Karakory Fomba Han̈anovan̈a Fivorian̈a Alohany Fanompoan̈a?

Fivorian̈a alohany fanompoan̈a io fan̈amezan̈a baka amy Jehovah karaha fivorian̈a amy fiangonan̈a fo. Izio ahavitantsika mifandrisiky amy fitiavan̈a ndreky asa tsara. (He 10:24, 25) Tokony ho vita an̈atiny dimy na fito minity izio, an̈atinizen̈y fizaran̈a olo ndreky faritany, baka io vavaka. (Izikoa izio atao lera vita fivorian̈a, tokony hatao fohifohikiny zen̈y.) Rahalahy mitariky izio tokony han̈oman̈a raha ten̈a ilainy pitory aminy andra io. Ohatra, ankamarozany pitory tsy afaka manompo izikoa tsy farany herin̈andra. Ke tsara izikoa ampody ndraiky raha mety koran̈iny amy fanompoan̈a. Ino aby ma raha mety dinihin̈y amy fivorian̈a alohany fanompoan̈a?

• Raha mety koran̈iny amy Fomba Fiain̈ana Kristianin̈y Ndreky Fanompoan̈a: Boky Fianaran̈a

• Karakory hampiasan̈a vaovao nandalo vo tsy ela na vaovao niboaka amy gazety anombohan̈a koran̈a?

• Karakory hamalian̈a fanoheran̈a matetiky misy amy faritany?

• Karakory hikoran̈ana aminolo tsy mino Zan̈ahary, olo mino evolision, olo mampiasa volan̈a hafa, ndreky aminolo efa manan̈a fivavahan̈anany?

• Karakory fampiasan̈a tranonkala jw.org, fampiasan̈a JW Library^®, na fampiasan̈a Baiboly?

• Karakory fampiasan̈a Fitaovan̈a Fampianaran̈a?

• Karakory atao mitory amy telefony, mitory amy taratasy, mitory amy tany maro olo, man̈ano fiveren̈ana mitsidiky, ndreky mampianatra Baiboly?

• Fampatsiarovan̈a momba fiarovanten̈a izikoa fa mitory, fahaizan̈a mandanjalanja, fahalalampomba, toetsain̈y tsara, na raha miramira zen̈y

• Leson araiky na video araiky baka amy bokikely Mifen̈a Mare amy Vakiteny Avio Fampianaran̈a

• Akory atao mifan̈ampy ndreky mifampahery lera amy fanompoan̈a?

• Mandiniky andininteny araiky misy ifandraisany amy fanompoan̈a na fitantaran̈a tamy fanompoan̈a tamy saha