Mifen̈a Fo Man̈aboaka Fitiavan̈a Izikoa fa Man̈ano Raha Ihavanan̈a

1, 2. Azovy aby olo koran̈iny bokiny Genesisy ao tsy nifan̈araka? Nan̈ino mahalian̈a atsika raha zen̈y?

Tantaranjovy amy Baibly ao avy an̈aty jerinao koa fa mikoran̈a olo tsy mifan̈araka zen̈y? Sasany amindro io koran̈iny bokiny Genesisy. Kaina namono Abela. (Gen. 4:3-8) Lameka namono lelahy tanora araiky nandratra izy. (Gen. 4:23) Tsiman̈ajany Abrahama (Abrama) ndreky Lota nankany. (Gen. 13:5-7) Hagara tsy tia Saraha (Saray) ke neloko taminy Abrahama Saraha. (Gen. 16:3-6) Tia niady taminolo jiaby Ismaela, ke olo jiaby niady taminany koa.​—Gen. 16:12.

² Nan̈ino Baiboly mitantara olo tsy mifan̈araka ambaka zen̈y? Antony araiky voanalohany, han̈ampy olo tsy lavorary hahay nan̈ino iro mila man̈ano raha ihavanan̈a aminolo tsy fan̈araka amindro. Ravoravo atsika lera mamaky tantara amy Baiboly ao momba olo miady amy raha manahiran̈a mahazo iro. Mianadraha baka aminy ezaka nataondro atsika ke ampiharintsika amy fiain̈anantsika koa raha zen̈y lera atsika miatriky problemo. Raha jiaby zen̈y man̈ampy atsika handiniky ino raha tokony ataontsika ndreky tsy tokony ataontsika amy lera atsika tojy raha mitovy amy zen̈y.​—Rom. 15:4.

3. Ino aby raha hidinihintsika amy lahatsoratra ty?

³ Amy lahatsoratra ty atsika handiniky nan̈ino panompony Jehovah mila man̈ano raha ihavanan̈a avio akory hahavitantsika raha zen̈y. Misy toro lalan̈a Baiboly koa ato han̈ampy atsika han̈ano raha ihavanan̈a ndreky hihavan̈a tsarabe fo amy Jehovah ndreky amintsika samy atsika.

NAN̈INO MA OLONY JEHOVAH MILA MAN̈ANO RAHA IHAVANAN̈A?

4. Ino toetsain̈y miparitaka erantany, avio ino vokany?

⁴ Baka amy Satana ten̈a mahavy olo miady ndreky tsy mifan̈araka io. Zen̈y hevitry naboakany tamy zaridain̈iny Edena tao. Kila olo afaka sady tokony hanapakevitry amy raha tsara ndreky ratsy ho izy, fa tsy mila Zan̈ahary zen̈y. (Gen. 3:1-5) Hitantsika izioty vokatrany hevitry ratsinany zen̈y. Tany ty feno olo mirehareha ndreky tsy tia volan̈iny, avio tia ady. Ten̈a tianolo hevitriny Satana io ke zen̈y mahavy olo maro tia ten̈a mare, ke tsy jirendro foeky vokatrany raha ataondro aminolo hafa. Raha karaha zen̈y aminjay mahavy ady. Ke tsara amintsika tsy man̈adin̈a fo fa “olo koa mora meloko, mampisy ady raha zen̈y. Avio man̈ano hadisovan̈a maro olo koa mora man̈ajima.”​—Ohab. 29:22.

5. Akory nampianarany Jesosy iro pianatranany aby io han̈ano raha ihavanan̈a?

⁵ Tsy karaha zen̈y foeky raha nampianariny Jesosy. Izy nampianatra olo han̈ano raha ihavanan̈a, ndray mety hampandefitry raha tiany izy. Tamy Toriteny Tan̈abony Bongo in̈y Jesosy nan̈amia torohevitry ten̈a tsara momba fomba fandaminan̈a ady na tsy fifan̈arahan̈a. Ohatra izioty, izy nandrisiky pianatranany halemy toetry, ho tia fihavanan̈a, tsy han̈ano ampô, handamin̈y malaky raha tsy ifan̈arahan̈a, ndreky ho tia fahavalondro.​—Mat. 5:5, 9, 22, 25, 44.

6, 7. a) Izikoa atsika tsy mifan̈araka aminolo, nan̈ino ma mila alamin̈intsika malaky raha zen̈y? b) Ino aby fan̈ontanian̈a tokony hapetrakany panompony Jehovah jiaby?

⁶ Atsika koa tsy man̈ano raha ihavanan̈a amy namantsika, tsisy varany ezaka jiaby ataontsika hanompoan̈a Jehovah, karaha ataony mivavaka, mivory, mitory ndreky mampianatra. (Mar. 11:25) Tsy ho kamaradiny Zan̈ahary koa atsika izikoa tsy von̈ono han̈ambela hadisovan̈anolo.​—Vakia Lioka 11:4; Efesianina 4:32.

⁷ Mila mandiniky tsarabe Kristianin̈y tsiaraikiaraiky momba fihavanan̈a aminolo ndreky fan̈ambilan̈a hadisovan̈anolo zen̈y. Asa anao ten̈a mamela heloko ankitin̈y? Ravoravo tsarabe ma anao koa fa miaraka amindro? Tiany Jehovah panomponany hazoto mamela heloko. Ke izikoa hitanao fa mbala mila miezaka anao amy raha zen̈y, mivavaha amy Jehovah, baka anao hahavita zen̈y. Tandrin̈esany Jehovah tsarabe vavaka karaha zen̈y, ke von̈ono koa izy hamaly.​—1 Jaona 5:14, 15.

TSAO IZIO METY AMBELA KARAHA IO FO?

8, 9. Izikoa misy olo nampameloko atsika, ino raha tokony hataontsika?

⁸ Mbala samy tsy lavorary atsika jiaby io, ke na ho ela na malaky, mbala mety hisy olo hivolan̈a na han̈ano raha hampameloko atsika. Tsy azo famaran̈a raha zen̈y. (Mpito. 7:20; Mat. 18:7) Ke akory hataontsika, izikoa fa misy raha karaha zen̈y? Diniha baka ohatra araiky ty: Misy Vavolombelon̈o Jehovah vitsivitsy man̈ano fiarahan̈a. Baka io misy rahalahy aroe nan̈ano mbalatsara ranabavy araiky. Araiky tamindro rahalahy io neloko tamy raha nivolan̈iny ranabavy io. Ke iro rahalahy aroe io koa fa nitokana, rahalahy araiky neloko io nankaratsy ranabavy io taminany. Fa rahalahy araiky io ndraiky nampatsiaro izy raha tsara vitany ranabavy io. Nivolan̈iny fa izy efa nanompo Jehovah tan̈atiny 40 taon̈o, ndray maro sarotro raha nandalovany. Ke namiany toky rahalahy io fa ranabavy io tsisy jery ratsy zen̈y. Loso diniky rahalahy io, avio izy nivolan̈a: “Marin̈y volan̈anao zen̈y.” Vokany, nilamin̈y problemo in̈y.

⁹ Ino raha ianarantsika baka amy zen̈y? Miankiny amy raha ataontsika tsiaraikiaraiky hampihavan̈a atsika na tsy hampihavan̈a atsika. Ke izikoa olo araiky be fitiavan̈a izy tsy ho sarotiny aminy hadisovan̈a madinidiniky. (Vakia Ohabolana 10:12; 1 Petera 4:8.) Amy Jehovah, “voninahitry” aminolo “man̈ambela hadisovan̈a” zen̈y. (Ohab. 19:11; Mpito. 7:9) Ke izikoa fa misy olo man̈ano raha mampameloko anao na karaha tsy man̈aja anao, man̈ontania ten̈a karaha ty: ‘Tsao mety ambela karaha io fo izio? Ten̈a problemo maventy ma izy ty?’

10. a) Tamy voanalohany, karakory nataony ranabavy io izikoa fa naharen̈y olo nankaratsy izy? b) Ino aby andininy amy Baiboly nan̈ampy ranabavy io hihavan̈a aminolo?

¹⁰ Mety ho sarotro amintsika han̈eky izikoa misy olo mivolan̈a atsika. Diniha baka ranabavy pisava lalan̈a araiky ty, Lucy natao an̈arany. Nisy olo nankaratsy fanompoan̈anany ndreky fomba fampiasany fotoan̈anany. Neloko Lucy, ke izy nangataka torohevitry tamy rahalahy maro matotro. Karaha ty ho Lucy: “Torohevitry namezandro zaho baka tamy Soratra Masin̈y nan̈ampy zaho hizaha toetry tsaranolo fo ndreky hifantoko amy Jehovah fo.” Avio izy nampirisihindro hamaky Matio 6:1-4. (Vakia.) Andininy aby io nampatsiaro izy fa tanjon̈onany tokony han̈ano raha mamparavoravo Jehovah fo. “Ravoravo fo zaho ndray misy olo mankaratsy fanompoan̈anaka, fotony haiko fa Jehovah hankasitraka zaho izikoa zaho man̈ano ny farany tsara mety ho vitako.” Izikoa fa tsapany raha zen̈y, izy tsy nijery raha volan̈inolo momba izy eky.

IZIKOA TSY METY AMBELA KARAHA IO FO PROBLEMO IO

11, 12. a) Karakory tokony hataony Kristianin̈y araiky, izikoa hainy fa nisy rahalahiny “tsy fan̈araka” aminany? b) Ino raha ianarantsika baka amy fomba nandaminany Abrahama problemondro ndreky Lota? (Zahava sary voanalohany amy fianaran̈a ty.)

¹¹ “Atsika jiaby io samy man̈ano hadisovan̈a, ary matetiky koa.” (Jak. 3:2) Miniminia hely baka ty. Ren̈inao fa nisy rahalahy araiky neloko tamy raha nivolan̈inao taminany na tamy raha nataonao taminany. Akory hataonao? Jesosy nivolan̈a: Izikoa anao mitondra fan̈amezan̈a hatao aminy alitara, ke iô anao mahatsiaro fa rahalahinao manan̈a alahelo aminao, ambilà alohany alitara iô fan̈amezan̈anao, fa mindao antsendriky mihavan̈a amy rahalahinao.” (Mat. 5:23, 24) Areha torohevitriny Jesosy zen̈y, ke mikoràn̈a amy rahalahinao na anabavinao io. Aza adin̈a fa tanjon̈onao amy zen̈y tsy raha hangala aro aminany fa hiala tsin̈y avio han̈ano raha hihavanan̈a. Fihavanan̈a io raha farany maventy.

¹² Tantarany Abrahama ndreky Lota zanaka rahalahiny nikoran̈intsika tamy voanalohany in̈y, tantara amy Baiboly man̈ampy atsika handamin̈y tsy fan̈arahan̈a. Iro io samy nanan̈a tarimindro, fa tsiman̈ajandro fo tsy nifan̈araka. Abrahama tsy tia fihavanan̈a, ke nirahiny nifidy aloha Lota, iro koa fa hifidy tany hifindrandro. (Gen. 13:1, 2, 5-9) Tsara arehan̈a jeriny Abrahama zen̈y. Izy tsy tia ten̈a fa tia fihavanan̈a. Natiatonko ma izy nan̈ano zen̈y? Aha. Tsy elany nisiany problemondro ndreky Lota io, Jehovah nampan̈anten̈a Abrahama raha maventy. (Gen. 13:14-17) Zan̈ahary tsy han̈ambela panomponany be fitiavan̈a hijaly, fotony nan̈ano raha mifan̈araka amy toro lalan̈anany, ke nan̈ano raha nihavanan̈a zen̈y.^[1]

13. Akory nataony piandraikitry faritry araiky izikoa fa nisy rahalahy tsy tsara koran̈a taminany, avio ino raha ianarantsika baka tamy raha nataony zen̈y?

¹³ Diniha koa iro olo aminy andra izioty. Misy piandraikitriny faritry vaovao man̈oman̈a fivoriambeny vondroparitry mikaiky rahalahy araiky amy telefony, man̈ontany izy tsao izy afaka man̈ano asa antsitrapo. Rahalahy araiky io aminjay nivolan̈a raha maro tsy parpare, avio nitapahany telefony. Izy baka mbala meloko amy piandraikitry faritrindro taloha. Piandraikitry faritry vaovao io tsy nasiaka izy, fa izio ndraiky tsy nety nambela karaha io fo. Koa fa nafaka lera araiky, nikahiny ndraiky rahalahy in̈y, ke nivolan̈iny taminany fa tiany iro mba mifanojy hiaraka handamin̈y problemo io. Herin̈iandra tafaranizio amy zay, iro roe fanojy tamy Tran̈o Fivorian̈a Tan̈y. Nivavaka antsendriky iro, avio nikoran̈a tan̈atiny lera araiky, ke rahalahy in̈y nitantara tamy piandraikitry faritry io raha nisy. Koa fa baka nitandren̈y izy tsarabe rahalahy piandraikitry faritry io, nan̈aboaka raha koran̈iny Soratra Masin̈y izy, ke nilamin̈y problemondro io. Tafaranizin̈y iro nafaka niaraka niasa tsarabe tamy fivoriambeny vondroparitry, ke rahalahy in̈y nan̈ano mersy piandraikitry faritry in̈y, fotony izy kalma ndreky tsara fan̈ahy taminany.

TOKONY HIVOLAN̈INAO AMINY ANTIPAN̈AHY MA IZIO?

14, 15. a) Lera karakory anao tokony han̈araka raha koran̈iny Matio 18:15-17? b) Ino ma dingana telo nikoran̈iny Jesosy, avio ino tokony ho tanjon̈ontsika izikoa atsika fa man̈araka iro io?

¹⁴ Tokony iro olo aroe tsy fan̈araka io fo antsendriky amy voanalohany handamin̈y raha tsy ifan̈arahandro. Fa Jesosy nivolan̈a fa mety koa ndraikindraiky mangataka fan̈ampian̈a. (Vakia Matio 18:15-17.) Misy dingana telo tsy maintsy hatao amy zen̈y. Fa karakory fo atao, izikoa araiky amindro aroe io efa nikoran̈ana fa tsy mijery foeky, avio efa nitondrasan̈a vavolombelon̈o, avio nata efa nivolan̈iny antipan̈ahy aby io? ‘Hatao mira iro olo amy donia ty ndreky olo pamory latety aby io’ izy. Izikoa atao amy volan̈a mahazatra atsika izioty, ho voaroaka izy. Fa tsy kila tsy fifan̈arahan̈a raha tiany Jesosy koran̈iny aminy “izikoa rahalahinao manota aminao.” Hadisovan̈a maventy raha io matoa izio mampavoaroaka, fa kanefa anaro aroe fo efa afaka mandamin̈y izy. Izio mety olo nikatramo namany, na fan̈indrikindrehan̈a nataonolo ke mandrobaka lazanolo io. Lera amy raha karaha zen̈y fo han̈arehan̈a dingana telo nikoran̈iny Jesosy io. Tsy tafiditry amy zen̈y olo nijanganjanga na nanambady lelahy karaha izy na man̈angy karaha izy, na nivadipinoan̈a, na nanompo sampy, na nan̈ano fahotan̈a maventy. Iro antipan̈ahy aby io fo tsy maintsy handamin̈y raha karaha zen̈y.

¹⁵ Tanjon̈ony Jesosy taminizy nan̈amia torohevitry han̈ampy rahalahy araiky io ampitiavan̈a. (Mat. 18:12-14) Amy voanalohany, olo araiky mahatsiaro misy problemo io man̈aton̈o olo tsy fan̈araka aminany io. Iro roe fo mikoran̈a fa tsisy olo hafa. Mety tsy indraiky fo izy mila man̈ano zen̈y. Izikoa mbala tsy milamin̈y fo, mangalà vavolombelon̈o araiky indesin̈y aminany an̈y, misy ahitan̈a asa ten̈a tsy mety ankitin̈y raha nataony. Izikoa fa milamin̈y problemo io, efa “azonao rahalahinao” io. Izikoa anao efa niezaka impirimpiry kanefa izio tsy mety voalamin̈y, iô anao vo tokony hikoran̈a aminy antipan̈ahy aby io.

16. Ino ivolan̈ana fa ten̈a tsara arehan̈a ndreky feno fitiavan̈a torohevitry nikoran̈iny Jesosy in̈y?

¹⁶ Mahalan̈a fo vo misy problemo ampiharan̈a Matio 18:15-17 io. Ten̈a mankahery raha zen̈y, fotony hita baka amy zen̈y fa tsy avy firaka amy fandroasan̈a problemo io. Ny raha misy baka, olo io koa fa mahatsapa fa tsy mety raha ataony, izy von̈ono hiova. Olo neloko amy raha nataony koa von̈ono handefitry aminany ke mamela helokonany. Fa na ino na ino raha mety misy, hita baka amy volan̈any Jesosy io fa tsy tokony haparitaka amy fiangonan̈a raha zen̈y. Iro antipan̈ahy aby io tsy han̈ano raha izikoa tsy efa natao dingana aroe io, avio iro efa mahazo porofo ampy tsarabe momba raha nandalo io.

17. Ino aby hatsaran̈a ho azontsika, izikoa atsika ‘man̈ano raha ihavanan̈a’ amy namantsika?

¹⁷ Koa mbala amy donia ty fo, tsisy olo lavorary ke tsy hampameloko olo zen̈y. Karaha ty nisoratiny Jakoba momba zen̈y: “Izikoa misy olo tsiary ndraiky diso tamy raha nivolan̈iny, dikanizen̈y izy olo lavorary, mahabeko ain̈inany jiaby.” (Jak. 3:2) Izikoa tiantsika han̈ano raha ihavanan̈a, atsika mila “mitady fihavanan̈a ndreky miaro izio.” (Sal. 34:14) Pampihavan̈a olo atsika, ke ho ravoravo atsika fotony ho tsara fihavanan̈a amy rahalahy ndreky ranabavintsika aby io, avio hampisy firaisantsain̈y amy fiangonan̈a. (Sal. 133:1-3) Fa an̈abony raha jiaby, ho tsara fihavanan̈a amy Jehovah atsika, “Zan̈ahariny fiadanan̈a.” (Rom. 15:33) Olo man̈ano raha ihavanan̈a ndreky be fitiavan̈a fo mahazo hatsaran̈a jiaby zen̈y.