LAHATSORATRA FIANARAN̈A 30
HIRA 97 Ny Teninao no Ivelomanay
Mbala Man̈ampy Anao ma Fampianaran̈a Fôtotro amy Baiboly?
‘Zen̈y mahavy zaho vôn̈ono fo hampatsiaro anarô raha zen̈y, ndray izio efa hainarô, ndray anarô efa miôrin̈y tsarabe amy fahamarin̈ana nianaranarô.’—2 PET. 1:12.
HEVITRY HIDINIHIN̈Y
Akôry han̈arehan̈a irô leson maro maventy baka amy fampianaran̈a fôtotro amy Baiboly ao, ndray efa tan̈atin’ny taon̈o maro nianarantsika irô io voanalohany?
1. Ino vokatran’ny fahaizanao fampianaran̈a fôtotro, tamin’ny anao somilany nianatra fahamarin̈ana?
NAN̈OVA fiain̈anantsika raha nianarantsika tamy voanalohan’ny atsika nianatra Baiboly. Ohatra, atsika koa fa nianatra fa Jehovah an̈aran’ny Zan̈ahary, atsika nanomboko nikamarady taminany. (Isaia 42:8) Atsika koa fa nahay ny marin̈y momba olo maty, atsika efa tsy mavozo olo maty eky. (Mpito. 9:10) Izikoa atsika fa nahay fa Zan̈ahary han̈ano Paradisa ambony tany eto, atsika efa tsy niasaloha ny amaray eky. Natoky koa atsika fa tsy 70 na 80 taon̈o fo atsika ho velon̈o, fa mandrakizay.—Sal. 37:29; 90:10.
2. Nan̈ino 2 Petera 1:12, 13 man̈aboaka fa ndray Kristianin̈y efa ela, mbala mahazo hatsaran̈a fo baka amy fampianaran̈a fôtotro?
2 Tsy mila adin̈antsika foeky fa ten̈a raha maventy irô fampianaran̈a fôtotro nianarantsika tamy Baiboly. Tamy taratasy faharoe nisoratin’i Petera, izy nivolan̈a fa irô Kristianin̈y aby io efa “niôrin̈y tsarabe tamy fahamarin̈ana.” (Vakia 2 Petera 1:12, 13.) Fa tamin’io, tan̈atin’ny fiangonan̈a nisy olo nila hampiala irô tamy fahamarin̈ana, karaha ataon’ny mpampianatra sandoko ndreky olo tsy navozo Zan̈ahary. (2 Pet. 2:1-3) Ke tian’i Petera han̈ampy irô rahalahy ndreky ranabavy aby io, amy zen̈y irô tsy voafitaka. Ke baka hahavitandrô zen̈y, nampatsiarôviny irô fampianaran̈a sasany efa nianarandrô. Fampianaran̈a aby zen̈y han̈ampy irô tsy hivadiky firak’amy farany.
3. Nan̈ino Kristianin̈y jiaby mbala mila misaintsain̈y fampianaran̈a fôtotro fo? Man̈ameza ohatra.
3 Ndray efa ela atsika nahita fahamarin̈ana, mbala misy raha vaovao fo ianarantsika baka amy fampianaran̈a fôtotro. Ty misy ohatra. Olo araiky efa mpampianatra olo mandoky ndreky olo araiky vo mianatra mandoky tsy mira, izikoa fa mandoky raha araiky. Araiky mpampianatra io efa ela niasan̈a, ke hainy karakôry hikarakaran̈a hanin̈y io baka izio masirosiron’ny jiaby, baka iô hainy koa man̈ovan̈ova fomba fandokisan̈a izio. Karaha zen̈y koa olo efa ela nanompoan̈a Jehovah ndreky olo vo mianatra Baiboly. Mety samy hafa fomba fandraisandrô fampianaran̈a fôtotro amy Baiboly. Izikoa efa elaela nivitan’ny batisantsika, fiain̈anantsika ndreky tombontsoam-panompoan̈antsika nety efa niova. Ke izikoa atsika fa mieritreritry fampianaran̈a fôtotro efa haintsika efa elabe in̈y, ataontsika mifan̈araka amy raha iain̈antsika iziôty, hahita fomba vaovao atsika han̈arehan̈a raha nianarantsika taloha in̈y. Atsika iziô hizaha ino raha ianaran’ny Kristianin̈y efa ela baka amy fampianaran̈a fôtotro telo amy Baiboly ao.
JEHOVAH IO MPAMÔRON̈O
4. Ino vokatran’ny fahaizantsika fa Jehovah io Mpamôron̈o?
4 ‘Zan̈ahary niasa raha jiaby.’ (Heb. 3:4) Haintsika fa tany ty ndreky fiain̈ana an̈abon’izio, niasain’ny Mpamôron̈o araiky hendry ndreky faran’ny mahery. Izy niasa atsika, ke izy ten̈a mahay atsika. Aviô koa izy mikarakara atsika. Hainy raha ten̈a mahatsara atsika. Fahaizantsika fampianaran̈a tsotra mivolan̈a fa Jehovah Mpamôron̈o, nisy vokany tamintsika mare, ke nahavy atsika manan̈a fiain̈ana misy dikany, ndreky manan̈a tanjon̈o.
5. Ny marin̈y momba ino han̈ampy atsika hanetry ten̈a? (Isaia 45:9-12)
5 Mampianatra atsika hanetry ten̈a koa fahaizantsika fa Jehovah io Mpamôron̈o. Ohatra, Joba koa fa nifantoko loatra tamin’ny ain̈inany tômpiny ndreky tamin’olo hafa, nampatsiarôvin’i Jehovah izy fa Jehovah io Mpamôron̈o faran’ny mahery. (Joba 38:1-4) Fampatsiarovan̈a zen̈y nahavy Joba nahita fa marin̈y aby raha jiaby ataon’i Jehovah. Ke mifan̈araka amy zen̈y, mpaminan̈y Isaia efa tafaran’izen̈y nanoratra: “Tanimanga ma tôkony hivolan̈a amy Mpanefy: ‘Ino raha ataonao ty?’”—Vakia Isaia 45:9-12.
6. Lera karakôry atsika ten̈a tôkony hieritreritry fa Mpamôron̈o atsika io ten̈a hendry ndreky faran’ny mahery? (Zahava koa sary.)
6 Kristianin̈y araiky za-draharaha mety hanjary hatoky hevitrinany tômpiny. Ke izy mety tsy hijery Jehovah ndreky Volan̈anany izikoa fa misy tari-dalan̈a tadiaviny. (Joba 37:23, 24) Fa karakôry ndraiky izikoa olo araiky mieritreritry mare momba fahendrena ndreky habezan̈an’ny Mpamôron̈o? (Isaia 40:22; 55:8, 9) Raha zen̈y hahavy izy hanetry ten̈a fo ke han̈araka hevitrin’i Jehovah, fa tsy han̈izingizin̈y hevitrinany tômpiny.
Ino man̈ampy atsika hangala onon̈o fa hevitrin’i Jehovah an̈abon̈abon’ny nintsika? (Zahava fehintsoratra 6)d
7. Ino nahavy Rahela han̈eky fan̈ovoan̈a nataon’ny fandaminan̈a?
7 Rahela mipetraka a Slovenia nahita fa izy koa fa nieritreritry momba Mpamôron̈o io, raha zen̈y nan̈ampy izy nan̈eky fan̈ovoan̈a nataon’ny fandaminan̈a. Ho izy: “Ndraikindraiky tsy nora taminaka nan̈eky fanapahan-kevitry nataondrô mpitariky aby io. Ohatra, ndray efa tafaran’ny zaho nizaha Vaovao Farany Baka amy Filan-kevi-pitantan̈ana (2023) #8, zaho mbala nahinihiny fo nahita ranadahy nanangana sômbotro nan̈ano kabaro. Ke zaho nivavaka tamy Jehovah han̈ampy zaho han̈eky fan̈ovoan̈a io.” Rahela tontohitry fa Jehovah io Mpamôron̈o, ke izy mahay fomba ten̈a tsara itaritany fandaminan̈anany. Ke izikoa hitanao sarotro aminao man̈eky fan̈azavan̈a vaovao na toromariky vaovao, nan̈ino izikoa misaintsain̈y fa Mpamôron̈o atsika io ten̈a hendry ndreky mahery?—Rom. 11:33-36.
NAN̈INO TSY ADOSON’NY ZAN̈AHARY JALY?
8. Nan̈ino mahatsara atsika mahay antony mahavy Zan̈ahary mbala tsy man̈adoso jaly?
8 Nan̈ino tsy adoson’ny Zan̈ahary jaly? Olo sasany tsy mahita valin’ny fan̈ontanian̈a zen̈y, ke irô meloko amy Zan̈ahary na hivolan̈a foeky fa Zan̈ahary zen̈y tsisy! (Ohab. 19:3) Fa anao tsy karaha zen̈y. Hainao fa baka amy fahotan̈a nilovaintsika ndreky tsy fahalavorarian̈a mahavy jaly io misy, fa tsy baka amy Jehovah. Nianaranao koa fa faharetan̈an’i Jehovah io nahavy olo maro nanjary nahay izy ndreky nahay fa Zan̈ahary mbala han̈adoso jaly io, ke tsy ho hisy eky izio. (2 Pet. 3:9, 15) Ny marin̈y nianaranao zen̈y nahavy anao natoky Jehovah ke nahainarikitry izy fo.
9. Lera akôry atsika mila mieritreritry ndraiky antony mahavy Zan̈ahary tsy man̈adoso jaly?
9 Mazava amintsika fa mila manan̈a faharetan̈a atsika izikoa fa miambin̈y Jehovah han̈adoso jaly. Kanefa, izikoa atsika na olo tiantsika mijaly na avoa raha tsy rariny, na naty, atsika mety hieritreritry nan̈ino Jehovah mbala tsy man̈ano raha fo. (Hab. 1:2, 3) Amy lera karaha zen̈y, tsara atsika mieritreritry irô antony mahavy olo tsara fan̈ahy mijaly.a (Sal. 34:19) Tsara koa atsika mieritreritry fikasan̈anany han̈adoso jaly io, indraiky tsy man̈indroe.
10. Ino raha nankahery Anne tafaran’ny nifatesan’ny mamany?
10 Fahaizan̈a ny marin̈y momba jaly io koa man̈ampy atsika hiaritry. Anne mipetraka a Mayotte, amin’ny Océan Indien nivolan̈a: “Ten̈a nalahelo mare zaho, tan̈atin’ny taon̈o vitsivitsy nifatesan’ny mamako. Fa kanefa nalaiko onon̈o fo fa tsy baka amy Jehovah jaly io, fa izy efa vôn̈ono han̈adoso jaly jiaby ndreky hamelon̈o olo maty. Fangalan̈a onon̈o fahamarin̈ana aby zen̈y, nahavy zaho nilamin-tsain̈y ndreky nahazo angôvo.”
11. Nan̈ino mandrisiky atsika hitory fo fahaizantsika antony mbala tsy han̈adosoan’ny Zan̈ahary jaly?
11 Fahaizan̈a antony tsy han̈adosoan’ny Zan̈ahary jaly io koa mandrisiky atsika hazoto hitory fo. Petera koa fa baka nan̈azava fa dikan’ny faharetan̈an’i Jehovah io famonjian̈a lan̈iany olo mibebaka, karaha ty nisoratiny: “Iritrireta tôkony ho olo karakôry anarô amy fitondran-ten̈a masin̈y ndreky fan̈aboahan̈a fahafoizan-ten̈a amy Zan̈ahary.” (2 Pet. 3:11) Asa fitorian̈a ataontsika io mbala an̈isan’ny “fahafoizan-ten̈a amy Zan̈ahary.” Karaha Babantsika an-dan̈itry an̈y, atsika tia olo. Tiantsika irô hipetraka amy donia vaovao hanjakan’ny fahamarin̈ana. Jehovah manan̈a faharetan̈a ke man̈amia fotoan̈a olo hanompo izy. Ten̈a tombontsoa maventy nintsika miaraka miasa amy Zan̈ahary, man̈ampy olo faran’ny maro hianatra momba izy, alohan’ny havian’ny farany!—1 Kor. 3:9.
ATSIKA MIAIN̈Y AMIN’NY “ANDRA FARANY”
12. Nan̈ino mahatsara atsika mahay fa atsika io miain̈y amin’ny “andra farany”?
12 Ambaran’ny Baiboly mazava han̈ano karakôry olo amin’ny “andra farany.” (2 Tim. 3:1-5) Hitantsika amy raha ataon’olo man̈odidin̈y atsika fa marin̈y raha volan̈in’ny Baiboly io. Aviô, hitantsika koa fa toe-tsain̈in’olo mahairatsy fo, ke mahairesy lahatra fo atsika fa atokisan̈a Volan̈a Zan̈ahary.—2 Tim. 3:13-15.
13. Mifan̈araka amy fan̈oharan̈an’i Jesosy amy Lioka 12:15-21, ino fan̈ontanian̈a tôkony hiritriretintsika?
13 Fahaizantsika fa atsika io efa an̈atin’ny andra farany, man̈ampy atsika hifantoko amy raha ten̈a maventy. Diniha baka raha ianarantsika baka amy fan̈oharan̈an’i Jesosy amy Lioka 12:15-21. (Vakia.) Nan̈ino ma lelahy mpan̈arivo io kahian̈a “tsy mandiniky”? Tsy nohon’izy mpan̈arivo, fa tsy nety raha nataony faran’ny maventy tamy fiain̈ananany. Izy namory “harian̈a ninany tômpiny, kanefa amy Zan̈ahary izy tsy manan-draha.” Ten̈a hadisovan̈a maventy raha nataony zen̈y, fôtony izy efa tsy ela hofoaty. Ho Zan̈ahary taminany: “Hofoaty anao alin̈y ty.” Efa hely koa fotoan̈a tavela amy ziôty, ke tsara atsika man̈ontany ten̈a: ‘Hita amy tanjon̈onaka ma fa zaho mifantoko amy raha ten̈a maventy? Ino ma tanjon̈o hampirisihiko anan̈andry zanako? Zaho ma mampiasa angôvonaka, fotoan̈anaka, fanan̈ananaka, hamorian̈a harian̈a ninaka tômpiny, sa hamorian̈a harian̈a an-dan̈itry an̈y?’
14. Nan̈ino tantaran’i Miki man̈aboaka fa ten̈a raha maventy tsy han̈adin̈asantsika fa atsika io miain̈y amin’ny andra farany?
14 Fahaizantsika fa atsika io miain̈y amin’ny andra farany, mety han̈ova raha ataontsika tanjon̈o amy fiain̈ana. Diniha baka ranabavy Miki. Karaha ty ho izy: “Zaho koa fa nahavita fianaran̈a tamy lise, zaho ten̈a tihahazo asa hahavitako man̈ano fikarohan̈a momba biby. Kanefa zaho koa tihan̈ano mpisava lalan̈a maharitry, aviô han̈itatra faritany. Irô kamaradiko maro matotro aby io nan̈amia torohevitry zaho, ke nan̈iraka zaho handiniky tsarabe, izikoa ho vitako han̈ano asa tiako io, sady hanakatra tanjon̈onaka io. Nampatsiarôvindrô zaho fa tsy ela ho avy faran’ny donia ty. Aviô nambarandrô zaho fa amy donia vaovao, zaho mbala hahavita handiniky biby maro erakany tiako. Ke zaho nifidy nan̈ano fianaran̈a fôhiky. Izio nahavitako nahita asa sady nan̈ano mpisava lalan̈a maharitry. Zaho baka tiô nandeha nan̈itatra ta Ekoatera.” Miki ndreky vadiny iziôty man̈ano asan’ny faritry amy tany io.
15. Karakôry mety fandraisan’olo vaovao tsara koran̈intsika amindrô? Man̈ameza ohatra. (Zahava koa sary.)
15 Tsy tôkony ho kivy atsika, izikoa misy olo tsy man̈eky vaovao tsara amy voanalohany. Olo baka mahay miova. Diniha i Jakoba rahalahin’i Jesosy. Hitany nahabe Jesosy, izy nanjary Mesia, aviô tsisy olo nahay nampianatra nandilatra Jesosy. Fa tan̈atin’ny taon̈o maro, Jakoba tsy nan̈araka Jesosy. Efa tafaran’i Jesosy natsangana tamy maty izy vo nanjary mpianatran’i Jesosy sady nazoto mare!b (Jaona 7:5; Gal. 2:9) Ke izikoa misy havanao na olo itorianao tsy man̈eky hafatra momba Fanjakan̈an’ny Zan̈ahary, aza kivy fa ikoràn̈a fo irô. Aza adin̈a fa atsika io efa miain̈y amin’ny andra farany, ke ten̈a meky asa fitorian̈a io. Raha koran̈inao amindrô iziôty io mety hisy vokany amindrô amin’ny afara an̈y, ndray izy aby mety efa afaran’ny fahorian̈a be manomboko foeky.c
Ino raha mandrisiky atsika tsy ho kivy amindrô havantsika tsy Vavolombelon̈o aby io? (Zahava fehintsoratra 15)e
ANKASITRAHA FO FAMPATSIAROVAN̈AN’I JEHOVAH
16. Ino hatsaran̈a azonao baka amy fampatsiarovan̈an’i Jehovah? (Zahava koa efajoro “Ampiasà Irô io Han̈ampian̈a Olo.”)
16 Sasany amin’ny hanin̈y ara-pan̈ahy azontsika, natao nin’olo tsiary naharen̈y fahamarin̈ana fôtotro amy Baiboly. Ohatra, kabaro natao nin’olo jiaby, lahatsoratra sasany ndreky video amy jw.org, aviô gazety ho an’ny besinimaro, natao voanalohany nin’olo tsy Vavolombelon̈on’i Jehovah. Fa na zen̈y, atsika jiaby koa mahazo hatsaran̈a baka amy fampatsiarovan̈a an̈atin’izio. Mahaifatatra fo koa fitiavantsika Jehovah ndreky finoantsika Volan̈anany, aviô irô io koa man̈ampy atsika hahay hampianatra tsarabe fahamarin̈ana.—Sal. 19:7.
17. Amy lera karakôry anao tsara mangala onon̈o fampianaran̈a fôtotro amy Baiboly?
17 Maro amintsika koa efa ela nanompoan̈a Jehovah, ke ravoravo atsika izikoa fa misy fan̈azavan̈a vaovao miboaka momba Soratra Masin̈y. Fa mbala mankasitraka fampianaran̈a fôtotro nazontsika tamin’ny atsika voanalohany nianatra fahamarin̈ana koa atsika. Ke izikoa atsika tafampanjaka hevitrintsika, fa tsy tihan̈araka tari-dalan̈a baka amy fandaminan̈an’i Jehovah, tsara atsika manetry ten̈a ke mangala onon̈o fa Zan̈ahary Mpamôron̈o sady faran’ny mahery, aviô faran’ny hendry io mitariky fandaminan̈anany. Fa koa ndraiky atsika na olo tiantsika miatriky fitsapan̈a, atsika mila manan̈a faharetan̈a, ndreky mangala onon̈o antony mahavy Jehovah mbala man̈ambela jaly io hisy. Aviô, izikoa atsika manapa-kevitry momba fampiasan̈a fotoan̈antsika, ndreky volantsika na fanan̈anantsika, tsara alaintsika onon̈o fa efa amin’ ny andra farany atsika iziôty, ke efa hely fotoan̈a tavela. Irarian̈a fampatsiarovan̈an’i Jehovah aby io hankahery, handrisiky, ndreky hampisy jery atsika fo.
HIRA 95 Mihamazava ny Lalantsika
a Zahava lahatsoratra “Inona no Porofo fa Hifarana Tsy ho Ela ny Fijaliana”, amy Tilikambo fiambesan̈a 15 May 2007, p. 21-25.
c Zahava lahatsoratra “Ino Raha Haintsika Momba Didim-pitsaran̈an’i Jehovah Amin’ny Hoavy?” amy Tilikambo Fiambesan̈a May 2024, p. 8-13.
d FAN̈AZAVAN̈A SARY: Anti-pan̈ahy araiky miziriziry amin’ny hevitrinany, kanefa izio tsy niken’ny anti-pan̈ahy jiaby. Alin̈y andra, izy koa fa nandiniky lakintan̈a tamy lan̈itry, nazony onon̈o fa Mpamôron̈o io ten̈a hendry ndreky mahery. Tontohitry izy fa raha tian’i Jehovah ten̈a raha maventy fa tsy raha tiany.
e FAN̈AZAVAN̈A SARY: Ranabavy araiky man̈ano fianaran̈a manokan̈a, mandiniky porofo aby ivolan̈ana fa atsika io efa miain̈y amin’ny andra farany. Raha zen̈y nandrisiky izy hikaiky rahavaviny, ke nitory taminany.