Hita Baka amy Familoman̈a Olo Maty fa Zan̈ahary io Be Fitiavan̈a, Hendry Ndreky Maharidraha

1. Nan̈ino ma Jehovah namoron̈o raha manampahin̈ana?

TALOHANY Jehovah niasa raha jiaby, tsisy raha nisy foeky izikoa tsy izy fo. Ndray zen̈y, Sambatra fo izy ndray tsisy naman̈a. Tsy jerinjerin̈y foeky izy. Nan̈ino basy izy namoron̈o raha manampahin̈ana? Fotony tiany ho sambatra ndreky hankafỳ fiain̈ana koa iro.​—Sal. 36:9; 1 Jaona 4:19.

2. Nan̈ano akory Jesosy ndreky anjely aby io koa fa nahita raha niforon̈iny Zan̈ahary?

² Azovy niforon̈iny Jehovah voanalohany? Jesosy. Nampiasa Zanany io amy zay izy koa fa namoron̈o “raha hafa jiaby”, an̈isanizen̈y anjely. (Kol. 1:16) Ravoravo mare Jesosy niaraka niasa tamy Babany. (Ohab. 8:30) Ravoravo mare koa anjely aby io izikoa fa nahita Jehovah ndreky Jesosy, Piasa Ten̈a Mahay io, niaraka niasa lan̈itry ndreky tany. Akory ma nan̈aboahandro haravoan̈andro zen̈y? Iro nan̈ano hira hideran̈a Jehovah, izikoa fa vita tany. Karaha zen̈y fo nataondro isaka Jehovah baka niasa raha araiky, intsaka eky izy koa fa baka namoron̈o olombelon̈o. (Joba 38:7; Ohab. 8:31) Ino toetriny Jehovah miboaka isaka izy niasa raha? Fitiavan̈a ndreky fahendrena.​—Sal. 104:24; Rom. 1:20.

3. Izikoa 1 Korintianina 15:21, 22 zahan̈a, ino hatsaran̈a azontsika baka amy soron̈o nataony Jesosy?

³ Farandraha tsara eky fomba niasany Jehovah tany ty, ke tiany hiain̈y eto mandrakizay atsika. Antsany hely fo, Adama ndreky Eva tsy nan̈araka volan̈anany Jehovah Babandro be fitiavan̈a io. Zen̈y nahavy iro ndreky atsika taranakandro nanjary panota ndreky mety maty. (Rom. 5:12) Ino raha nataony Jehovah? Direkty nambarany fomba handeha han̈avotany olombelon̈o. (Gen. 3:15) Izy ho izy han̈iraka Zanany han̈ano soron̈o ain̈inany han̈avotan̈a atsika amy fahotan̈a ndreky fahafatesan̈a. Ke lan̈iany olo mifidy hanompo Jehovah, afaka hiain̈y tsisy farany.​—Jaona 3:16; Rom. 6:23; vakia 1 Korintianina 15:21, 22.

4. Ino aby fan̈ontanian̈a hivaliantsika ato?

⁴ Mety maro fan̈ontanian̈a mandalo amy jerintsika mikasiky fampan̈antinan̈any Jehovah hamelon̈o olo maty zen̈y. Ohatra: Ino eky raha handalo lera Jehovah hamelon̈o olo maty? Ho haintsika edy havantsika ndreky namantsika efa naty aby in̈y lera iro hivilomin̈y? Nan̈ino raha zen̈y ten̈a hamparavoravo? Nan̈ino izio ahitan̈a fa Jehovah ten̈a be fitiavan̈a, hendry ndreky maharidraha ankitin̈y? Alô valiantsika fan̈ontanian̈a aby zen̈y.

LERA JEHOVAH HAMELON̈O OLO MATY

5. Akory ahaizan̈a fa tsy hivilomin̈y indraiky mipàka olo maty?

⁵ Jesosy hampiasainy Jehovah hamelon̈o olo antapitrisany. Hay be fa tsy hivilomin̈y indraiky mipàka olo jiaby, amy zen̈y tsy ho feno pamaka olo ambony tany eto ke hialamboetry fiain̈ana! Nakiry izy, Jehovah io “Zan̈ahariny filaminan̈a” ke tsy maintsy han̈ano raha fo izy hampisy filaminan̈a baka olo hiadan̈a. (1 Kor. 14:33) Azonao onon̈o raha nataony Jehovah taminizy nampiasa Jesosy hiasa tany ty hipitrahanolombelon̈o? Niforon̈iny tsihelihely raha jiaby. Hita baka amy zen̈y fa Jehovah ten̈a hendry sady maharidraha. Mbala han̈aboaka toetry aby io koa Jesosy amy Fanjakan̈a Arivo Taon̈o. Izy aminio hiaraka hiasa aminolo tafitsaka velon̈o aminy Aramagedona, ke han̈ova tany ty ho tsara mare, handraisan̈a olo antapitrisany hivilomin̈y.

6. Koa Asan’ny Apostoly 24:15 zahan̈a, azovy an̈isany olo hivilominy Jehovah?

⁶ Ho hisy asa maventy koa ataonolo tafitsaka velon̈o aminy Aramagedona. Iro hampianatra olo hivilomin̈y aby io raha momba Fanjakan̈any Zan̈ahary ndreky raha takiny amindro. Ankamarozanolo hivilomin̈y aby io tsy panompony Jehovah, ke olo “tsy marin̈y” fomba ivolan̈any Baiboly iro io. (Vakia Asan’ny Apostoly 24:15.) Maro koa fan̈ovoan̈a mila ataondro amy fiain̈anandro izikoa iro tihahazo hatsaran̈a baka amy vidipan̈avotan̈a ke hiain̈y mandrakizay. Mba miniminia hely baka! Olo antapitrisany hampianarin̈y raha momba Jehovah, fotony iro tsiary nahay izy. Ke iro io ma miaraka hampianarin̈y sa hampianarin̈y tsiaraikiaraiky? Atsika iziô baka samby amy fiangonan̈a nanendren̈a atsika, ke ho karaha zen̈y koa ma iro? Iro ma hampiofanin̈y hampianatra olo hafa mbala hivilomin̈y? An̈y atsika mahita izy. Fa ny raha haintsika fo, hahay Jehovah aby olo jiaby ambony tany eto, amy farany Fanjakan̈a Arivo Taon̈ony Kristy. (Isaia 11:9) Maro asa miambin̈y atsika an̈atiny arivo taon̈o, kanefa ho ravoravo tsarabe atsika han̈ano zen̈y!

7. Nan̈ino panompony Jehovah mila mitepô iro olo hivilomin̈y aby io, izikoa fa hampianatra iro?

⁷ Samby mbala hifen̈y han̈ano fan̈ovoan̈a aby panompony Jehovah, amy Fanjakan̈a Arivo Taon̈ony Kristy, izikoa tihamparavoravo Jehovah. Iro koa fa hampianatra olo hivilomin̈y aby io, iro mila mitepô iro, baka ho vitandro han̈ampy iro io hiala aminy eritreritry ndreky fahazaran̈a ratsy. Ampiandro koa iro hiain̈y mifan̈araka amy fitsipikiny Jehovah. (1 Pet. 3:8) Olo hivilomin̈y aby io koa fa mahita vahoakany Jehovah manetry ten̈a sady mifen̈y fo man̈ano raha mamparavoravo izy, iro manjary tihanompo Jehovah koa.​—Fil. 2:12.

HO HAINTSIKA MA IRO LERA IRO HIVILOMIN̈Y?

8. Nan̈ino atsika matoky fa mbala ho haintsika fo havantsika ndreky kamaradintsika aby in̈y lera iro hivilomin̈y?

⁸ Maro antony hahafahantsika mivolan̈a fa mbala ho haintsika fo kamaradintsika aby in̈y lera iro hivilomin̈y. Ohatra iziô izikoa zahavan̈a fomba namilomany Jehovah olo taloha tan̈y, atsika afaka man̈anten̈a fa lera izy hamelon̈o havantsika aby io koa, iro mbala ho karaha iro talohany iro naty in̈y fo. Saorandro tsy hiova, avio feondro ndreky toetsain̈indro mbala ho in̈y fo. Olo maty nampitovisiny Jesosy aminolo mandry. Ke iro io ndray maty, iro mbala mety fohazin̈y fo. (Mat. 9:18, 24; Jaona 11:11-13) Karakory ma ataonolo araiky koa vo nifoha baka nandry? Izy mbala izy fo, tsy zen̈y? Saoranany ndreky feonany tsy miova. Avio mbala tsaroany raha jiaby. Karaha zen̈y Lazarosy. Efa efatra andra izy naty, ke efa nanomboko robaka nofotronany. Fa Jesosy koa fa namelon̈o izy, direkty hainiry anabaviny izy, ary Lazarosy koa nahazo onon̈o iro.​—Jaona 11:38-44; 12:1, 2.

9. Nan̈ino iro olo hivilomin̈y aby io koa fa velon̈o mbala tsendriky hahazo vatan̈a ndreky jery lavorary?

⁹ Jehovah efa nampan̈anten̈a fa amy Paradisa efa tsy ho hisy eky olo hivolan̈a: “Zaho zen̈y marary e!” (Isaia 33:24; Rom. 6:7) Dikanizen̈y, iro olo hivilomin̈y aby io hahazo vatan̈a salama tsara. Fa ndray zen̈y, iro tsy direkty hanjary lavorary. Manjary tsy hainiry havandro ndreky namandro baka iro izikoa zen̈y. Hanjary lavorary tsihelihely olo amy Fanjakan̈a Arivo Taon̈ony Kristy. Lera tapitry arivo taon̈o, Fanjakan̈a io hampodiny Jesosy amy Babany, fotony amy zen̈y efa tanteraka fikasan̈any Jehovah jiaby, an̈isanizen̈y olombelon̈o hanjary lavorary.​—1 Kor. 15:24-28; Apok. 20:1-3.

NAN̈INO RAHA ZEN̈Y TEN̈A HAMPARAVORAVO?

10. Ino raha ho tsapanao lera olo maty hivilomin̈y?

¹⁰ Miniminia hely baka han̈ano akory anao koa fa hitsena iry havanao ndreky namanao! Ravoravo loatra ma anao ke ho latsaka ranomaso? Va anao amy zen̈y himoe mare? Sa anao ho tafihihira lastio hideran̈a Jehovah? Fa ny raha azo antoko, hitombo fitiavanao Jehovah ndreky Zanany, fotony baka amy fitiavandro atsika mahavy iro hamelon̈o olo maty.

11. Izikoa zahan̈a volan̈any Jesosy amy Jaona 5:28, 29 ao, han̈ano akory olo man̈araka volan̈any Zan̈ahary?

¹¹ Diniha koa haravoan̈anolo aby hivilomin̈y aby io, lera iro mifen̈y hiala amy toetry taloha ke mampifan̈araka fomba fiain̈anandro amy fitsipikiny Jehovah. ‘Hivilomin̈y amy fiain̈ana’ zay olo mifen̈y hiova, ke iro ho velon̈o tsisy farany amy Paradisa. Fa han̈ano akory ndraiky izikoa misy olo manohitry Jehovah? Tsy hambelany Jehovah han̈elingelin̈y fiadanan̈a misy amy Paradisa ao iro.​—Isaia 65:20; vakia Jaona 5:28, 29.

12. Nan̈ino atsika mivolan̈a fa hitahiany Jehovah aby olo jiaby ambony eto, aminy amaray an̈y?

¹² Lera Fanjakan̈a io hanjaka amy tany ty, ho tsapany panompony Jehovah tsarabe fahamarin̈any raha volan̈iny Ohabolana 10:22 ty: “Fitahian̈a baka amy Jehovah mampapan̈arivo, avio izio tsy sosaohany fahorian̈a.” Hampiany fan̈ahy masin̈y atsika amy zen̈y ke ho vitantsika tsarabe hangala tahaka toetriny Jesosy, baka io atsika hahaiho lavorary tsihelihely. (Jaona 13:15-17; Efes. 4:23, 24) Isanandra, atsika hahaiho salama ndreky hahaiho tsara toetry fo. Zay fiain̈ana ho tsara marin̈y! (Joba 33:25) Rango iziô efa maro hatsaran̈a azontsika izikoa atsika misaintsain̈y momba familoman̈a olo maty. Ino antony?

BE FITIAVAN̈A ANKITIN̈Y JEHOVAH!

13. Izikoa zahan̈a Salamo 139:1-4, nan̈ino familoman̈a olo maty io ahitan̈a fa mahay atsika tsarabe Jehovah?

¹³ Efa hitantsika tio fa Jehovah koa fa hamelon̈o olo maty, hampodiny amindro aby fitadidian̈andro ndreky raha jiaby mampiavaka iro. Tsy hitanao ten̈a be fitiavan̈a Jehovah? Miniminia hely baka! Azony onon̈o aby raha mombamomba anao, eritreritrinao, fihetsehamponao, raha volan̈inao ndreky ataonao. Ke izikoa san̈atria misy ny ifatesanao, tsy ho sarotro aminany foeky han̈ampody aminao fitadidian̈anao, fomba fisain̈ananao ndreky toetry mampiavaka anao. Zen̈y nahavy Panjaka Davida nivolan̈a fa Jehovah mahay atsika tsiaraikiaraiky. (Vakia Salamo 139:1-4.) Nan̈ino ma fahaizantsika zen̈y misy vokany amintsika rango izioty?

14. Atsika koa fa mieritreritry fa Jehovah mahay atsika tsarabe, ino tokony ho vokatranizen̈y amintsika?

¹⁴ Mahay atsika tsarabe Jehovah. Nan̈ino ma raha zen̈y tsy tokony hampavozo atsika? Aleva onon̈o fa Jehovah ten̈a tia atsika. Valera aminany aby atsika tsiaraikiaraiky. Azony onon̈o aby zay raha mandalo amy fiain̈anantsika ke misy vokany amintsika. Mankahery! Tsy zen̈y? Tsy latsatokan̈a foeky atsika. Isanandra vakindran̈ahary, Jehovah ankilantsika iô fo, ke mitady fomba fo izy han̈ampian̈a atsika.​—2 Tan. 16:9.

JEHOVAH TEN̈A HENDRY ANKITIN̈Y!

15. Jehovah nampan̈anten̈a hamelon̈o olo maty. Nan̈ino raha zen̈y ahitan̈a fa izy hendry?

¹⁵ ‘Hivonenay anao koa tsy man̈ano izio!’ Fampitahoran̈a karaha zen̈y an̈isany fomba mahomby fampiasainy fahavalo hiforsen̈a olo han̈ano raha tsy fataondro. Karaha zen̈y koa ataony olony Satana baka atsika hivadiky amy namantsika na han̈ano raha efa haintsika fa ratsy. Fa raha zen̈y tsy hahomby. Fotony haintsika fa, ndray iro fahavalontsika aby io mamono atsika, Jehovah mbala hamelon̈o atsika. (Apok. 2:10). Atsika matoky fa ndray ino ndray ino raha ataondro, iro tsy hahavita hisakana atsika tsy hanjary kamaradiny Jehovah. (Rom. 8:35-39) Hita baka amy fampan̈antinan̈any Jehovah hamelon̈o olo io fa izy ten̈a hendry ankitin̈y. Fotony baka amizio mahavy atsika tsy mavozo hofoaty, ndray menasen̈a hivonen̈a. Baka amy raha antin̈aintsika io koa mahavy atsika misy korazy ke tsy hivadiky amy Jehovah foeky.

16. Ino aby fan̈ontanian̈a tokony hiritriretinao? Nan̈ino fahaizanao valinizen̈y han̈ampy anao hahay izikoa anao matoky Jehovah ankitin̈y?

¹⁶ Akory eky izikoa misy fahavalony Jehovah mimenasy hamono anao? Hatoky Jehovah ma anao, ke tsy hivadiky? Akory hahazainao fa ho vitanao raha zen̈y? Ty fan̈ontanian̈a tsara dinihinao: ‘Hita amy fanapahankevitry madiniky ataoko isanandra ma fa zaho matoky Jehovah ankitin̈y?’ (Lioka 16:10) Ty koa araiky: ‘Hita amy fomba ampiasako fotoan̈anaka ndreky volanaka ma fa zaho matoky fampan̈antinan̈any Jehovah han̈amia zay raha ilaiko izikoa zaho man̈ano voalohantoeran̈a Fanjakan̈anany?’ (Mat. 6:31-33) Izikoa ia valiny fan̈ontanian̈a aby io, dikanizen̈y anao efa matoky Jehovah ndreky efa von̈ono hiatriky fitsapan̈a mbala ho avy.​—Ohab. 3:5, 6.

JEHOVAH MAHARIDRAHA ANKITIN̈Y!

17. a) Nan̈ino ma familoman̈a olo maty io ahitan̈a fa Jehovah maharidraha? b) Akory han̈aboahantsika fa atsika mankasitraka izy?

¹⁷ Efa misy andra ndreky lera nifidiny Jehovah handravan̈ana donia ratsy ty. (Mat. 24:36) Efa hitany Jehovah ela aby fotoan̈a hamilomany olo maty. (Joba 14:14, 15) Fa ndray zen̈y, izy tsy han̈ano raha alohany fotoan̈a efa nifidiny io. Miambin̈y fotoan̈a hitany fa mety tsarabe izy vo hamelon̈o iro. (Jaona 5:28) Nakiry Jehovah maharidraha; fa izikoa tsy zen̈y, marobe olo tsy nahavita nibebaka, an̈isanizen̈y atsika. (2 Pet. 3:9) Tiany Jehovah ho maro mare olo hiain̈y mandrakizay. Akory fo basy han̈aboahantsika fa mankasitraka Jehovah atsika nohony izy maharidraha? Atsika mila mifen̈y angovo jiaby ‘mitsakaraka olo manan̈a toetsain̈y tsara, hazahoan̈a fiain̈ana mandrakizay.’ Mila ampiantsika koa iro ho tia Jehovah ndreky hanompo izy. (Asa. 13:48) Hahazo hatsaran̈a baka amy faharetan̈any Jehovah iro, karaha atsika koa.

18. Nan̈ino atsika tokony haharidraha aminolo?

¹⁸ Jehovah tsy man̈anten̈a atsika hanjary lavorary alohany farany arivo taon̈ony Kristy io. Maharidraha izy, ke parpavianizen̈y, von̈ono izy han̈ambela hadisovan̈antsika. Zen̈y mahavy atsika mila von̈ono fo koa haharidraha aminolo, ke hifantoko amy toetry tsarandro fo. Sa karakory? Diniha baka raha nataony ranabavy araiky ty. Ndraikindraiky ramosenany miasaloha angovo jiaby, ary tampoko koa, ke tsy nandeha nivory eky vadiny io tafara tatỳ. Volan̈iny ranabavy io: “Tampoko tio, nikorontan̈a ambony ambany fiain̈ananay. Maro raha tianay hatao kanefa tsy vitanay eky raha zen̈y.” Nifen̈y fo ndraiky ranabavy io nan̈aboaka fitiavan̈a ndreky faharetan̈a tamy ramosenany. Nitavandra Jehovah fo izy, ke tsy voly izy nan̈ampy vadiny io. Tsy aretin̈iny vadiny raha nampandianany jerinany, fa tamy toetry tsarany vadiny. Ho izy: “Farandraha tsara toetry eky vadiko io. Mifen̈y mare koa izy, ke efa mianko tsihelihely.” Ke izikoa misy aminolo tran̈o araiky aminao na piaramanompo aminao miezaka miady amy raha sarotro mavoa izy, mifen̈a mare haharidraha aminany fotony raha zen̈y ten̈a ilain̈a.

19. Tokony ho tapakevitry han̈ino ma atsika?

¹⁹ Jehovah koa fa namoron̈o tany ty, ravoravo mare Jesosy ndreky iro anjely aby io. Misaora ho ravoravo koa iro aminy hoavy! Fotony ho lavorary aby olo jiaby ambony tany sady ho tia Jehovah ndreky hanompo izy. Ho ravoravo mare koa iro voahosotro aby io, lera iro hiaraka hanjaka amy Kristy, fotony ho maro hatsaran̈a ho azonolo ambony tany ty baka amy raha hataondro. (Apok. 4:4, 9-11; 5:9, 10) Miniminia koa baka haravoan̈antsika amy leranizen̈y! Ranomasony haravoan̈a fo raha ho hisy amy zen̈y. Tsy ho hisy eky aretin̈y, alahelo ndreky fahafatesan̈a. (Apok. 21:4) Fa parpavianizen̈y fo, atsika tokony ho tapakevitry fo han̈aboaka fa atsika be fitiavan̈a, hendry ndreky maharidraha, karaha Babantsika andan̈itry an̈y. Izikoa anao man̈ano zen̈y, ho ravoravo fo anao ndray miatriky raha sarotro. (Jak. 1:2-4) Nahatsara izy Jehovah efa nampan̈anten̈a fa hivilominy olo maty!​—Asa. 24:15.