‘Mikahia Anti-pan̈ahy’

1. Akôry nan̈aboahan’i Jehovah fa valera aminany ôndrikôndrikinany?

TEN̈A valera amy Jehovah ôndrikôndrikinany. Irô io nivangainy tamy lion’i Jesosy, aviô izy nan̈iraka irô anti-pan̈ahy aby io hikarakara andian’ny ôndrikôndrikinany. (Asa. 20:28) Irô anti-pan̈ahy aby io tian’i Jehovah ho tsara fan̈ahy koa fa mikarakara vahoakanany. Irô man̈araka tari-dalan̈an’i Kristy, ke mankahery ôndrikôndriky aby io, ndreky man̈ampy irô hifandray tsara amy Jehovah.​—Isaia 32:1, 2.

2. Azôvy ten̈a karakarain’i Jehovah? (Ezekiela 34:15, 16)

² Jehovah mikarakara mare vahoakanany jiaby, sirto lan̈iany mijaly. Sasany mijaly noho ny hadisovan̈a nataondrô. Ke Jehovah mampiasa anti-pan̈ahy han̈ampy irô. (Vakia Ezekiela 34:15, 16.) Kanefa, tiany atsika hitady fan̈ampian̈a, isaka atsika mila zen̈y. Amy fotoan̈a karaha zen̈y, atsika sady mivavaka mangataka fan̈ampian̈a aminany, aviô atsika mangataka fan̈ampian̈a amy “mpiambin̈y ôndrikôndriky ndreky mpampianatra” aby an̈atin’ny fiangonan̈a.​—Efes. 4:11, 12.

3. Nan̈ino mahatsara atsika jiaby mandiniky andraikitrin’ny anti-pan̈ahy aby io?

³ Amy lahatsoratra ty atsika handiniky akôry ataon’i Jehovah mampiasa anti-pan̈ahy aby io han̈ampy atsika hifandray tsara aminany. Atsika hamaly fan̈ontanian̈a aby ty: Lera karakôry atsika tôkony hangataka fan̈ampian̈a amin’ny anti-pan̈ahy? Nan̈ino atsika tôkony han̈ano zen̈y? Akôry ataondrô man̈ampy atsika? Mety mbala tsisy problemo atsika iziôty, ke atsika mety mbala tsy mila fan̈ampian̈a baka amin’ny anti-pan̈ahy. Fa valin’ny fan̈ontanian̈a aby io hahavy atsika hankasitraka mare fomba ampiasan’i Jehovah irô ndreky hahay ino raha tôkony hatao, lera atsika mila fan̈ampian̈a baka amindrô.

LERA KARAKÔRY ATSIKA MILA “MIKAIKY ANTI-PAN̈AHY”?

4. Nan̈ino atsika mivolan̈a fa olo marary ara-pan̈ahy koran̈in’ny Jakoba 5:14-16, 19, 20? (Zahava koa sary.)

⁴ Jakoba man̈azava fomba ampiasan’i Jehovah anti-pan̈ahy aby io han̈ampian̈a atsika. Ho izy: “Misy olo marary ma aminarô ao? Iraha mikaiky anti-pan̈ahin’ny fiangonan̈a izy.” (Vakia Jakoba 5:14-16, 19, 20.) Jakoba iô mikoran̈a momba olo marary ara-pan̈ahy. Ohatra, izy nivolan̈a fa olo marary io tsy mila mikaiky dôkotera, fa mila mikaiky anti-pan̈ahy. Aviô ho janga izy, izikoa izy voavela heloko. Karaha ataon’ny olo araiky marary koa tiho janga, izy mila mandeha dôkotera mikoran̈a raha momba aretin̈inany, aviô mila man̈araka raha jiaby volan̈in’ny dôkotera aminany in̈y. Karaha zen̈y koa, izikoa atsika marary ara-pan̈ahy, atsika mila mikoran̈a izio amin’ny anti-pan̈ahy, aviô man̈araka torohevitry amezandrô baka amy Baiboly.

5. Akôry hahaizantsika fa atsika marary ara-pan̈ahy?

⁵ Lamin̈y koran̈in’ny Jakoba toko faha-​5 io mandrisiky atsika han̈aton̈o anti-pan̈ahy, izikoa atsika mahatsapa fa mahairobaka fifandraisantsika amy Jehovah. Nan̈ino ma ten̈a raha maventy han̈anaovantsika zen̈y? Atsika hahazo fan̈ampian̈a, diany mbala tsy robaka be fifandraisantsika amy Jehovah. Aza mamitaka ten̈a. Atsika mety hivolan̈a fa atsika mbala ankasitrahin’i Jehovah, kanefa ny marin̈y aminany, efa robaka fifandraisantsika aminany. (Jak. 1:22) Karaha zen̈y Kristianin̈y sasany ta Sardisy, ke Jesosy nampitandrin̈y fa efa tsy namparavoravo Jehovah irô. (Apok. 3:1, 2) Akôry hahaizantsika fa atsika mbala mifandray tsara amy Jehovah? An̈isan’ny fomba araiky, mila ampiran̈intsika karakôry fitiavantsika Jehovah, tamin’ny atsika vo vita batisa ndreky amy ziôty. (Apok. 2:4, 5) Atsika mila man̈ontany ten̈a: ‘Nahainihen̈y ma fitiavako mamaky Baiboly ndreky misaintsain̈y? Zaho ma tapatapaka fivorian̈a ndreky efa tsy man̈oman̈a? Nahainihen̈y ma fazotoako mandeha manompo? Fangalan̈a diandian̈a ndreky fitsakarahan̈a fanan̈ana ma raha ten̈a mandany leranaka?’ Izikoa ia valin’ny fan̈ontanian̈a aby io, dikan’izen̈y misy raha tsy paripare ao, ke izikoa tsy voahitsy malaky, mety hahaiho ratsy fo. Ke izikoa tsy vitantsika tômpiny man̈itsy raha tsy paripare io, na izikoa atsika efa tafandika fitsipikin’ny Zan̈ahary, atsika tôkony hikaiky anti-pan̈ahy han̈ampy.

6. Ino raha tôkony hataon’olo nan̈ano fahotan̈a maventy?

⁶ Fa lan̈iany olo nan̈ano fahotan̈a maventy, fahotan̈a mety hahavy izy hadoso tsy ho an̈isan’ny fiangonan̈a, tôkony han̈aton̈o anti-pan̈ahy. (1 Kor. 5:11-13) Olo karaha zen̈y tsy mahavita man̈arin̈y fifandraisany amy Jehovah. Ke izikoa atsika tihahazo familan-kelokon’i Jehovah baka amy vidim-pan̈avotan̈a, atsika tsy maintsy ‘man̈ano raha han̈aboahan̈a fa atsika nibebaka ankitin̈y.’ (Asa. 26:20) An̈isan’izen̈y atsika mila man̈aton̈o anti-pan̈ahy izikoa nan̈ano fahotan̈a maventy.

7. Azôvy koa olo mila ampian’ny anti-pan̈ahy?

⁷ Tsy olo nan̈ano fahotan̈a maventy fo ampian’ny anti-pan̈ahy aby io, fa olo malemy ara-pan̈ahy koa. (Asa. 20:35) Ohatra, anao mety mavozo mare, tsao tsy hahavita handresy fan̈irian̈a ratsinao. Mety ho sarotro aminao mare hiady amizio, sirto izikoa talohan’ny anao nahita fahamarin̈ana, nandivôzin’ny jamala, zatra nizaha sary vetaveta, na koa ratsy fitondran-ten̈a. Aza miady manokan̈a. Anao mety mikoran̈a izio amin’ny anti-pan̈ahy. Izy hitandren̈y tsarabe anao mitantara problemonao io ndreky han̈amia anao torohevitry mety tsarabe. Aviô izy han̈amia toky anao fa anao mahavita mamparavoravo Jehovah, ke tsy han̈eky han̈ano fan̈irian̈a ratsinao io. (Mpito. 4:12) Ke izikoa anao kivy fôtony tsy mety resinao problemonao io, irô anti-pan̈ahy aby io hampatsiaro anao fa matoa anao mbala mangataka fan̈ampian̈a amindrô, dikan’izen̈y ten̈a raha maventy aminao fifandraisanao amy Jehovah sady anao tsy matoky ten̈a loatra.​—1 Kor. 10:12.

8. Kila hadisovan̈a madiniky nataontsika ma mila koran̈iny amin’ny anti-pan̈ahy? Hazavà.

⁸ Aviô tsy kila raha tsy metimety zay, atsika efa han̈aton̈o anti-pan̈ahy edy. Ohatra, anao tafivolan̈a raha namparary fô rahalahy na ranabavy araiky, na koa tafy neloko mare. Anao tsy voatery han̈aton̈o anti-pan̈ahy, fa areva torohevitrin’i Jesosy in̈y. Ke ataon̈a rahalahinao na ranabavinao io, aviô mialà tsin̈y. (Mat. 5:23, 24) Anao koa mety man̈ano fikarohan̈a momba fahalimian-toetry, faharetan̈a, aviô fifihezan-ten̈a, amy zen̈y anao hahavita han̈aboaka tsarabe toetry aby io amin’ny afara. Fa izikoa mbala tsy mety voavaha fo, anao mety mangataka fan̈ampian̈a amin’ny anti-pan̈ahy. Tamy taratasy nisoratin’i Paoly tamy Filipianin̈y aby io, izy nan̈iraka rahalahy araiky tsy voaton̈ono an̈aran̈a, han̈ampy Eodia ndreky Syntyke, hamaha tsy fifankazahoan̈andrô. Irô anti-pan̈ahy amy fiangonan̈a misy anao mety hahavita han̈ampy anao karaha zen̈y koa.​—Fil. 4:2, 3.

NAN̈INO ATSIKA TÔKONY HIKAIKY ANTI-PAN̈AHY?

9. Nan̈ino favozoan̈a ho voabaraka tsy tôkony hataontsika tamban̈a tsy hikahian̈a anti-pan̈ahy? (Ohabolana 28:13)

⁹ Mila manan̈a finoan̈a ndreky korazy atsika vo hahavita hitady fan̈ampian̈a izikoa atsika nan̈ano fahotan̈a maventy, na izikoa mahatsapa fa tsy vitantsika mandresy fan̈irian̈a ratsintsika. Fa favozoan̈a ho voabaraka tsy tôkony hatao tamban̈a tsy ikahian̈a anti-pan̈ahy. Nan̈ino? Izikoa atsika man̈araka lamin̈y napetrakan’i Jehovah, aboakantsika fa atsika matoky izy ndreky toromariky amiany han̈ampy atsika ho salama ara-pan̈ahy ndreky hatanjaka finoan̈a fo. Haintsika fa izikoa atsika fa mitady ho resy, atsika mila fan̈ampian̈a aminany. (Sal. 94:18) Koa atsika tafan̈ano fahotan̈a maventy, hamindra fô amintsika Zan̈ahary, izikoa atsika mamosa fahotan̈antsika ndreky vôly man̈ano zen̈y.​—Vakia Ohabolana 28:13.

10. Ino mety ho vokany izikoa atsika manitrisitriky fahotan̈antsika?

¹⁰ Maro hatsaran̈a azontsika izikoa atsika mikoran̈a amin’ny anti-pan̈ahy, lera atsika mila fan̈ampian̈a. Fa hahaiho be fo problemo, izikoa atsika mitady han̈asitriky fahotan̈antsika. Mpanjaka Davida koa fa nanitriky fahotan̈a nataony, robaka fifandraisany tamy Jehovah, ke izy kivy ndreky narary foeky. (Sal. 32:3-5) Ain̈intsika koa marary na maratra, izikoa iambembesan̈a, hahaiharary fo. Mira zen̈y koa, hahaiho robaka fo fifandraisantsika amy Jehovah, koa tsy voakarakara malaky. Hain’i Jehovah raha zen̈y, ke zen̈y mahavy izy man̈iraka atsika “hifandamin̈y” aminany. Izy mampiasa irô anti-pan̈ahy aby io han̈ampy atsika hikamarady aminany ndraiky.​—Isaia 1:5, 6, 18.

11. Ino koa mety ho vokany amin’olo, izikoa atsika manitriky fahotan̈a maventy?

¹¹ Mety hisy vokany amin’olo izikoa atsika manitriky fahotan̈antsika. Atsika mety hisakana fan̈ahin’i Jehovah tsy hiasa amy fiangonan̈a ndreky tsy hampisy fiadan̈ana amindrô rahalahy ndreky ranabavintsika aby io. (Efes. 4:30) Karaha zen̈y koa, izikoa atsika mahay olo nan̈ano fahotan̈a maventy, atsika tôkony handrisiky izy hikoran̈a izio amin’ny anti-pan̈ahy.a Atsika koa manitriky fahotan̈a maventy nataon’olo, atsika manota miaraka aminany. (Lev. 5:1) Fitiavantsika Jehovah mahavy atsika hamosa ny marin̈y amin’ny anti-pan̈ahy. Atsika koa man̈ano zen̈y, hadio fo fiangonan̈a, ndreky man̈ampy olo nan̈ano fahotan̈a io hifandray tsara amy Jehovah ndraiky.

AKÔRY ATAONDRÔ ANTI-PAN̈AHY ABY IO MAN̈AMPY ATSIKA?

12. Akôry ataondrô anti-pan̈ahy aby io man̈ampy olo malemy ara-pan̈ahy?

¹² Irô anti-pan̈ahy aby io natao han̈ampy olo malemy ara-pan̈ahy. (1 Tes. 5:14) Izikoa anao nan̈ano fahotan̈a, irô mety han̈ontany anao raha hahaizandrô raha an̈aty fônao an̈y, ndreky hevitrinao momba izio. (Ohab. 20:5) Ten̈a han̈ampy irô anao koa mikoran̈a tsara amindrô, nata tsy mora aminao man̈ano zen̈y, noho ny kolontsain̈inao, toetrinao, na anao men̈atra hikoran̈a izio. Fa aza mavozo ndray anao “tafikapokapoko.” (Joba 6:3) Irô anti-pan̈ahy aby io tsy meky hitsara raha volan̈inao fa irô tihitandren̈y anao tsarabe, amy zen̈y haindrô tsarabe raha jiaby, alohan’irô han̈amia torohevitry anao. (Ohab. 18:13) Haindrô fa tsy vitan’ny andra araiky man̈amia olo fan̈ampian̈a ten̈a ilainy, ke mety tsy indraiky fo irô hikoran̈a aminao.

13. Amy karakôry vavaka ndreky torohevitry baka amy Baiboly ataondrô anti-pan̈ahy aby io man̈ampy atsika? (Zahava koa sary.)

¹³ Anao koa mikaiky anti-pan̈ahy aby io, irô hifen̈y tsy han̈amia tsin̈y anao. Ndray irô aby hivavaka ninao. Mety ho gaga anao fa “misy vokany be” vavaka ataondrô io. Irô man̈ampy anao io koa mira ‘man̈ôsotro menaka anao, amin’ny an̈aran’i Jehovah.’ (Jak. 5:14-16) Fahamarin̈ana amy Volan̈a Zan̈ahary ao “menaka” io. Irô anti-pan̈ahy aby io mahay mampiasa tsarabe Baiboly, ke irô hahavita hankahery anao ndreky han̈ampy anao ho tsara fifandraisan̈a amy Jehovah ndraiky. (Isaia 57:18) Torohevitry baka amy Baiboly amezandrô, hahavy anao hahaiho tapa-kevitry han̈ano ny tsara. Irô han̈ampy anao haharen̈y Jehovah mivolan̈a aminao: “Ty lalan̈a ke areha.”​—Isaia 30:21.

14. Eraka Galatianina 6:1, akôry ataon’ny anti-pan̈ahy man̈ampy zay olo ‘niala lalan̈a’? (Zahava koa sary.)

¹⁴ Vakia Galatianina 6:1. Kristianin̈y araiky koa “miala lalan̈a”, izy tsy man̈araka fitsipikin’i Jehovah. Mety nan̈ano fanapahan-kevitry ratsy izy, na nan̈ano fahotan̈a maventy. Irô anti-pan̈ahy aby io tia rahalahindrô, ke irô “hifen̈y han̈itsy izy amy fahalimian-toetry.” Volan̈a griky nadika “man̈itsy” io koa mety ivolan̈ana dokotera araiky man̈itsy taolan̈an’olo nipitsoko, baka izio janga. Dokotera araiky mahay, mitandrin̈y tsara baka tsy hanôsoko tehokon’olo, koa fa man̈itsy taolan̈a. Tsara fan̈ahy koa anti-pan̈ahy aby io koa fa man̈itsy olo araiky niala lalan̈a, ke irô mitandrin̈y tsy hanôsoko alahelonany. Baiboly koa man̈iraka irô ‘hitandrin̈y tsara fo.’ Ke irô koa fa man̈ampy atsika han̈itsy lalan̈antsika, tsy adin̈andrô fa irô koa mba mahay diso. Ke irô tsy hihevitry irô ho ten̈a olo marin̈y mandilatra olo ampiandrô io, fa mifen̈y hanetry ten̈a ndreky hahinakinaka olo.​—1 Pet. 3:8.

15. Mety ino raha tiantsika hatao izikoa atsika fa misy problemo?

¹⁵ Atsika matoky anti-pan̈ahintsika aby io. Irô efa nampianarin̈y tsy han̈aboely sekiren’olo, han̈amia torohevitry baka amy Baiboly fa tsy hevitrindrô manokan̈a, aviô tsy ho rivan̈a han̈ampy atsika amy problemontsika. (Ohab. 11:13; Gal. 6:2) Toetrindrô tsy mira, aviô sasany efa anti-pan̈ahy efa ela, fa sasany vo tsy ela. Fa mety fo zay atôn̈inao amindrô io. Fa izy ndraiky edy tsy pare izikoa anao mitety anti-pan̈ahy jiaby mitady torohevitry tiatian’ny sofin̈inao fo. Izikoa atsika man̈ano zen̈y, atsika manjary tsy han̈araka ‘fampianaran̈a mahatsara’ amy Volan̈a Zan̈ahary, fa hitandren̈y ‘raha tiatian’ny sofin̈intsika’ fo. (2 Tim. 4:3) Atsika koa mikoran̈a amin’ny anti-pan̈ahy araiky problemontsika izy mety han̈ontany, asa atsika efa nikoran̈a tamin’ny anti-pan̈ahy hafa momba izio, ndreky ino torohevitry efa namezandrô atsika. Izy manetry ten̈a, ke izy mety hangataka torohevitry amin’ny anti-pan̈ahy hafa.​—Ohab. 13:10.

ANDRAIKITRINTSIKA TSIARAIKIARAIKY

16. Ino andraikitrintsika?

¹⁶ Anti-pan̈ahy aby io ndray mikarakara atsika, irô tsy manapa-kevitry amy plasintsika. Andraikitrintsika man̈aboaka amy Jehovah fa atsika tia izy ndreky tihamparavoravo izy, amy raha volan̈intsika ndreky ataontsika isan’andra. Izy man̈ampy atsika ke ho vitantsika fo tsy hivadiky aminany. (Rom. 14:12) Ke anti-pan̈ahy aby io tsy manapa-kevitry amy plasintsika fa mampiasa Baiboly han̈ampian̈a atsika hahay ino hevitrin’i Jehovah. Izikoa atsika man̈araka torohevitry baka amy Baiboly amezandrô, ho vitantsika hampiofan̈a ‘sain̈intsika’ han̈ano fanapahan-kevitry tsara.​—Heb. 5:14.

17. Tôkony ho tapa-kevitry han̈ino atsika?

¹⁷ Man̈ano mersy Jehovah atsika an̈isan’ny ôndrikôndrikinany! Jehovah nandefa “tsiman̈aja faran’ny tsara”, i Jesosy, nan̈efa vidim-pan̈avotan̈a baka atsika hahazo fiain̈ana tsisy farany. (Jaona 10:11) Aviô Jehovah mampiasa anti-pan̈ahy aby io han̈atantirahany raha nivolan̈iny ty: “Zaho han̈amia anarô tsiman̈aja sitrakan’ny fônaka, ke anarô hivokisandrô fahaizan̈a ndreky fahaizan̈a mandiniky.” (Jer. 3:15) Ke izikoa atsika marary ara-pan̈ahy na malemy ara-pan̈ahy, atsika tsy tôkony hisalasala hikaiky anti-pan̈ahy han̈ampy atsika. Ho hitantsika edy fa Jehovah ten̈a mampiasa tsarabe irô io han̈ampian̈a atsika.