Mamparavoravo Anao ma Mitory Vaovao Tsara?

Sarotro aminao ma mitory? Maro amintsika mety hivolan̈a ia. Nan̈ino? Fotony mety tsy lian̈a na manohitry olo amy faritanintsika, na atsika foeky mety mavozo hikoran̈a aminolo tsy haintsika. Ke mety tsy ho ravoravo eky atsika. Kanefa Zan̈ahary tompoentsika io, Zan̈ahary ravoravo, ke tiany ho ravoravo atsika izikoa fa manompo izy. (Sl 100:2; 1Ti 1:11) Ino antony telo tokony hamparavoravo atsika mitory?

Voanalohany, hafatra mampisy fan̈antinan̈a torintsika io. Tsy tsara fan̈antinan̈anolo momba ny hoavy, kanefa atsika mety man̈ampy iro hahay ‘vaovao tsara momba raha tsara mare.’ (Is 52:7) Ten̈a mamparavoravo atsika koa vaovao tsarany Fanjakan̈any Zan̈ahary. Ke miniminia hatsaran̈a hindesiny Fanjakan̈a io, alohany anao handeha hitory.

Faharoe, mahatsara olo vaovao tsara torintsika io. Man̈ampy iro hiala amy fahazaran̈a ratsy izio. Loso man̈anten̈a hiain̈y mandrakizay koa iro. (Is 48:17, 18; Ro 1:16) Mamonjy ain̈inolo asantsika ty, karaha atao mamonjy olo dobo andrano in̈y. Ndray misy olo tsy tihovonjen̈a, atsika mbala mitsakaraka iro olo man̈iry ho voavonjy.—Mt 10:11-14.

Fahatelo, sady ten̈a maventy, man̈amia voninahitry Jehovah fitorian̈a ataontsika. Valera aminany asa fitorian̈a ataony Vavolombelon̈onany. (Is 43:10; He 6:10) Tsy zen̈y fo, izy von̈ono han̈amia atsika fan̈ahy masin̈y baka ho vitantsika asa io. Ke iangavia Jehovah baka han̈amia anao haravoan̈a, fotony vokatrany fan̈ahy masin̈y izio. (Ga 5:22) Han̈ampy anao tsy hiasa loha ndreky hasaky hitory izy. (As 4:31) Amy zen̈y hamparavoravo anao fo mitory, na mandray olo amy faritany na tsy mandray.—Ezk 3:3.

ZAHAVA VIDEO HO RAVORAVO NDRAIKY ANAO IZIKOA MIANATRA NDREKY MISAINTSAIN̈Y, AVIO VALIA FAN̈ONTANIAN̈A ABY TY:

• Nan̈ino tokony hataontsika voalohantoeran̈a fianaran̈a Baiboly, ndray atsika mandany lera maro hitorian̈a isaka fanjava?

• Akory angalantsika tahaka Maria?

• Isaka ino anao misaintsain̈y Volan̈a Zan̈ahary?

• Ino raha mamparavoravo anao koa fa mitory vaovao tsara?