Ikia fa Jehovah Mamela Heloko

1-2. Karakôry ataon’i Jehovah izikoa atsika mibebaka amy fahotan̈a nataontsika? (Zahava koa sary .)

MPANJAKA Davida nahay karakôry mijaly jery baka amy fahotan̈a natao taloha zen̈y. (Sal. 40:12; 51:3; volan̈a mampiditry) Nan̈ano fahotan̈a maventy baka izy tamy fiain̈ananany. Fa kanefa, izy koa fa ten̈a nibebaka, Jehovah namela helokonany. (2 Sam. 12:13) Ke Davida nahay tsarabe haravoan̈an’olo voavela heloko zen̈y.​—Sal. 32:1.

² Karaha Davida, atsika koa afaka hahatsapa haravoan̈a baka amy famindram-pôn’i Jehovah zen̈y. Ten̈a mankahery mahay fa Jehovah vôn̈ono han̈ambela fahotan̈antsika, na izio fahotan̈a maventy. Fa atsika fo mila mibebaka, mamosa fahotan̈a nataontsika, aviô mifen̈y tsy han̈ampody izin̈y eky! (Ohab. 28:13; Asa. 26:20; 1 Jaona 1:9) Mankahery mare koa mahay fa Jehovah ten̈a mamela heloko, ke ataony karaha tsiary nisy in̈y fahotan̈a io!​—Ezek. 33:16.

3-4. Ino raha tsapan’ny ranabavy araiky tafaran’ny nivitan’ny batisanany, aviô ino raha hidinihintsika amy lahatsoratra ty?

³ Ndraikindraiky mety sarotro amin’olo sasany man̈eky fa Jehovah efa namela helokonany. Diniha baka Jennifer. Izy nitarimin̈y tamy fahamarin̈ana. Fa izy koa fa bebe, izy nanjary ratsy fitondran-ten̈a ke nan̈ano fiain̈ana aroe sôsony. Taon̈o maromaro tafaran’izen̈y izy nimpody tamy Jehovah, aviô nahafeno fepetra natao batisa. Ho izy: “Zaho taloha adalan’ny vola ndreky harian̈a, nijangajanga, nigiaka toaka mare, aviô faran-draha satain̈y eky. Tan̈atin’ny jeriko tan̈y haiko fa sôron̈o nataon’i Kristy nan̈adio zaho, tafaran’ny zaho niangavy Jehovah namela helokonaka ndreky nibebaka ankitin̈y. Fa kanefa tsy nety vitako nandresy lahatra fônaka fa zaho efa voavela heloko.”

⁴ Sarotro aminao koa ma ndraikindraiky mandresy lahatra fônao fa Jehovah efa nan̈ambela hadisovan̈a nataonao taloha? Tian’i Jehovah anao hilamin-tsain̈y izikoa fa nahazo famindram-pô karaha Davida in̈y. Ke amy lahatsoratra ty atsika handiniky nan̈ino atsika mila man̈eky fa Jehovah nan̈ambela helokontsika, ndreky ino raha han̈ampy atsika han̈ano zen̈y.

NAN̈INO ATSIKA MILA MAN̈EKY FAMILAN-KELOKON’I JEHOVAH?

5. Ino raha tian’i Satana hinoantsika? Man̈ameza ohatra.

⁵ Atsika koa man̈eky familan-kelokon’i Jehovah, atsika tsy hino vandin’i Satana. Aza adin̈a fa Satana han̈ano erakan’ny vitany, hampavôly atsika hanompo Jehovah. Baka ho tatrany tanjon̈onany zen̈y, izy mety han̈ano raha hahavy atsika hieritreritry fa fahotan̈antsika io tsy mety hambelan’i Jehovah. Diniha baka ohatran’ny lelahy araiky ta Korinto tan̈y, nadoso tamy fiangonan̈a fôtony nijangajanga. (1 Kor. 5:1, 5, 13) Izy koa fa nibebaka tafaran’izen̈y, tian’i Satana olo amy fiangonan̈a tsy hamela heloko, ke tsy handray lelahy io. Aviô tian’i Satana koa lelahy nibebaka io hahatsapa fa izy tsy ho voavela heloko, ke ho “rivan̈a baka amin’ny alahelo dila loatra”, sady ho vôly hanompo Jehovah. Satana mbala tsy nan̈ova tanjon̈onany ndreky tetik’adinany. Fa atsika ndraiky ‘mahay teti-dratsinany.’​—2 Kor. 2:5-11.

6. Ino raha han̈ampy atsika tsy hivisaran’ny nen̈iny?

⁶ Atsika koa man̈eky familan-kelokon’i Jehovah, atsika tsy hivisaran’ny nen̈iny. Izikoa atsika manota, matetiky atsika manen̈iny amy raha nataontsika. (Sal. 51:17) Tsara atsika koa mahatsapa karaha zen̈y. Feon’ny fieritreretan̈antsika mandrisiky atsika han̈itsy raha tsy mety nataontsika. (2 Kor. 7:10, 11) Fa izikoa atsika mbala hinjehin’ny eritreritry fo ndray atsika efa nibebaka, hiafarany atsika mety ho rivan̈a. Izikoa atsika man̈eky familan-kelokon’i Jehovah, ho vitantsika tsy han̈amelo-ten̈a dila loatra, ke atsika hahavita hanompo Jehovah erakan’ny itiavany hanompoan̈a izy, dikan’izen̈y amin’ny eritreritry madio ndreky haravoan̈a mare. (Kol. 1:10, 11; 2 Tim. 1:3) Fa akôry handrisiantsika lahatra fôntsika, baka izio han̈eky familan-kelokon’ny Zan̈ahary?

INO RAHA HAN̈AMPY ATSIKA HAN̈EKY FAMILAN-KELOKON’I JEHOVAH?

7-8. Akôry nivolan̈an’i Jehovah toetrinany tamy Mosesy, aviô ino toky azontsika baka amy zen̈y? (Eksodosy 34:6, 7)

⁷ Iritrireta karakôry fivolan̈an’i Jehovah izy tômpiny. Ohatra, aleva onon̈o raha nivolan̈in’i Jehovah tamy Mosesy tamy Bongo Sinay.a (Vakia Eksodosy 34:6, 7.) Jehovah nata manan̈a toetry hafa maro tsara, izy nivolan̈a tamy Mosesy fa “izy Zan̈ahary mamindra fô ndreky mahinakinaka.” Ke Zan̈ahary karaha zen̈y tsy hamela heloko mpanomponany araiky ten̈a nibebaka tamy fahotan̈a nataony? San̈atria! Tsy mamindra fô ndreky mafy fô edy izy koa man̈ano zen̈y. Tsy honohono Jehovah foeky ho karaha zen̈y!

⁸ Matoky atsika fa Jehovah koa fa mivolan̈a fa izy mamindra fô, dikan’izen̈y izy mivolan̈a ny marin̈y. Izy tsiary navandy. (Sal. 31:5) Ke mety sambôrintsika amy volan̈anany izy. Ke izikoa hitanao fa sarotro aminao tsy hieritreritry fahotan̈a nataonao taloha in̈y, man̈ontania ten̈a: ‘Zaho ma matoky fa Jehovah ten̈a mamindra fô ndreky mahinakinaka, aviô ten̈a hamela helokon’ny zay mpanota nibebaka?’ Ke zaho amy zay ma tsy tôkony hatoky fa izy efa namela helokonaka?’

9. Ino ma dikan’ny voavela heloko zen̈y? (Salamo 32:5)

⁹ Saintsain̈a baka amy raha nampanoratin’i Jehovah irô mpanoratra Baiboly aby io, raha koran̈iny momba familan-kelokonany. Diniha, ohatra, raha nivolan̈in’i Davida mpanoratra Baiboly momba familan-kelokon’i Jehovah. (Vakia Salamo 32:5.) “Anao nan̈ambela hadisovan̈anaka ndreky fahotan̈anaka”, ho Davida. Dikan’ny volan̈a hebreo “man̈ambela” io, “man̈onjon̈o”, “man̈adoso”, na “mitondra.” Jehovah koa fa namela helokon’i Davida, izy nira nan̈onjon̈o fahotan̈anany baka iô nitondra izin̈y lavitry tan̈y. Davida baka tiô nahatsiaro nahivankivan̈a, fôtony Jehovah efa nan̈ambela tanteraka helokonany. (Sal. 32:2-4) Karaha zen̈y koa raha mety ho tsapantsika, izikoa atsika ambelan’i Jehovah hadisovan̈a. Atsika koa fa nibebaka ankitin̈y tamin’ny hadisovan̈a nataontsika, atsika efa tsy mila mitondra nen̈iny baka amy fahotan̈antsika efa ninjonin’i Jehovah, aviô efa nindesiny lavitry atsika an̈y io.

10-11. Man̈ambara ino momba Jehovah ma izy “vôn̈ono han̈ambela hadisovan̈a” zen̈y? (Salamo 86:5)

¹⁰ Vakia Salamo 86:5. Iô Davida mivolan̈a fa Jehovah “vôn̈ono han̈ambela hadisovan̈a.” Misy boky araiky man̈azava fa Jehovah io “‘mpan̈ambela hadisovan̈a’, zen̈y efa ‘maha izy izy.’” Nan̈ino ma Jehovah karaha zen̈y? Tapany fan̈araka amin’ny andininy io man̈azava karaha ty: “Anao be fitiavan̈a sady tsy mivadiky amin’olo jiaby mikaiky anao.” Tamy lahatsoratra talohan’ity atsika nianatra fa Jehovah mampan̈anten̈a fa han̈aboaka fitiavan̈a ndreky tsy fivadihan̈a amin’olo tia izy. Izy tsy mety hiala irô. Ke izikoa irô nan̈ano hadisovan̈a ndreky nibebaka, Jehovah tsy ho vôly han̈aboaka fitiavan̈a ndreky tsy fivadihan̈a io amindrô, ndreky ‘ten̈a hamela heloko.’ (Isaia 55:7) Izikoa hitanao sarotro man̈eky familan-kelokon’ny Zan̈ahary, man̈ontania ten̈a: ‘Zaho ma matoky tsarabe fa Jehovah io mpamela heloko, ke izy vôn̈ono han̈ambela hadisovan̈an’olo jiaby nibebaka ndreky nangataka famindram-pô taminany? Tsy tôkony han̈eky ma zaho fa izy nan̈ambela helokonaka lera zaho nangataka famindram-pô taminany?’

¹¹ Mankahery atsika mahay fa Jehovah io ten̈a mahay fa atsika io mpanota. (Sal. 139:1, 2) Man̈azava tsarabe raha zen̈y salamo hafa nataon’i Davida, ke man̈ampy atsika han̈eky familan-kelokon’i Jehovah koa.

AZA ADIN̈A RAHA TSAROAN’I JEHOVAH

12-13. Izikoa Salamo 103:14 zahan̈a, ino raha tsaroan’i Jehovah momba atsika, aviô mandrisiky izy han̈ino raha zen̈y?

¹² Vakia Salamo 103:14. Iô Davida mivolan̈a fa Jehovah “mahatsiaro fa atsika io fotaka.” Amy volan̈a aby io, Davida man̈azava antony araiky mahavy Jehovah vôn̈ono han̈ambela helokon’ny mpanomponany nibebaka: Hainy fa atsika io mpanota. Baka hazava amintsika tsarabe raha zen̈y, alô hizahavantsika marikitry volan̈an’i Davida io.

¹³ Davida nivolan̈a fa Jehovah “mahay tsarabe raha niasan̈a atsika.” Jehovah niasa Adama “baka tamy fotaka”, ke hainy raha niasan̈a olombelon̈o ndreky raha ilaindrô. Ohatra irô mila mihina, mandry, aviô miain̈y. (Gen. 2:7) Nata olombelon̈o lavorary mbala mila raha aby zen̈y. Fa Adama ndreky Eva koa fa nanota, nisy dikany hafa koa olombelon̈o niasain̈a tamy fotaka io. Atsika io taranakan’i Adama ndreky Eva, ke atsika nandova fahotan̈a, ke mila han̈ano raha ratsy fo. Jehovah tsy vitan’ny mahay fa atsika io mpanota fo fa Davida koa mivolan̈a fa izy “mahatsiaro” raha zen̈y. Dikan’ny volan̈a hebreo ampiasain̈a eto, fôtony Jehovah mahay fa atsika io mpanota, izy tsy vôly mahinakinaka atsika. Karaha ty izikoa fintin̈iny raha nivolan̈in’i Davida io: Hain’i Jehovah fa atsika io mety ho lavo ndraikindraiky. Fa izikoa atsika hitany fa ten̈a mibebaka, izy hamindra fô amintsika ndreky hamela helokontsika.​—Sal. 78:38, 39.

14. a) Karakôry an̈azavan’i Davida habezan’ny familan-kelokon’i Jehovah? (Salamo 103:12) b) Nan̈ino ohatran’i Davida man̈aboaka fa Jehovah ten̈a mamela heloko ankitin̈y? (Zahava efajoro “Akôry Ataon’i Jehovah Mamela Ndreky Man̈adin̈a?”)

¹⁴ Ino koa man̈ampy atsika hatoky tsarabe fa Jehovah ten̈a mamela helokontsika? (Vakia Salamo 103:12.) Davida mivolan̈a fa Jehovah koa fa mamela heloko, fahotan̈antsika io ataony lavitry atsika mare, mira “halaviran’ny antin̈iana ndreky andrefa” in̈y. Mifankalavitry mare antin̈iana ndreky andrefa io, ke tsy mety hifanôjy foeky. Ke ino ma raha tian’izen̈y volan̈iny momba fahotan̈a ambelan’i Jehovah? Misy boky araiky man̈azava izio karaha ty: “Izikoa efa nadoso lavitry mare fahotan̈a io, atsika mety matoky fa nata fofokonany, potipotikinany, aviô raha momba izio, efa tsy tsaroan̈a foeky.” Diniha baka: Matetiky fofokon’ny raha araiky mahavy atsika hahatsiaro raha taloha. Fa Jehovah koa fa man̈ambela helokontsika, efa tsisy nata fofony hely fo, ke mety hahavy izy hampiasa fahotan̈a io han̈asazian̈a atsika.​—Ezek. 18:21, 22; Asa. 3:19.

15. Izikoa atsika tsy vôly man̈amelo-ten̈a baka tamy fahotan̈a nataontsika taloha tan̈y, ino raha tôkony hataontsika?

¹⁵ Nan̈ino raha nivolan̈in’i Davida amy Salamo faha-​103 man̈ampy atsika han̈eky familan-kelokon’i Jehovah? Izikoa anao mbala man̈amelo-ten̈a fo tamy fahotan̈a nataonao taloha, man̈ontania ten̈a: ‘Tsao zaho man̈adin̈a raha tsaroan’i Jehovah ay, ke tsy man̈eky fa azony onon̈o fa zaho io mpanota ndreky izy han̈ambela helokon’olo mpanota nibebaka karaha zaho ty? Tsao zaho ty koa tsy man̈adin̈a raha fidin’i Jehovah ho adin̈any ay, ke mbala mangala onon̈o fo fahotan̈a efa nambelan’i Jehovah, sady efa tsy han̈asaziany zaho eky?’ Jehovah efa tsy mizaha fahotan̈a nataontsika taloha in̈y. Ke atsika efa tsy tôkony himenimeny izio koa. (Sal. 130:3) Izikoa atsika matoky fa Jehovah mamela helokontsika, zen̈y han̈ampy atsika han̈ambela helokontsika tômpiny, tamy fahotan̈a nataontsika taloha tan̈y, baka iô ho ravoravo hanompo Jehovah fo.

16. Hazavà amin’ny ohatra nan̈ino ten̈a ratsy mieritreritry fo fahotan̈a vitantsika taloha. (Zahava koa sary.)

¹⁶ Ty misy ohatra. Olo araiky koa tsy vôly man̈amelo-ten̈a baka tamy fahotan̈a nataony taloha tan̈y, izy mira olo mitondra tomabily kanefa tsy vôly mizaha taratra fizahan̈a afara. Tsara ndraiky mizaha tsindraikindraiky fitaratra io. Ho hitanao baka raha mety havoazanao problemo baka afaranao. Fa kanefa, baka tsy hisy problemo dianao, anao mila mizaha tsarabe lalan̈a alohanao fo. Mira zen̈y fo, mety hampatsara atsika mieritreritry tsindraikindraiky fahotan̈a vitantsika taloha tan̈y, fôtony ahafahantsika mangala leson ndreky man̈ampy atsika ho tapa-kevitry tsy han̈ampody izin̈y eky. Fa izikoa jerintsika tsy miala amy fahotan̈a vitantsika taloha foeky, atsika lôso han̈amelo-ten̈a be loatra. Ke raha zen̈y mety hampihen̈y raha ho vitantsika amy fanompoan̈a Jehovah amy ziôty. Ke tsy sitrany atsika hizaha lalan̈a alohantsika fo! Atsika io mandeha amy lalan̈a mitariky atsika amy fiain̈ana, amy donia vaovao nampan̈antinain’ny Zan̈ahary, ke efa “tsy ho tsaroan̈a eky sovenira ratsy.”​—Isaia 65:17; Ohab. 4:25.

AZA VÔLY MANDRESY LAHATRA FÔNAO

17. Nan̈ino atsika mila tsy vôly mandresy lahatra fôntsika fa Jehovah tia atsika ndreky mamela helokontsika?

¹⁷ Atsika mila tsy vôly mandresy lahatra fôntsika fa Jehovah tia atsika ndreky man̈ambela helokontsika. (1 Jaona 3:19, l.p.a.) Nan̈ino? Fôtony Satana tsy ho vôly handresy lahatra atsika fa atsika io tsy tian’ny Zan̈ahary, na tsy hahazo familan-keloko baka aminany foeky. Na karakôry ataony, tanjon̈onany mbala tsy niova. Tiany atsika ho vôly hanompo Jehovah. Ke azo antoko fa Satana hampitombo fo ezaka ataony, fôtony hainy fa efa hely fotoan̈anany tavela. (Apok. 12:12) Kanefa, aza ambela izy handresy!

18. Ino raha mety hataonao baka handrisian̈a lahatra fônao fa Jehovah tia anao ndreky mamela helokonao?

¹⁸ Baka anao hahaihatoky fo fa Jehovah tia anao, areva irô sôso-kevitry nikoran̈intsika tamy lahatsoratra talohan’ity in̈y. Fa baka handrisian̈a lahatra fônao fa Jehovah mamela helokonao, miniminia karakôry fomba hivolan̈an’i Jehovah raha momba izy. Saintsain̈a ino raha volan̈indrô mpanoratra Baiboly aby io momba familan-kelokonany. Aza adin̈a fa izy mahay tsarabe fa anao io mpanota, baka iô izy vôn̈ono hamindra fô aminao. Tsarova koa fa izikoa izy mamela heloko, izio efa tsisy arakaraka eky. Ke ho mira fatokisan’i Davida famindram-pôn’i Jehovah koa raha tsapanao, ke anao hivolan̈a: “Mersy Jehovah ay, fôtony anao mamela ‘hadisovan̈anaka ndreky fahotan̈anaka’!”​—Sal. 32:5.