Sariny sehatra, an̈abonizio misy banderole maventy
1922 Zato Taon̈o Rôso Zay!
‘ATSIKA ataony Zan̈ahary mandresy baka amy Jesosy Kristy.’ (1 Kor. 15:57, Dikanteniny Panjaka Jacques, angiley) Io andininteny niny taon̈o 1922. Izio nampahatsiaro iro Pianatra Baiboly aby io fa izikoa iro tsy mivadiky, Jehovah han̈amia iro hatsaran̈a. Tamy taon̈o io, Jehovah nan̈amia hatsaran̈a iro pitory mazoto aby io. Tamy fomba akory? Izy nitahy iro lera iro nanomboko nan̈ano pirinty ndreky nanambatra bokindro. Nampiany koa iro ke nahavita nampiasa radio han̈aparitahan̈a fahamarin̈ana momba Fanjakan̈any Zan̈ahary. Avio tamy faramparany taon̈o 1922, iro Pianatra Baiboly aby io nahavita nan̈ano fivoriambe miavaka araiky ta Cedar Point, an Etazonỳ. Ke mbala naboakany Jehovah tsarabe fa izy nitahy vahoakanany. Rango tamy zen̈y firaka amy zioty, fivoriambe io nisy vokany mare taminy asany fandaminan̈any Jehovah.
“TSARA MARE HEVITRY ZEN̈Y!”
Nahainaro boky ndreky gazety nilain̈a fotony nahainaro pitory. Iro rahalahy tamy Betelany Brooklyn tan̈y nan̈amboatra gazety nampiasain̈y, tamy fotoan̈a zen̈y. Fa iro fo mbala tsy nahavita nan̈ano pirinty boky misy fon̈ony matevin̈y, ke iro mbala nila nikarama kompanỳ pan̈ano pirinty. Problemo fo, tan̈atiny fanjava maromaro, tsy nahampy foeky boky nataony kompanỳ io pirinty, kanefa raha zen̈y ten̈a nilain̈y taminy asa fitorian̈a. Rahalahy Robert Martin piandraikitriny fan̈anaovan̈a pirinty tamy zen̈y. Rahalahy Rutherford nan̈ontany izy tsao vitandro tompiny fo man̈ano pirinty bokindro.
Tran̈o fan̈anaovan̈a pirinty tamy Concord Street ta Brooklyn, a New York
Ho Rahalahy Martin: “Tsara mare hevitry zen̈y! Fa atsika fo mila man̈abian̈a tran̈o fan̈anaovan̈a pirinty misy lamasiny mahavita mandahatra soratra, man̈ano soratra mangilatra amy fon̈ony boky, man̈ano pirinty, avio manambatra boky.” Ke iro rahalahy aby io baka tio namondro tran̈o tamy 18 Concord Street ta Brooklyn, avio iro nividy fitaovan̈a jiaby nilain̈a taminy asa io.
Tsy olo jiaby ravoravo, iro rahalahy aby io koa fa han̈ano pirinty bokindro tompiny. Nitsidiky tany fan̈anaovan̈a pirinty vaovao io prezidany kompanỳ araiky pan̈ano pirinty bokintsika taloha. Karaha ty hoizy: “Anaro manan̈a lamasiny farany tsara, kanefa aminaro tsisy olo mahay mampiasa izio. Tsiota fanjava fo amiako anaro fa efa robaka edy raha jiaby io.”
Rahalahy Martin nivolan̈a: “Karaha marin̈y raha nivolan̈iny. Kanefa tsy hainy fa Tompo iô; ary izy miaraka amintsika fo.” Marin̈y niny Rahalahy Martin, fotony tsy ela, atsika efa nahavita nanambatra boky 2 000 isanandra!
Piasa mitsangana ankilany lamasiny fan̈anaovan̈a pirinty
ANDRIVONY OLO NAHAREN̈Y VAOVAO TSARA TAMY RADIO
Vahoakany Jehovah tsy vitany nan̈ano pirinty bokindro tompiny fo, fa iro koa nampiasa raha vaovao han̈ambaran̈a vaovao tsara. Tsy ino zen̈y fa radio. Taminy harivany dimansy 26 Fevrie 1922, Rahalahy Rutherford nivolan̈a voanalohany tamy radio. Nan̈ano kabaro izy tamy zen̈y. Titranany io: “Olo Antapitrisany Velon̈o amy Zioty Tsy Hofoaty Eky.” Izio natao tamy radio KOG ta Los Angeles, an Etazonỳ.
Olo kadiriny 25 000 naharen̈y izio. Sasany tamindro nandefa taratasy nankasitraka Rahalahy Rutherford. Araiky tamindro taratasy aby io baka tamy Willard Ashford, nipetraka ta Santa Ana, a Californie. Izy nankasitraka Rahalahy Rutherford fotony “tsara ndreky mahalian̈a” fan̈azavan̈a nataony. Karaha ty koa hoizy: “Misy telo olo marary antran̈onay ato. Ke ndray natao narikitry zahay tatỳ kabaro io, tsy posibla foeky zahay haharen̈y izio, izikoa tsy baka tamy radio fo.”
Nahainaro fo fandaharan̈a nalefa tamy radio, tan̈atiny iro herin̈iandra nan̈araka. Tamy farany taon̈o io, Tilikambo Fiambesan̈a nan̈ambara fa “farany vitsy, olo 300 000 naharen̈y vaovao tsara baka [tamy radio].”
Nankahery Pianatra Baiboly aby io taratasy ndreky fankasitrahan̈a nazondro. Ke iro tapakevitry hanangana radiondro manokan̈a, ta Staten Island. Izio tsy lavitry Betelany Brooklyn. Koa fa nandeha taon̈o, iro nampiasa radiondro manokan̈a, WBBR. Baka tamizio nahavitandro nan̈aparitaka vaovao tsara taminolo maro, avio tamy tany isankarazany.
“ADV”
Tilikambo Fiambesan̈a tamy 15 Ziain 1922 nan̈ambara fa hisy fivoriambe hatao a Cedar Point, a Ohio, manomboko amy 5 firaka 13 Septambra 1922. Ravoravo mare iro Pianatra Baiboly aby io koa fa navy ta Cedar Point.
Tamy kabaro fanokafan̈a, Rahalahy Rutherford nivolana tamy pan̈atriky karaha ty: “Zaho ten̈a matoky fa Tompo ... hitahy fivoriambe ty ndreky han̈ano raha hampisy fitorian̈a maventy mbala tsiary nisy ambaka izy, erantany.” Zay pan̈ano kabaro tamy fivoriambe io samby nandrisiky iro rahalahy ndreky ranabavy aby io hitory.
Pan̈atriky fivoriambe ta Cedar Point, a Ohio, taminy 1922
Tamy joma 8 Septambra, nisy pan̈atriky kadiriny 8 000 navy. Efa tsy din̈indro hitandren̈y kabarony Rahalahy Rutherford. Iro baka nan̈anten̈a fa izy han̈azava dikany soratra “ADV” taminy invitasiony fivoriambe io. Iro koa fa nahazo plasy, naro tamindro nahita lamba be niolonkolon̈o nihanton̈o tan̈abony sehatra tarỳ. An̈isanolo nan̈atriky tao i Arthur Claus, baka ta Tulsa, an Etazonỳ. Mbala tsisy raha mamparesaka feo tamy zen̈y, ke tsy ren̈y tsara kabaro tao. Fa Arthur ndraiky nahita plasy nety tsara.
“Nitandrin̈esinay tsara raha jiaby nivolan̈iny Rahalahy Rutherford”
Nivolan̈a pitaridraharaha fa baka tsy hisiany tabataba, tsisy olo mahazo miditry eky Rahalahy Rutherford koa fa manomboko man̈ano kabaro. Tamy 9:30 maraindrain̈y, Rahalahy Rutherford koa fa nanomboko kabaronany, izy namaky volan̈a Jesosy amy Matio 4:17 ty: “Efa marikitry fanjakan̈any lan̈itry.” (Dikanteniny Panjaka Jacques) Karaha ty hoizy koa fa nan̈azava fomba harin̈esanolo momba Fanjakan̈a io: “Jesosy lasitio nan̈ambara fa lera izy man̈atriky, hisy asa fijinjan̈a hatao, ke havoriny han̈aton̈o izy lan̈iany olo marin̈y ndreky tsy mivadiky.”
Nipetraka tsara tamy plasinany Rahalahy Arthur tamy zen̈y. Ty raha tsaroany: “Nitandrin̈esinay tsara raha jiaby nivolan̈iny Rahalahy Rutherford.” Kanefa tampoko tio narary i Arthur. Hainy fa izikoa izy miboaka, izy tsy ho tafiditry ao eky. Fa ndray izy nalain̈y handeha, izy tsy maintsy niboaka tantany fo.
Tsy ela, ren̈iny tsaratsara izy. Ke izy koa fa nimpody nandeha tamy tany nan̈anaovan̈a fivoriambe io, izy naharen̈y rombo maresaka. Taitry mare izy. Ke izy nanapakevitry hanonga amy tafontran̈o an̈y, baka izy haharen̈y tohiny kabaro tsarabe io firaka amy farany. Mbala vo 23 taon̈o Rahalahy Arthur tamy zen̈y, ke tsy sarotro taminany nanonga tantafontran̈o tan̈y. Nibian̈a lafenaitrany tafontran̈o io tamy zen̈y. Ke hitany “naharen̈y tsara” izy koa fa nan̈aton̈o tio.
Tsy Arthur zaraiky tan̈abony tafo tao. Nisy kamaradiny maromaro koa tao, Frank Johnson an̈arany araiky. Nan̈aton̈o izy malaky i Frank sady nan̈ontany: “Misy mesopiky aminao ao?”
“Ia, zaho misy” ho Arthur.
Volan̈iny Frank: “Anao ten̈a valimbavakanay. Hitanao lambabe miolonkolon̈o mifantsiky amy kilò io? Izio banderole. Tandrin̈esa tsara raha volan̈iny Pitsara.a Lera izy mivolan̈a: ‘Ambarà, ambarà’, direkty tapaha tady efatra io.”
Niambin̈y sin̈aly io Arthur ndreky iro namany aby io, ke efa pare tantan̈anany mesopikinany. Tsy ela, navy taminy hevitry maventy tamy kabaronany amy zay Rahalahy Rutherford. Endrakendraka sady nafana fô mare izy, ke azo antoko fa mety tafandronton̈o foeky izy nivolan̈a: “Aboaha fa anaro tsy mivadiky ndreky ten̈a vavolombelon̈ony Tompo. Tohiza fo ady firaka Babylony ravan̈a tanteraka. Ambarà amy tany jiaby hafatra io. Mila hainy donia ty fa Jehovah Zan̈ahary, avio Panjakany panjaka ndreky Tompony tompo i Jesosy Kristy. Miavaka andra niany ty. Aleva onon̈o fa efa manjaka Panjaka io. Anaro irahiny han̈ambara raha zen̈y. Ke ambarà, ambarà, ambarà, raha momba Panjaka io ndreky Fanjakan̈anany!”
Nitantara i Arthur fa izy ndreky rahalahy hafa nanapaka tady tamy banderole io, ke nivaha moramora raha io. Karaha ty soratra tamizio: “Ambarà raha momba Panjaka io ndreky Fanjakan̈anany.” “ADV” io fan̈afohezen̈a volan̈a angiley “advertise.” Dikanizio “mitory” na “man̈ambara.”
“ASA ARAIKY MAVENTY”
Fivoriambe ta Cedar Point in̈y, nan̈ampy iro rahalahy ndreky ranabavy aby io hifantoko taminy asa maventy; fitorian̈a momba Fanjakan̈any Zan̈ahary. Ravoravo nandray anjara tamizio lan̈iany olo von̈ono. Nisy pisava lalan̈a araiky baka Oklahoma, an Etazonỳ, nanoratra karaha ty: “Zahay nitory tamy faritry nisy olo niasa tamy tany fangadian̈a charbon de terre. Iro ten̈a masikiny.” Nivolan̈a koa izy fa iro olo aby io koa fa naharen̈y hafatra baka tamy gazety Fotoam-pahasambarana, matetiky “iro latsaka ranomaso.” Ke hoizy: “Ten̈a ravoravo zahay fotony afaka nankahery iro.”
Haindro Pianatra Baiboly aby io fa ten̈a raha maventy volan̈any Jesosy amy Lioka 10:2 ty: ‘Be mare vokatra, fa piasa fo vitsy.’ Ke koa fa nifaran̈a taon̈o, iro nahaitapakevitry fo han̈ambara hafatra momba Fanjakan̈a io firaka amy tany farany lavitry.
a “Pitsara” nikahian̈a Rahalahy Rutherford ndraikindraiky, fotony nisy fotoan̈a izy nan̈ano asany pitsara ta Missouri, an Etazonỳ.