Fan̈ontanian̈an’ny Mpamaky

‘Irô’ amin’ny ‘anao hiambin̈y irô’, amy Salamo 12:7 ao io ma “olo mijaly” (andininy faha-5) sa “volan̈an’i Jehovah” (andininy faha-6)?

Volan̈a aby alohan’izio ndreky afaran’izio man̈ambara fa olo raha tiany koran̈iny.

Amy Salamo 12:1-4 ao mivolan̈a fa ‘efa tsisy olombelon̈o mafatoky eky.’ Aviô amy Salamo 12:5-7 izy mivolan̈a karaha ty:

Andininy faha-5 io mivolan̈a mikasiky raha hataon’ny Zan̈ahary ‘nin’olo mijaly aby io.’ Hamonjy irô izy.

Andininy faha-6 koa mivolan̈a fa “volan̈an’i Jehovah madio” karaha ataon’ny ‘volafotsy avoadio’ in̈y. Karaha zen̈y tsarabe koa fahitantsika volan̈an’i Jehovah.​—Sal. 18:30; 119:140.

Zahava amy zay baka andininy fan̈araka izio, amy Salamo 12:7 ty: ‘Jehovah e, anao hiambin̈y irô; harovanao tsiaraikiaraiky irô baka tsy azon’ny taranaka ty mandrakizay.’ Ino ma “irô” volan̈iny io?

Misy olo mivolan̈a fa matoa andininy faha-6 mikoran̈a momba ‘volan̈an’i Jehovah’, dikan’izen̈y “irô” amin’ny andininy faha-7 io volan̈an’ny Zan̈ahary. Aviô haintsika koa fa Jehovah ‘niambin̈y’ na niaro Baiboly fo, nata nifen̈y mare irô olo tsy tia izio nisakana izio ndreky nandrobaka izio.​—Isaia 40:8; 1 Pet. 1:25.

Fa tsy diso koa izikoa Jehovah miambin̈y olonany, karaha koran̈in’ny andininy faha-5 io. Jehovah man̈ampy ndreky mamonjy olo ‘mijaly’ ndreky ‘ampijalin̈y’, ary izy mbala han̈ano zen̈y fo.​—Joba 36:15; Sal. 6:4; 31:1, 2; 54:7; 145:20.

Ke ino amy zay raha tiany koran̈iny amin’ny “irô” amin’ny andininy faha-7 io?

Izikoa zahan̈a tsarabe raha koran̈in’ny salamo io, olo raha tiany koran̈iny amin’ny “irô” io.

Koran̈iny Salamo 12:1 fa nisy olo navandy tamindrô “olo mafatoky” aby io. Aviô amy zay, atsika mahita fa Jehovah hamaly irô olo tsy mampiasa tsara lelandrô. Man̈amia toky atsika salamo io fa Zan̈ahary han̈ano raha hamonjian̈a vahoakanany, fôtony madio volan̈anany.

Ke andininy faha-7 io mivolan̈a fa Jehovah hiambin̈y ndreky hiaro “irô”, dikan’izen̈y irô olo mijaly nohon’ny raha ataondrô olo ratsy fan̈ahy aby io.

Mifan̈araka tsarabe amy soratra Hebreo nataon’ny Masoreta fomba nandikan̈a “irô” amin’ny andininy io. Mampiasa “atsika” indroe aby andininy faha-7 amy Fandikan-teny Grikan’ny Fitopolo. Irô olo mafatoky voakoran̈a taloha tiô in̈y, mijaly sady ampijalin̈y, raha tiany koran̈iny amizio. Aviô, andininy faha-7 mivolan̈a koa fa “tsiaraikiaraiky” amindrô olo mafatoky aby io voaro ‘tsy ho azon’ny taranaka ty’, na irô mampirisiky olo ho ratsy fitondran-ten̈a aby io. (Sal. 12:7, 8) Karaha ty ndraiky nandikan̈a izio amy Targoma Aramianin̈y, andininy faha-7: “Anao TÔMPO hiaro olo marin̈y, anao hiaro irô mandrakizay tsy ho azon’ny taranaka ratsy fan̈ahy ty. Mivezivezy atỳ arỳ irô ratsy fan̈ahy aby io, karaha dinta mitsentsitry lion’ny zanak’olombelon̈o in̈y.” Zen̈y koa mbala man̈aboaka fa tsy volan̈an’ny Zan̈ahary raha tian’ny Salamo 12:7 io koran̈iny.

Ke ten̈a man̈amia fan̈antinan̈a irô ‘olo mafatoky’ andininy io, fa Zan̈ahary tsy maintsy han̈ano raha.