Hainao ma Sekire Man̈ampy Olo ho Afa-pô?

1. Ino ma dikan’ny mahay afa-pô zen̈y, aviô tsy midika ino izio?

ANAO ma mahay afa-pô? Olo mahay afa-pô zen̈y mahay mifantoko amin’ny hatsaran̈a misy amy fiain̈ananany, ke izy mahita haravoan̈a ndreky milamin-tsain̈y fo. Izy tsy mahinihiny amy raha tsy anan̈any. Fa ndray atsika afa-pô amy raha anan̈antsika, zen̈y tsy mivolan̈a fa atsika efa tsy mila miasaloha amy fomba itondrasantsika fiain̈anantsika. Ohatra, tsy diso Kristianin̈y araiky izikoa tihampitombo fanompoan̈a. (Rom. 12:1; 1 Tim. 3:1) Ndray zen̈y, izy tsy tôkony ho meloko izikoa fanendrena niriny io tsy azony malaky.

2. Nan̈ino ratsy mare tsy fahaizan̈a ho afa-pô io?

² Ratsy mare vokatran’ny tsy fahaizan̈a afa-pô io. Olo karaha zen̈y mety hifen̈y hiasa mare an̈atin’ny lera maro, baka hazahoan̈a fanan̈ana tsy ten̈a ilaindrô aby. Ny raha mampalahelo, nisy Kristianin̈y sasany nangalatra vola foeky, na raha hafa nirindrô. Irô aby mety nieritreritry: ‘Zaho vain̈y hahazo raha ty’, ‘Efa ela tihazahoako izy ty’, na ‘Mbala hampodiko fo vola ty afara an̈y.’ Kanefa karazan̈a halatra jiaby tsy mamparavoravo Jehovah ndreky mangala baraka izy. (Ohab. 30:9) Sasany ndraiky lôso kivy tamy tombontsoam-panompoan̈a araiky tsy nazony, ke farany vôly nanompo Jehovah foeky. (Gal. 6:9) Nan̈ino Kristianin̈y efa nanokan-ten̈a tamy Jehovah nieritreritry han̈ano ambaka zen̈y? Fôtony izy mety efa tsy nianatra hahay ho afa-pô eky.

3. Man̈amia toky atsika momba ino Filipianina 4:11, 12?

³ Atsika jiaby mety mianatra hahay ho afa-pô. Apostoly Paoly nanoratra fa izy “nianatra ho afa-pô tamy zay raha nanan̈any.” (Vakia Filipianina 4:11, 12.) Tamin’izy nigadra nanoratany volan̈a aby zen̈y. Fa ndray zen̈y, izy mbala ravoravo fo. Izy “nianatra sekire” man̈ampy olo ho afa-pô io. Ke izikoa sarotro amintsika ho afa-pô, volan̈a Paoly ndreky raha niain̈any man̈amia toky atsika fa atsika koa mba mety ho afa-pô. Fa atsika ndraiky tsy tôkony hieritreritry fa raha zen̈y handeha ho azy. Atsika mila mianatra hahay ho afa-pô. Amy fomba akôry? Alô atsika handiniky irô toetry han̈ampy atsika hianatra sekire man̈ampy olo ho afa-pô io.

MIFEN̈A HAHAY HANKASITRAKA

4. Nan̈ino fahaizan̈a mankasitraka man̈ampy atsika hahay ho afa-pô? (1 Tesalonianina 5:18)

⁴ Mora afa-pô olo araiky, izikoa mahay mankasitraka. (Vakia 1 Tesalonianina 5:18.) Ohatra, izikoa atsika mahay mankasitraka raha ten̈a ilaintsika, atsika tsy hiasaloha loatra amy raha tiantsika kanefa tsy anan̈antsika. Izikoa atsika mankasitraka tombontsoam-panompoan̈a efa anan̈antsika amy ziôty, atsika hifen̈y mare han̈ano tsarabe fanendrena azontsika, fa tsy hiasaloha mare amin’ny araiky mbala tsy azontsika io. Tsy mahagaga Soratra Masin̈y koa mandrisiky atsika han̈ano mersy Jehovah lera mivavaka! Atsika koa mahay mankasitraka, atsika hanan̈a “fiadan̈anan’ny Zan̈ahary tsy takatran’ny jerin’olombelon̈o foeky.”​—Fil. 4:6, 7.

5. Nan̈ino irô Israelita aby io tôkony ho nahay nankasitraka? (Zahava koa sary.)

⁵ Diniha baka raha nandalo tamindrô Israelita aby io. Natetiky irô nitarain̈y tamy Jehovah fa tsy nahazo hanin̈y karaha nankafizindrô ta Ezipty tan̈y. (Nom. 11:4-6) Marin̈y ndraiky fa fiain̈ana tamy tany paiky tan̈y tsy nora. Fa ino raha tôkony nan̈ampy irô hahay ho afa-pô? Irô tôkony nankasitraka ndreky nieritreritry raha efa nataon’i Jehovah tamindrô. Ta Ezipty, tamin’irô nampijalin̈a natao karaha andevo, Jehovah efa nandefa antambo folo aby nan̈avotan̈a irô. Aviô irô koa fa nafaka andevo, Jehovah nan̈ampy irô “nangala raha maro tamindrô Ezipsianin̈y aby io”, karaha ataon’ny volafotsy, volamena, ndreky lamba. (Eks. 12:35, 36) Israelita aby io koa fa tavela tamy sisin’ny Ranomasin̈y Mena, Jehovah nampisaraka izio. Aviô, irô koa fa namakivaky tany paiky, Jehovah nan̈amia mana irô isan’andra. Ke nan̈ino irô mbala nitarain̈y? Tsy irô tsisy hanin̈y, fa irô tsy nahay nankasitraka raha namian̈a irô, ke tsy afa-pô.

6. Ino aby raha han̈ampy atsika hahay hankasitraka?

⁶ Ke akôry hahavy anao hahay hankasitraka? Voanalohany, isan’andra mangalà fotoan̈a hangalan̈a onon̈o raha tsara mamparavoravo anao. Anao mety manoratra raha aroe na telo, mahavy anao tihan̈ano mersy. (Fitom. 3:22, 23) Faharoe, aboaha fa anao mahay mankasitraka. Ataova mersy olo nan̈ano ny tsara taminao. Fa faran’ny maventy, man̈anaova mersy Jehovah isan’andra. (Sal. 75:1) Fahatelo, olo mahay mankasitraka fo ataova kamarady marikitry. Fahaizan̈a mankasitraka io mifindra karaha tsy fahaizan̈a mankasitraka fo. (Deot. 1:26-28; 2 Tim. 3:1, 2, 5) Atsika koa mitady fomba hankasitrahan̈a, ho kirikiry helokontsika ndray iô problemo ndreky raha tiantsika kanefa tsy anan̈antsika.

7. Ino raha nan̈ampy Aci nahay nankasitraka, aviô ino vokany?

⁷ Diniha baka raha nandalo tamy ranabavy Aci, mipetraka an Indonésie. Ho izy: “Tamy valan̈aretin̈y COVID-19, zaho nampiran̈a raha nahazo zaho tamy nindrô mpiara-manompo aby io. Ke zaho lôso tsy afa-pô ndreky tsy ravoravo.” (Gal. 6:4) Ino raha nan̈ampy izy han̈ova toe-tsain̈inany? Ho Aci: “Zaho nanomboko nikônty irô hatsaran̈a azoko isan’andra, ndreky mieritreritry raha maro tsara azoko noho ny zaho an̈isan’ny fandaminan̈an’ny Zan̈ahary. Zaho baka tiô nan̈ano mersy Jehovah. Ke zaho lôso nahatsiaro afa-pô mare.” Izikoa misy eritreritry tsy mankahery mampijaly jerinao, asa anao mety man̈ano karaha Aci, baka anao lôso manan̈a toe-tsain̈y mahay mankasitraka ndraiky koa?

MIFANTOHA TSARA NDREKY MANETRE TEN̈A FO

8. Ino raha nahazo Baroka?

⁸ Nisy fotoan̈a i Baroka sekreteran’i Jeremia, lôso tsy afa-pô tamy fiain̈ananany. Sarotro raha nirahan̈a nataony. Izy nila nan̈ampy Jeremia, tamy Jeremia nan̈ambara hafatra matomboko tamin’ny Israelita tsy nahay nankasitraka aby io. Nisy fotoan̈a Baroka tsy nifantoko tamy raha tian’i Jehovah ataony, fa niasaloha loatra momba ain̈inany ndreky raha tiany hatao fo. Ke Jehovah nan̈iraka Jeremia nivolan̈a tamy Baroka: “Anao ndraiky mitady raha maventy ninao. Aza mitady zen̈y eky.” (Jer. 45:3-5) Dikan’ny volan̈an’i Jeremia io: “Mahaiza afa-pô amy fiain̈ananao iziôty.” Narehan’i Baroka volan̈a zen̈y, ke Jehovah mbala nankasitraka izy fo.

9. Eraka 1 Korintianina 4:6, 7, mahavy atsika hahatsapa ino fanetren-ten̈a io? (Zahava koa sary.)

⁹ Mety hisy Kristianin̈y hieritreritry fa izy vain̈y hahazo tombontsoam-panompoan̈a araiky. Izy mety maro raha hay, miasa mare, na efa ela nanompoan̈a Jehovah, na koa raha telo zen̈y foeky. Kanefa, mety olo hafa mahazo tombontsoam-panompoan̈a tiany mare io. Ino raha han̈ampy izy, izikoa izy meloko? Mety han̈ampy izy mieritreritry raha nisoratin’ny apostoly Paoly, amy 1 Korintianina 4:6, 7. (Vakia.) Baka amy Jehovah aby zay tombontsoa ndreky talenta anan̈antsika, fa tsy atsika vain̈y hahazo izio. Noho ny hatsaram-pan̈ahinany miavaka mahavy Jehovah man̈amia atsika irô io.​—Rom. 12:3, 6; Efes. 2:8, 9.

10. Ino han̈ampy atsika hanetry ten̈a?

¹⁰ Han̈ampy atsika hanetry ten̈a mandiniky tsarabe modely namezan’i Jesosy. Diniha baka raha nisy, tamin’ny alin̈y nanasan’i Jesosy vitin’ny apostolinany aby io. Karaha ty nisoratin’ny apostoly Jaona: “Efa hain’i Jesosy [1] fa namezan’ny Babany izy tam-pelantan̈ananany raha jiaby, aviô [2] izy baka amy Zan̈ahary ke [3] handeha amy Zan̈ahary, ... ke nanasa vitin’ny mpianatranany aby io.” (Jaona 13:3-5) Tôkony ho Jesosy nieritreritry fa irô mpianatranany aby io vain̈y nanasa vitinany. Fa izy tsiary nieritreritry izy vain̈y han̈ano fiain̈anan’ny mpan̈arivo zen̈y. (Lioka 9:58) Jesosy nanetry ten̈a, ke nahay afa-pô. Izy nan̈ambela modely tsara arehantsika.​—Jaona 13:15.

11. Nan̈ino nan̈ampy Dennis hahay ho afa-pô fanetren-ten̈a io?

¹¹ Dennis baka a Holandy, nifen̈y nanetry ten̈a karaha Jesosy, ndray tsy nora taminany. Ho izy: “Misy zaho meloko, fôtony nazon’olo tombontsoam-panompoan̈a niriko ho azo. Izikoa zaho fa mahatsiaro karaha zen̈y, zaho mianatra foto-kevitry momba fanetren-ten̈a. Efa nataoko mariky amy JW Library^® ao irô andininy aby momba fanetren-tena, amy zen̈y malaky hitako, ke mimpody vakiko. Nalaiko amy telefoninaka koa irô kabaro sasany momba fanetren-tena, ke matetiky tandrin̈esako.a Nianarako fa asa jiaby ataoko io han̈amezan̈a voninahitry Jehovah, fa tsy zaho. Atsika jiaby samy ambelan’i Jehovah handray anjara, fa izy ten̈a mampahômby asa io.” Ke anao koa tsy afa-pô fôtony tsy azonao fanendrena araiky tianao, mifen̈a hanetry ten̈a. Zen̈y hahavy fifandraisanao amy Jehovah hahaifatatra ndreky han̈ampy anao hahay ho afa-pô.​—Jak. 4:6, 8.

MINIMINIA FAN̈ANTINAN̈ANAO

12. Ino aby raha antinaintsika amin’ny amaray ke man̈ampy atsika ho afa-pô? (Isaia 65:21-25)

¹² Izikoa atsika mimenimeny raha maro tsara miambin̈y atsika, hahatsiaro ho afa-pô atsika. Volan̈a Jehovah nisoratin’ny mpaminan̈y Isaia man̈aboaka tsarabe fa hitan’i Jehovah raha mampijaly atsika aby io. Aviô izio man̈amia toky fa izy han̈adoso problemo jiaby. (Vakia Isaia 65:21-25.) Atsika amy zen̈y hanan̈a tran̈o tsara, asa tsara, hihina hanin̈y mahasalama ndreky masiro. Atsika koa tsy hidaon̈o tsao ho hisy raha ratsy havoa atsika na zanakantsika eky. (Isaia 32:17, 18; Ezek. 34:25) Ho tsara mare ny amaraintsika, ke tsisy raha hampavozo foeky.

13. Lera an̈atin’ny raha karakôry aby atsika ten̈a mila mifantoko amy fan̈antinan̈antsika?

¹³ Iziôty mandilatran’ny taloha, atsika mila mifantoko amy fan̈antinan̈antsika. Nan̈ino? Atsika io miain̈y amin’ny “andra farany”, ke atsika jiaby tôjy problemo “tsy mora hatrefin̈y.” (2 Tim. 3:1) Jehovah isan’andra man̈ampy atsika hiaritry, ke man̈amia tari-dalan̈a, angôvo ndreky fan̈ampian̈a ilaintsika. (Sal. 145:14) Ankoatran’izen̈y, fan̈antinan̈antsika koa ten̈a man̈amia angôvo atsika, lera atsika an̈atin’ny sarotro. Ke anao koa sahiran̈a vo mahita raha ten̈a ilain’ny fianakavian̈anao, izio ma anao ho sahiran̈a karaha zen̈y fo? Aha! Jehovah nampan̈anten̈a fa han̈amia raha ilainao, aviô han̈amia raha maro amy Paradisa. (Sal. 9:18; 72:12-14) Anao koa marary lava na kivy na marary fatatra, anao ma hiaritry aretin̈y karaha zen̈y fo? Aha! Amy donia vaovao hataon’ny Zan̈ahary io, tsy ho hisy eky aretin̈y ndreky fahafatesan̈a. (Apok. 21:3, 4) Fan̈antinan̈a zen̈y man̈ampy atsika hahay ho afa-pô rango iziôty, fa tsy hahinihiny ndreky tsy ho meloko. Atsika na miatriky raha tsy rariny, naty havan̈a, na miaritry aretin̈y, na koa miaritry fitsapan̈a hafa, atsika mbala mety ho afa-pô fo. Nan̈ino? Fôtony na karakôry raha sarotro io, “betibetiky fo” izio, aviô efa tsy ho hisy eky amy donia vaovao.​—2 Kor. 4:17, 18.

14. Akôry hankafatarantsika fan̈antinan̈antsika?

¹⁴ Fan̈antinan̈a io raha maventy ten̈a han̈ampy atsika ho afa-pô. Ke ino han̈ampy atsika hankafatatra izio? Karaha ataon’olo araiky mety mila linety vo mahita tsarabe raha lavitry in̈y, atsika koa mety mila man̈ano raha hankafataran̈a fan̈antinan̈antsika, baka atsika hahavita hangala sary an-tsain̈y tsarabe fiain̈anantsika amy Paradisa. Ke izikoa atsika miasaloha amy tsy fanan̈ana vola, tsara atsika koa mimenimeny fotoan̈a efa tsy ilàn̈a vola eky, ke efa tsisy olo masikiny eky. Izikoa ndraiky atsika miasaloha amy tombontsoam-panompoan̈a mbala tsy azontsika, tsara koa atsika mieritreritry fa tsy hisy dikany foeky asalohantsika zen̈y lera atsika lavorary, ndreky mahavita manompo Jehovah andrivony taon̈o. (1 Tim. 6:19) Maro raha mampiasaloha atsika amy ziôty, ke mety ho sarotro amintsika hieritreritry irô fampan̈antinan̈a amin’ny amaray io. Fa arakarakan’ny atsika mimenimeny hatsaran̈a amin’ny amaray io, ho mora amintsika handefa jery amizio, fa tsy amy problemontsika.

15. Ino raha ianaranao baka amy raha nivolan̈in’i Christa?

¹⁵ Diniha baka karakôry nataon’ny fan̈antinan̈a io nan̈ampy Christa vadin’i Dennis, araiky nikoran̈intsika taloha tarỳ in̈y. Ho Christa: “Zaho nanjary narary hozatra, ke tsy maintsy mandeha amy sezy misy laroa, aviô presky mandry an̈abo fandrian̈a fo. Manehoko fo ain̈inaka isan’andra. Dokoteranaka nivolan̈a fa hahay ho ratsy fo aretin̈inaka io. Fa zaho direkty nieritreritry: ‘Tsy mira amy fizahavako ny amaray foeky fahitany izio.’ Fan̈antinan̈anaka fo baka raha dinihiko, ke raha zen̈y man̈ampy zaho hilamin-tsain̈y. Amy donia ty fo zaho tsy maintsy miaritry, fa ho tsara mare fiain̈ananaka amy donia vaovao!”

“LAN̈IANY OLO MAVOZO IZY TSISY RAHA HIJALIAN̈A”

16. Nan̈ino Mpanjaka Davida nanoratra fa lan̈iany olo mavozo Jehovah “tsisy raha hijalian̈a”?

¹⁶ Atsika ndray mahay afa-pô amy fiain̈ana, atsika mbala ho tôjy raha sarotro fo. Diniha baka Mpanjaka Davida. Faran’ny vitsy, telo zanany naty, ke raha zen̈y nampalahelo izy mare. Nan̈odian’olo nan̈ano raha tsy nataony koa izy. Kamaradiny nivadiky taminany, aviô nisy mpanjaka nitady hamono izy, ke tsy vôly nan̈ian̈a izy tan̈atin’ny taon̈o maro. Fa ndray naro raha niaretany, karaha ty ho izy momba Jehovah: “Lan̈iany olo mavozo izy, tsisy raha hijalian̈a.” (Sal. 34:9, 10) Nan̈ino izy nivolan̈a zen̈y? Fôtony ndray atsika vahoakan’i Jehovah tsy man̈anten̈a tsy ho voan’ny problemo, atsika matoky fa hahazo raha ten̈a ilaintsika fo. (Sal. 145:16) Mira Davida, atsika matoky fa Jehovah han̈ampy atsika hiaritry fitsapan̈a jiaby mahazo atsika, ke atsika hilamin-tsain̈y ndreky ho ravoravo fo.

17. Nan̈ino ma anao tapa-kevitry hahay ho afa-pô?

¹⁷ Tian’i Jehovah ho afa-pô atsika. (Sal. 131:1, 2) Ke mifen̈a han̈ano erakan’ny vitanao, baka anao hahay ho afa-pô. Izikoa anao mifen̈y mare hahay hankasitraka, hifantoko tsara ndreky hanetry ten̈a, baka iô hankafatatra fan̈antinan̈anao, anao hahavita hivolan̈a karaha ty: “Afa-pô zaho.”​—Sal. 16:5, 6.