LAHATSORATRA FIANARAN̈A 8
Ataova Raha Hihavan̈ana ke Aza Be Fô Olo
“Irarian̈a atsika hifen̈y hampisy fihavanan̈a ndreky hifampahery.”—ROM. 14:19.
HIRA 113 Ny Fiadanantsika
HO HITA ATOa
1. Rahalahiny Josefa koa fa be fô izy, nan̈ano akory fianakavian̈andro?
TIANY Jakoba aby zanany jiaby, fa Josefa ny ten̈a tiany. Nan̈ano akory iro rahalahiny Josefa aby io koa fa nahay zen̈y? Iro nanjary nafana fô Josefa, ke nanjary tsy tiandro izy. Josefa tamy zen̈y 17 taon̈o. Izy tsiary ndraiky nan̈ano raha hahavy iro rahalahiny aby io tsy ho tia izy foeky. Fa akory niafarany? Nalafondro izy ke nanjary andevo ta Ezipty, baka io iro navandy tamy babandro. Nataondro naty nihoaniny biby dỳ masiaka zen̈y Josefa, zanany ten̈a tiany io. Nanjary nialamboetry koa fianakavian̈andro, baka io nalahelo mare babandro. Ino nahavy raha jiaby zen̈y? Fotony iro be fô rahalahindro.—Gen. 37:3, 4, 27-34.
2. Izikoa Galatianina 5:19-21 dinihin̈y, ino maharatsy olo araiky be fô naman̈a?
2 Izikoa Soratra Masin̈y zahan̈a, olo araiky koa be fôb naman̈a manjary tsy tia olo, miady, baka io tsy mahafehy heloko. “Asany nofotro” ikahiany Baiboly toetry aby io, ary tsy handova fanjakan̈any Zan̈ahary lan̈iany olo manan̈a toetry aby io.—Vakia Galatianina 5:19-21.
3. Ino raha hidinihintsika amy lahatsoratra ty ato?
3 Hitantsika tamy raha nataony rahalahiny Josefa aby in̈y, fa ten̈a mandrobaka fihavanan̈a ndreky mampialamboetry fianakavian̈a toetry be fô olo io. Marin̈y ndraiky fa atsika tsy han̈ano raha karaha nataondro rahalahiny Josefa aby in̈y, fa atsika baka tsy lavorary. Mamitaka koa fontsika io. (Jer. 17:9) Ke mety tsy ampoizintsika aby fa efa be fô olo atsika. Atsika iziô handiniky ohatra baka amy Baiboly man̈ampy atsika hitandrin̈y tsao hanjary be fô olo. Ho hitantsika ato koa raha tokony hataontsika baka hahavita hihavan̈a aminolo.
INO RAHA METY HAHAVY OLO HO BE FÔ NAMAN̈A?
4. Ino nahavy iro Filistiny aby io nanjary be fô Isaka?
4 Baka amy fanan̈ana. Pan̈arivo mare Isaka, ke iro Filistiny aby io nafana fô fanan̈ananany. (Gen. 26:12-14) Ino raha nataondro Filistiny aby io? Nitotofandro fotaka vôvo fantsakaniry Isaka rano nigiahiny biby tarimiandro. (Gen. 26:15, 16, 27) Aminandra izioty koa, misy olo manjary be fô naman̈a baka amy raha anan̈ana io fo, karaha iro Filistiny aby io. Iro tsy vitany man̈iry rahanolo fo fa ataondro koa fomba tsy hanan̈anolo io raha io.
5. Nan̈ino iro pitondra fivavahan̈a jiosy aby io be fô Jesosy?
5 Baka aminizy tiatianolo. Iro pitondra fivavahan̈a jiosy aby io be fô Jesosy, fotony Jesosy tiatianolo tozay iro. (Mat. 7:28, 29) Jesosy solonten̈any Zan̈ahary, ke izy nampianatra ny marin̈y fo. Fa ndray zen̈y, iro pitondra fivavahan̈a aby io nankaratsy Jesosy baka ho robaka lazanany. (Mar. 15:10; Jaona 11:47, 48; 12:12, 13, 19) Ino raha ianarantsika baka amy zen̈y? Mety misy piaramanompo amintsika manan̈a toetry tsara tsy anan̈antsika. Ke mila mitandrin̈y atsika tsao manjary be fô iro. Atsika tokony hifen̈y hangala tahaka toetry tsarandro zen̈y.—1 Kor. 11:1; 3 Jaona 11.
6. Ino ma raha nataony Diotrefa ke nahitan̈a fa izy be fô olo?
6 Baka amy tombontsoampanompoan̈a. Tamy taonjato voanalohany, Diotrefa be fô iro rahalahy nanan̈a andraikitry aby io. Izy “tiho voanalohany” tamindro io, ke nataony raha nahavy olo tsy han̈aja apostoly Jaona ndreky iro rahalahy aby io. (3 Jaona 9, 10) Mety tsy ho avy firaka amy raha nataony Diotrefa zen̈y atsika. Kanefa mila mitandrin̈y fo atsika, tsao manjary be fô iro piaramanompo amintsika nahazo andraikitry na tombontsoampanompoan̈a. Intsaka eky izikoa efa ela nan̈iriantsika andraikitry io, na mieritreritry atsika fa atsika mahavita izio tsara mandilatra olo hafa.
Fontsika io mety ampitovisin̈y amy tany fambolian̈a. Toetry tsara aby io mira folera maro tsara. Toetry be fô olo ndraiky mira ahitry tsy manjary. Tsy hanan̈a toetry tsara karaha ataony fitiavan̈a, fahaizan̈a mahinakinaka olo, ndreky hatsarampan̈ahy atsika izikoa be fô olo (Zahava fehintsoratra 7)
7. Ino vokany izikoa atsika be fô olo?
7 Toetry be fô olo io mira ahitry tsy manjary. Toetry tsy manjary io koa mitsiry an̈aty fontsika ao, farandraha sarotro himbotan̈a eky. Baka amizio mahavy atsika hiavonkavon̈o, ndreky ho tia ten̈a. Karaha ataony ahitry tsy manjary misakana folera tsy hitombo, izio koa mety hisakana atsika tsy hanan̈a toetry tsara karaha ataony fitiavan̈a, fahaizan̈a mahinakinaka olo ndreky hatsarampan̈ahy. Ke izikoa hitantsika fa manomboko be fô olo atsika, mila imbotantsika malaky an̈aty fontsika ao izio. Ino raha mety han̈ampy atsika?
MANETRY TEN̈A NDREKY AFAPO AMY RAHA ANAN̈ANA
Tsy ho be fô olo atsika izikoa man̈eky ampiany fan̈ahy masin̈y ke manetry ten̈a ndreky afapo amy raha anan̈antsika (Zahava fehintsoratra 8-9)
8. Ino aby toetry tsara han̈ampy atsika tsy ho be fô olo?
8 Tsy ho be fô olo atsika izikoa mifen̈y hanetry ten̈a fo ndreky ho afapo amy raha anan̈antsika. Tsy hafana fô olo foeky atsika izikoa manan̈a toetry tsara aby io. Atsika koa manetry ten̈a, atsika tsy hieritreritry be loatra momba ain̈intsika, na hihevitry fa atsika ny ten̈a mafoaka mandilatra olo hafa. Atsika koa tsy hieritreritry fa atsika fo vain̈y hahazo tombontsoa na raha mandilatra olo hafa. (Gal. 6:3, 4) Izikoa atsika afapo amy raha anan̈antsika, atsika ravoravo fo mahita olo mahazo raha manjary fa tsy mampiran̈a raha vitantsika na raha anan̈antsika amy ninany.—1 Tim. 6:7, 8.
9. Izikoa Galatianina 5:16 ndreky Filipianina 2:3, 4 zahan̈a, han̈ampy atsika han̈ino ma fan̈ahy masin̈y io?
9 Ino raha han̈ampy atsika tsy ho be fô olo, fa hanetry ten̈a ndreky ho afapo amy raha anan̈antsika fo? Fan̈ahy masin̈iny Zan̈ahary. (Vakia Galatianina 5:16; Filipianina 2:3, 4.) Fan̈ahy masin̈y io han̈ampy atsika handiniky eritreritrintsika ndreky antony mahavy atsika han̈ano raha. Mety ho hisy eritreritry ratsy hielan̈a amy jerintsika. Kanefa, ho vitantsika fo han̈adoso eritreritry ratsy zen̈y ke hieritreritry raha tsara momba olo, fotony Jehovah han̈ampy atsika. (Sal. 26:2; 51:10) Nahavita zen̈y Mosesy ndreky apostoly Paoly. Alô zahavantsika modely tsara nambelandro zen̈y.
Manafolahy israelita mivolan̈a amy Mosesy ndreky Josoa fa misy lelahy aroe amy tobiny Israely man̈ano karaha paminan̈y. Josoa man̈iraka Mosesy hisakana iro lelahy aby io, fa Mosesy tsy nan̈eky. Ndray Mosesy mivolan̈a amy Josoa haravoan̈anany fotony mba namiany Jehovah fan̈ahy masin̈inany iro lelahy aroe io. (Zahava fehintsoratra 10)
10. Ino raha nandalo ke mety ho nahavy Mosesy ho be fô olo? (Zahava sary amy fon̈ony gazety ty.)
10 Mosesy ten̈a nanan̈a fahifan̈a taminolony Zan̈ahary, fa izy tsiary nisakana olo tsy hahazo fahifan̈a. Nisy fotoan̈a, nan̈adosoany Jehovah fan̈ahy masin̈y tamy Mosesy, ke namiany iro antipan̈ahiny Israely nitsangana marikitry “tranolay fihaonana.” Tsy ela tafaranizen̈y, ren̈iny Mosesy fa nisy antipan̈ahy aroe tsy navy tamy tran̈olay io tao kanefa mba nahazo fan̈ahy masin̈y, baka io nan̈ano karaha paminan̈y. Josoa nan̈iraka izy hisakana iro lelahy aby io. Fa akory nataony Mosesy? Izy tsy be fô iro. Ndray izy aby ravoravo mare nahita iro nahavita naminan̈y! Ten̈a nanetry ten̈a izy. (Nom. 11:24-29) Ino raha ianarantsika baka amy Mosesy?
Akory han̈aboahany antipan̈ahy fa iro manetry ten̈a karaha Mosesy? (Zahava fehintsoratra 11-12)c
11. Akory han̈aboahany antipan̈ahy fa iro manetry ten̈a karaha Mosesy?
11 Antipan̈ahy ma anao? Asa anao efa nirahin̈y nampiofan̈a olo han̈ano andraikitry araiky an̈ivony fiangonan̈a? Mety tianao mare mitariky Fianaran̈a Tilikambo isaka herin̈iandra, kanefa anao baka tio nirahin̈y nampiofan̈a rahalahy araiky han̈ano izio, hisoatra anao. Akory han̈aboahanao fa anao manetry ten̈a karaha Mosesy? Anao tsy hieritreritry fa man̈ambany anao mampiofan̈a rahalahy araiky zen̈y. Tsy mavozo koa anao tsao losony andraikitry tianao be io. Mifanohitry amy zen̈y, ravoravo anao fotony nahavita nan̈ampy rahalahinao han̈ano andraikitry io tsarabe.
12. Akory nan̈aboahandro piaramanompo aby io fa iro manetry ten̈a ndreky afapo amy raha anan̈andro?
12 Maro koa rahalahy efa matoe man̈ano karaha nataony Mosesy. Misy amindro io antipan̈ahy pandamin̈y, tan̈atiny taon̈o maro. Kanefa, iro koa fa feno 80 taon̈o, iro nan̈eky hiala aminy andraikitry tiandro be io. Manetry ten̈a koa iro piandraikitry faritry aby io, fotony iro von̈ono han̈ano fanompoan̈a hafa han̈irahan̈a iro, lera iro feno 70 taon̈o. Vo tsy ela koa, betelita maro erantany nitindren̈a hanompo amy faritany. Fa iro rahalahy ndreky ranabavy tsy mivadiky aby io tsy meloko, ndray nisoloan̈a olo hafa man̈ano asa nataondro taloha. Ten̈a manetry ten̈a iro!
13. Ino aby tombontsoa nanan̈andro apostoly 12 aby io ke mety ho nahavy Paoly ho be fô iro?
13 Apostoly Paoly koa ten̈a nanetry ten̈a ndreky afapo tamy raha nanan̈any. Nahavita be tamy fanompoan̈a izy, kanefa nanetry ten̈a. Ho izy: “Aminy apostoly jiaby, zaho ny olo ten̈a tsisy kontiny. Ndray zaho tsy vain̈y kahian̈a apostoly zen̈y foeky!” (1 Kor. 15:9, 10) Tamy Jesosy tambony tany teto, iro apostoly 12 aby io nanan̈a tombontsoa niaraka taminany. Kanefa efa tafarany nifatesany Jesosy ndreky nanongany tandan̈itry tan̈y, Paoly vo loso kristianin̈y. Marin̈y fa voatendry ho “apostoliny hafa firenena” Paoly, kanefa izy tsy nahazo tombontsoa ho an̈isany apostoly 12. (Rom. 11:13; Asa. 1:21-26) Tsy nanan̈a fifandraisan̈a manokan̈a tamy Jesosy karaha iro 12 lahy aby io koa izy. Ndray zen̈y, Paoly tsy be fô iro foeky, fa afapo tamy fanendren̈a nazony.
14. Akory han̈aboahantsika fa atsika manetry ten̈a ndreky afapo amy raha anan̈antsika?
14 Atsika koa afapo amy raha anan̈antsika ndreky manetry ten̈a karaha Paoly, hajaintsika fo iro olo namiany Jehovah fahifan̈a aby io. (Asa. 21:20-26) Jehovah nanendry antipan̈ahy hikarakara fiangonan̈a. Marin̈y fa tsy lavorary iro io, fa amy Jehovah, iro io mira ‘kadô’ natao han̈ampy fiangonan̈a. (Efes. 4:8, 11) Atsika koa man̈aja iro lelahy voatendry aby io, baka io manetry ten̈a ke man̈araka taridalan̈a amiandro, ho tsara fo fihavan̈antsika amy Jehovah ndreky piaramanompo amintsika.
‘MIFEN̈A HAMPISY FIHAVANAN̈A’
15. Ino raha mila hataontsika?
15 Mila imbontantsika baka an̈aty fontsika ao zay raha mety hahavy atsika ho be fô olo. Ten̈a mila man̈ano zen̈y atsika izikoa tiho tsara fihavanan̈a aminolo. Sady Jehovah efa nan̈iraka atsika han̈ano raha “hampisy fihavanan̈a.” (Rom. 14:19) Zen̈y ny amintsika. Fa karakory amy zay han̈ampiantsika olo tsy ho be fô naman̈a ke hampisy fihavanan̈a fo?
16. Ino raha tsy tokony hataontsika baka olo tsy ho be fô atsika?
16 Misy vokany aminolo hafa toetsain̈intsika ndreky raha ataontsika. Donia ty mandrisiky atsika ‘han̈ano vantara’ raha anan̈antsika. (1 Jaona 2:16) Kanefa baka amy raha karaha zen̈y mahavy olo hanjary be fô naman̈a. Ino raha tsy tokony hataontsika baka olo tsy ho be fô atsika? Tsy tokony porporaintsika amindro raha anan̈antsika na raha hivangaintsika na raha vitantsika tamy fanompoan̈a. Tokony hanetry ten̈a fo koa atsika izikoa fa man̈ano andraikitrintsika an̈ivony fiangonan̈a. Izikoa ndraiky atsika mitady raha mahatsara olo, ke man̈eky fa mba mahavita raha tsara fo koa iro io, han̈ampy iro ho afapo amy raha anan̈andro zen̈y. Hihavan̈a tsara ndreky hiray sain̈y koa fiangonan̈a.
17. Nahavita nan̈ino iro rahalahiny Josefa aby io? Nan̈ino atsika mivolan̈a zen̈y?
17 Ho vitantsika handresy toetsain̈y ratsy io! Aleva onon̈o baka iro rahalahiny Josefa aby io. Taon̈o maro tafarany nandafosandro Josefa in̈y, iro fanojy izy ndraiky ta Ezipty. Nasitrikiny Josefa azovy izy. Nitsapainy jery iro misy ahitany iro niova. Nikahiany niaraka nihinan̈a taminany iro ndreky Benjamina zandrindro. Iro koa fa nihina, nirahiny natao maromarony nindro niny Benjamina. (Gen. 43:33, 34) Fa iro zokiny aby io tsy nafana fô zandrindro. Ndray iro niasaloha tamy zandrindro ndreky babandro! (Gen. 44:30-34) Nanjary nilamin̈y ndraiky fianakavian̈andro fotony iro tsy be fô rahalahindro eky. (Gen. 45:4, 15) Karaha zen̈y koa, izikoa atsika mifen̈y fo tsy ho be fô olo, hiray sain̈y fianakavian̈antsika ndreky fiangonan̈a.
18. Izikoa Jakoba 3:17, 18 dinihin̈y, ino raha tokony hataontsika baka hampisy fihavanan̈a?
18 Tiany Jehovah han̈ano raha hampisy fihavanan̈a fo atsika ke tsy ho be fô olo. Mila miady mare atsika izikoa tihahavita zen̈y. Hitantsika tio fa mora be fô olo atsika. (Jak. 4:5) Olo man̈odidin̈y atsika koa mandrisiky atsika hanan̈a toetsain̈y io. Kanefa, izikoa atsika manetry ten̈a ndreky afapo amy raha anan̈antsika baka io mahay mankasitraka, tsy mety atsika koa ho be fô olo.—Vakia Jakoba 3:17, 18.
HIRA 130 Andao Hifamela
a Tia fihavanan̈a olo an̈isany fandaminan̈any Jehovah. Kanefa izikoa atsika be fô olo, mety ho ravan̈a fihavanan̈a io. Ho hitantsika ato ino aby raha mety hahavy atsika ho be fô olo, baka io karakory tokony hataontsika hiadivan̈a amy toetsain̈y ratsy io ke hampisy fihavanan̈a fo.
b FAN̈AZAVAN̈A: Mafana fô koa ndraikindraiky mety ivolan̈ana olo be fô naman̈a. Ke koran̈iny Baiboly fa olo be fô naman̈a zen̈y tsy raha man̈iry rahanolo fo, fa ataony koa raha hahavy olo io tsy hanan̈a raha io foeky.
c FAN̈AZAVAN̈A SARY: Amy fivorian̈any antipan̈ahy, antipan̈ahy araiky efa matoe sady pitariky Fianaran̈a Tilikambo irahin̈y mampiofan̈a rahalahy tanora araiky han̈ano zen̈y, hisoatra izy. Tiany antipan̈ahy efa matoe io mare andraikitry zen̈y, fa nikeny fo fanapahankevitriny antipan̈ahy jiaby. Ravoravo izy man̈amia sosokevitry ndreky midera rahalahy tanora io amy raha tsara vitany.