LAHATSORATRA FIANARAN̈A 18
HIRA 1 Ireo Toetran’i Jehovah
Matokisa fa “Mpitsara Tany Jiaby io Mamindra Fô”!
“Mpitsara tany jiaby edy tsy han̈ano ny rariny?”—GEN. 18:25.
HEVITRY HIDINIHIN̈Y
Lahatsoratra ty hahavy atsika hahatakatra tsarabe fampianaran̈a momba familaoman̈a irô olo tsy marin̈y aby io, mifan̈araka amy famindram-pôn’i Jehovah ndreky fan̈anaovany ny rariny.
1. Ino ma leson faran’ny maventy nampianarin’i Jehovah i Abrahama?
EFA elabe taloha tan̈y, Jehovah nampiasa anjely araiky nivolan̈a tamin’i Abrahama fa Izy handeha handravan̈a tanànan’i Sodoma ndreky Gomora. Abrahama ndray efa nino Jehovah tsarabe, sarotro taminany nahazo dikan’ny raha nikoran̈in’i Jehovah taminany tamy zen̈y. Ke izy nan̈ontany: “Handeha haripakanao miaraka amin’olo ratsy fan̈ahy ma olo marin̈y? ... Mpitsara tany jiaby io edy tsy han̈ano ny rariny?” Ten̈a nahari-draha Jehovah nan̈ampy kamaradibenany io, hahay leson araiky faran’ny maventy ty: Zan̈ahary tsy mety handripaka olo tsara fan̈ahy. Fianaran̈a nazony zen̈y mahatsara atsika jiaby amin’ny andra iziôty sady mankahery atsika koa.—Gen. 18:23-33.
2. Nan̈ino ma atsika matoky fa marin̈y fomba fitsaran’i Jehovah, aviô mamindra fô izy koa fa mitsara?
2 Nan̈ino ma atsika matoky fa marin̈y ankitin̈y fitsaran̈an’i Jehovah, aviô izy mamindra fô? Fôtony haintsika fa “Jehovah mahita raha an̈atin’ny fôn’olo.” (1 Sam. 16:7) Hainy raha an̈atin’ny “fôn’olo tsiaraikiaraiky.” (1 Mpanj. 8:39; 1 Tan. 28:9) Mahagaga fahamarin̈ana araiky zen̈y! Fitsaran̈an’i Jehovah io tsy takatran’ny sain̈intsika. Zen̈y nahavy apostoly Paoly nivolan̈a karaha ty momba Zan̈ahary Jehovah: “Tsy takatran’ny jery foeky fomba fitsaran̈anany!”—Rom. 11:33.
3-4. Ino aby fan̈ontanian̈a avy an̈atin’ny jerintsika ndraikindraiky, aviô ino raha hidinihintsika amy lahatsoratra ty? (Jaona 5:28, 29)
3 Fa kanefa, atsika ndray mahay fa marin̈y fomba fitsaran’i Jehovah, mety mbala han̈ontany karaha nataon’i Abrahama fo koa atsika. Atsika aby mety han̈ontany karaha ty: ‘Mbala misy fan̈antinan̈a ma momba olo jiaby naripakan’i Jehovah in̈y, karaha ataony irô olo ta Sodoma ndreky Gomora in̈y? Mety ho hisy an̈isan’ny “olo tsy marin̈y mbala hivilômin̈y” ma amindrô in̈y?’—Asa. 24:15.
4 Alô himpodianantsika hidinihin̈y ndraiky ino fahatakaran̈a anan̈antsika momba familaoman̈a olo maty. Vo tsy ela atsika nan̈itsy fahatakarantsika momba olo “hatsangana amy fiain̈ana” ndreky “hatsangana amy fitsaran̈a.”a (Vakia Jaona 5:28, 29.) Fa fahatakaran̈a anan̈antsika io mbala mahavy atsika nan̈ano fan̈ovoan̈a ndraiky koa amy fomba fahatakarantsika raha koran̈in’ny Baiboly momba familaoman̈a olo tsy marin̈y io. Zen̈y raha hidinihintsika amy lahatsoratra ty ndreky araiky fan̈araka ty. Fa atsika iziô ndraiky handiniky ino raha mbala tsy haintsika ndreky ino raha efa haintsika momba fomba fitsaran’i Jehovah.
INO RAHA TSY HAINTSIKA?
5. Ino raha nivolan̈in’ny boky ndreky gazetintsika taloha momba irô olo aby naripaka ta Sodoma ndreky Gomora in̈y?
5 Tamy boky ndreky gazetintsika taloha tan̈y efa navy nisy fan̈azavan̈a momba raha hahazo irô olo aby volan̈in’i Jehovah fa tsy marin̈y aby io. Nivolan̈iny tamy fan̈azavan̈a io tao fa karaha ataondrô olo aby ta Sodoma ndreky Gomora in̈y, irô in̈y efa tsy hivilomin̈y eky amy familaoman̈a olo maty mbala ho avy io. Fa izikoa ndraiky efa nimpody nidinihin̈y am-bavaka ndraiky izio, nanjary mazava fa atsika tsy afaka mivolan̈a raha zen̈y marin̈y. Fôtony nan̈ino?
6. Ino ohatra sasany momba fitsaran’i Jehovah olo tsy marin̈y, aviô ino raha mbala tsy haintsika?
6 Diniha koa baka irô tantara amy Baiboly mikoran̈a momba fitsaran’i Jehovah. Maro tantara ao man̈ambara amintsika fomba fitsaran’i Jehovah irô olo tsy marin̈y aby io. Ohatra, tamin’ny andran’i Noa, Jehovah nandripaka olo jiaby tamy Safodrano, izikoa tsy Noa ndreky fianakavian̈anany fo. Aviô koa izy nampiasa irô Israelita aby io nandripaka irô firenena fito nipetraka tamy Tany Nampan̈antinain̈y tao. Aviô izy koa nampiasa anjely araiky namono maramila asyrianin̈y 185 000, tan̈atin’ny alin̈y araiky fo. (Gen. 7:23; Deot. 7:1-3; Isaia 37:36, 37) Amy raha jiaby zen̈y, Baiboly ma man̈ambara mazava amintsika fa Jehovah nanapa-kevitry fa hofoaty mandrakizay irô olo jiaby naripany tamizin̈y, ke efa tsy hivilômin̈y eky? Aha tsy karaha zen̈y. Nan̈ino atsika mivolan̈a zen̈y?
7. Ino ma raha mbala tsy haintsika momba irô olo aby naripaka tamy Safodrano in̈y ndreky irô olo aby naripaka tamy tany Kanana in̈y? (Zahava amy fôn̈ony.)
7 Atsika tsy mahay akôry ataon’i Jehovah mitsara olo tsiaraikiaraiky, aviô tsy haintsika koa asa irô olo aby in̈y koa mba nampianarin̈y raha momba Jehovah, asa nety ho nibebaka fo irô? Karaha ataon’ny tamy fotoan̈an’ny Safodrano in̈y, Baiboly mivolan̈a fa Noa “mpitory fahamarin̈ana.” (2 Pet. 2:5) Fa Baiboly tsy mivolan̈a fa tamin’izy nan̈amboatra Sambofiara maventy be in̈y, izy nahavita nitory tamin’olo tsiaraikiaraiky tambony tany, talohan’ny navian’ny Safodrano. Karaha zen̈y koa tamindrô firenena aby nipetraka ta Kanana in̈y. Atsika tsy mahay, asa mbala nety ho niova irô in̈y, izikoa namian̈a fotoan̈a nianaran̈a raha momba Jehovah.
Noa ndreky fianakavian̈anany miasa sambofiara maventy. Tsy haintsika asa tamy fotoan̈an’izen̈y, Noa koa nifen̈y nandamin̈y ezaka manokan̈a hitorian̈a tamin’olo jiaby tambony tany, talohan’ny navian’ny Safodrano (Zahava fehintsoratra 7)
8. Ino raha tsy haintsika momba irô olo aby ta Sodoma ndreky Gomora in̈y?
8 Fa karakôry ndraiky irô olo jiaby naripaka ta Sodoma ndreky Gomora in̈y? Lota, an̈aran̈an’ny olo marin̈y niaraka niain̈y tamindrô. Haintsika ma fa izy nahavita nitory tamin’olo tsiaraikiaraiky tamy tanàna io tao tamy zen̈y? Ehe. Irô io ma ndray ratsy fan̈ahy, irô ma nahay nan̈avaka ny tsara ndreky ratsy aby jiaby? Aleva onon̈o koa irô lelahy marobe tamy tanàna io nila handeha hanambady irô vahinin’i Lota aby in̈y. Baiboly mivolan̈a fa nan̈ano karaha zen̈y aby irô lelahy jiaby tan̈y, “rango tamy tsaiky madiniky firaka tamy matoelahy.” (Gen. 19:4; 2 Pet. 2:7) Fa haintsika tsarabe ma fa Jehovah Zan̈ahary mamindra fô io nan̈adiso irô jiaby tsiaraikiaraiky hofoaty ke efa tsy hamelon̈o irô eky? Jehovah nan̈amia toky Abrahama fa tsy ampy folo foeky olo marin̈y tamy tanàna io tao. (Gen. 18:32) Ke nohon’ny irô olo tsy marin̈y, Jehovah nanan̈a zo tsarabe handripaka irô jiaby nohon’ny raha ratsy nataondrô. Fa atsika ma afaka mivolan̈a fa tsisy hivilomin̈y foeky irô in̈y nata araiky, izikoa avy ‘familaoman̈a olo tsy marin̈y’ io? Tsy ten̈a haintsika tsarabe raha zen̈y!
9. Ino raha tsy haintsika momba Solomona?
9 Misy tantara amy Baiboly koa mikoran̈a momba olo marin̈y nanjary olo tsy marin̈y. Ohatra araiky amy zen̈y Mpanjaka Solomona. Izy nahay tsarabe Jehovah, aviô hainy koa fomba tôkony hanompoan̈a izy. Ke Jehovah nitahy izy mare. Fa tafara, Solomona nanjary nanompo Zan̈ahary tsy izy koa. Neloko mare Jehovah tamy fahotan̈a nataony zen̈y, ke firenenan’ny Israely jiaby nanjary nijaly tan̈atin’ny taon̈o maro. Fa Solomona koa fa naty, Baiboly mivolan̈a fa izy ‘nalevin̈y niaraka tamy razambeny’, karaha ataon’ny Mpanjaka Davida, olo tsy nivadiky. (1 Mpanj. 11:5-9, 43; 2 Mpanj. 23:13) Ke izikoa zahan̈a fomba nandivenan̈a izy zen̈y, atsika ma mety matoky fa Solomona mbala hivilômin’i Jehovah? Baiboly tsy mivolan̈a zen̈y. Fa olo sasany ndraiky mety hieritreritry fa “lan̈iany olo maty efa afaka madiodio amy fahotan̈anany.” (Rom. 6:7) Kanefa, zen̈y tsy midika fa olo jiaby naty in̈y mbala hivilômin’i Jehovah aby jiaby. Aviô zen̈y koa tsy mivolan̈a fa olo araiky koa fa naty, izy manan̈a zo tsy maintsy hivilômin̈y. Familaoman̈a olo maty io kadô baka amy Zan̈ahary be fitiavan̈a. Izy man̈amia izio lan̈iany olo mendriky hanompo izy mandrakizay. (Joba 14:13, 14; Jaona 6:44) Fa Solomona ma an̈isan’ny hahazo kadô io? Atsika tsy mahay valiny fa Jehovah zaraiky fo mahay zen̈y. Fa ny raha haintsika fo, amy rariny aby raha jiaby ataon’i Jehovah.
INO MA RAHA HAINTSIKA?
10. Ino raha tsapan’i Jehovah momba fandripahan̈a olombelon̈o? (Ezekiela 33:11) (Zahava koa sary.)
10 Vakia Ezekiela 33:11. Tsara fan̈ahy Jehovah, ke izy man̈ambara amintsika raha tsapany momba fitsarany olo. Apostoly Petera nanoratra raha mira raha nisoratin’ny mpaminan̈y Ezekiela ty: “Tsisy olo tian’i Jehovah ho ripaka foeky.” (2 Pet. 3:9) Ten̈a mankahery atsika irô volan̈a aby io. Haintsika baka amy zen̈y baka fa Jehovah tsy handripaka olo mandrakizay, izikoa tsy raha misy antony maventy mahavy izy han̈ano zen̈y. Izy Zan̈ahary ten̈a mamindra fô, ke izikoa mbala azony atao, izy mamindra fô fo.
Lera amy familaoman̈a olo tsy marin̈y, maro karazan̈an’olo mbala hampianarin̈y raha momba Jehovah (Zahava fehintsoratra 10)
11. Azôvy aby olo tsy hivilômin̈y, aviô akôry nahaizantsika zen̈y?
11 Ino fo raha haintsika momba olo aby tsy hivilômin̈y eky? Olo vitsivitsy fo volan̈in’ny Baiboly fa tsy hivilômin̈y eky.b Ohatra, Jesosy nivolan̈a fa Jodasy Iskariota efa tsy hivilômin̈y eky. (Marka 14:21; zahava koa Jaona 17:12.) Jodasy nahay fa izy ten̈a efa kinia nanohitry Jehovah ndreky Jesosy Zanany. (Zahava Marka 3:29.) Karaha zen̈y koa fa Jesosy nivolan̈a fa nisy sasany tamindrô mpitondra fivavahan̈a aby in̈y hofoaty, ke efa tsisy fan̈antinan̈a mbala hivilômin̈y zen̈y eky. (Mat. 23:33; zahava Jaona 19:11.) Aviô, apostoly Paoly koa nampitandrin̈y fa tsy hivilômin̈y eky lan̈iany mpivadi-pinoan̈a tsy mibebaka.—Heb. 6:4-8; 10:29.
12. Ino raha haintsika momba famindram-pôn’i Jehovah? Man̈ameza ohatra.
12 Ino fo basy raha haintsika momba famindram-pôn’i Jehovah? Karakôry nan̈aboahany fa “tsy tiany hisy ho ripaka foeky olo nata araiky”? Diniha baka fa izy namindra fô tamin’olo sasany nan̈ano fahotan̈a maventy. Karaha ataon’ny Mpanjaka Davida, izy nan̈ano fahotan̈a maventy maro, an̈atin’izen̈y izy nijangajanga ndreky namono olo. Fa Davida koa fa nibebaka, Jehovah namindra fô taminany sady namela helokonany. (2 Sam. 12:1-13) Mpanjaka Manase koa faran-draha nahavita raha ratsy maro eky tamy fiain̈ananany. Fa kanefa, ndray faran’ny ratsy mare raha nataony, Jehovah mbala namela helokonany fo, izy koa fa nibebaka. (2 Tan. 33:9-16) Irô ohatra aby io ahitantsika fa Jehovah mamindra fô izikoa izy mahita antony tôkony han̈anaovan̈a zen̈y. Mbala hivilôminy irô olo aby io, fôtony tsapandrô fa ten̈a ratsy raha nataondrô, aviô irô nibebaka.
13. a) Nan̈ino Jehovah namindra fô tamindrô olo ta Ninive tan̈y? b) Ino raha nivolan̈in’i Jesosy momba irô olo ta Ninive tan̈y?
13 Haintsika koa fa Jehovah namindra fô tamindrô olo nipetraka ta Ninive tan̈y. Izy nivolan̈a tamy Jona: “Hitako raha ratsy ataondrô io.” Fa irô olo aby io koa fa nibebaka tamy fahotan̈a nataondrô, Jehovah tsara fan̈ahy tamindrô ke namela helokondrô. Izy ten̈a namindra fô tozay Jona. Neloko baka Jona, ke Jehovah nampatsiaro izy fa irô olo aby io ‘tsy mahay ny mety ndreky tsy mety foeky.’ (Jona 1:1, 2; 3:10; 4:9-11) Efa elabe tafaran’izin̈y, Jesosy koa fa nampianatra, izy nampiasa ohatra io nan̈azavan̈a tamin’olo fa Jehovah io Zan̈ahary man̈ano ny rariny ndreky mamindra fô. Jesosy nivolan̈a fa olo ta Ninive nibebaka aby io mbala ‘hivilômin̈y amin’ny andra fitsaran̈a.’—Mat. 12:41.
14. Ino ma dikan’ny “hatsangana amy fitsaran̈a”, izikoa raha momba irô olo ta Ninive tan̈y koran̈iny?
14 Ino ma raha tian’i Jesosy koran̈iny tamin’izy nivolan̈a fa irô olo ta Ninive aby in̈y mbala hivilômin̈y amin’ny “andra fitsaran̈a”? Jesosy tamin’io nampianatra momba “olo hatsangana amy fitsaran̈a” amin’ny hoavy. (Jaona 5:29) Izy nikoran̈a momba Fanjakan̈a Arivo Taon̈onany, fotoan̈a hamilaoman̈a “olo marin̈y ndreky tsy marin̈y.” (Asa. 24:15) Fa momba familaoman̈a irô olo tsy marin̈y aby io, “fitsanganan̈a amy fitsaran̈a” ivolan̈ana izio. Dikan’izen̈y, afaran’irô hivilômin̈y io, Jehovah ndreky Jesosy hizaha tsarabe asa irô man̈araka raha ampianarin̈y irô amy zen̈y. Ke izikoa irô olo aby ta Ninive aby in̈y amy zen̈y nivilômin̈y, ke tsy man̈eky han̈araka fivavahan̈a marin̈y, hatsangana amy fitsaran̈a irô. (Isaia 65:20) Fa lan̈iany mifidy hanompo Jehovah ndreky tsy hivadiky aminany ndraiky, hatsangana amy fiain̈ana. Dikan’izen̈y, hiain̈y tsisy farany irô!—Dan. 12:2.
15. a) Nan̈ino atsika tsy tôkony hivolan̈a fa tsisy hivilômin̈y irô olo naty ta Sodoma ndreky Gomora in̈y? b) Akôry tôkony ho fazahoantsika raha koran̈in’ny Joda 7? (Zahava efajoro “Ino ma Raha Tian’i Joda Koran̈iny?”)
15 Jesosy koa fa nikoran̈a momba irô olo ta Sodoma ndreky Gomora, izy nivolan̈a fa ho moramora raha hahazo irô amin’ny “Andra Fitsaran̈a” tozay raha hahazo irô olo nanohitry izy ndreky tsy nan̈eky fampianaran̈anany. (Mat. 10:14, 15; 11:23, 24; Lioka 10:12) Ino ma raha tiany volan̈iny amy zen̈y? Atsika nety nieritreritry fa Jesosy tamin’io nan̈ano sarin-teny ke nampitombo fomba fivolan̈ana raha. Tsara alain̈a onon̈o fa Jesosy koa fa nikoran̈a fa irô olo ta Ninive aby in̈y hitsangana amin’ny andra fitsaran̈a, ten̈a ara-bakiteny raha nivolan̈iny io.c Ke ten̈a ara-bakiteny koa raha nivolan̈in’i Jesosy momba Sodoma ndreky Gomora io. Nira fo baka “Andra Fitsaran̈a” nikoran̈iny tamindrô io. Samy nan̈ano raha ratsy baka irô olo ta Sodoma ndreky Gomora ndreky irô olo ta Ninive tan̈y. Fa irô ta Ninive aby io fo namian̈a fotoan̈a nahavitandrô nibebaka. Aleva onon̈o koa, ino raha nivolan̈in’i Jesosy momba irô olo “hatsangana amy fitsaran̈a” in̈y. Ho an̈isan’izen̈y irô olo “zatra nan̈ano raha ratsy.” (Jaona 5:29) Hita baka amy zen̈y fa mbala misy fan̈antinan̈a nindrô olo nipetraka ta Sodoma ndreky Gomora in̈y. Ampoizin̈y tsarabe fa sasany amindrô io mbala hivilômin̈y, aviô mety ho atsika aby handeha hampianatra irô raha momba Jehovah ndreky Jesosy Kristy.
16. Ino ma raha haintsika momba azôvy olo hivilômin’i Jehovah? (Jeremia 17:10)
16 Vakia Jeremia 17:10. Andininy io ahitan̈a raha haintsika momba fitsaran’i Jehovah. Izy tsy vôly “mandiniky fô ndreky eritreritry faran’ny lalin̈y.” Ke izikoa avy familaoman̈a olo maty amin’ny amaray an̈y, ‘eraka raha nataon’olo tsiaraikiaraiky fo hamaliany izy.’ Dikan’izen̈y, Jehovah ho mentitry izikoa ilain̈y, kanefa izy hamindra fô izikoa mbala azony atao. Ke atsika tsy afaka mivolan̈a foeky fa olo araiky efa tsisy fan̈antinan̈a mbala hivilômin̈y foeky, izikoa tsy raha hoe ke haintsika fa zen̈y raha nivolan̈in’ny Baiboly momba izy!
“MPITSARA TANY JIABY HAN̈ANO NY RARINY”
17. Handeha hatao karakôry irô olo jiaby naty in̈y?
17 Adama ndreky Eva koa fa nan̈araka Satana sady nanohitry Jehovah Zan̈ahary, andrivony tapitrisa olo naty. Ten̈a ‘fahavalo ankitin̈y fahafatesan̈a io’! (1 Kor. 15:26) Handeha hatao karakôry irô olo jiaby naty in̈y? Hisy olo vitsivitsy, 144 000 an̈isan’ny mpan̈ara-dia Jesosy Kristy hivilômin̈y ke hiain̈y tsisy farany an-dan̈itry an̈y. (Apok. 14:1) Baka iô koa hisy lelahy ndreky man̈angy maro tsy nivadiky tamy Jehovah, ho an̈isan’olo “hatsangana amy fiain̈ana” baka iô irô hiain̈y tsisy farany ambony tany eto, izikoa irô mbala tsy mivadiky fo an̈atin’ny Fanjakan̈a Arivo Taon̈on’i Kristy, ndreky amy fitsapan̈a farany. (Dan. 12:13; Heb. 12:1) Baka iô, amy Fanjakan̈a Arivo Taon̈o io, irô “olo tsy marin̈y”, an̈isan’izen̈y olo tsiary nanompo Jehovah foeky na irô “zatra nan̈ano raha ratsy”, hamian̈a fotoan̈a hahavitandrô hiova, ke hanjary mpanompon’i Jehovah tsy mivadiky. (Lioka 23:42, 43) Kanefa misy olo sasany ten̈a ratsy fan̈ahy mare, ke tapa-kevitry nanohitry Jehovah ndreky fikasan̈an’i Jehovah. Efa tapa-kevitry Jehovah fa tsy hivilôminy foeky olo aby karaha zen̈y.—Lioka 12:4, 5.
18-19. a) Nan̈ino atsika matoky fomba hitsaran’i Jehovah irô olo efa naty aby in̈y? (Isaia 55:8, 9) b) Ino raha hidinihintsika amy lahatsoratra fan̈araka?
18 Atsika ma afaka mahatoky fa lera Jehovah hitsara olombelon̈o, ho mety fo ma fanapahan-kevitrinany? Ia! Hain’i Abrahama tsarabe baka fa Jehovah “Mpitsara tany jiaby” io lavorary, ten̈a be fahendrena ndreky mamindra fô. Efa nampiofan̈iny koa Zanany, ke izy nambelany hitsara olo jiaby. (Jaona 5:22) Jehovah ndreky Jesosy samy mahay raha an̈atin’ny fôn’olo. (Mat. 9:4) Irô tsy maintsy han̈ano “ny rariny” fo!
19 Irarian̈a atsika hatoky Jehovah ndreky fanapahan-kevitry jiaby ataony. Haintsika baka fa Jehovah fo tôkony hitsara olo fa tsy atsika! (Vakia Isaia 55:8, 9.) Ke zen̈y mahavy atsika matoky Jehovah ndreky Zanany hitsara raha jiaby. Sady atsika koa mahay fa Jesosy Mpanjakantsika io hangala tahaka fan̈anaovan’i Jehovah ny rariny ndreky hamindra fô karaha izy koa. (Isaia 11:3, 4) Fa kanefa ino raha azontsika ambara momba karakôry hataon’i Jehovah ndreky Jesosy hitsara olo amy fahorian̈a be? Ino raha tsy haintsika? Aviô ino raha haintsika? Hivalin̈a amy lahatsoratra fan̈araka irô fan̈ontanian̈a aby zen̈y.
HIRA 57 Mitoria Amin’ny Karazan’olona Rehetra
b Momba Adama ndreky Eva, baka iô Kaina, zahava Tilikambo Fiambesan̈a 1 Zanvie 2013 p. 12, l.p.a.
c Mampiasa sarin-teny fampitombosan̈a volan̈a olo araiky, izikoa misy hevitry tiany hamafisin̈y, fa tsy mety alain̈a ara-bakiteny ndraiky dikan’ny volan̈a ampiasainy. Fa mety ho ara-bakiteny dikan’ny volan̈an’i Jesosy tamin’izy nikoran̈a momba irô olo ta Sodoma ndreky Gomora. Ke dikan’izen̈y izio tsy sarin-teny fampitombosan̈a volan̈a.