Man̈ano Pisava Lalan̈a

Mampiasa angovontsika amy fomba tsara atsika, izikoa manan̈a tanjon̈o amy fanompoan̈a Jehovah. (1Ko 9:26) Hahay hampiasa tsarabe fotoan̈antsika koa atsika izikoa man̈ano zen̈y, fotony efa tsy ela hiravanin̈y donia ratsy ty. (Ef 5:15, 16) Diniha amy fotoampivavahan̈a ataonaro, ino aby tanjon̈o mety takarinaro amy taompanompoan̈a vaovao io. Baka han̈ampian̈a anaro amy zen̈y, nasian̈a lahatsoratra mikoran̈a iro tanjon̈o mety dinihinaro ndreky ampidirinaro amy vavaka, amy boky fianaran̈antsika amy fanjava ty.​—Jk 1:5.

Ohatra, asa misy araiky aminaro mba mety tohan̈anaro han̈ano pisava lalan̈a maharitry? Izikoa anao mavozo tsao tsy hahatakatra lera, mangataha hevitry amy pisava lalan̈a sasany efa navy nanan̈a problemo karaha zen̈y. (Oh 15:22) Mety mikaiky araiky amindro io anaro, amy fotoampivavahan̈anaro, ke an̈ontania izy raha jiaby tianaro han̈ontanian̈a. Sorata amy zay programo isankarazany mety hanakaranao leranao. Fa izikoa anao efa navy nan̈ano pisava lalan̈a taloha, diniha ndraiky fiain̈ananao izioty, tsao anao efa afaka mimpody.

Asa misy araiky aminaro mety afaka man̈ano pisava lalan̈a pan̈ampy fanjava araiky na mandilatra zen̈y? Ndray anao tsy matanjaka tsarabe, mbala afaka man̈ano pisava lalan̈a pan̈ampy fo anao, izikoa manokan̈a fotoan̈a hely han̈anaovan̈a fanompoan̈a isanandra. Izikoa ndraiky anao tsy afaka miboaka isanandra fotony anao miasa man̈ariva andra na mandeha lekoly, anao mety man̈ano pisava lalan̈a pan̈ampy lera vakansy na lera amy fanjava misy farany herin̈iandra dimy. Sorata amy kalandrie na amy raha hafa ladaty tianao han̈anaovan̈a pisava lalan̈a pan̈ampy, avio sorata programo hanakaranao leranao.​—Oh 21:5.

ZAHAVA VIDEO KORAZY FO ANARO...PISAVA LALAN̈A AVIO TADIAVA VALINY FAN̈ONTANIAN̈A ABY TY:

• Izikoa tantarany Ranabavy Aamand in̈y zahan̈a, akory nahitan̈a fa Jehovah tia ndreky mikarakara lan̈iany olo mahafoe ten̈a man̈ano pisava lalan̈a?