminao, lekoly araiky aminao, na amy jiraninao? (Lioka 6:45) Anao ma hifen̈y mare amin’ny asanao sa hitsilen̈alen̈a? (Kolosianina 3:23) Anao ma hinaman̈a mare amin’olo tsy dia tia Jehovah na tsy tia izy foeky, sa anao hinaman̈a amin’olo ten̈a tia Jehovah? (Ohabolana 13:20) Ino raha hataonao, nata izio tsy raha be, hanohanan̈a asan’ny Fanjakan̈an’ny Zan̈ahary? (Matio 6:33) Izikoa anao man̈araka raha koran̈in’ny andininy voasoratra aby io amy fanapahan-kevitry raisinao isan’andra, dikan’izen̈y anao mieritreritry Jehovah “amy raha jiaby ataonao.”
15 Ke isaka atsika hanapa-kevitry, atsika tôkony han̈ontany fo: ‘Ino raha tian’i Jehovah hataoko? Ino raha ten̈a hamparavoravo izy?’ (Ohabolana 27:11) Favozoan̈a Zan̈ahary karaha zen̈y fomba ten̈a tsara han̈aboahantsika fa atsika tia Jehovah. Favozoan̈a Zan̈ahary io koa handrisiky atsika hifen̈y hadio ara-pan̈ahy, fitondran-ten̈a ndreky vatan̈a. Aza adin̈a fa amin’ny andininy ivolan̈an’i Jakoba “man̈ataon̈a Zan̈ahary” io, izy koa mandrisiky: “Anarô mpanota, diova tan̈anarô baka ho afaka amin’ny asa ratsy; anarô mpisalasala, diova fônarô.”—Jakoba 4:8.
16. Atsika ndray man̈amia raha Jehovah, ino raha tsy ho vitantsika foeky, fa kanefa ino vokany tsara izikoa atsika man̈amia raha Jehovah?
16 Olo tia Jehovah zen̈y tsy vitan’ny fady raha ratsy fo fa mila tia ny tsara koa.Ohatra, akôry han̈aboahantsika fa atsika mankasitraka Jehovah tsy matity? Karaha ty ho Jakoba: “Avy baka an̈abo fan̈amezan̈a tsara jiaby ndreky fan̈amezan̈a lavorary jiaby, fôtony izio mijotso baka amy Baban’ny fahazavan̈a an-dan̈itry an̈y.” (Jakoba 1:17) Atsika baka ndray man̈amia Jehovah raha maro, zen̈y tsy mipasy amy fanan̈ananany foeky. Izy baka tômpin’ny raha tsara jiaby. (Salamo 50:12) Ke atsika koa man̈amia Jehovah fotoan̈antsika ndreky angôvontsika, tsy miasa aminany zen̈y han̈atantirahany sitrapônany. Nata atsika tsy han̈eky hitory vaovao tsaran’ny Fanjakan̈an’ny Zan̈ahary, izy mbala mahavita mampivolan̈a vato fo! Ke nan̈ino fo atsika mila man̈amia Jehovah fanan̈anantsika, fotoan̈antsika ndreky angôvontsika? Antony araiky ten̈a maventy, fôtony tiantsika haboaka izy fa atsika tia izy amy fô jiaby, vatan̈a, sain̈y, ndreky angôvo jiaby.—Marka 12:29, 30.
17. Tôkony ho ino raha mandrisiky atsika man̈amia raha Jehovah?
17 Atsika koa man̈amia raha Jehovah, tôkony ho ravoravo koa atsika. “Zan̈ahary tia olo mpan̈amia ankaravoan̈a.” (2 Korintianina 9:7) Mandrisiky atsika han̈ano zen̈y torolalan̈a amy Deoteronomia 16:17 ty: “Tôkony ho arakarakan’ny hamarozan’ny hatsaran̈a namezan’i Jehovah Zan̈aharinao izy fan̈amezan̈a hindesin’olo tsiaraikiaraiky.” Izikoa alaintsika onon̈o fa Jehovah tsy natity tamintsika, atsika mba tihan̈amia raha izy koa. Mamparavoravo izy raha zen̈y, karaha ataon’ny tsaiky hely man̈amia raha hely babany na reniny in̈y. Atsika koa man̈aboaka Jehovah fitiavantsika izy karaha zen̈y, man̈aton̈o izy atsika.
Mifandraisa marikitry amy Jehovah amy vavaka
18. Nan̈ino tsara izikoa atsika mandiniky fomba hankatsaran̈a vavakantsika?
18 Atsika koa man̈ano vavaka manokan̈a amy Jehovah, aboakantsika fa atsika ten̈a tia izy ndreky mikoran̈a raha tsy hikoran̈intsika amin’olo hafa foeky, koa tsy amy Babantsika an-dan̈itry an̈y io. (Filipianina 4:6) Vavaka io fomba hifandraisantsika marikitry amy Zan̈ahary, ke tsara izikoa atsika mandiniky raha hivolan̈intsika ndreky hatsaran̈an’ny vavakantsika. Tôkony ho baka amy fô izio fa tsy voatery miavaka be na feno volan̈a sarotro. Akôry hankatsarantsika vavakantsika?
19, 20. Nan̈ino atsika mila misaintsain̈y alohan’ny hivavaka, aviô ino aby raha tsara saintsain̈intsika?
19 Tsara izikoa atsika misaintsain̈y antsendriky alohan’ny hivavaka. Hivolan̈a raha voafaritry tsara ndreky hisy dikany atsika koa man̈ano zen̈y aloha be, fa tsy hivolan̈a zay raha avy an̈atin’ny jerintsika ndreky tsy han̈ano tsianjery. (Ohabolana 15:28, 29) Mety han̈ampy atsika koa mangala onon̈o raha nivolan̈in’i Jesosy tamy vavaka modely in̈y, ke dinihintsika ino amindrô in̈y ma misy ifandraisany amy raha mahazo atsika ke hampidirintsika amy vavaka. (Matio 6:9-13) Ohatra, atsika mety hangataka han̈ano raha hely mety hataontsika, baka atsika mandray anjara amy fan̈atantirahan̈a sitrapôn’ny Jehovah ambony tany eto. Mety koran̈intsika amy Jehovah fan̈irian̈antsika baka ho mety hampiasainy fo ndreky hangataka izy han̈ampy atsika hahavita zay fanendrena namiany atsika. Atsika ma miasaloha amy raha ten̈a ilaintsika? Ino fahotan̈a mila hangatahantsika familan-keloko, aviô azôvy olo mila hambelantsika helokonany? Ino fakam-pan̈ahy tôjy atsika, aviô nan̈ino atsika mila fiarovan’i Jehovah meky aminany zen̈y?
20 Sôsoko zen̈y koa, atsika mety mieritreritry olo haintsika fa ten̈a mila fan̈ampian’i Jehovah. (2 Korintianina 1:11) Fa tsy mila adin̈antsika koa mankasitraka Jehovah. Izikoa atsika mijanon̈o hely antsendriky mandiniky zen̈y, matoky atsika fa ho avy an̈aty jerintsika mankasitraka Jehovah ndreky midera izy isan’andra, nohon’ny raha maro tsara amezany atsika. (Deoteronomia 8:10; Lioka 10:21) Hahazo hatsaran̈a atsika koa man̈ano zen̈y, fôtony hanjary tsy ho mora kivy amy fiain̈ana ndreky hahay hankasitraka.
21. Izikoa atsika mivavaka amy Jehovah, ohatran-jôvy amy Baiboly ao mety han̈ampy atsika?
21 Han̈ampy atsika amy vavaka koa fan̈anaovan̈a fianaran̈a manokan̈a. Misy vavakan’ny lelahy ndreky man̈angy maro an̈atin’ny Baiboly ao. Ohatra, Izikoa misy raha sarotro mare mahazo atsika, ke mampiasaloha atsika ndreky misy vokany amintsika ndreky olo tiantsika, atsika mety mamaky vavakan’i Jakoba, tamin’izy hifanôjy tamin’i Esao rahalahiny nila hamaly faty izy in̈y. (Genesisy 32:9-12) Na atsika koa mianatra momba vavaka nataon’i Mpanjaka Asa, izikoa fa nisy Etiopianin̈y an-tapitrisany nila hanafiky vahoakan’ny Zan̈ahary. (2 Tantara 14:11, 12) Izikoa ndraiky misy olo tsy man̈isy fôtiny an̈aran’i Jehovah, vavakan’i Elia nanoloan̈a irô mpaminan̈in’i Bala tamy Bongo Karmela in̈y tsara dinihintsika, ndreky vavakan’i Nehemia tamy Jerosalema robaka be in̈y. (1 Mpanjaka 18:36, 37; Nehemia 1:4-11) Hankafatatra finoan̈antsika mamaky ndreky misaintsain̈y vavaka karaha zen̈y sady ahitantsika hevitry amy raha hikoran̈intsika amy Jehovah, lera atsika kivy mare in̈y.
22. Ino andinin-teny nin’ny taon̈o 2003, aviô ino fan̈ontanian̈a tsara iritriretintsika firaka amy faran’ny taon̈o io?
22 Mazava baka amy zen̈y fa tsisy voninahitry ndreky tanjon̈o mandilatra fan̈arahan̈a torohevitrin’i Jakoba in̈y: “Man̈ataon̈a Zan̈ahary.” (Jakoba 4:8) Irarian̈a atsika han̈araka zen̈y fo, ke hampitombo fahaizantsika Zan̈ahary, hitady fomba hankasitrahan̈a izy fo, ndreky hifandraisan̈a marikitry aminany amy vavaka. Amy taon̈o 2003, atsika mieritreritry Jakoba 4:8 io fo, fôtony izio andinin-teny nin’ny taon̈o io. Irarian̈a atsika handinin̈iky atsika tômpiny, asa atsika mifandray marikitry amy Jehovah. Karakôry fo basy tapany farany amin’ny volan̈anany io? Ino hatsaran̈a ho azontsika, izikoa Jehovah ‘man̈aton̈o atsika’? Lahatsoratra fan̈araka ty han̈azava zen̈y.
Asa Azonao Onon̈o?
• Nan̈ino ten̈a raha maventy man̈aton̈o Jehovah zen̈y?
• Ino aby tanjon̈o mety takarintsika baka atsika mahay Jehovah?
• Akôry han̈aboahantsika fa atsika ten̈a tia Jehovah?
• Akôry aby fomba han̈aboahantsika amy Jehovah amy vavaka fa atsika mifandray tsarabe aminany?
[Volan̈a nalain̈a]
Ty andinin-teny nin’ny taon̈o 2003: “Man̈ataon̈a Zan̈ahary anarô, fa izy han̈aton̈o anarô.”—Jakoba 4:8.
[Sary]
Samoela koa fa nahaibe, nahainahay Jehovah ndreky nifandray marikitry taminany
[Sary]
Ohatra tsara nintsika vavaka nataon’i Elia tamy Bongo Karmela