Hitan’i Jehovah ma Raha Ataonao?
AKÔRY hamalianao fan̈ontanian̈a zen̈y? Maro olo mivolan̈a: ‘Zaho mino fa hitan’ny Zan̈ahary raha nataon’ny lelahy karaha iry Mosesy, Gideona, ndreky Davida, fa zaho fo tsy matoky fa tiany ho hita raha ataoko. Zaho baka tsy Mosesy, na Gideona, na koa Davida!’
Marin̈y ndraiky fa misy lelahy tsy nivadiky sasany tamin’ny andran’ny Baiboly nahavita raha miavaka fôtony nanam-pinoan̈a. Nisy tamindrô, ohatra, ‘nandresy fanjakan̈a, namody vavan’ny lion, namono môtro nizelazela, baka iô afaka nilefa lelan’ny sabatra.’ (Hebreo 11:33, 34) Fa misy sasany ndraiky tsy dia nahavita raha niavaka loatra kanefa irô mba nanam-pinoan̈a koa. Ndray zen̈y, Baiboly man̈amia toky atsika fa hitan’ny Zan̈ahary finoan̈andrô. Alô baka atsika hikoran̈a ohatran’olo vitsivitsy amy Baiboly ao. Araiky amindrô mpiambin̈y ôndrikôndriky, araiky mpaminan̈y, aviô araiky viavy maty vady.
Mpiambin̈y Ôndrikôndriky Araiky Nan̈ano Sôron̈o
Ino raha tsaroanao momba Abela, zanakan’i Adama ndreky Eva lelahy faharoe? Mety azonao onon̈o fa izy nivonen’ny rahalahiny. Mety vitsy amintsika fo tatran’ny raha karaha zen̈y. Fa misy antony hafa mahavy Zan̈ahary nandiniky Abela.
Tandraraiky, Abela nangala ôndrikôndriky vitsivitsy farany tsara baka tamy ôndrikôndriky tarimìny baka iô irô io nataony sôron̈o tamy Zan̈ahary. Izikoa amin’ny andra ziôty, karaha tsisy dikany raha namiany io. Fa ndray zen̈y, hitan’i Jehovah raha nataony sady nankasitrahiny. Fa tsy zen̈y fo. Hely tsy ho efatra arivo taon̈o tafara tatỳ, Jehovah nan̈iraka apostoly Paoly nanoratra momba raha nataony io amy bokin’ny Hebreo. Ndray efa tafaran’ny taon̈o maro be karaha zen̈y, mbala tsy nadin̈an’ny Zan̈ahary fo sôron̈o tsotra nataon’i Abela in̈y.—Hebreo 6:10; 11:4.
Karakôry nataon’i Abela nahay ino biby hataony sôron̈o? Baiboly ndraiky tsy mikoran̈a momba zen̈y. Fa azo antoko fa Abela mety nieritreritry momba zen̈y. Izy mpiambin̈y ôndrikôndriky, ke tsy mahagaga izikoa biby nitariminy fo nangalany natao sôron̈o. Fa aleva onon̈o fo fa lay farany tsara tamindrô nifidiny, lay ten̈a vondraka. (Genesisy 4:4) Mety nidinihiny koa raha nivolan̈in’i Jehovah tamy bibilava tamy zaridain’i Edena tao karaha ty in̈y: ‘Hataoko raha tsy mampifankahazo anao ndreky man̈angy io, baka iô taranakanao ndreky taranakanany. Izy hanôrotôro lohanao, fa anao ndraiky handratra hôtrombitinany.’ (Genesisy 3:15; Apokalypsy 12:9) Nata tsy hainy azôvy “man̈angy” io ndreky azôvy “taranaka” io, mety efa hain’i Abela fa matoa ratravin̈y hôtrombitinin’ny taranakan’ny man̈angy io dikan’izen̈y ho hisy lio latsaka. Mety hainy fa tsisy raha valera mandilatra raha manam-pahin̈ana. Ke nety tsara sôron̈o namezany.
Karaha Abela, Kristianin̈y amin’ny andra ziôty koa mba man̈ano sôron̈o amy Zangahary. Tsy ny farany tsara amy raha tarimindrô amezandrô fa “sôron̈o fideran̈a Zan̈ahary baka amy Jesosy Kristy, tsy ino zen̈y fa volan̈a aboakan’ny vavanay han̈anaovan̈a fan̈ambaran̈a momba an̈aran̈anany [Zan̈ahary] amin’olo jiaby.” (Hebreo 13:15) Man̈ano fan̈ambara amin’olo jiaby vavantsika lera atsika mikoran̈a raha inoantsika amin’olo.
Anao ma tihankatsara sôron̈o hataonao? Diniha tsarabe basy ino raha ilain’olo amy faritaninarô. Ino ma raha mampiasaloha irô? Ino raha maharikian̈a irô? Ino amy raha koran̈in’ny Baiboly mety ho tiandrô? Isaka anao mitory, diniha akôry mety hankatsaranao fomba fitorinao. Aviô mifen̈a hafana fô koa fa mikoran̈a raha momba Jehovah. Ataova baka amy fônao koran̈anao. Ataova raha hahavy sôron̈o ataonao io ho ten̈a “sôron̈o fideran̈a.”
Mpaminan̈y Araiky Nitory Tamin’olo Tsy Tihitandren̈y
Diniha koa ziôty ohatran’ny mpaminan̈y Enoka. Izy zaraiky fo nisolo ten̈a Jehovah Zan̈ahary, ke misaora nahatsiaro latsatokan̈a mare izy. Karaha Enoka ma anao, ke anao zaraiky fo ma manompo Jehovah amy fianakavian̈anao? Anao zaraiky fo ma man̈araka toro lalan̈an’ny Baiboly amy tsaiky kilasy araiky aminao na ampiasan̈anao an̈y? Izikoa zen̈y, tsy mora ankitin̈y raha mavoa anao. Samby mety handrisiky anao handika lalàn̈an’ny Zan̈ahary na kamarady, na havan̈a, mpiara-mianatra na mpiara-miasa. Irô mety hivolan̈a karaha ty: “Zahay tsy han̈ambara amin’olo. Tsisy olo hahay izio.” Mety hisisiky fo irô hivolan̈a fa anao tsy tôkony hiasaloha amy fitsipikin’ny Baiboly momba fitondran-ten̈a fôtony Zan̈ahary tsy mijery raha ataonao. Mety hifen̈y mare irô han̈ano raha hahavy anao hivadiky izikoa fa hitandrô fa anao tsy man̈ano raha ataondrô na manan̈a toe-tsain̈y karaha nindrô.
Marin̈y ndraiky fa tsy mora miatriky raha karaha zen̈y. Fa ndray zen̈y azo atao fo mandresy. Diniha baka Enoka. Izy taranaka fahafito baka tamin’i Adama. (Joda 14) Enoka koa fa teraka, ankamarozan’olo efa ratsy fitondran-ten̈a mare. Irô nan̈ano volandratsy, aviô fitondran-ten̈andrô nangala baraka. (Joda 15) Mitovy amy raha ataony ankamarozan’olo amy ziôty raha nataondrô tamy fotoan̈a zen̈y.
Ke akôry nataon’i Enoka? Tiantsika amy ziôty hahay valiny fan̈ontanian̈a zen̈y. Enoka zaraiky fo olo nanompo Jehovah tambony tany teto tamy fotoan̈a zen̈y, fa ndray zen̈y izy tsy ten̈a latsatokan̈a. Enoka niaraka nandeha tamy Zan̈ahary.—Genesisy 5:22.
Han̈ano raha mamparavoravo Jehovah fo tanjon̈on’i Enoka. Hainy fa dikany miaraka mandeha amy Zan̈ahary zen̈y tsy vitany madio fitondran-ten̈a fo. Tian’i Jehovah koa izy hitory amin’olo. (Joda 14, 15) Olo aby io nila nampitandremin̈y fa misy mahita raha ratsy ataondrô. Mandilatran’ny 300 taon̈o Enoka tsy vôly niaraka nandeha tamy Zan̈ahary. Mbala tsisy amintsika nahavita niaritry elabe karaha zen̈y. Firaka izy naty, izy nan̈ano dia araiky tamy Zan̈ahary fo.—Genesisy 5:23, 24.
Karaha Enoka, nirahin̈y hitory atsika koa. (Matio 24:14) Atsika tsy basiny mitory isaka tran̈o fo fa mitady fomba koa ikoran̈ana vaovao tsara amin’ny havan̈a, mpiara-miasa, ndreky mpiara-mianatra. Ndray zen̈y, misy fotoan̈a atsika mety havozo. Asa anao efa tatran’izen̈y? Aza kivy. Aleva tahaka irô Kristianin̈y tamy taonjato voanalohany, baka iô angataha Zan̈ahary han̈amia korazy anao. (Asan’ny Apostoly 4:29) Aza adin̈a fa izikoa anao man̈ano dia araiky amy Zan̈ahary fo, anao tsy hahatsiaro latsatokan̈a loatra.
Man̈angy Maty Vady Araiky Mikarakara Hanin̈in’olo
Nisy man̈angy maty vady araiky nikarakara hanin̈y tsotra hely kanefadirekty nahazo fitahian̈a aroe. Tsy ambaran’ny Baiboly an̈aran̈anany. Izy tsy Israelita, fa vahiny nipetraka ta Zarefata tamy taonjato fahafolo T.K. Nisy mosary ndreky haintany nahadin̈y ela tamy tany nisy izy tan̈y. Efa hely hanin̈y tavela taminany tao koa fa narikitry ho tapitry mosary io. Lafariny felantan̈ana araiky ndreky menaka ampy andokisan̈a hanin̈y farany hoanindrô roen’ny zanany lelahy fo tavela taminany tao.
Tamy fotoan̈a zen̈y, nisy olo navy tamindrô tao. Tsy azôvy izio fa Elia mpaminan̈in’ny Zan̈ahary. Izy nangataka raha hely hoanin̈y tamy man̈angy io. Efa hanin̈y hely tsy ampy irô roen’ny zanany fo tao, ke azo antoko efa tsisy raha mety amian̈a lelahy io izy. Fa Elia nan̈amia toky izy ke nan̈ambara taminany volan̈an’i Jehovah fa izikoa rasainy aminany hanin̈indrô, irô roeny zanany tsy ho mosary. Nila nanan̈a finoan̈a izy baka hatoky fa Zan̈aharin’i Israely mahita izy nata izy tsy Israelita. Ndray zen̈y, izy natoky Elia, ke namezan’i Jehovah hatsaran̈a izy. “Tsy lany foeky lafariny tan̈atin’ny sajoa maventy, aviô tsy ritry foeky menaka tan̈atin’ny sajoa hely. Tsisy ny hafa tamy raha nivolan̈in’i Jehovah tamin’i Elia.” Firaka mosary io tapitry, irô roe mianaka nisy raha nihoanin̈y fo.—1 Mpanjaka 17:8-16.
Fa misy fitahian̈a araiky koa niambin̈y man̈angy io. Tsy ela tafaran’ny fahagagan̈a io, narary mare zanany tiany be in̈y ke naty. Nahinakinaka izy Elia ke nangataka tamy Jehovah hamelon̈o tsaiky lelahy io. (1 Mpanjaka 17:17-24) Ten̈a miavaka fahagagan̈a io. Talohan’io mbala tsiary nisy olo natsangana tamy maty. Ke Jehovah ma hamindra fô ndraiky amy man̈angy tsy israelita io? Ia. Namian’i Jehovah angôvo Elia ke nahavita namelon̈o tsaiky lelahy hely io. Karaha ty ho Jesosy tafara tatỳ momba man̈angy nahazo tombontsoa miavaka io: “Maro man̈angy maty vady tan’Israely ... Kanefa, Elia ... nalefa ... tamy man̈angy maty vady ta Zarefata a Sidona.”—Lioka 4:25, 26.
Amy ziôty miovaova toe-karian̈a, firaka amy tany efa mivohatra mare an̈y. Misy sôsiete sasany tsy maintsy nan̈adoso mpiasa sasany efa niasa tamindrô tao tan̈atin’ny taon̈otaon̈o. Kristianin̈y araiky mavozo mare tsao ho afakasa mety hitady fomba jiaby hahavy izy tsy ho afakasa. Ke izy mety han̈eky hampitombo lera hiasany. Kanefa raha zen̈y mety hahavy izy tsy ho afaka hivory, hitory, na hikarakara fianakavian̈anany amy lafiny ara-pan̈ahy ndreky ara-pihetseham-pô. Ndray zen̈y, izy mety hieritreritry fa izy tsy maintsy man̈ano raha hahavy izy tsy ho afakasa na ino na ino eky raha hafoeny.
Miasaloha mare Kristianin̈y araiky koa fa miatriky fahasahiran̈a ara-bola karaha zen̈y. Tsy mora baka mahita asa amin’andra ziôty. Ankamarozantsika karaha man̈angy maty vady ta Zarefata in̈y, atsika tsy mifen̈y hanjary mpan̈arivo, fa tiantsika fo izikoa atsika mba misy raha hoanin̈y isan’andra. Fa karaha ty volan̈an’ny Zan̈ahary nampatsiarovin’ny apostoly Paoly atsika: “Zaho tsy hiala anao foeky. Tsisy andra han̈ariako anao!” Ke atsika afaka matoky mare sady mivolan̈a karaha ty: “Jehovah mpan̈ampy zaho, ke tsy havozo foeky zaho. Ino ma raha mety ho vitan’olo hatao aminaka?” (Hebreo 13:5, 6) Paoly natoky fampan̈antinan̈a zen̈y ke Jehovah nikarakara izy fo. Karaha zen̈y koa ataon’ny Zan̈ahary amintsika izikoa atsika tsy man̈adin̈a izy.
Atsika mety hieritreritry karaha ty: ‘Tsisy andra zaho hahavita raha vitandrô olo nanam-pinoan̈a aby io, karaha ataon’iry Mosesy, Gideona, ndreky Davida.’ Marin̈y zen̈y, fa atsika afaka mangala tahaka finoan̈andrô. Alaintsika onon̈o fa hely fo raha nataon’i Abela, Enoka, ndreky man̈angy maty vady ta Zarefata in̈y. Nata hely fo raha ataon’olo araiky, fa izikoa izy manam-pinoan̈a, izy hitan’i Jehovah edy. Hitany mpianatra araiky mavozo izy ke tsy man̈eky hihina jamala amiandry namany izy. Hitany koa Kristianin̈y araiky tsy man̈eky han̈ano raha tsy manjary ampiasan̈a an̈y. Hitany irô rahalahy na ranabavy efa matoe mifen̈y fo mandeha mivory nata kajo na koa marary. Ravoravo Jehovah mahita irô!—Ohabolana 27:11.
Asa mba Hitanao Raha Ataon’olo?
Hitan’i Jehovah raha ataontsika. Ke atsika mila mangala tahaka izy koa. Mila alaintsika onon̈o ndreky deraintsika ezaka ataon’olo hafa. (Efesianina 5:1) Nan̈ino izikoa dinihinao tsara mety ino raha sarotro tsy maintsy iadivan’ny mpiara-manompo araiky baka izy ho afaka hivory, hitovy, ndreky baka tsy ho varian̈a amy fiain̈ana andavanandra?
Baka iô aboaha irô fa ankasitrahinao mare ezakandrô. Ho ravoravo irô mahay fa hitanao raha ataondrô, ke zen̈y han̈amia toky irô fa ndray Jehovah koa mba mahita irô.