Akory Hamaliany Jehovah Vavaka Ataontsika?

1-2. Ino raha mety avy an̈aty jerintsika momba vavakantsika?

ANAO ma efa navy nieritreritry asa Jehovah mba mamaly vavakanao? Izikoa zen̈y, tsy anao zaraiky mieritreritry karaha zen̈y. Maro rahalahy ndreky ranabavy nivolan̈a fa iro koa efa navy loso diniky karaha zen̈y, intsaka eky lera iro miatriky raha sarotro. Izikoa atsika mijaly mare, loso sarotro amintsika mahita akory amaliany Jehovah vavakantsika.

² Alo atsika handiniky ndraiky nan̈ino atsika afaka matoky fa Jehovah mamaly vavakany panomponany. (1 Jaona 5:15) Hamaly fan̈ontanian̈a aby ty koa atsika ato: Nan̈ino ndraikindraiky Jehovah hitantsika karaha tsy mamaly vavakantsika? Akory aby fomba hamaliany vavakantsika amy zioty?

METY TSY ARAKARAKA RAHA NIRITRIRETINTSIKA FOMBA AMALIANY JEHOVAH VAVAKANTSIKA

3. Nan̈ino atsika tiany Jehovah hivavaka aminany?

³ Soratra Masin̈y man̈amia toky atsika fa Jehovah ten̈a tia atsika salakady atsika valera aminany. (Hag. 2:7; 1 Jaona 4:10) Zen̈y mahavy izy man̈iraka atsika hangataka fan̈ampian̈a aminany amy vavaka. (1 Pet. 5:6, 7) Izy tihan̈ampy atsika hifandray marikitry aminany ndreky hiatriky problemo jiaby mahazo atsika.

4. Akory ahaizantsika fa Jehovah mamaly vavakany panomponany? (Zahava koa sary.)

⁴ Matetiky hitantsika amy Baiboly ao fa Jehovah mamaly vavakany panomponany. Araiky amy zen̈y iziô Panjaka Davida. Maro fahavalo izy tamy fiain̈ananany, sady aminio maro mampavozo mare. Ke matetiky izy nivavaka tamy Jehovah nangataka fan̈ampian̈a. Tandraraiky, izy nilafidafiky mare tamy Jehovah karaha ty: ‘A Jehovah e, tandrin̈esa vavaka ataoko; tandrin̈esa kaiky vonjy ataoko aminao. Valia zaho fotony anao mafatoky sady man̈ano ny rariny.’ (Sal. 143:1) Jehovah namaly vavakany Davida taminizy nangataka vonjy taminany. (1 Sam. 19:10, 18-20; 2 Sam. 5:17-25) Ke Davida nasaky nivolan̈a karaha ty: “Jehovah tsy lavitry zay olo mikaiky izy.” Afaka matoky zen̈y koa atsika.​—Sal. 145:18.

5. Erakany raha niritriretindro fo ma fomba namaliany Jehovah vavakany panomponany taloha tan̈y? Man̈ameza ohatra. (Zahava koa sary.)

⁵ Jehovah mety tsy hamaly vavakantsika erakany fomba niritriretintsika. Karaha zen̈y iziô taminy apostoly Paoly. Izy nangataka tamy Zan̈ahary han̈adoso taminany “fatsiky amy nofotro.” Intelo aby Paoly nivavaka manokan̈a momba problemo io. Nivaliany Jehovah ma vavakanany aby zen̈y? Ia, fa tsy erakany raha nantinainy Paoly. Tsy nadosony Jehovah problemo io, fa Paoly namezany angovo hahavitany manohy manompo Izy ndreky tsy mivadiky aminany.​—2 Kor. 12:7-10.

6. Nan̈ino ndraikindraiky Jehovah mety hitantsika karaha tsy mamaly vavakantsika?

⁶ Misy fotoan̈a koa atsika mety hahazo valimbavaka tsy arakaraka raha nantinaintsika. Fa ndray zen̈y, afaka matoky atsika fa Jehovah mahay fomba ten̈a tsara han̈ampian̈a atsika. Ndray izy aby, Jehovah afaka ‘man̈ano raha mandilatra lavitry raha jiaby angatahintsika na iritriretintsika.’ (Efes. 3:20) Zen̈y mahavy vavakantsika mety valiany amy fotoan̈a ndreky amy fomba tsy niritriretintsika foeky.

7. Nan̈ino atsika mety mila man̈ova raha angatahintsika amy vavaka? Man̈ameza ohatra.

⁷ Mety mila hivoantsika raha angatahintsika amy vavaka izikoa fa loso mazava amintsika ino sitrapony Jehovah. Diniha baka ohatrany Martin Poetzinger. Tsy ela tafarany mariazinany, Rahalahy Poetzinger nigadrain̈y tamy toby fitanany Nazỳ olo. Tamy voanalohany, izy nangataka tamy Jehovah baka izy ho afaka gadra, amy zen̈y izy afaka hikarakara vadiny ndreky hahavita hitory ndraiky. Kanefa afaka herin̈iandra aroe, hitany fa tsisy raha foeky man̈aboaka fa Jehovah han̈ano raha hahavy izy ho afaka gadra. Ke izy nanomboko nivavaka karaha ty: “Jehovah, ambarà zaho ino raha tianao hataoko.” Avio izy nanomboko nandiniky raha niaretany rahalahy hafa tamy toby tao. Maro tamindro io koa baka niasaloha mare tamy vadindro ndreky zanakandro. Ke Rahalahy Poetzinger nivavaka karaha ty: “Jehovah, mersy anao amy fanendrena vaovao ty. Ampia zaho hahavita hankahery rahalahiko aby io.” Zen̈y ankitin̈y raha nataony tan̈atiny sivy taon̈o nigadrany tamy toby io tao!

8. Ino raha maventy mila alaintsika onon̈o lera atsika mivavaka?

⁸ Tsara alaintsika onon̈o fa Jehovah manan̈a fikasan̈a hitantirahiny amy fotoan̈a efa nifidiny. Tafiditry amy fikasan̈anany zen̈y, han̈adoso mandrakizay problemo jiaby mampijaly olo, karaha ataony antambo, aretin̈y avio fahafatesan̈a. Amy fomba akory han̈anaovany zen̈y? Izy hampiasa Fanjakan̈anany. (Dan. 2:44; Apok. 21:3, 4) Fa parapavianizen̈y, mbala ambelany Jehovah mitondra donia ty antsendriky Satana.b (Jaona 12:31; Apok. 12:9) Izikoa vahany Jehovah aby problemonolombelon̈o amy zioty, tsy loso karaha mahay mitondra edy Satana va? Ke atsika mila miambin̈y fotoan̈a han̈atantirahany Jehovah fikasan̈anany. Fa zen̈y ndraiky tsy mivolan̈a fa izy tsy han̈ampy atsika foeky amy zioty. Alo baka hidinihintsika raha sasany ataony Jehovah an̈ampian̈a atsika.

FOMBA AMALIANY JEHOVAH VAVAKANTSIKA AMY ZIOTY

9. Akory an̈ampiany Jehovah atsika koa fa hanapakevitry? Man̈ameza ohatra.

⁹ Atsika amezany fahendrena. Jehovah mampan̈anten̈a han̈amia fahendrena ilaintsika baka hahavitan̈a hangala fanapahankevitry tsara. Mila fahendrena baka amy Jehovah atsika lera hanapakevitry amy raha mety hisy vokany be amy fiain̈anantsika, karaha ataony hanambady sa tsy hanambady. (Jak. 1:5) Diniha baka ohatrany Maria,c ranabavy araiky selibatera. Ravoravo izy nan̈ano asany pisava lalan̈a maharitry, fa izy baka tio nifanojy tamy rahalahy araiky. Hoizy: “Loso nahaikamarady fo zahay, ke zahay nanjary nifankatia. Haiko fa zaho mila manapakevitry, ke zaho nivavaka mare momba izio. Zaho ten̈a nila taridalan̈a baka tamy Jehovah. Kanefa, haiko koa fa Jehovah tsy hanapakevitry amy pilasinaka.” Tsapany Maria fa Jehovah namaly vavakanany ke nan̈amia izy fahendrena. Tamy fomba akory? Izikoa izy fa nan̈ano fikarohan̈a tamy boky ndreky gazetintsika, izy nahita lahatsoratra nan̈ampy izy hahita valiny fan̈ontanian̈a jiaby nitadiaviny. Nitandrin̈esiny tsara koa torohevitry feno fahendrena baka tamy mamany, panompony Jehovah tsy mivadiky. Torohevitry aby zen̈y nan̈ampy Maria handiniky tsarabe raha tsapany. Ke tamy farany vitany fo nangala fanapahankevitry tsara.

10. Izikoa Filipianina 4:13 zahan̈a, ino raha ataony Jehovah han̈ampian̈a panomponany? Man̈ameza ohatra. (Zahava koa sary.)

¹⁰ Atsika amezany angovo hiaretan̈a. Karaha nataony taminy apostoly Paoly, Jehovah han̈amia angovo ilaintsika hiaretan̈a fitsapan̈a mahazo atsika. (Vakia Filipianina 4:13.) Diniha baka akory nataony Jehovah nan̈ampy Benjamin hiaritry raha ten̈a sarotro. Nipetraka tamy tobiny pitsoaponenan̈a araiky tan Afriky izy ndreky fianakavian̈anany. Ankamarozany fahatanoran̈any rahalahy io lany tao. Hoizy: “Zaho tsy voly nivavaka tamy Jehovah baka zaho hamiany angovo hahavitako han̈ano raha mamparavoravo izy. Nivaliany Jehovah vavakanaka, ke zaho nataony nilamintsain̈y, nisy korazy hanohizan̈a fitorian̈a, avio namezany boky ndreky gazety nan̈ampy zaho hatanjaka arapan̈ahy fo.” Karaha ty koa nivolan̈iny: “Zaho koa fa mamaky tantarampiain̈anandro piaramanompo aby io, loso haiko akory fomba an̈ampiany Jehovah iro hiaritry, ke zen̈y nan̈ampy zaho ho tapakevitry tsy hivadiky foeky.”

11-12. Akory mety ataony Jehovah mampiasa piaramanompo hamalian̈a vavakantsika? (Zahava koa sary.)

¹¹ Ampiasainy fianakavian̈antsika arapan̈ahy. Nivavaka mare Jesosy taminy alin̈y talohany han̈anaovany soron̈o ain̈inany. Izy niangavy Jehovah tsy han̈ambela olo hieritreritry fa izy tsy man̈isy fotiny Zan̈ahary, ke ho afabaraka. Fa Jehovah tsy nan̈ano raha nangatahiny Jesosy zen̈y. Ino fo nataony? Jehovah nandefa anjely araiky an̈isany rahalahiny Jesosy han̈ampy ndreky hankahery izy. (Lioka 22:42, 43) Karaha zen̈y koa, Jehovah mety hampiasa araiky amindro rahalahy ndreky ranabavintsika aby io hankahery atsika. Mety baka amy telefony zen̈y, na mety hisy amindro foeky avy hamangy atsika antran̈ontsika. Atsika tsiaraikiaraiky afaka mitady fomba han̈anaovan̈a ‘volan̈a mankahery’ amy piaramanompo.​—Ohab. 12:25.

¹² Diniha baka tantarany ranabavy Miriam. Nahatsiaro latsatokan̈a mare izy, herin̈iandra vitsivitsy tafarany nifatesany vadiny. Izy nalahelo mare sady kivy. Ke niasa nitomoan̈y fo izy salakady nila olo ikoran̈ana. Hoizy: “Zaho tsisy angovo ikahian̈a olo foeky, ke zaho nivavaka tamy Jehovah. Tan̈atiny zaho mbala mitomoan̈y ndreky mivavaka in̈y, nan̈ena telefoninaka. Antipan̈ahy araiky kamaradinay zay nikaiky zaho.” Nankahery Miriam mare antipan̈ahy io ndreky vadiny. Resy lahatra Miriam fa Jehovah nandrisiky rahalahy io hikaiky izy.

13. Jehovah ma afaka mampiasa olo tsy manompo izy hamalian̈a vavakantsika? Man̈ameza ohatra.

¹³ Izy mety hampiasa olo tsy manompo izy. (Ohab. 21:1) Ndraikindraiky, Jehovah mety hampiasa olo tsy manompo izy hamalian̈a vavakany panomponany. Ataony raha hahavy olo aby io han̈ampy olonany. Karaha zen̈y, ohatra, nataony tamy Nehemia. Jehovah nan̈ano raha hahavy Panjaka Artaksersesy han̈ambela Nehemia himpody ta Jerosalema, amy zen̈y izy afaka man̈ampy amy fan̈oren̈ana tanàna io ndraiky. (Neh. 2:3-6) Karaha zen̈y koa ataony Jehovah amy zioty. Firaka aminolo tsy manompo izy, mety ampiasainy han̈ampy atsika amy fotoan̈a ilavantsika zen̈y.

14. Nan̈ino tantarany Soo Hing io mankahery anao? (Zahava koa sary.)

¹⁴ Tsapany ranabavy araiky kahian̈a Soo Hing fa Jehovah nampiasa dokoteranany han̈ampy izy. Marary sain̈y zanaka ranabavy io, ary maromaro karazan̈a aretintsain̈y avoa tsaiky io. Nisy fotoan̈a zanany io navoa aksidan mare, ke iro roeny vadiny tsy maintsy niala niasa baka hahavitan̈a mikarakara zanakandro io. Vokatranizen̈y, iro loso sahiran̈a arabola. Soo Hing nivolan̈a fa efa dila loatra problemo nahazo iro ke nila tsy ho din̈iny. Ke nikoran̈iny tamy Jehovah raha tan̈aty fonany, avio izy nangataka fan̈ampian̈a taminany. Dokotera nikarakara iro io nitady fomba han̈ampian̈a izy ndreky fianakavian̈anany. Nohony raha nataony dokotera io, iro nanjary nahazo fan̈ampian̈a baka tamy fanjakan̈a sady nahita tran̈o zakany volandro. Tafara tatỳ, Soo Hing nivolan̈a: “Hitanay fa tan̈any Jehovah ten̈a nan̈ampy zahay. Izy ‘Pitandren̈y vavaka’ ankitin̈y.”​—Sal. 65:2.

FINOAN̈A HAN̈AMPY ATSIKA HAHITA NDREKY HAN̈EKY VALIMBAVAKA

15. Ino nan̈ampy ranabavy araiky hahita fa efa nivaliany Jehovah vavakanany?

¹⁵ Matetiky, tsy mibaribary be valiny vavaka ataontsika. Fotony valimbavaka azontsika mety raha han̈ampy atsika tsy hivadiky amy Babantsika andan̈itry an̈y fo. Ke alevaleva onon̈o fo tsao efa nivaliany Jehovah vavakanao. Nisy ranabavy araiky, Yoko an̈arany, nieritreritry fa tsy nivaliany Jehovah vavakanany. Fa baka tio, nanomboko nisoratiny tamy karne raha jiaby nangatahiny tamy Jehovah. Koa fa nandeha fotoan̈a, nimpody nizahavany raha nisoratiny tamy karne in̈y, ke hitany fa ankamarozany vavakanany efa nivaliany Jehovah, firaka tamy raha sasany efa tsy tsaroany! Ndraikindraiky, tsara atsika mangala onondraha hely ke mandiniky fomba amaliany Jehovah vavakantsika.​—Sal. 66:19, 20.

16. Akory han̈aboahantsika fa atsika manampinoan̈a koa vavaka koran̈iny? (Hebreo 11:6)

¹⁶ Manan̈a finoan̈a atsika matoa mivavaka amy Jehovah. Kanefa tsy zen̈y fo fomba an̈aboahantsika fa atsika manampinoan̈a fa lera atsika man̈eky valimbavaka amezany Jehovah atsika koa, ndray karakory izio ndray karakory. (Vakia Hebreo 11:6.) Diniha baka tantarany Mike ndreky Chrissy vadiny. Iro nanan̈a tanjon̈o hanompo amy Betela. Ho Mike: “Efa impirimpiry zahay fivadiany nan̈ano fangatahan̈a hanompo amy Betela. Zahay koa tsy voly nivavaka tamy Jehovah momba tanjon̈onay io, kanefa zahay tsy nety navoakaiky.” Iro fivadiany natoky fa Jehovah mahay fomba ten̈a tsara mety hampiasainy iro. Ke iro nifen̈y erakany vitandro nan̈ano zay karazan̈a fanompoan̈a afaka nataondro. Iro nan̈ano pisava lalan̈a tamy tany nila pitory maro, avio nan̈ampy tamy fan̈oren̈ana. Iro zioty man̈ano asany faritry. Ho Mike: “Tsy arakaraka raha nantinainay foeky matetiky fomba namaliany Jehovah vavakanay. Kanefa vavakanay nivaliny fo, sady aminio tsaratsarany raha niritriretinay.”

17-18. Izikoa zahan̈a Salamo 86:6, 7, ino raha atokisantsika?

¹⁷ Vakia Salamo 86:6, 7. Natoky Davida panoratra salamo fa Jehovah nitandren̈y ndreky namaly vavakanany. Anao koa afaka matoky karaha zen̈y. Tantaranolo aby nikoran̈intsika tamy lahatsoratra ty man̈amia toky atsika fa Jehovah mahavita man̈amia fahendrena ndreky angovo ilaintsika baka hahavitantsika miaritry. Mety hampiasainy Jehovah han̈ampy atsika amy fomba isankarazany piaramanompo amintsika, na koa olo tsy manompo izy.

¹⁸ Haintsika fa Jehovah tsy maintsy hamaly vavakantsika, fa ndraikindraiky fo mety tsy arakaraka raha antinaintsika fomba amaliany izio. Izy tsy maintsy han̈amia atsika raha ten̈a ilaintsika, amy fotoan̈a ten̈a ilavantsika izy. Ke mivavaha fo. Matokisa fa Jehovah hitandren̈y anao. Matokisa koa fa izy hikarakara anao rango zioty. Baka io amy donia vaovao, hataony raha hahavy “raha jiaby manampahin̈ana ho afapo amy raha irindro.”​—Sal. 145:16.