Baiboly Mampianatra Atsika Raha Momba Araiky Nampanoratra Izio

1. Nan̈ino anao mankasitraka Baiboly?

MAN̈ANO mersy Jehovah atsika fotony izy nan̈amia atsika Baiboly! Baka amizio an̈amezany atsika torohevitry han̈ampy atsika hamaha problemo tojy atsika amy zioty. Tsy vitany zen̈y fo fa, atsika koa amezany fan̈antinan̈a tsara momba ny hoavy. Fa ny ten̈a maventy, ambarany atsika amy Baiboly ao toetrinany isankarazany. Hanohin̈y fontsika mare ndreky handrisiky atsika hikamarady marikitry amy Jehovah fisaintsain̈ana toetrinany maro tsarabe aby io.​—Sal. 25:14.

2. Akory aby fomba nan̈ambarany Jehovah hafatranany taminolo?

² Tiany Jehovah olo hahay izy. Taloha tan̈y, akory fomba nan̈ambarany hafatranany taminolo? Baka tamy nofy, fahitan̈a, avio anjely. (Nom. 12:6; Asa. 10:3, 4) Fa akory eky ahaizantsika iro nofy ndreky fahitan̈a, avio hafatra nindesindro anjely aby io izikoa iro io tsy nisoratin̈y? Zen̈y nahavy Jehovah nan̈iraka lelahy vitsivitsy ‘hanoratra amy boky’ raha tiany ho haintsika. (Jer. 30:2) Atsika afaka matoky fa fomba nifidiny hifandraisan̈a amintsika io ny farany tsara sady mahatsara atsika. Nan̈ino? Fotony ‘tsisy tsin̈iny lalan̈any araiky ten̈a Zan̈ahary.’​—Sal. 18:30.

3. Ino raha nataony Jehovah baka Baiboly misy fo firaka amy zioty? (Isaia 40:8)

³ Vakia Isaia 40:8. Efa mandeha andrivony taon̈o, Volan̈a Zan̈ahary nan̈amia taridalan̈a feno fahendrena lelahy ndreky man̈angy tsy mivadiky. Akory eky nampa posibla zen̈y? Efa ela baka nanoratan̈a Soratra Masin̈y io, salakady izio nisoratin̈y tamy raha mora robaka, avio amy zioty efa tsisy iro horonamboky aby nisoratin̈y tamy voanalohany in̈y eky. Fa ndray zen̈y, nataony Jehovah azo antoko fa nan̈ano dika soratra boky masin̈y io olo. Tsy lavorary iro pan̈ano dika soratra aby io, fa iro nitandrin̈y mare. Karaha ty, ohatra, raha nivolan̈iny manampahaizan̈a araiky momba Soratra Hebreo: “Azo antoko fa amy boky kay jiaby nisy taloha tan̈y, tsisy boky vita dika soratra marin̈y tsarabe mandilatra Baiboly.” Ke ndray nandeha fotoan̈a sady mora robaka raha aby nanoratan̈a Baiboly io, avio tsy lavorary iro pan̈ano dika soratra izio, afaka matoky atsika fa mbala hevitry Jehovah fo raha voasoratra amy Baiboly vakintsika amy zioty io.

4. Ino raha hianarantsika amy lahatsoratra ty?

⁴ Baka amy Jehovah “fan̈amezan̈a tsara jiaby ndreky fan̈amezan̈a lavorary jiaby.” (Jak. 1:17) Baiboly an̈isany kadô farany tsara namezany Jehovah atsika. Baka amy kadô azontsika ahaizantsika olo nan̈amia izio. Izio koa ahaizan̈a asa olo io mahay atsika ndreky raha ilaintsika tsarabe. Karaha zen̈y koa Baiboly. Fotony atsika koa fa mandiniky tsarabe izio, maro raha haintsika momba Jehovah. Haintsika fa izy mahay atsika ankitin̈y avio hainy tsarabe koa raha ilaintsika. Amy lahatsoratra ty, atsika handiniky telo amy toetriny Jehovah koran̈iny Baiboly. Tsy ino zen̈y fa fahendrenanany, fan̈anaovany ny rariny, avio fitiavan̈anany. Hizahavantsika voanalohany, akory an̈aboahany Baiboly fahendrenany Zan̈ahary.

ZAN̈AHARY BE FAHENDRENA

5. Akory an̈aboahany Baiboly fahendrenany Zan̈ahary?

⁵ Hainy Jehovah fa atsika mila torohevitry feno fahendrena baka aminany. Ke Baiboly, kadô namezany atsika io feno fahendrenanany. Misy vokany tsara aminolo torohevitry baka amizio, fotony Baiboly io man̈ova olo. Mosesy koa fa nanoratra iro boky voalohandohany amy Baiboly, hoizy taminy Israelita aby io: ‘Tsy raha volan̈a tsisy dikany iro io aminaro, fa iankinany ain̈inaro.’ (Deot. 32:47) Ke lan̈iany man̈araka raha volan̈iny Soratra Masin̈y hahomby ndreky ho sambatra amy fiain̈ana. (Sal. 1:2, 3) Ndray efa elabe nanoratan̈a Volan̈a Zan̈ahary, izio mbala mahavita man̈ova fiain̈ananolo fo. Amy jw.org, ohatra, misy andiandahatsoratra “Man̈ova Olo Baiboly”, ahitan̈a tantarampiain̈ananolo mandilatra 50. Iro olo aby io samy nahavita niova ndreky nankatsara fiain̈anandro, fotony iro nino ke ‘miasa an̈atindro’ ao Volan̈a Zan̈ahary.​—1 Tes. 2:13.

6. Nan̈ino atsika mivolan̈a fa tsisy boky miran̈a Baiboly?

⁶ Tsisy boky miran̈a Volan̈a Zan̈ahary. Nan̈ino? Fotony Jehovah nampanoratra izio. Izy farany mahery, velon̈o mandrakizay, avio tsisy manan̈a fahendrena miran̈a amy ninany. Maro boky mbala misy fo ndray efa naty olo nanoratra izy, fa torohevitry amy boky aby io fo efa lany andra. Toro lalan̈a feno fahendrena an̈atiny Baiboly ndraiky mbala mahomby fo sady nan̈ampy olo maro letrizay. Ke atsika koa fa mamaky avio misaintsain̈y raha nianarantsika an̈aty boky masin̈y io, akory ataony Zan̈ahary? Izy han̈amia atsika fan̈ahy masin̈inany han̈ampian̈a atsika hahay akory han̈arehan̈a torohevitry nazontsika tao. (Sal. 119:27; Mal. 3:16; Heb. 4:12) Velon̈o Zan̈ahary nampanoratra Baiboly io salakady ten̈a tihan̈ampy atsika. Tsy mandrisiky anao hamaky Baiboly tsy tapaka ma fahaizan̈a zen̈y?

7. Taloha tan̈y, akory fomba nan̈ampiany Baiboly vahoakany Zan̈ahary hiray sain̈y?

⁷ Akory koa ahitan̈a fa Baiboly misy fahendrenany Zan̈ahary? Izio man̈ampy vahoakany Zan̈ahary hiray sain̈y. Iro Israelita aby io koa fa navy tamy Tany Nampan̈antinain̈y, iro niparitaka tamy tanàna maro. Sasany tamindro nanjary pan̈arato, sasany pitarimy raha, avio sasany pamboly. Israelita nipetraka tamy faritry araiky iziô mety ho varian̈a tamy velonten̈a, ke mety han̈adin̈a havandro tamy faritry hafa. Fa Jehovah nandamin̈y fivorian̈a matetitetiky baka iro afaka niaraka nitandren̈y famakian̈a ndreky fan̈azavan̈a Volan̈anany. (Deot. 31:10-13; Neh. 8:2, 8, 18) Iritrireta hely raha tsapany Israelita araiky izikoa fa avy a Jerosalema ke mahita piaramanompo aminany mandeha antapitrisany, baka amy faritry Israely jiaby! Karaha zen̈y nataony Jehovah baka panomponany hiray sain̈y fo. Tafara tatỳ, izikoa fa niforon̈o fiangonan̈a kristianin̈y, tan̈atinizio tao nisy lelahy ndreky man̈angy samby amy fivolan̈any. Nisy tamindro olo an̈abo, fa sasany ndraiky olo tsotra; tao ny manandraha, tao koa ny masikiny. Fa iro niray sain̈y nanompo Zan̈ahary marin̈y, nohony fitiavandro Soratra Masin̈y. Loso nahay raha koran̈iny Volan̈a Zan̈ahary koa lan̈iany olo vaovao izikoa fa nampiandro ndreky niaraka nivory tamindro.​—Asa. 2:42; 8:30, 31.

8. Nan̈ino Baiboly mampiray sain̈y vahoakany Jehovah amy zioty?

⁸ Zan̈aharintsika feno fahendrena io mbala mampiasa Baiboly fo hampianaran̈a vahoakanany ndreky han̈ampian̈a iro hiray sain̈y. Amy Baiboly misy fahamarin̈ana jiaby tokony ho haintsika momba Jehovah. Miaraka mivory tsy tapaka koa atsika lera fivorian̈a ndreky fivoriambe ke mitandren̈y famakian̈a ndreky fan̈azavan̈a Baiboly, avio miaraka midiniky izio. Hita baka amy zen̈y fa Baiboly io fitaovan̈a ten̈a ampiasainy Jehovah han̈ampian̈a vahoakanany “hanompo izy an̈atiny firaisantsain̈y.”​—Zef. 3:9.

9. Ino toetry mila anan̈antsika baka atsika hahazo tsara hafatra an̈atiny Baiboly? (Lioka 10:21)

⁹ Misy fomba hafa koa ahitan̈a fahendrenany Jehovah. Maro aminy andininy amy Baiboly ao nisoratin̈y baka olo manetry ten̈a fo mahazo raha tiany hambara. (Vakia Lioka 10:21.) Afaka mamaky Baiboly aby olo amy tany jiaby. Misy manampahaizan̈a araiky nivolan̈a fa Baiboly “boky ten̈a maro pamaky, avio mifantoko tsarabe koa olo lera mamaky izio.” Fa ndray zen̈y, olo manetry ten̈a fo ten̈a mahazo raha tianizio hambara ndreky man̈araka raha volan̈inizio.​—2 Kor. 3:15, 16.

10. Akory koa fomba hafa an̈aboahany Baiboly fahendrenany Jehovah?

¹⁰ Akory koa fomba hafa an̈aboahany Baiboly fahendrenany Jehovah? Jehovah mampiasa Baiboly hampianaran̈a ndreky hankahirezan̈a atsika, na atsika amy fitambarany zen̈y na tsiaraikiaraiky. Ke atsika koa fa mamaky Baiboly, tsapantsika fa izy mijery atsika tsiaraikiaraiky. (Isaia 30:21) Lera misy problemo, ohatra, matetiky atsika mahita andininy karaha nisoratin̈y nintsika manokan̈a. Kanefa antapitrisany olo voasariky amy Baiboly. Ke ino mahavy fan̈azavan̈a an̈aty ao tsy mety lany daty sady mifan̈araka tsarabe amy raha ten̈a ilainao manokan̈a? Fotony Araiky nampanoratra izio farany misy fahendrena amy raha jiaby!​—2 Tim. 3:16, 17.

ZAN̈AHARY MAN̈ANO NY RARINY

11. Izikoa zahan̈a fomba nanoratan̈a Baiboly, ino ivolan̈ana fa Zan̈ahary tsy man̈avakavaka?

¹¹ Jehovah Zan̈ahary man̈ano ny rariny. (Deot. 32:4) Olo man̈ano ny rariny zen̈y tsy man̈avakavaka. Dikanizen̈y, Jehovah Zan̈ahary tsy man̈avakavaka. (Asa. 10:34, 35, l.p.a.; Rom. 2:11, l.p.a.) Porofonizen̈y, Baiboly nisoratin̈y tamy volan̈a ten̈a hainolo maro. Ohatra, tamy volan̈a hebreo nanoratan̈a ankamarozandro boky 39 voanalohany ao, fotony zen̈y volan̈a ten̈a fampiasainy vahoakany Jehovah tamy fotoan̈a zen̈y. Fa tamy taonjato voanalohany ndraiky, volan̈a griky ten̈a fampiasainolo. Ke zen̈y nahavy ankamarozandro boky 27 farany amy Baiboly ao nisoratin̈y tamy volan̈a griky. Tsy nataony Jehovah amy volan̈a araiky fo Baiboly. Amy zioty, efa ho valo arivo tapitrisa olo erantany sady mampiasa volan̈a isankarazany. Akory hahavitanolo marobe zen̈y hahay momba Jehovah?

12. Karakory fomba ahatantirahany Daniela 12:4, aminy andra farany zioty?

¹² Amy bokiny Daniela ao, Jehovah nampan̈anten̈a fa amy fotoan̈any farany, “hitombo be fahaizanolo ny marin̈y” amy Baiboly. Dikanizen̈y, hazava tsarabe aminolo maro raha koran̈inizio. (Vakia Daniela 12:4.) Maro Baiboly avio boky ndreky gazety voadika, natao printy, ndreky nizarain̈y ke maro olo nanjary nahay raha an̈aty Baiboly. Erantany, tsisy boky voadika ndreky voazara maromarony Baiboly! Matetiky lafo mare Baiboly alafondro pivarotro aby io. Fa panompony Jehovah ndraiky efa nahavita nandika tapany amy Baiboly na izy feno, amy volan̈a mandilatra 240. Olo jiaby afaka mahazo amizio fotony izio tsy alafo. Ino vokatra zen̈y? Alohany aviany farany, loso mahay “vaovao tsara mikasiky Fanjakan̈a” karazanolo jiaby. (Mat. 24:14) Tiany Zan̈ahary hahay izy, olo farany maro. Ke iro ataony afaka mamaky Baiboly. Hita baka amy zen̈y fa Jehovah tia rariny ankitin̈y sady ten̈a tia atsika.

ZAN̈AHARY BE FITIAVAN̈A

13. Nan̈ino Baiboly man̈aboaka fa Jehovah be fitiavan̈a? (Jaona 21:25)

¹³ Baiboly man̈aboaka fa fitiavan̈a toetry ten̈a mampiavaka Jehovah. (1 Jaona 4:8) Akory ahitan̈a zen̈y? Misy raha, ohatra, nampidiriny Jehovah an̈aty Baiboly, fa misy raha koa tsy nampidiriny. Zay raha han̈ampy atsika hifandray tsara aminany ndreky hampasambatra atsika rango zioty, avio fomba azahoan̈a fiain̈ana tsisy farany fo nataony an̈aty ao. Nohony fitiavany atsika, tsy nampidiriny an̈aty Baiboly tsipiriandraha tsy ten̈a ilaintsika amy fanompoan̈a izy.​—Vakia Jaona 21:25.

14. Izikoa Baiboly zahan̈a, akory koa ahitan̈a fa Jehovah tia atsika?

¹⁴ Baka amy fomba fikoran̈any amintsika koa ahitan̈a fa Jehovah tia atsika. Izy man̈aja atsika. Nan̈ino atsika mivolan̈a zen̈y? Fotony Baiboly io tsy nifinoany lalàn̈a misy listiny raha jiaby mety atao ndreky tsy mety. Fa izio nasiany tantaranolo, faminanian̈a, ndreky torohevitry maro mahomby baka han̈ampian̈a atsika hahay hanapakevitry. Ke izikoa atsika fa mamaky Baiboly, atsika loso tia Jehovah ndreky von̈ono han̈araka volan̈anany amy fô jiaby.

15. a) Karakory an̈aboahany Baiboly fa Jehovah mijery atsika? b) Tantaranjovy saintsain̈iny tsaiky viavy, rahalahy tanora, avio ranabavy efa matoe, amy sary io? (Gen. 39:1, 10-12; 2 Mpanj. 5:1-3; Lioka 2:25-38)

¹⁵ Baiboly man̈aboaka fa Jehovah ten̈a mijery atsika. Amy fomba akory? Amy Baiboly ao feno tantara man̈aboaka tsarabe raha tsapantsika olombelon̈o. Tsapantsika tsarabe fihetsehampondro olo aby io fotony iro ‘nanan̈a fihetsehampo karaha nintsika fo.’ (Jak. 5:17) Fa ny ten̈a maventy, atsika koa fa mandiniky fomba nitondrasany Jehovah olo aby io, loso mazava amintsika tsarabe fa “Jehovah ten̈a be fitiavan̈a sady mamindra fô.”​—Jak. 5:11.

16. Ino raha ianarantsika momba Jehovah izikoa atsika fa mandiniky fomba nitondrasany olo nan̈ano hadisovan̈a tantarainy Baiboly? (Isaia 55:7)

¹⁶ Mbala misy fomba hafa koa an̈aboahany Baiboly fitiavany Jehovah atsika. Soratra Masin̈y man̈amia toky fa Zan̈ahary tsy han̈ary atsika izikoa atsika sendra man̈ano hadisovan̈a. Isaka teteky iro Israelita aby io nanota tamy Jehovah, fa iro koa efa ten̈a nibebaka, nambelany hadisovan̈andro. (Vakia Isaia 55:7.) Iro Kristianin̈y tamy taonjato voanalohany koa nahatsapa fa Zan̈ahary ten̈a tia iro. Tamy zen̈y, nisy lelahy araiky nan̈ano fahotan̈a maventy tan̈aty fotoan̈a lavalava, fa izy baka tio nibebaka. Ke fan̈ahy masin̈y Zan̈ahary nandrisiky Paoly nan̈iraka piaramanompo aby io ‘han̈ambela hadisovan̈a ndreky hankahery’ lelahy io. (2 Kor. 2:6, 7; 1 Kor. 5:1-5) Tiany Jehovah ankitin̈y panomponany matoa iro tsy nariany ndray nan̈ano hadisovan̈a! Tiany iro ke nampiany ndreky nahitsiny, avio nikahiany hinaman̈a taminany ndraiky. Amy zioty, Jehovah mampan̈anten̈a han̈ano karaha zen̈y koa aminolo panota jiaby mibebaka.​—Jak. 4:8-10.

“FAN̈AMEZAN̈A TSARA” BAIBOLY KE ANKASITRAHA

17. Nan̈ino ma Baiboly io kadô miavaka?

¹⁷ Baiboly io kadô tsara sady miavaka namezany Jehovah atsika. Fotony nan̈ino? Hitantsika tamy lahatsoratra ty, fa Baiboly io man̈aboaka toetriny Zan̈ahary aby ty: Fahendrena, man̈ano ny rariny, avio be fitiavan̈a. Aboakany boky io koa fa tiany Jehovah atsika hahay izy. Tiany koa atsika hanjary kamaradinany.

18. Akory an̈aboahantsika fa atsika mankasitraka “fan̈amezan̈a tsara” baka amy Jehovah io?

¹⁸ Tsy tiantsika han̈adin̈a fa Volan̈a Zan̈ahary io “fan̈amezan̈a tsara.” (Jak. 1:17) Ke irarian̈a atsika tsy voly hankasitraka izio. Man̈ano zen̈y atsika izikoa mamaky ndreky misaintsain̈y volan̈a masin̈y an̈atinizio ao. Koa atsika man̈ano zen̈y, matokisa fa Zan̈ahary nampanoratra boky io hitahy ezakantsika, ke atsika hahay Zan̈ahary tsarabe.​—Ohab. 2:5.