Anao ma Efa Von̈ono amy Fahorian̈a Be?

1. Ino mahatsara mioman̈a aminy antambo?

FIOMAN̈ANA io man̈avotro fahin̈ana. Lera misy antambo, ohatra, lan̈iany olo efa nioman̈a mety ho avotro sady ho afaka han̈ampy olo hafa. Karaha ty nivolan̈iny fikambanan̈a araiky man̈ampy olo, an Eropy an̈y: “Hafa fo izikoa anao tsara fioman̈ana.”

2. Nan̈ino ma atsika tôkony hioman̈a amy faviany fahorian̈a be? (Matio 24:44)

² Ho tampoko faviany “fahorian̈a be” io. (Mat. 24:21) Fa ny raha tsy mampitovy izio aminy antambo hafa, atsika efa mahay fa izio ho avy. Efa misy 2 000 taon̈o roso zay, Jesosy nampitandrin̈y pan̈aradia izy fa iro tôkony ho von̈ono hiatriky fotoan̈a io. (Vakia Matio 24:44.) Izikoa atsika efa mioman̈a, ho moramora amintsika hiatriky fotoan̈a sarotro be io avio ho afaka han̈ampy olo hafa han̈ano ambaka zen̈y koa atsika.​—Lioka 21:36.

3. Nan̈ino ho von̈ono hiatriky fahorian̈a be atsika izikoa miaritry, mahinakinaka olo, avio be fitiavan̈a?

³ Misy toetry telo mety han̈ampy atsika ho von̈ono hiatriky fahorian̈a be. Akory, ohatra, izikoa atsika hasain̈a mitory didipitsaran̈a henjan̈a mare kanefa iro olo tsy man̈ahoa Zan̈ahary aby io manohitry atsika? (Apok. 16:21) Hahavita han̈araka volan̈a Jehovah atsika izikoa miaritry, sady matoky fa izy han̈ampy atsika. Akory ndraiky izikoa iro rahalahintsika aby io very fanan̈ana? (Hab. 3:17, 18) Hahavita han̈ampy iro atsika izikoa mahinakinaka iro. Fa akory fo fihetsikintsika izikoa atsika tsy maintsy miaraka mipetraka amy piaramanompo maro an̈aty fotoan̈a lavalava, afarany iro firenena aby io manafiky atsika? (Ezek. 38:10-12) Ho vitantsika hiatriky fotoan̈a sarotro zen̈y izikoa atsika ten̈a tia mare iro piaramanompo aby io.

4. Akory an̈aboahany Baiboly fa atsika mila mifen̈y fo miaritry, mahinakinaka olo, avio be fitiavan̈a?

⁴ Volan̈a Zan̈ahary mandrisiky atsika hifen̈y hiaritry, hahinakinaka olo, ndreky ho be fitiavan̈a. Lioka 21:19 mivolan̈a: “Izikoa anaro miaritry fo, ho voavonjinaro ain̈inaro.” Kolosianina 3:12 koa mivolan̈a: ‘Misikìna fahaizan̈a mahinakinaka.’ Baka io 1 Tesalonianina 4:9, 10 mivolan̈a: ‘Anaro efa nampianariny Zan̈ahary hifankatia. ... Fa ampirisihinay fo koa anaro rahalahy aby han̈ano zen̈y misimisy.’ Iro pianatra Jesosy nanoratan̈a andininteny aby io efa niaritry, nahinakinaka olo, avio be fitiavan̈a. Kanefa iro mbala nampirisihin̈y fo hanan̈a toetry aby io. Atsika koa mila man̈ano karaha zen̈y. Akory hahavitantsika zen̈y? Alo atsika handiniky akory nataondro Kristianin̈y voanalohany tan̈y nan̈aboaka toetry aby io. Hizahavantsika koa akory mety angalantsika tahaka iro, avio akory an̈aboahantsika fa atsika efa von̈ono hiatriky fahorian̈a be.

ATAOVA RAHA HAHAVY ANAO HAHAVITA HIARITRY FO

5. Karakory nahavitandro Kristianin̈y voanalohany tan̈y niaritry fitsapan̈a?

⁵ Nila niaritry iro Kristianin̈y taminy andrany Paoly. (Heb. 10:36) Iro tsy basiny efa niatriky problemo pavoa olo jiaby fo fa, mbala nisy problemo hafa koa tsy maintsy niaretandro. Maro tamindro ninjehiny pitondra fivavahan̈a jiosy ndreky manampahifan̈a romanin̈y, avio firaka tamy lafamindro foeky koa mbala nan̈enjiky iro. (Mat. 10:21) Iro koa tsy maintsy nitandrin̈y tamy fampianarandisony pivadipinoan̈a nitady hampisaratsaraka fiangonan̈a. (Asa. 20:29, 30) Fa ndray tio raha aby zen̈y, iro Kristianin̈y aby io ten̈a nahavita niaritry. (Apok. 2:3) Akory nataondro? Iro nandiniky tantaranolo nahavita niaritry an̈aty Baiboly ao, karaha ataony Joba. (Jak. 5:10, 11) Iro nivavaka baka hahazo angovo. (Asa. 4:29-31) Baka io, tsy nadosondro tan̈aty jerindro foeky hatsaran̈a ho azondro izikoa iro miaritry.​—Asa. 5:41.

6. Ino raha ianaranao baka amy raha nataony Merita?

⁶ Hahavita hiaritry koa atsika izikoa mianatra tsy tapaka ndreky misaintsain̈y tantaranolo nahavita niaritry an̈aty Baiboly ao, avio amy boky ndreky gazety. Karaha zen̈y nataony Merita ranabavy baka an Albanie. Nan̈enjiky izy mare fianakavian̈anany, kanefa vitany fo niaritry raha zen̈y. Karaha ty hoizy: “Ten̈a nankahery zaho tantarany Joba. Izy vahany jaly mare kanefa tsy hainy aby azovy nahavy zen̈y. Fa ndray zen̈y, hoizy: ‘Zaho tsy hivadiky foeky firaka zaho maty!’ (Joba 27:5) Hitako karaha tsisy dikany foeky problemonaka tankilany niny Joba. Sady tsy mampitovy zahay koa, haiko azovy ambadikiny fitsapan̈a mavoa zaho.”

7. Rango zioty, ino raha efa mila iezahantsika atao ndray atsika mbala tsendriky miatriky raha sarotro mare?

⁷ Ho vitantsika koa hiaritry fo izikoa atsika mivavaka tsy tapaka amy Jehovah sady mikoran̈a aminany raha jiaby mampiasaloha atsika. (Fil. 4:6; 1 Tes. 5:17) Anao amy zioty mety mbala tsendriky miatriky raha sarotro mare. Kanefa, anao ma zatra mivavaka amy Jehovah ndreky mangataka fan̈ampian̈a aminany lera misy raha mampameloko anao, na lera anao sahirantsain̈y, na lera tsy hainao raha tôkony hatao? Izikoa rango zioty anao efa zatra mangataka fan̈ampian̈a amy Jehovah fo amy problemo madinidiniky tojy anao, tsy hisalasala han̈ano zen̈y anao lera tojy problemo maventy afara an̈y. Ke anao hatoky tsarabe fa hainy Jehovah ankitin̈y fotoan̈a ndreky fomba tôkony han̈ampiany anao.​—Sal. 27:1, 3.

8. Izikoa tantarany Mira zahan̈a, nan̈ino fiaretan̈a fitsapan̈a amy zioty han̈ampy atsika hahavita hiaritry fitsapan̈a mbala ho avy? (Jakoba 1:2-4) (Zahava koa sary.)

⁸ Ho moramora amintsika hiatriky fahorian̈a be ho avy io, izikoa rango zioty atsika efa mifen̈y tsy mivadiky amy Jehovah ndray iô raha sarotro. (Rom. 5:3) Nan̈ino atsika mivolan̈a zen̈y? Maro rahalahy ndreky ranabavy nivolan̈a fa isaka problemo niaretandro nan̈ampy iro hahavita hiaritry problemo hafa niboaka. Hitandro fa Jehovah nan̈ampy iro hahavita hiaritry, ke iro mahaimatoky fo fa izy ten̈a man̈iry han̈ampy iro. Finoan̈andro zen̈y man̈ampy iro hahavita hiaritry fitsapan̈a mbala hiboaka. (Vakia Jakoba 1:2-4.) Hitany Mira, pisava lalan̈a baka an Albanie, fa fiaretany problemo taloha tan̈y nan̈ampy izy hahavita hiaritry problemo mavoa izy amy zioty. Izy niaiky fa ndraikindraiky izy mahatsapa fa karaha raha izy fo tsy mety hialany problemo. Fa baka io, tsaroany raha jiaby nataony Jehovah han̈ampian̈a izy tan̈atiny 20 taon̈o loso zay. Ke hoizy tan̈aty jerinany tan̈y: ‘Aza mivadiky. Jehovah kony efa nan̈ampy anao niaritry raha maro ay, ke zioty edy anao hivadiky aminany?’ Afaka dinihinao koa akory nataony Jehovah nan̈ampy anao hahavita hiaritry. Matokisa fa hitany fitsapan̈a tsiaraikiaraiky iaretanao avio izy han̈amia hatsaran̈a anao. (Mat. 5:10-12) Ke lera fahorian̈a be hanomboko, efa hainao akory atao miaritry sady anao amy zen̈y ho tapakevitry hiaritry fo.

MAHAIZA MAHINAKINAKA

9. Akory nan̈aboahany fiangonan̈a ta Antiokia fa iro nahinakinaka piaramanompo tamindro?

⁹ Aleva onon̈o ino raha nandalo tamy fotoan̈a nisiany mosary mare ta Jodia tan̈y. Koa fa ren̈iny fiangonan̈a ta Antiokia ta Syria tan̈y raha zen̈y, azo antoko fa iro nahinakinaka piaramanompo tamindro ta Jodia tan̈y. Ke iro nan̈ano raha han̈ampian̈a rahalahy ndreky ranabavindro. Iro nanapakevitry fa “samy handefa fan̈ampian̈a arakarakany vitandro, hamian̈a iro rahalahy nipetraka ta Jodia tan̈y.” (Asa. 11:27-30) Nata lavitry iro tany nisy piaramanompo aby tatrany mosary io, iro Kristianin̈y ta Antiokia tan̈y mbala von̈ono han̈ampy iro fo.​—1 Jaona 3:17, 18.

10. Akory aby fomba an̈aboahantsika fa atsika mahinakinaka iro piaramanompo tatrany antambo? (Zahava koa sary.)

¹⁰ Karaha zen̈y koa aminy andra zioty. Izikoa fa ren̈intsika fa tatrany antambo iro piaramanompo amintsika aby io, atsika afaka man̈aboaka fa atsika mahinakinaka iro. Atsika afaka man̈ano raha malaky han̈ampian̈a iro. Ino aby, ohatra, raha mety ataontsika? Atsika afaka man̈ontany antipan̈ahy tsao mba afaka man̈ampy amy tetikasa araiky, na koa man̈amia fan̈amezan̈a hanohan̈ana asa man̈erantany, na atsika afaka mivavaka ninolo tatrany antambo.b (Ohab. 17:17) Taminy 2020 iziô, mandilatra 950 Komitiny Vonjy Rano Vaky nitindren̈y erantany hikarakara olo nila fan̈ampian̈a, tamy valan̈aretin̈y COVID-19. Atsika ten̈a mankasitraka iro piaramanompo amintsika nandray anjara tamy fan̈ampian̈a olo tatrany antambo. Iro nahinakinaka rahalahy ndreky ranabavindro, ke zen̈y nahavy iro nitondra fan̈ampian̈a ndreky nankahery iro. Iro koa nan̈orin̈y na nan̈amboatra raha robaka tamy tran̈ondro rahalahy aby io ndreky tany ivoriandro.​—Ampiràn̈a amy 2 Korintianina 8:1-4.

11. Nan̈ino man̈amia voninahitry Babantsika andan̈itry an̈y atsika izikoa mahinakinaka namantsika?

¹¹ Hitanolo raha ataontsika izikoa atsika fa mahinakinaka naman̈a tatrany antambo ke man̈ampy iro. Ravany Sikilony Dorian taminy 2019 in̈y, ohatra, Tran̈o Fivorian̈a ta Bahamas. Tamindro rahalahy aby io nimpody nan̈amboatra Tran̈o Fivorian̈a io, iro nan̈ontany pan̈amboatra tran̈o araiky tsy Vavolombelon̈o Jehovah otrino izy man̈ano asa sasany nilain̈y tamizio. Kanefa karaha ty hoizy tamindro: “Amezako anaro karaha io fo ... fitaovan̈a jiaby, avio tsy mila ifain̈y zaho man̈ano asa io. ... Tiako han̈ano izio niny fandaminan̈anaro fotony ten̈a maharikian̈a zaho mahita fitiavanaro namanaro.” Ankamarozanolo amy donia ty tsy mahay Jehovah. Fa maro amindro ndraiky mahita raha ataony Vavolombelon̈o Jehovah. Ravoravo atsika mahay fa fahinakinantsika namantsika io mety handrisiky olo ho tihahay raha maro momba Zan̈ahary ‘be famindrampo’ io!​—Efes. 2:4.

12. Nan̈ino ho von̈ono amy fahorian̈a be atsika izikoa rango zioty efa mahay mahinakinaka olo? (Apokalypsy 13:16, 17)

¹² Nan̈ino amy fahorian̈a be atsika mila mahay mahinakinaka olo? Baiboly man̈ambara fa lan̈iany tsy manohan̈a fanjakan̈a aby amy donia ty ho tojy problemo, na amy zioty na amy fahorian̈a be. (Vakia Apokalypsy 13:16, 17.) Mety mila hampian̈a iro rahalahintsika aby io baka hahazo raha ilaindro amy fiain̈ana. Lera Jesosy Kristy Panjakantsika hitsara olombelon̈o, tiantsika atsika ho hitany mahay mahinakinaka ke kahiany ‘handova Fanjakan̈a.’​—Mat. 25:34-40.

MIFEN̈A FO HO BE FITIAVAN̈A

13. Izikoa zahan̈a Romanina 15:7, akory nataony Kristianin̈y tamy taonjato voanalohany baka hahavita hifankatia fo?

¹³ Fitiavan̈a raha ten̈a nampiavaka Kristianin̈y tamy taonjato voanalohany. Kanefa, nora tamindro fo ma nankatia naman̈a zen̈y? Aleva onon̈o fa nisy olo isankarazany tamy fiangonan̈a ta Roma. Nisy tamindro tao Jiosy, olo zatra nan̈araka Lalàn̈any Mosesy, fa sasany ndraiky hafa firenena sady baka tamy kolontsain̈y samihafa. Kristianin̈y sasany koa nety andevo, fa ny hafa ndraiky tsy karaha zen̈y. Mety nisy tamindro koa nanan̈a andevo. Akory nataony Kristianin̈y aby io hifankatia fo ndray tio tsy fitovizan̈a? Apostoly Paoly nandrisiky iro ‘hifandray tsarabe.’ (Vakia Romanina 15:7.) Ino ma raha tiany volan̈iny amy zen̈y? Volan̈a nadika ‘mifandray tsara’ io midika tsara fan̈ahy aminolo, karaha ataony tia man̈ano karibo antran̈o olo na von̈ono hinaman̈a aminolo. Karaha ty, ohatra, nivolan̈iny Paoly tamy Filemona fomba tôkony handraisan̈a Onesimosy, andevo nilefa in̈y: ‘Raisa tsara izy.’ (Filem. 17) Apolosy koa tsy karaha Prisila ndreky Akoila, fotony izy tsy dia nahay raha maro momba raha nampianariny Jesosy. Fa ndray zen̈y, niraisindro tsara izy ke ‘nindesindro niaraka tamindro.’ (Asa. 18:26) Tsy nambelandro Kristianin̈y aby io hampisy problemo amindro samby iro raha tsy nampitovy iro, fa iro nifandray tsara fo.

14. Akory nataony Anna ndreky vadiny nan̈aboaka fa iro tia piaramanompo?

¹⁴ Atsika koa afaka man̈aboaka fitiavan̈a amy piaramanompo ke von̈ono hikamarady amindro ndreky hanokan̈a fotoan̈a hiarahan̈a amindro. Matetiky fan̈anaovantsika zen̈y mandrisiky iro han̈aboaka fitiavan̈a amintsika koa. (2 Kor. 6:11-13) Diniha baka tantarany Anna ndreky vadiny. Iro voatendry misionera tan Afriky Andrefa. Kanefa tsy ela heliny naviandro tan̈y, navy valan̈aretin̈y COVID-19. Azonizio, iro tsy nafaka nifanojy nivantan̈a tamindro rahalahy aby io, ke sarotro tamindro nahay piaramanompo. Akory nan̈aboahandro fa iro tia piaramanompo? Nikahiandro roe fivadiany tamy vidéoconférence iro, avio nivolan̈indro tamindro fa iro tihifankahay mare amindro. Nanohin̈y mare fony rahalahy aby io fitiavan̈a naboakandro misionera aby io, ke nikahiandro matetitetiky iro fivadiany avio nandifasandro mesazy. Nan̈ino iro fivadiany io nan̈ano raha hahaizan̈a tsarabe piaramanompo amindro? Ho Anna: “Tsisy andra han̈adin̈asako fitiavan̈a naboakany piaramanompo taminaka ndreky tamy fianakavian̈anaka, na tamy mora na tamy sarotro. Ke modelindro nandrisiky zaho ho tia piaramanompo koa.”

15. Ohatrany Vanessa io mampianatra anao ino momba fitiavan̈a piaramanompo jiaby? (Zahava koa sary.)

¹⁵ Maro amintsika fiangonan̈a araiky amy piaramanompo tsy mitovy kolontsain̈y ndreky toetry amintsika. Ho vitantsika fo hankatia iro jiaby izikoa atsika mifantoko amy toetry tsarandro. Hitany Vanessa, ranabavy araiky a Nouvelle-Zélande, fa sarotro taminany nifandray tsara tamy piaramanompo sasany tamy fiangonan̈a nisy izy. Ndray zen̈y, izy nanapakevitry tsy hilefalefa iro piaramanompo nanan̈a toetry tsy tiany aby io, fa hanokan̈a fotoan̈a hiarahan̈a tsarabe amindro. Baka tamy zen̈y nahitany ino marin̈y ten̈a itiavany Jehovah iro. Karaha ty hoizy: “Vadiko koa fa nanjary piandraikitry faritry, zahay nanjary nifandray tamy piaramanompo nanan̈a toetry isankarazany, ke loso nora taminaka nifandray tamindro. Nanjary tiako oe mifandray aminolo isankarazany. Hay be fa Jehovah koa tia zen̈y fotony olo isankarazany ambelany hanompo izy.” Izikoa fomba fahitantsika olo tsiaraikiaraiky mitovy amy fomba fahitany Jehovah olo jiaby, aboakantsika amy zen̈y fa atsika tia olo.​—2 Kor. 8:24.

16. Nan̈ino atsika tsy maintsy mankatia piaramanompo amintsika amy fahorian̈a be? (Zahava koa sary.)

¹⁶ Fitiavan̈a io raha ten̈a ilain̈y amy fahorian̈a be. Akory ma ataony Jehovah hiaro atsika amy fotoan̈a zen̈y? Aleva onon̈o raha nirahiny Jehovah nataony panomponany taloha tan̈y izikoa iro fa nitafihin̈y Babylony. Karaha ty hoizy tamindro: ‘Anaro vahoakanaka, mindao miditry aminy efitry farany an̈atiny amy tran̈onaro, avio afodia varavaran̈a. Misitria an̈y betibetiky mandrapahafaka heloko.’ (Isaia 26:20) Mety mbala zen̈y fo koa toromariky mila arehantsika amy fahorian̈a be. ‘Efitry an̈atiny’ io mety manondro fiangonan̈antsika. Amy fahorian̈a be io, Jehovah mampan̈anten̈a fa izy hiaro atsika izikoa atsika miray sain̈y fo amindro piaramanompo aby io. Zen̈y mahavy rango zioty atsika tsy basiny mila mandefitry amy piaramanompo fo fa mila mifen̈y koa hankatia iro. Raha zen̈y iankin̈any fahin̈anantsika!

MIOMÀN̈A RANGO ZIOTY

17. Izikoa rango zioty atsika efa mioman̈a, hahavita han̈ino atsika amy fahorian̈a be?

¹⁷ Hijaly mare olombelon̈o lera avy ‘andra maventiny Jehovah.’ (Zef. 1:14, 15) Firaka amy panompony Jehovah koa mbala hiatriky raha sarotro. Fa izikoa rango zioty atsika efa mioman̈a, atsika tsy ho taitaitry sady ho afaka han̈ampy olo hafa koa. Ho vitantsika hiaritry zay raha sarotro mety hiboaka. Lera misy piaramanompo amintsika mijaly, atsika han̈ano erakany vitantsika han̈ampian̈a iro ke hahinakinaka iro ndreky han̈amia raha ilaindro. Baka io, izikoa rango zioty atsika efa mianatra mankatia piaramanompo amintsika, ho vitantsika hankatia iro aminy amaray. Ke atsika hamezany Jehovah hatsaran̈a; atsika hiain̈y mandrakizay amy donia araiky efa tsisy jaly ndreky antambo eky.​—Isaia 65:17.