Miomàn̈a Hiatriky Fan̈injehan̈a Rango Iziô

1. Nan̈ino ma atsika mila mioman̈a hiatriky fan̈injehan̈a?

ALIN̈Y talohany nifatesany Jesosy Tompo in̈y, nivolan̈a izy fa ho halanolo lan̈iany olo mifidy han̈aradia izy. (Jaona 17:14) Rango tamy zen̈y firaka amy zioty, injehinolo tsy panompony Jehovah fo lan̈iany Kristianin̈y tsy mivadiky amy Jehovah. (2 Tim. 3:12) Efa haintsika fa hahaimare fo fan̈injehan̈a atsika, arakaraka han̈aton̈any farany donia ty.​—Mat. 24:9.

2-3. a) Ino ma maharatsy tahotro? b) Ino raha hidinihintsika ato?

² Ke ino ma raha tokony hataontsika rango izioty, baka atsika ho von̈ono hiatriky fan̈injehan̈a? Atsika tsy mila miasaloha mare amy raha ratsy jiaby mety mbala hataonolo amintsika. Atsika koa man̈ano karaha zen̈y, efa havozo mare atsika, nata mbala tsisy olo man̈enjiky atsika. (Ohab. 12:25; 17:22) Tahotro io tetiky ten̈a mahomby ampiasainy Satana ‘Devoly fahavalontsika’ io, baka atsika hivadiky amy Jehovah. (1 Pet. 5:8, 9) Ke ino raha tokony hataontsika rango izioty, baka atsika ho von̈ono tsarabe hiatriky fan̈injehan̈a?

³ Hizahavantsika amy lahatsoratra ty ato akory fomba hankafatarantsika fifandraisantsika amy Jehovah, avio nan̈ino raha zen̈y tokony hataontsika rango zioty. Ho hitantsika koa akory tokony hataontsika baka atsika hahaihisy korazy fo. Amy farany amy zay, atsika handeha hizaha akory tokony hataontsika, atsika koa fa halanolo panohitry aby io.

INO HAN̈AMPY ANAO HIFANDRAY TSARABE AMY JEHOVAH?

4. Izikoa Hebreo 13:5, 6 zahan̈a, ino raha tsy maintsy mamparesy lahatra atsika? Nan̈ino?

⁴ Atsika mila resy lahatra fa Jehovah ten̈a tia atsika ndreky tsy hiala atsika foeky. (Vakia Hebreo 13:5, 6.) Taon̈o maro loso zay, karaha ty nikoran̈iny Tilikambo Fiambesan̈a araiky zay: “Izikoa fa misy fan̈injehan̈a, lan̈iany olo mahay tsarabe Jehovah fo hatoky izy.” Marin̈y raha zen̈y! Ke izikoa atsika tsitihavadiky amy Jehovah, atsika tsy maintsy tia izy ndreky matoky izy tsarabe, avio tsy tokony hisalasala atsika fa izy ten̈a tia atsika.​—Mat. 22:36-38; Jak. 5:11.

5. Ino han̈ampy anao hahatsapa fa anao tiany Jehovah?

⁵ Vakia isanandra Baiboly, ke ataova tanjon̈o hifandray amy Jehovah tsarabe. (Jak. 4:8) Anao koa fa mamaky Baiboly, mifantoha amy toetriny Jehovah, ohatra izy be fitiavan̈a, mamindra fô ndreky tsara fan̈ahy. Zahava koa ino amy raha volan̈iny ndreky ataony ahitanao fa izy ten̈a tia anao. (Eks. 34:6) Sarotro aminolo sasany hahatsapa fa Jehovah tia izy, fotony tsiary nisy olo nan̈aboaka fitiavan̈a tamindro. Izikoa karaha zen̈y raha niain̈anao, man̈anaova listy isanandra, ke sorata ao ino aby raha nan̈aboahany Jehovah fa izy mamindra fô ndreky tsara fan̈ahy taminao. (Sal. 78:38, 39; Rom. 8:32) Ke izikoa anao mieritreritry raha niain̈anao ndreky misaintsain̈y raha nivakinao tamy Baiboly tao, matokisa fa ho maro raha efa nataony Jehovah taminao ho tsiaronao. Anao amy zay koa mankasitraka hatsaran̈a jiaby nazonao taminany, hahaiharikitry izy fo anao.​—Sal. 116:1, 2.

6. Izikoa Salamo 94:17-19 zahan̈a, nan̈ino ten̈a ilain̈a man̈ano vavaka baka amy fô?

⁶ Aza voly mivavaka. Miniminia hely tsaiky lelahy araiky injoniny papany ten̈a tia izy. Tsisy raha mampavozo izy foeky. Tsisy raha tsy tantarainy amy papany, na raha mamparavoravo izy na raha mampalahelo izy taminy andra io. Karaha zen̈y koa anao izikoa man̈ano vavaka baka an̈atiny fônao isanandra. Hifandray marikitry amy Jehovah anao. (Vakia Salamo 94:17-19.) Anao koa mivavaka amy Jehovah, “aboraha amy Jehovah karaha ataony rano ahidin̈y in̈y raha an̈aty fonao.” (Fitom. 2:19) Ino amy zay vokany? Ho tsapanao tsarabe “fiadanan̈a Zan̈ahary, bebeny eritreritry jiaby.” (Fil. 4:6, 7) Anao koa zatra mikoran̈a matetiky aminany, hahaiharikitry izy fo anao.​—Rom. 8:38, 39.

7. Nan̈ino anao tokony ho resy lahatra fa ho tanteraka ankitin̈y zay raha ampan̈antinainy Jehovah fa hataony Fanjakan̈anany?

⁷ Ataova raha hahavy anao ho resy lahatra fa ho tanteraka ankitin̈y zay raha ampan̈antinainy Jehovah fa hataony Fanjakan̈any. (Nom. 23:19) Anao koa baka tsy matoky tsarabe fa ho tanteraka raha zen̈y, ho mora amy Satana ndreky iro panohan̈a izy aby io hampitahotro anao. (Ohab. 24:10; Heb. 2:15) Ke ino raha mety hataonao rango izioty baka anao hahaihatoky Fanjakan̈any Zan̈ahary? Manokàna fotoan̈a, ke ataova fikarohan̈a ino raha ampan̈antinainy Jehovah fa hataony Fanjakan̈anany, avio ino porofo fa izio tsy maintsy ho tanteraka. Ten̈a han̈ampy anao ma fan̈anaovan̈a zen̈y? Ia. Diniha baka raha nahazo Rahalahy Stanley Jones. Nigadrain̈a nohony finoan̈anany izy tan̈atiny fito taon̈o.b Ino raha nan̈ampy izy tsy hivadiky? Ho izy: “Fatatra tsarabe finoan̈anaka, fotony haiko tsarabe karakory Fanjakan̈any Zan̈ahary zen̈y. Nazava taminaka tsara raha hataonizio, sady zaho ten̈a natoky fa tsy maintsy ho tanteraka raha zen̈y. Tsy nisalasala foeky zaho nata ny hely! Zen̈y raha nahavy zaho tsy nivadiky foeky.” Ke anao koa matoky raha ampan̈antinainy Jehovah, hifandray marikitry aminany anao sady tsy ho resiny tahotro zen̈y foeky.​—Ohab. 3:25, 26.

8. Karakory havitantsika hiatriky fan̈injehan̈a? Hazavà.

⁸ Mifen̈a fo mivory tsy tapaka. Fivorian̈a aby io man̈ampy atsika hifandray marikitry amy Jehovah. Ten̈a raha maventy aminao ma fandihanan̈a mivory io? Baka amy zen̈y ahitanao na anao hahavita hiatriky fan̈injehan̈a na tsy hahavita. (Heb. 10:24, 25) Nan̈ino ma atsika mivolan̈a zen̈y? Izikoa olo araiky tatrany problemo hely efa tsy mandeha mivory, izy tsy hahavita handeha hivory koa lera fanjakan̈a tsy han̈omba atsika hivory afara an̈y. Fa izikoa ndraiky atsika efa tapakevitry tsy hanapatapaka fivorian̈a rango izioty, tsisy olo hahavita hisakana atsika tsy hivory aminy amaray an̈y. Ke ten̈a tsara izikoa rango izioty atsika efa tia mivory. Atsika koa baka man̈ano ambaka zen̈y, ho vitantsika fo han̈araka volan̈a Zan̈ahary, fa tsy han̈araka volan̈anolo. Ke na iro panohitry aby io hisakana atsika, na fanjakan̈a foeky tsy han̈omba atsika hivory, atsika mbala hivory fo.​—Asa. 5:29.

9. Nan̈ino ten̈a ilain̈a man̈ano tsianjery andininteny, izikoa tihioman̈a hiatriky fan̈injehan̈a?

⁹ Ataova tsianjery iro andininy ten̈a tianao. (Mat. 13:52) Marin̈y fa ndraikindraiky sarotro amintsika mitadidy raha. Fa ndray zen̈y, fan̈ahy masin̈iny Jehovah io ten̈a mahery, ke Jehovah afaka mampiasa izio hampatsiaro anao iro andininy aby io. (Jaona 14:26) Ohatra, nisy rahalahy araiky nigadra tan Allemagne Antian̈ana. Tsy nasian̈a naman̈a izy tao fa izy zaraiky fo. Karaha ty raha nivolan̈iny: “Nakiry izy mba efa nisy andininteny mandeha anjatony haiko tsianjery, talohany nigadrako. Ke tsy nahatsiaro latsatokana zaho fotony nisaintsain̈y hevitry isankarazany baka amy Baiboly.” Iro andininy aby io nan̈ampy izy hifandray marikitry tamy Jehovah fo, ke raha zen̈y nahavy izy nahavita niaritry sady tsy nivadiky.

10. Nan̈ino ma atsika mila man̈ano tsianjery iro hirantsika aby io?

¹⁰ Ianara tsianjery iro hirantsika aby io. Paoly ndreky Silasy nahay tsianjery iro hira natao hideran̈a Jehovah tamy zen̈y. Ke iro koa fa nigadra ta Filipy, iro nihira. (Asa. 16:25) Fan̈anaovan̈a hira zen̈y koa raha nan̈ampy iro rahalahy ndreky ranabavy tamy Firaisan̈a Sovietiky taloha. Karaha ty nivolan̈iny ranabavy araiky, Mariya Fedun an̈arany: “Nataonay hira jiaby azonay onon̈o tan̈aty fihiranantsika.” Nivolan̈iny fa hira aby io nan̈ampy iro jiaby ke loso nahatsiaro nahainarikitry Jehovah fo iro. Mahazo korazy koa ma anao koa fa mihira hirany fandaminan̈a ten̈a tianao aby in̈y? Ataova tsianjery edy basy hirantsika aby io!​—Zahava efajoro “Amia Korazy Zaho.”

INO HAN̈AMPY ATSIKA HAHAIHISY KORAZY FO?

11-12. a) Izikoa 1 Samoela 17:37, 45-47 zahan̈a, ino nahavy Davida nisy korazy mare? b) Ino raha maventy ianarantsika baka amy tantarany Davida in̈y?

¹¹ Mila korazy atsika baka havita hiatriky fan̈injehan̈a. Izikoa anao mahita fa karaha tsy dia misy korazy, ino raha tokony hataonao? Aleva onon̈o fa korazy io tsy miankin̈y aminy habezan̈a, angovo na fahaizan̈anao. Zahava fo baka Davida taminizy niady tamy Goliata in̈y. Tsisy dikany foeky Davida koa tankilany Goliata, fotony Davida olo hely, tsy ampy angovo salakady tsisy fitaovampiadian̈a. Ndray sabatra aby tsy nanan̈any. Fa izy nisy korazy mare ke tsy navozovozo foeky izy nilomoay hiady tamy Goliata, lelahy maventy salakady poerapoera mare io.

¹² Baka taia nahavy Davida nisy korazy be karaha in̈y? Izy natoky mare fa Jehovah nan̈ampy izy. (Vakia 1 Samoela 17:37, 45-47.) Hitany Davida tsarabe Goliata io maventy be, fa izy tsy nampiran̈a ain̈inany tamy Goliata. Nampitovisiny tamy Jehovah i Goliata, fotony tsisy dikany Goliata izikoa ampitahain̈a amy Jehovah. Ino raha ianarantsika baka amy tantara io? Hahaihisy korazy fo atsika, izikoa matoky fa Jehovah iô fo han̈ampy atsika, avio matoky fa tsisy dikany iro panohitry atsika aby io izikoa ampitovisin̈y amy Zan̈ahary Farany Mahery io. (2 Tan. 20:15; Sal. 16:8) Fa ino raha mety hataontsika, baka atsika hahaihisy korazy fo, nata mbala tsisy fan̈injehan̈a?

13. Akory hahavy atsika hahaihisy korazy? Hazavà.

¹³ Hahaihisy korazy fo atsika, izikoa mitory vaovao tsara momba Fanjakan̈any Zan̈ahary. Atsika koa baka mitory io, mianatra matoky Jehovah atsika sady mianatra mandresy fahatahoran̈a olo. (Ohab. 29:25) Fanan̈ana korazy io karaha hozatra fo. Atsika koa ampy spaoro, mahaifatatra fo hozatrantsika. Mira zen̈y koa atsika koa zatra mitory na isaka tran̈o zen̈y na amy tany maro olo, na man̈ano fitorian̈a tsy arapotoan̈a, na mitory amy tany fiasanolo, hahaihisy korazy fo atsika. Sady atsika koa zatra mitory rango izioty, mbala von̈ono hitory fo atsika nata tsy himboan̈a man̈ano zen̈y afara an̈y.​—1 Tes. 2:1, 2.

14-15. Ino aby raha ianarantsika baka amy Ranabavy Nancy Yen ndreky Valentina Garnovskaya?

¹⁴ Atsika hangala fianaran̈a baka amy ranabavy aroe nanan̈a korazy ke tsy nivadiky: Ranabavy Nancy Yen ndreky Valentina Garnovskaya. Ranabavy Nancy Yen io metra araiky sy sasany fo alavasany, fa izy tsy mety niribiriben̈y zen̈y foeky.c Tsy narin̈y taminany foeky tsy hitory vaovao tsara zen̈y, ke izy nigadrain̈y fitondrasan̈a koministy sinoa tan̈atiny 20 taon̈o. Nivolan̈iny manampahifan̈a nan̈ano ankety izy fa izy olo “farany mafy loha” amy firenenandro!

¹⁵ Karaha zen̈y koa Ranabavy Valentina Garnovskaya. Intelo aby izy nigadrain̈y tamy Firaisan̈a Sovietiky taloha. Ke izikoa atambatra taon̈o jiaby nigadrany, efa nandeha 21 taon̈o.d Ino antony? Fotony izy tapakevitry mare hitory fo, ke nataony manampahifan̈a fa “olo pandika lalàn̈a tsisy ambaka izy” zen̈y. Ino nahavy iro ranabavy aroe io hanan̈a korazy be karaha zen̈y? Fotony iro resy lahatra aminy ankitiny fa Jehovah miaraka amindro fo.

16. Ino raha tokony hataontsika baka atsika ten̈a hisy korazy?

¹⁶ Efa nikoran̈intsika fa atsika koa tiho hisy korazy, tsy tokony hitoron̈o angovontsika na fahaizan̈antsika. Tsy maintsy matoky atsika fa Jehovah han̈ampy atsika fo, avio izy hiady nintsika. (Deot. 1:29, 30; Zak. 4:6) Zen̈y raha ten̈a hampisy korazy atsika.

INO TOKONY HATAONTSIKA IZIKOA ATSIKA HALANOLO?

17-18. Ino raha nivolan̈iny Jesosy fa hiboaka, izikoa Jaona 15:18-21 io zahan̈a? Nan̈ino ma atsika halanolo?

¹⁷ Ndray tiantsika atsika hajainolo, zen̈y tsy mivolan̈a fa lera atsika maro olo tia fo atsika vo misy dikany. Jesosy nivolan̈a: “Sambatra anaro ndray halanolo ndreky ailikilikindro, avio hankaratsindro ke ataondro ratsy fan̈ahy, fotony baka amy Zanakolo mahavy anaro atao karaha zen̈y.” (Lioka 6:22) Ino ma raha tiany Jesosy havian̈a amy zen̈y?

¹⁸ Jesosy tsy nivolan̈a fa tiandro Kristianin̈y aby io iro koa halanolo. Fa izy zisty tihampitandrin̈y atsika amy raha mety handalo. Tsy maintsy ho halanolo atsika, fotony atsika tsy an̈isany donia ty sady atsika koa man̈araka raha nampianariny Jesosy, avio mitory hafatra nitoriany. (Vakia Jaona 15:18-21.) Fa raha mamparavoravo Jehovah fo raha ataontsika io. Ke atsika tia Jehovah Babantsika io fo, ndray azovy tia atsika ndray azovy malain̈y.

19. Akory angalantsika tahaka raha nataondro apostoly aby io?

¹⁹ Ke na ino na ino raha volan̈inolo na raha ataondro atsika, aza men̈atra foeky mivolan̈a fa anao Vavolombelon̈o Jehovah. (Mika 4:5) Hitantsika aminy ohatrandro apostoly ta Jerosalema, tafara heliny nifatesany Jesosy fa atsika afaka mandresy fahavozoan̈a olo. Efa haindro fa iro pitondra fivavahan̈a jiosy aby io tsy tia iro mare. (Asa. 5:17, 18, 27, 28) Fa iro mbala nandeha tamy tempoly fo isanandra. Avio mbala nambarandro olo fo fa iro pianatrany Jesosy. (Asa. 5:42) Iro tsy nan̈eky ho resiny tahotro zen̈y foeky. Karaha zen̈y koa atsika. Tsy havozo olo koa atsika izikoa ambarantsikai ro fo fa atsika io Vavolombelon̈o Jehovah, na olo io lekoly araiky amintsika, na olo miaraka miasa amintsika, na olo jiranintsika.​—Asa. 4:29; Rom. 1:16.

20. Nan̈ino ma iro apostoly aby io nahatsiaro sambatra fo ndray halanolo?

²⁰ Nan̈ino iro apostoly aby io sambatra fo nata iro ninjehin̈y? Fotony haindro antony nahavy iro halanolo, ke voninahitry maventy tamindro iro nampijalin̈a baka tamy fan̈anaovandro sitrapony Jehovah. (Lioka 6:23; Asa. 5:41) Karaha ty raha nisoratiny apostoly Petera tafaranizin̈y: “Sambatra anaro izikoa baka amy fan̈anaovan̈a ny marin̈y mampijaly anaro.” (1 Pet. 2:19-21; 3:14) Izikoa fa mazava amintsika fa nohony fan̈anaovantsika ny marin̈y tsy itiavanolo atsika, atsika tsy ho voly foeky hanompo Jehovah, ndray atsika halanolo.

HO MARO HATSARAN̈A HO AZONAO IZIKOA ANAO MIOMAN̈A TSIALOHALOHA

21-22. a) Ino raha iritriretinao hatao baka anao ho von̈ono hiatriky fan̈injehan̈a? b) Ino raha hidinihintsika amy lahatsoratra man̈araka?

²¹ Tsisy olo mahay raha hiboaka aminy amaray. Tsy haintsika asa mety hinjehin̈y tampoko atsika io, na mety tsy himboany fanjakan̈a hitory eky atsika. Ke tokony hifen̈y fo atsika hifandray marikitry amy Jehovah ndreky hahaihisy korazy fo, avio hianatra hiaritry izikoa fa misy olo tsy tia atsika. Izikoa atsika efa mioman̈a rango izioty, hahavita tsy hivadiky koa atsika aminy amaray.

²² Ke akory tokony hataontsika izikoa tsy himboany fanjakan̈a mitory atsika? Amy lahatsoratra man̈araka atsika handiniky toro lalan̈a han̈ampy atsika hanohy hanompo Jehovah fo.