Tiantsika Mare Jehovah Babantsika Io

1-2. Nan̈ino Jehovah nitady fomba hahavy atsika ho an̈isany lafamìnany? Akory nan̈anovany zen̈y?

JEHOVAH nitaon̈o atsika hanjary an̈isany fianakaviambenolo manompo izy. Ravoravo mare atsika nitahôminy! Lan̈iany olo an̈isany fianakavian̈a io nanokanten̈a tamy Zan̈ahary ndreky mino soropan̈avotany Zanany. Fianakavian̈a ravoravo ivolan̈ana fianakaviambentsika io. Ravoravo atsika fotony rango zioty misy dikany fiain̈anantsika. Man̈anten̈a fiain̈ana tsisy farany koa atsika aminy amaray an̈y, na andan̈itry an̈y zen̈y na amy Paradisa ambony tany eto.

² Ino nahavy Jehovah nitady fomba hahavy atsika ho an̈isany lafamìnany? Fitiavany atsika. Nataony soron̈o ain̈iny zanany baka raha zen̈y tanteraka. (Jaona 3:16) Atsika io “efa avoavanga.” (1 Kor. 6:20) Nan̈amia vidipan̈avotan̈a izy, baka atsika ho tsara fifandraisan̈a aminany. Iritrireta hely baka! Jehovah Farany An̈abo amy raha jiaby, kanefa atsika afaka mikaiky izy Baba! Ten̈a voninahitry maventy raha zen̈y. Efa haintsika koa fa tsisy baba ten̈a tsara mandilatra izy.

3. Ino aby fan̈ontanian̈a mety hapetrakantsika, izikoa atsika fa mandiniky raha tsara nataony Jehovah? (Zahava koa amy “Zaho ma Jireny Jehovah?”)

³ Karaha ty nivolan̈iny panoratra Baiboly: “Ino raha hamezako Jehovah hamaliako raha tsara jiaby nataony taminaka?” (Sal. 116:12) Asa anao mba fa nieritreritry karaha zen̈y? Ny marin̈y aminany, tsy ho voavalintsika foeky hatsaran̈a jiaby nataony Jehovah tamintsika. Ndray zen̈y, atsika afaka mankatia izy. Karaha ty nivolan̈iny apostoly Jaona: “Atsika tia, fotony izy efa tia atsika voanalohany.” (1 Jaona 4:19) Ke akory han̈aboahantsika fa atsika tia izy?

MIFEN̈A FO HO KAMARADINY JEHOVAH

4. Koa zahan̈a Jakoba 4:8, nan̈ino ma atsika tokony hifen̈y hanjary kamaradiny Jehovah?

⁴ Tiany Jehovah hifandray aminany ndreky ho kamaradiny atsika. (Vakia Jakoba 4:8.) Izy mandrisiky atsika tsy voly hivavaka, ary izy von̈ono fo hitandren̈y atsika amy fotoan̈a jiaby. (Rom. 12:12) Tsy mampanahiran̈a izy na mampakajo izy aby mitandren̈y atsika. Fa atsika fo mila mitandren̈y izy koa. Amy fomba karakory? Lera atsika mamaky Baiboly, ndreky iro boky ndreky gazety man̈ampy atsika hahazo raha koran̈iny Baiboly. Mitandren̈y izy koa atsika izikoa mifantoko tsarabe lera mivory. Tsaiky koa mikoran̈a matetiky aminolobeny, hanjary kamarady edy iro. Hanjary kamaradiny Jehovah koa atsika izikoa mivavaka isanandra.

5. Karakory mety hankatsarantsika vavakantsika?

⁵ Tiany Jehovah hikoran̈intsika aminany aby raha jiaby an̈aty jerintsika ndreky fontsika. (Sal. 62:8) Diniha amy zay vavakanao, ke man̈ontania ten̈a karaha ty: ‘Karakory ma hatsaran̈any vavakanaka? Karaha olo man̈ano tsianjery in̈y ma zaho koa fa mivavaka sa ten̈a mikoran̈a raha an̈aty fonaka lalin̈y an̈y?’ Hay be fa anao ten̈a tia Jehovah, ary anao koa tihifandray marikitry aminany karaha ataony olo kamarady mare in̈y. Fa raha zen̈y tsy ho vitanao, izikoa anao tsy mikoran̈a matetiky aminany. Koràn̈a aminany raha jiaby: Na sekirenao zen̈y, na raha mamparavoravo anao, na raha mampiasaloha anao ndreky mampalahelo anao. Matokisa fa izy han̈ampy anao izikoa anao mangataka fan̈ampian̈a aminany.

6. Ino raha mila ataontsika izikoa atsika tiho tsara fihavanan̈a amy Jehovah fo?

⁶ Atsika koa tiho tsara fihavanan̈a amy Babantsika andan̈itry an̈y io, atsika mila mankasitraka izy fo. Ikentsika raha nisoratiny panoratra salamo ty: “Maro ankitin̈y raha nataonao, Jehovah Zan̈aharinaka! Farandraha tsara eky asanao ndreky dinikinao momba zahay. Tsisy raha mety hampiran̈iny aminao. Misy zaho mba tihanon̈ono ndreky tihikoran̈a momba iro io fa tsy vitako, fotony iro io maro loatra ke tsy avoakonty.” (Sal. 40:5) Tsy raha amy vava fo atsika mankasitraka Jehovah, fa mila aboakantsika amy raha ataontsika koa. Zen̈y raha tsy mampiran̈a atsika aminolo maro avahizo. Iro tsy mahay mankasitraka raha jiaby nataony Zan̈ahary tamindro foeky. Tsy mahalany fan̈ahy atsika raha zen̈y, fotony Baiboly efa nivolan̈a fa olo “aminandra farany” tsy mahay mankasitraka. (2 Tim. 3:1, 2) Atsika tsy tokony han̈ano karaha zen̈y foeky!

7. Tiany Jehovah han̈ano karakory atsika samby atsika? Nan̈ino?

⁷ Farandraha tiany raimandreny eky izikoa zanany tsy miadiady fa mifandray tsara. Karaha zen̈y koa, tiany Jehovah hihavan̈a tsara atsika fotony atsika jiaby io zanany. Salakady fitiavan̈a lamariky ahaizan̈a ten̈a Kristianin̈y. (Jaona 13:35) Ikentsika raha koran̈iny panoratra salamo ty: “Farandraha tsara ndreky pare eky izikoa olo pirahalahy mahay miaraka miain̈y sady miray sain̈y!” (Sal. 133:1) Ho hita fa tia Jehovah atsika izikoa tia iro rahalahintsika ndreky ranabavintsika aby io. (1 Jaona 4:20) Farandraha tsara eky an̈isany fianakaviambeny rahalahy ndreky ranabavy ‘tsara fan̈ahy ndreky mahay mahinakinaka’ zen̈y!—Efes. 4:32.

ABOAHA FITIAVANAO JEHOVAH KE AREHA VOLAN̈ANANY

8. Ino antony voanalohany mahavy atsika man̈araka volan̈any Jehovah, izikoa 1 Jaona 5:3 dinihin̈y?

⁸ Jehovah man̈iraka tsaiky han̈araka volan̈anolobe, ke tiany koa atsika han̈araka volan̈anany. (Efes. 6:1) Vain̈y hajaintsika Jehovah, fotony izy namoron̈o atsika. Amiany atsika raha ilaintsika baka ho velon̈o. Izikoa misy baba misain̈y ndreky hendry efa tsisy ambaka Jehovah edy. Ndray izy man̈ano zen̈y, antony voanalohany mahavy atsika man̈araka volan̈anany: Fitiavantsika izy. (Vakia 1 Jaona 5:3.) Maro antony tokony han̈arehantsika volan̈a Jehovah, fa izy fo tsy miforse atsika han̈ano zen̈y. Namezany Jehovah safidy atsika, ke ravoravo mare izy izikoa baka amy fitiavantsika izy mahavy atsika mifidy han̈araka volan̈anany.

9-10. Nan̈ino atsika ten̈a mila mahay toro lalan̈any Jehovah ndreky miain̈y mifan̈araka amy zen̈y?

⁹ Tsy tiany raimandreny ho azondraha foeky zanakandro. Zen̈y mahavy iro tsy man̈omba zanakandro han̈ano raha sasany. Fa karakory an̈aboahany tsaiky fa matoky ndreky man̈aja olobendro iro? Amy fan̈arahan̈a volan̈anolobendro. Mbala mandilatra zen̈y tokony han̈arehantsika volan̈any Babantsika be fitiavan̈a io! Aboakantsika amy zen̈y fa atsika tia izy ndreky man̈aja izy. Atsika fo hahita hatsaran̈a baka amy zen̈y. (Isaia 48:17, 18) Fa mifanohitry amy zen̈y, mandrora mantsilan̈y lan̈iany olo tsy man̈eky Jehovah ndreky tsy man̈araka raha volan̈iny.—Gal. 6:7, 8.

¹⁰ Izikoa atsika mahay toro lalan̈any Jehovah ndreky miain̈y mifan̈araka amy zen̈y, atsika ho voaro amy raha mety handratra atsika amy lafiny arabatan̈a ndreky arapihetsehampo. Tsy ho robaka koa fihavan̈antsika aminany. Jehovah mahay raha ten̈a mahatsara atsika. Karaha ty volan̈iny Aurora, ranabavy araiky mipetraka an Etazonia: “Haiko fa zaho koa man̈araka volan̈a Jehovah fo, ho tsara mare fiain̈ananaka.” Marin̈y raha zen̈y. Asa mba ino hatsaran̈a nazonao, anao koa fa nan̈araka volan̈a Jehovah?

11. Han̈ampy atsika han̈ino ma vavaka?

¹¹ Mety tsy ho mora amintsika ndraikindraiky man̈araka volan̈a Jehovah, fotony atsika tsy lavorary ke mora manota. Kanefa tokony hifen̈y fo atsika han̈araka volan̈a Jehovah. Ino raha han̈ampy atsika? Vavaka. Niangavy Jehovah karaha ty panoratra salamo: “Ataova raha hahavy zaho han̈iry han̈araka volan̈anao.” (Sal. 51:12) Karaha ty nivolan̈iny Denise, ranabavy pisava lalan̈a maharitry araiky: “Izikoa fa tsy mora aminaka man̈araka didiny Jehovah, mivavaka zaho baka hahazo angovo han̈arehan̈a volan̈anany fo.” Mety matoky tsarabe atsika fa hivaliany Jehovah vavaka karaha zen̈y.—Lioka 11:9-13.

AMPIA OLO HO TIA JEHOVAH

12. Ino raha tokony hataontsika izikoa Efesianina 5:1 io zahan̈a?

¹² Vakia Efesianina 5:1. Matetiky ‘tsaiky tia mangala tahaka babany.’ Karaha zen̈y koa atsika, tokony hifen̈y mare atsika hangala tahaka toetriny Jehovah Babantsika ten̈a tia atsika io. Mangala tahaka izy atsika izikoa tia olo, tsara fan̈ahy, baka io tia man̈ambela hadisovan̈a. Ndraindray mety ho baka amy toetry tsarantsika hahavy olo tihianatra raha momba Jehovah. (1 Pet. 2:12) Tokony hangala tahaka Jehovah koa raimandreny amy fomba itondrasandro zanakandro. Iro koa man̈ano zen̈y, mety han̈iry hifandray amy Jehovah Babantsika be fitiavan̈a io edy zanakandro.

13. Ino raha han̈ampy atsika hasaky hikoran̈a raha momba Jehovah?

¹³ Endrakendraka salakady ravoravo mare tsaiky araiky izikoa fa mikoran̈a momba babany. Endrakendraka karaha zen̈y koa atsika izikoa fa mikoran̈a aminolo raha momba Jehovah, fotony tiantsika hahay izy koa iro. Mety hitovy amy raha tsapany panjaka Davida raha tsapantsika. Karaha ty hoizy: “Hidera anao fo zaho Jehovah.” (Sal. 34:2) Akory fo basy izikoa anten̈a bihen̈amaso? Akory hahavy anten̈a tsy havozovozo? Iritrireta vokatranizen̈y amy Jehovah ndreky olo hafa. Izikoa atsika mikoran̈a raha momba Jehovah, Jehovah tsy vitany ho ravoravo fo fa hahazo hatsaran̈a koa olo hafa. Jehovah han̈ampy anao hasaky hitory, karaha nataony tamindro Kristianin̈y tamy taonjato voanalohany tan̈y.—1 Tes. 2:2.

14. Ino aby antony maventy mahavy atsika tokony hazoto mitory vaovao tsara?

¹⁴ Jehovah tsy man̈avakavaka olo. Ho ravoravo koa izy izikoa atsika tia olo, ndray ino ndray ino karazan̈anolo io ndreky raha iain̈any. (Asa. 10:34, 35) Fazotoan̈a mitory vaovao tsara io an̈isany fomba ten̈a tsara han̈anovantsika zen̈y. (Mat. 28:19, 20) Ino ma mahatsara atsika man̈ano zen̈y? Lan̈iany olo mitandren̈y atsika mety hahavita hiova rango izioty. Mety ho afaka hiain̈y mandrakizay ambony tany paradisa koa izy aminy hoavy.—1 Tim. 4:16.

TIAVA JEHOVAH KE IRARIAN̈A ANAO HO RAVORAVO

15-16. Ino aby antony mahavy atsika ho ravoravo fo?

¹⁵ Jehovah io Baba be fitiavan̈a, ke tiany ho sambatra mare lafamìnany. (Isaia 65:14) Maro raha sarotro andalovantsika amy zioty, kanefa mbala maro raha mamparavoravo atsika. Ino antony? Fotony haintsika fa Babantsika andan̈itry an̈y io tena tia atsika. Haintsika ino aby ny marin̈y koran̈iny Volan̈a Zan̈ahary ao. (Jer. 15:16) Miavaka fianakavian̈a misy atsika io, fotony iro rahalahy ndreky ranabavintsika aby io tia Jehovah ndreky tia fitsipikinany. Iro io koa mifankatia.—Sal. 106:4, 5.

¹⁶ Ho ravoravo fo atsika, fotony haintsika fa ho tsara fiain̈ana aminy amaray an̈y. Haintsika fa tsy ho ela Jehovah han̈adoso raha ratsy jiaby. Lera Fanjakan̈anany mitondra, tany jiaby ty hanjary paradisa. Man̈anten̈a koa atsika fa olo naty aby in̈y hivilominy Jehovah, ke hiaraka amintsika ndraiky. (Jaona 5:28, 29) Zay haravoan̈a tsisy ambaka izy! Fa ny raha ten̈a maventy, tsy ho ela iro jiaby andan̈itry an̈y ndreky atsika jiaby ambony tany eto hiaraka hidera Babantsika be fitiavan̈a io ndreky han̈amia voninahitry izy. Hiaraka hanompo izy koa atsika, ary izy ten̈a vain̈y hatao zen̈y.