Haiko Izioty fa Kaiky Zaho mba Afaka Man̈ampy Olo

FIAIN̈ANANAKA TALOHA:

Zaho teraka ta Acul, tanàna mitokana maro bongo andrefany Goatemalà. Fianakavian̈anaka baka amy foko maya, Ixil an̈arany. Ankoatrany volan̈anay, zaho mahay teny espan̈ioly koa. Lagera fo raha niain̈ako tan̈atiny 36 taon̈o ta Goatemalà teto. Naro Ixil naty tamy zen̈y.

Tamy zaho efatra taon̈o, nisy zokiko lelahy fito taon̈o nisoma grenady, ke raha io tsy nampoiziny nipoaka tampoko. Nisy navoa masonaka raha io, ke nanjary tsy nahita eky masonaka. Fa ny ten̈a nampalahelo, naty zokiko in̈y. Napetraka tamy tany fitaizan̈a olo jamba tamy provainsiny Goatemalà zaho baka tio, ke tan̈y zaho nianatra soratra Braille. Tsy azoko raha nataony papianatranay tan̈y, fotony zaho tsy nimboany nikoran̈a tamy tsaiky aby io, ke iro kamaradiko aby io tsy nikoran̈a taminaka eky. Nahatsiaro latsatokana zaho, fotony tsy karaha zen̈y foeky fataony mamako zaho lera zaho mandeha vakansy fanjava aroe taminay tan̈y. Mamako tsara fan̈ahy ndreky nahinakinaka zaho mare. Nampalahelo fa naty koa mamako io tamy zaho folo taon̈o. Ten̈a nalemy troko zaho fotony mamako zaraiky fo olo mba ten̈a tia zaho, kanefa naty koa izy.

Tamy zaho 11 taon̈o, zaho nimpody tamy tanànanay, ke zaho nipetraka tamy zokiko lelahy zay ndreky fianakavian̈anany. Nahavita nikarakara raha nilaiko ndraiky iro, fa iro fo tsy nahavita nan̈ano raha namparavoravo zaho. Natetiky zaho nivavaka tamy Zan̈ahary: “Nan̈ino mamako in̈y naty? Nan̈ino zaho jamba karaha ty?” Nivolan̈inolo taminaka fa izio efa lahatra Zan̈ahary. Safe fahaizako Zan̈ahary io ratsy fan̈ahy ndreky tsy mijery olo foeky. Zaho fa tsaiky hamono ten̈a aby fa tsisy raha nan̈anovako izy fo.

Mora malemy troko zaho fotony masoko tsy mahita, avio mora aminolo koa man̈araraotro zen̈y. Tamy zaho mbala hely, natetiky zaho naolan̈anolo. Tsisy olo nivolan̈ako izio, fotony karaha hitako tsy hijirendro aby zen̈y koa volan̈iko amindro. Mahalan̈a fo misy olo nikoran̈a taminaka, ke zaho tsy tihikoran̈a taminolo foeky. Nahatsiaro latsatokana ndreky kivy mare zaho, ke tsisy olo natokisako.

BAIBOLY NAN̈OVA FIAIN̈ANANAKA:

Tamy zaho kadiriny 12 taon̈o tio, nisy Vavolombelon̈o Jehovah fivadiany zay nan̈aton̈o zaho tamy zahay rekreasion ta lekoly tan̈y. Man̈angy papianatranay zay nan̈iraka iro hizaha zaho, fotony izy nahinakinaka zaho mare. Nambarandro zaho tamy Baiboly fa olo maty mbala hivilomin̈y, avio olo jamba mbala hahita ndraiky koa. (Isaia 35:5; Jaona 5:28, 29) Tiako raha nampianarindro zaho fa mbala sarotro taminaka nikoran̈a tamindro tamy zen̈y, fotony zaho tsy zatra nikoran̈a taminolo. Haindro raha zen̈y fa iro mbala navy fo nampianatra Baiboly zaho, avio iro tsara fan̈ahy taminaka fo ndreky naharidraha fo. Mandeha vity folo kilometra iro, izy amy zen̈y manonga bongo, mandeha amy tany misy zaho.

Nivolan̈iny zokiko in̈y taminaka fa iro olo fivadiany io olo tsy manan̈a fa iro madio fo. Fa kanefa iro tsara fan̈ahy taminaka oe sady mitondra raha amian̈a zaho fo. Olo mahafoe raha karaha zen̈y ho zaho ten̈a Kristianin̈y aminany.

Nianatra Baiboly tamy boky tamy soratra Braille zaho. Nazava tamy jerinaka raha jiaby nianarako, fa kanefa nisy raha sarotro tamy fonaka nan̈eky izy. Ohatra, sarotro taminaka nan̈eky fa Zan̈ahary tia zaho, avio sarotro taminaka koa nan̈eky fa mampiasa olo Zan̈ahary han̈aboahany fitiavany zaho. Nazava taminaka nan̈ino Jehovah mbala man̈ambela raha ratsy misy, fa sarotro taminaka nan̈eky fa Jehovah io Baba be fitiavan̈a.a

Izikoa fa nandeha fotoan̈a, nan̈ova jerinaka raha nianarako tamy Baiboly. Ohatra, nianarako fa Zan̈ahary ten̈a mahinakinaka olo mijaly. Karaha ty volan̈iny Zan̈ahary momba olo ampijalinolo: ‘Hitako tsarabe jaliny olonaka aby io. Haiko tsarabe jaly mahazo iro.’ (Eksodosy 3:7) Tiako mare toetriny Jehovah aby io, ke zaho nanokanten̈a taminany. Avio taminy 1998 zaho nanjary Vavolombelon̈o Jehovah vita batisa.

Kadiriny taon̈o araiky tafarany nivitany batisanaka, nisy fampianaran̈a olo jamba narikitry tanànany Escuintla tan̈y, ke zaho loso tan̈y. Hitany antipan̈ahy tamy fiangonan̈anay fa sarotro taminaka mandeha mivory. Fiangonan̈a farany narikitry zaho, mitovy amy lalan̈a fandihanandro olo fivadiany nampianatra zaho in̈y fo. Ke safe sarotro taminaka nandeha nivory. Ke antipan̈ahy io nitady Vavolombelon̈o Jehovah ta Escuintla tan̈y ke nisy fianakavian̈a araiky zay nangala zaho hipetraka tamindro tan̈y sady nitondra zaho nandeha mivory. Rango tamy zen̈y zaho nahatsapa fa karaha fianakavian̈andro in̈y.

Mbala maro raha mety tantaraiko amy fitiavandro olo miaraka mivavaka aminaka aby io zaho. Fa raha zen̈y nahavy zaho nan̈eky marin̈y fa ten̈a an̈atiny fivavahan̈a marin̈y ankitin̈y zaho koa fa nanjary Vavolombelon̈o Jehovah.—Jaona 13:34, 35.

HATSARAN̈A NAZOKO:

Efa tsy mahatsiaro tsisy dikany ndreky tsy nanan̈a fan̈antinan̈a eky zaho izioty. Ten̈a feno fan̈antinan̈a fiain̈ananaka. Zaho izioty mampianatra Baiboly man̈ariva andra miaraka amy Vavolombelon̈o Jehovah, ke mandany fotoan̈a ampianaran̈a olo ny marin̈y zaho fa tsy mandany lera mieritreritry masonaka tsy mahita io. Antipan̈ahy zaho izioty, ke tombontsoa maventy raha zen̈y. Safe zaho man̈ano kabaro baka amy Baiboly amy fiangonan̈anay koa. Tsy zen̈y fo fa zaho koa mahazo tombontsoa man̈ano kabaro baka amy Baiboly amy fivoriambeny vondroparitry misy olo mandeha andrivony aby.

Taminy 2010, zaho nahazo diplomy tamy Sekoly Fampiofanana ho Amin’ny Fanompoana (Sekolin’ny Mpitory Ilay Fanjakana izioty) ta El Salvador. Sekoly io nahavy zaho ho von̈ono hankatsara fan̈anovako andraikitrinaka amy fiangonan̈a. Nahatsiaro nisy valera tamy Jehovah ndreky tiany oe koa zaho tamy zen̈y, fotony izy afaka mampiasa olo isankarazany han̈ano asanany.

Jesosy nivolan̈a: “Man̈amia raha olo ten̈a mampasambatra toizay mahazo raha baka aminolo.” (Asan’ny Apostoly 20:35) Izioty zaho masaky mivolan̈a fa sambatra zaho, fotony zaho taloha tsy nieritreritry hahavita han̈ampy olo zen̈y foeky, fa haiko izioty fa kaiky zaho mba afaka man̈ampy olo.