Ampitombosa Fo Fitiavanao

1. Ino aby fahamarin̈ana nianaranao tamy somilany anao nianatra Baiboly?

ASA tsaroanao raha nianaranao tamy somilany anao nianatra Baiboly? Mety gaga mare anao nahay fa kaiky Zan̈ahary misy an̈aran̈a. Mety nahatsiaro nahivankivan̈a koa anao koa fa nahay fa Zan̈ahary tsy mampijaly olo amy motrobe. Mety ravoravo mare koa anao koa fa nahay fa Zan̈ahary mbala hamelon̈o iro havanao maty aby in̈y, avio anao mbala ho afaka hiain̈y miaraka amindro, lera tany ty loso paradisa.

2. Ankoatrany nianatra fahamarin̈ana, ino koa fandrosoan̈a vitanao? (Efesianina 5:1, 2)

² Loso nitombo fitiavanao Jehovah arakaraka nianaranao Volan̈anany. Ke fitiavan̈a zen̈y nandrisiky anao han̈araka raha nianaranao. Nanjary nahay nanapakevitry koa anao izikoa fa nan̈araka toro lalan̈any Baiboly. Nahaitsara koa toetsain̈inao ndreky fitondranten̈anao, fotony anao tihan̈ano raha mamparavoravo Jehovah. Ke karaha ataony tsaiky mangala tahaka olobeny tia izy in̈y, nataonao nangala tahaka Babanao andan̈itry an̈y.​—Vakia Efesianina 5:1, 2.

3. Ino aby fan̈ontanian̈a tsara apetrakantsika aminy ain̈intsika?

³ Tsara atsika man̈ontany ten̈a karaha ty: ‘Izikoa ampiran̈iny zaho amy iziô ndreky tamy somilany zaho vo loso Kristianin̈y, nahaifatatra fo ma fitiavako Jehovah? Tafarany batisanaka, hita amy fitiavako iro rahalahy ndreky ranabavy aby io ma fa zaho nahainangala tahaka Jehovah fo?’ Izikoa hitanao nihen̈y ‘fitiavanao tamy voanalohany’, anao aza rivan̈a. Navy tatrany raha karaha zen̈y koa iro Kristianin̈y tamy taonjato voanalohany tan̈y, fa Jesosy tsy rivan̈a tamindro, ary izy tsy ho rivan̈a amintsika koa. (Apok. 2:4, 7) Hainy fa atsika mbala afaka hanan̈a fitiavan̈a karaha taminy atsika vo nianatra fahamarin̈ana in̈y.

4. Ino raha hianarantsika amy lahatsoratra ty?

⁴ Akory hahavy fitiavantsika Jehovah ndreky olo hafa hitombo fo? Ino aby hatsaran̈a sasany ho azontsika ndreky ho azonolo hafa izikoa atsika tsy voly mampitombo fitiavan̈antsika? Hidinihintsika amy lahatsoratra ty raha zen̈y.

AMPITOMBOSA FITIAVANAO JEHOVAH

5-6. Ino aby problemo tojy Paoly tamy fanompoan̈anany, fa ino ndraiky nandrisiky izy hanohy hanompo Jehovah fo?

⁵ Ravoravo apostoly Paoly nanompo Jehovah. Fa ndray zen̈y, naro koa problemo nandalovany. Izy iziô natetiky nan̈ano dia lavitry, kanefa raha zen̈y tsy nora taminy andra zen̈y. Tamy dia nataony aby io, izy navy ‘seky dobo tamy ten̈arano’ ndreky ‘seky tatrany dahalo.’ Nisy fotoan̈a koa izy nipopohindro panohitry aby io. (2 Kor. 11:23-27) Avio tsy vitany zen̈y fo fa, ndraikindraiky nisy rahalahy sasany tsy nankasitraka ezaka nataony an̈ampian̈a iro.​—2 Kor. 10:10; Fil. 4:15.

⁶ Ino nan̈ampy Paoly tsy voly nanompo Jehovah? Baka tamy raha niain̈any ndreky fahazotoany nianatra Soratra Masin̈y, izy loso nahay toetriny Jehovah tsarabe. Ke resy lahatra izy fa Jehovah tia izy ankitin̈y. (Rom. 8:38, 39; Efes. 2:4, 5) Loso tiany mare koa Jehovah. Akory nan̈aboahany zen̈y? Izy ‘nikarakara ndreky mbala nikarakara iro olo masin̈y aby io.’​—Heb. 6:10.

7. Ino fomba araiky ampitombosantsika fitiavantsika Jehovah?

⁷ Hitombo fitiavantsika Jehovah izikoa atsika mazoto mianatra Volan̈anany. Ke lera anao mamaky Baiboly, diniha ino raha ampianariny andininy tsiaraikiaraiky momba Jehovah. Avio man̈ontania ten̈a karaha ty: ‘Akory an̈aboahany tantara ty fa Jehovah tia zaho? Nan̈ino raha zen̈y mandrisiky zaho ho tia Jehovah?’

8. Nan̈ino hitombo fitiavantsika Jehovah izikoa atsika mivavaka?

⁸ Ino koa raha mety ataontsika baka fitiavantsika Jehovah hitombo fo? Atsika mila mivavaka aminany isanandra, ke koran̈intsika aminany raha jiaby an̈atiny fontsika. (Sal. 25:4, 5) Hivaliany Jehovah vavakantsika baka io. (1 Jaona 3:21, 22) Karaha ty ho Khanh,b ranabavy araiky mipetraka an Asie: “Tamy voanalohany, zaho koa fa nahay Jehovah, zaho loso tia izy. Fa vavakanaka koa fa hitako nivaliany, izy nahaitiako fo. Zen̈y amy zay nandrisiky zaho tihan̈ano raha mamparavoravo izy.”

AMPITOMBOSA FITIAVANAO OLO

9. Akory ahitan̈a fa Timoty ten̈a tia iro rahalahy ndreky ranabavy aby io?

⁹ Taon̈o vitsivitsy tafarany Paoly nanjary Kristianin̈y, izy nifanojy tamy manafolahy araiky, Timoty an̈arany. Timoty ten̈a tia Jehovah, avio tia olo koa. Ho Paoly tamindro Filipianin̈y aby io: “Zaho tsy mahita olo hafa miran̈a toetry aminany [Timoty], olo ten̈a hikarakara anaro.” (Fil. 2:20) Iô Paoly tsy nidera Timoty tamy fahaizany mandamindraha na tamy fahaizany nan̈ano kabaro, fa izy rikian̈a tamy fitiavany Timoty iro rahalahy ndreky ranabavy aby io. Ke azo antoko tsarabe fa efa tsy din̈indro fiangonan̈a handeha hitsidihiny Timoty lera aviany.​—1 Kor. 4:17.

10. Akory nan̈aboahany Anna ndreky vadiny fa iro tia piaramanompo?

¹⁰ Mila mitady fomba han̈ampian̈a iro rahalahy ndreky ranabavintsika aby io koa atsika. (Heb. 13:16) Diniha baka raha niain̈any Anna, araiky nikoran̈intsika tamy lahatsoratra taloha in̈y. Nisy sikilony nandalo tamy tany nisy iro. Fa raha io koa fa roso, izy ndreky vadiny nandeha namangy fianakavian̈a araiky Vavolombelon̈o Jehovah. Hitandro fa robaka tafontran̈ony piaramanompo io, ke naloto lambandro jiaby. Ho Anna: “Nindesinay nisasan̈a lambandro jiaby, avio nampodinay lera izy voapasy ndreky voaholon̈o tsarabe. Hitanay karaha tsisy dikany raha nataonay in̈y, fa izin̈y nahavy zahay loso kamarady mare firaka zioty.” Anna ndreky vadiny ten̈a tia iro rahalahy ndreky ranabavy aby io. Zen̈y nandrisiky iro nan̈ano raha han̈ampian̈a iro.​—1 Jaona 3:17, 18.

11. a) Ino matetiky raha tsapanolo izikoa atsika man̈aboaka fitiavan̈a iro? b) Izikoa Ohabolana 19:17 zahan̈a, akory ataony Jehovah izikoa atsika man̈aboaka fitiavan̈a?

¹¹ Izikoa atsika tsara fan̈ahy ndreky man̈aboaka fa atsika tia olo, ho hitanolo fa atsika mifen̈y mangala tahaka Jehovah. Iro mety hankasitraka mare raha nataontsika, tsy arakarakany niritriretintsika. Tsy nadin̈any Khanh, araiky nikoran̈intsika taloha tarỳ, foeky olo nan̈ampy izy. Hoizy: “Zaho mankasitraka mare iro rahavavy jiaby nitondra zaho nandeha nanompo. Zaho nalaindro tantran̈o, nindesindro nihina niaraka tamindro, avio naterindro nody koa. Tsapako amy zioty fa tsy nora nan̈ano raha jiaby zen̈y, fa nohony fitiavandro zaho nan̈anaovandro izin̈y.” Marin̈y ndraiky fa tsy olo jiaby zay han̈ano mersy atsika tamy raha nataontsika tamindro. Ho Khanh momba iro olo nan̈ampy izy aby io: “Tiako zaho koa mba mahavita mamaly raha tsara jiaby nataondro taminaka, fa tsy haiko aia aia aby tany misy iro. Fa Jehovah ndraiky mahay tany misy iro, ke zaho mivavaka baka izy hamaly raha tsara nataondro taminaka.” Marin̈y niny Khanh. Hitany Jehovah aby raha tsara jiaby ataontsika aminolo, firaka amy raha farany madiniky. Amy Jehovah raha zen̈y miran̈a soron̈o ten̈a valera ndreky trosa tsy maintsy hifainy.​—Vakia Ohabolana 19:17.

12. Akory an̈aboahany rahalahy fa iro tia fiangonan̈a? (Zahava koa sary.)

¹² Rahalahy ma anao? Akory an̈aboahanao fa anao tia olo ndreky von̈ono han̈ampy iro? Misy rahalahy araiky tanora, Jordan an̈arany, nan̈ontany antipan̈ahy araiky karaha ty: ‘Ino raha mety ataoko han̈ampian̈a olo an̈ivony fiangonan̈a?’ Niderainy antipan̈ahy io izy tamy fandrosoan̈a jiaby efa vitany, avio antipan̈ahy io nan̈amia izy sosokevitry vitsivitsy amy raha hafa mbala mety ataony. Nampirisihiny antipan̈ahy io, ohatra, izy ho avy bonera amy Tran̈o Fivorian̈a baka ho afaka handray olo, han̈amia valinteny, hitory tsy tapaka miaraka aminy andiampitory, avio hieritreritry fomba hafa mety han̈ampiany olo. Jordan koa fa nan̈araka raha jiaby zen̈y, izy tsy vitany nianatra raha vaovao fo fa loso nahainitombo koa fitiavany iro rahalahy ndreky ranabavy aby io. Nanjary hainy Jordan fa tsy lera rahalahy araiky voatendry pikarakara fiangonan̈a vo hanomboko han̈ampy olo, fa manohy man̈ano zen̈y iro lera voatendry.​—1 Tim. 3:8-10, 13.

13. Amy karakory fitiavan̈a nandrisiky Rahalahy Christian hanjary antipan̈ahy ndraiky?

¹³ Akory ndraiky izikoa anao efa navy pikarakara fiangonan̈a na efa navy antipan̈ahy? Tsy adin̈any Jehovah raha jiaby nataonao taloha ndreky fitiavan̈a nandrisiky anao nan̈ano zen̈y. (1 Kor. 15:58) Mbala hitany koa fitiavan̈a aboakanao amy zioty. Nalemy troko hely rahalahy araiky kahian̈a Christian izikoa izy fa nafaka antipan̈ahy. Fa hoizy: “Zaho tapakevitry hifen̈y erakany vitako hanompo Jehovah, na antipan̈ahy zaho na tsy antipan̈ahy.” Voatendry antipan̈ahy ndraiky izy tafara tatỳ, hoizy: “Navozo hely zaho koa fa voatendry antipan̈ahy ndraiky. Fa zaho nieritreritry izikoa Jehovah mbala man̈ambela zaho han̈ano andraikitriny antipan̈ahy ndraiky, ataoko zen̈y fotony izy tiako, avio tiako koa iro rahalahy ndreky ranabaviko aby io.”

14. Ino raha ianaranao baka amy raha nivolan̈iny ranabavy araiky baka Géorgie?

¹⁴ Tia piarabelon̈o amindro koa vahoakany Jehovah. (Mat. 22:37-39) Karaha ty ohatra nivolan̈iny Elena, ranabavy araiky mipetraka a Géorgie: “Tamy voanalohany, fitiavako Jehovah fo ny ten̈a nandrisiky zaho hitory. Fa izikoa fa nahainitombo fo fitiavako Babako andan̈itry an̈y io, loso nahaitia olo koa zaho. Ke zaho nifen̈y nandiniky ino aby problemo mety ho tojy olo aby io, avio ino fotokevitry mety hanohin̈y fondro. Arakaraka nan̈anaovako zen̈y, nahavy zaho nahaitihan̈ampy iro fo.”​—Rom. 10:13-15.

HAHAZO HATSARAN̈A LAN̈IANY MIFEN̈Y HO TIA OLO

15-16. Izikoa sary io zahan̈a, ino aby hatsaran̈a ho azo izikoa atsika man̈aboaka fitiavan̈a aminolo?

¹⁵ Izikoa atsika man̈aboaka fitiavan̈a amindro rahalahy ndreky ranabavintsika aby io, tsy iro zaraiky fo mahazo hatsaran̈a. Valan̈aretin̈y COVID-19 koa fa nanomboko, maro ranabavy efa matoe nampiany Rahalahy Paolo ndreky vadiny hitory tamy fitaovan̈a elektroniky. Nisy ranabavy araiky sahiran̈a mare koa fa nianatra nampiasa fitaovan̈anany, fa izy baka tio nahay fo. Ke izy afaka nampiasa fitaovan̈anany nikahiany ry havany han̈aton̈o Fahatsiarovan̈a. Ino raha niboaka? Nisy tsiotampolo havany nan̈aton̈o Fahatsiarovan̈a tamy vidéoconférence. Ke ranabavy matoe io ndreky havany aby io samby nahazo hatsaran̈a baka taminy ezaka nataony Paolo ndreky vadiny. Tafara tatỳ, ranabavy io nanoratra tamy Paolo karaha ty: “Mersy anao nampianatra zahay matoe ay! Tsisy andra han̈adin̈asako fikarakarany Jehovah zahay ndreky ezaka nataonao an̈ampian̈a zahay.”

¹⁶ Nisy leson maventy nianarany Paolo baka tamy raha nandalo in̈y. Izin̈y nampatsiaro izy fa fitiavan̈a ilain̈y mandilatra fahaizan̈a. Hoizy: “Zaho efa navy piandraikitry faritry. Amy zioty, hitako fa pitory mety han̈adin̈a kabaro nataoko, fa tsy mety hadin̈andro ndraiky raha tsara nataoko tamindro.”

17. Azovy koa hahazo hatsaran̈a izikoa atsika man̈aboaka fitiavan̈a?

¹⁷ Tsy ampoizintsika hatsaran̈a ho azontsika izikoa atsika man̈ano raha an̈aboahan̈a fa atsika tia olo. Zen̈y tsarabe raha nivolan̈iny Jonathan, rahalahy araiky mipetraka a Nouvelle-Zélande. Andra sabotsy folakandra mafana mare, izy nahita pisava lalan̈a araiky nitory tamy lalan̈a. Ke Jonathan nanapakevitry hanompo niaraka taminany taminy herin̈y izio. Tsendriky hainy taminio fa hitondra hatsaran̈a aminany raha nataony. Ho Jonathan: “Tamy fotoan̈a io zaho mbala tsy ten̈a tia nanompo. Fa zaho koa fa nitandren̈y tsarabe fomba fampianarany rahalahy pisava lalan̈a io ndreky nahita fa izy ten̈a nahomby tamy fanompoan̈a, loso tiako oe mitory. Avio loso nahaikamarady fo zahay ndreky rahalahy io. Zaho nampiany handroso arapan̈ahy, nampiany ho tia fanompoan̈a ndreky hifandray marikitry amy Jehovah.”

18. Ino raha tiany Jehovah hataontsika?

¹⁸ Tiany Jehovah izikoa atsika jiaby samby mifen̈y mampitombo fitiavantsika izy ndreky olo hafa. Eraka raha nianarantsika tio, hitombo fitiavantsika Jehovah izikoa atsika mamaky Volan̈anany ndreky misaintsain̈y izio, avio mivavaka aminany isanandra. Hitombo koa fitiavantsika iro rahalahy ndreky ranabavintsika aby io, izikoa atsika man̈ampy iro. Arakaraka hitombosany fitiavantsika, hahavy atsika hahaiharikitry Jehovah ndreky iro rahalahy ndreky ranabavintsika aby io. Ary raha zen̈y haharitry mandrakizay!