Sarombà Malaky zay Olo Tihahay Zan̈ahary

1. Izikoa atsika fa mitory amin’olo, karakôry aby mety fandraisandrô izio? (Asan’ny Apostoly 13:47, 48; 16:14, 15)

TAMY taonjato voanalohany, naro olo nan̈eky fahamarin̈ana, niaraka irô naharen̈y izio. (Vakia Asan’ny Apostoly 13:47, 48; 16:14, 15.) Mira zen̈y koa iziôty. Maro olo ravoravo, koa fa maharen̈y vaovao tsara io voanalohany. Ndray olo tsy tia nitandren̈y tamy voanalohany, afara izy mbala lôso tia fo. Ke ino raha tôkony hataontsika, izikoa atsika tôjy olo manan̈a “toe-tsain̈y tsara” lera atsika mitory?

2. Nan̈ino asa ataontsika io mety ampiran̈iny amin’ny asa ataon’olo araiky mambôly amy vilo?

² Asa fitorian̈a ataontsika io mira asan’olo araiky mambôly amy vilo in̈y fo. Izikoa izy mahita vodin’ny kakazo araiky misy voankazo masaka, izin̈y efa alainy edy. Fa lan̈iany kakazo misy voankazo mbala tsy masaka ndraiky, mbala rozeny ndreky karakarainy fo. Karaha zen̈y koa atsika. Izikoa atsika mahita olo tia mitandren̈y atsika, efa tiantsika edy han̈ampy izy hanjary mpianatran’i Kristy, farany malaky. Fa an̈atin’izen̈y koa izikoa atsika mahita olo mbala tsy vôn̈ono hianatra Baiboly, atsika mifen̈y fo man̈aboaka aminany ino hatsaran̈a ho azony, izikoa izy mahay Zan̈ahary. (Jaona 4:35, 36) Fahaizan̈a mandiniky han̈ampy atsika hahay ino fomba ten̈a tsara han̈ampian̈a olo mitandren̈y atsika. Ke atsika iziô hizaha ino raha mety hataontsika, izikoa misy olo vôn̈ono hitandren̈y lera atsika mitory voanalohany in̈y. Hidinihintsika koa akôry han̈ampiantsika olo karaha zen̈y, baka izy handroso fo.

IZIKOA FA MISY OLO VÔN̈ONO HITANDREN̈Y

3. Ino raha tôkony hataontsika izikoa atsika mitory in̈y ke tôjy olo mitandren̈y? (1 Korintianina 9:26)

³ Atsika koa mitory ke tôjy olo mitandren̈y, tiantsika hampianatra izy raha momba Jehovah ndreky hifandray aminany. Ke atsika tôkony direkty mitaon̈o izy hianatra Baiboly ndreky hivory, nata mbala amy voanalohany atsika mitory aminany.​—Vakia 1 Korintianina 9:26.

4. Koràn̈a tantaran’olo araiky efa direkty vôn̈ono nianatra Baiboly.

⁴ Mitaon̈o olo hianatra. Misy olo sasany mbala vo sambany ikoran̈antsika efa man̈eky hianatra Baiboly edy. Karaha zen̈y man̈angy araiky ta Kanada tan̈y. Kamisy andra tamin’io, izy nan̈aton̈o fampirantian̈a, aviô nangala bokikely Mankafiza Fiain̈ana Tsisy Farany! in̈y. Ranabavy tamy fampirantian̈a io nivolan̈a taminany fa tsy man̈efa mianatra Baiboly amizio. Man̈angy io lian̈a ke irô nifan̈amia nimeron’ny telefony. Mbala tamin’ny andran’izin̈y fo, man̈angy io efa nandefa mesazy tamy ranabavy io momba fianaran̈a Baiboly io. Fa ranabavy io nivolan̈a taminany fa amy faran’ny herin̈iandra izy vo afaka. Fa man̈angy io nivolan̈a: “Akôry amaray? Zaho efa libra.” Ke joma fo man̈angy io efa nampianarin’ny ranabavy io Baiboly edy. Aviô dimansin’izio izy efa nivory edy, aviô izy mbala tsy vôly man̈ano fandrosoan̈a malaky.

5. Akôry han̈anaovantsika raha hahavy olo tihianatra Baiboly? (Zahava koa sary.)

⁵ Fa tsy olo jiaby tia mitandren̈y atsika malaky mianatra Baiboly karaha man̈angy tiô in̈y. Sasany mety elaela vo man̈eky hianatra. Ke amy voanalohany atsika mikoran̈a in̈y, atsika mila mikoran̈a foto-kevitry ten̈a tian’olo. Ke izikoa atsika man̈anten̈a fa olo io mbala hiova, aviô atsika mitady fomba han̈ampian̈a izy fo, mety tsy ela izy efa tihianatra Baiboly edy. Fa ino ma raha volan̈intsika, atsika koa fa mitaon̈o olo hianatra? Alô hizahavantsika soso-kevitrindrô rahalahy ndreky ranabavy efa nahita vokatra tamy fanombohan̈a fampianaran̈a Baiboly.

6. Ino raha mety volan̈intsika, baka olo io hahita fa ten̈a mahatsara izy mianatra Baiboly?

⁶ Mpitory ndreky mpisava lalan̈a nan̈ontanian̈a nivolan̈a fa amy tany sasany, misy raha tsy tôkony hikoran̈iny izikoa fa mitaon̈o olo hianatra Baiboly. Ohatra “hianatra”, na “fianaran̈a Baiboly,” na koa “zaho hampianatra anao.” Fa irô nivolan̈a fa tsara izikoa atsika mivolan̈a “dinidiniky”, na “korokoran̈a hahaizan̈a Baiboly”, na koa “hizaha karakôry hahaizan̈a tsarabe raha momba Baiboly.” Izikoa tiantsika olo io hikoran̈a amintsika ndraiky amin’ny afara, karaha ty raha mety volan̈intsika: “Ten̈a mahalany fan̈ahy fa Baiboly io mamaly fan̈ontanian̈a maro maventy!”, na “Baiboly io tsy raha boky momba fivavahan̈a fo fa mikoran̈a raha ilaintsika amy fiain̈ana koa.” Aviô anao mety mivolan̈a koa: “Tsy ela atsika mikoran̈a raha momba Baiboly io. An̈atin’ny 10 na 15 minity efa hahaizanao raha araiky maventy edy.” Anao man̈ano zen̈y, tsy mila mampiasa volan̈a karaha ataony “isaka ino anao malalaka” na “isaka herin̈iandra zahay avy”, fôtony izy karaha mahatsiaro manan̈a adidy izikoa atao zen̈y.

7. Taia voanalohan’ny nahaizan’olo sasany fahamarin̈ana baka amy Baiboly? (1 Korintianina 14:23-25)

⁷ Tahoma mivory irô. Tamy faha apostoly Paoly, tamy fivorian̈a tan̈y voanalohan’ny narin̈esan’olo sasany fahamarin̈ana. (Vakia 1 Korintianina 14:23-25.) Karaha zen̈y koa raha matetiky misy amin’ny andra ziôty. Maro amindrô olo vaovao aby io malaky mandroso, fôtony irô nan̈aton̈o fivorian̈antsika. Ke lera karakôry hikahiantsika irô hivory? Marin̈y ndraiky fa amy leson faha-10 amy boky Mankafiza Fiain̈ana Tsisy Farany! vo mandrisiky atsika man̈ano zen̈y. Fa aza miambin̈y lera fa avy amy fianaran̈a io zay vo hikaiky olo handeha hivory. Mbala voanalohany anao mikoran̈a aminany in̈y, anao tôkony efa hikaiky izy han̈aton̈o fivorian̈a. Mety koran̈inao aminany titran’ny kabaro na hevitry araiky amy Fianaran̈a Tilikambo Fiambesan̈a hianaran̈a amy faran’ny herin̈iandra io.

8. Ino raha mety koran̈intsika amin’olo izikoa atsika fa mitaon̈o izy handeha hivory? (Isaia 54:13)

⁸ Izikoa anao mikaiky olo hivory, hazavà aminany fa fivorian̈antsika io tsy mitovy amy fivavahan̈a mahazatra irô. Karaha ataon’ny man̈angy araiky zay, lera izy nivory voanalohany, koa fa navy tamy fianaran̈a Tilikambo Fiambesan̈a, izy nan̈ontany olo mampianatra izy io karaha ty: “Olo mampianatra aloha arỳ io mahay an̈aran’olo tsiaraikiaraiky ato?” Ranabavy io nan̈azava fa atsika jiaby ao samy mifen̈y mahay an̈aran’olo fiangonan̈a araiky amintsika, karaha ataontsika mila mahay an̈aran’ny havantsika in̈y. Hitan’ny man̈angy io baka tiô fa tsy mira amy fivavahan̈andrô an̈y kaiky amintsika ao. Vaovao amin’olo maro koa tanjon̈on’ny fivorian̈antsika io. (Vakia Isaia 54:13.) Diantsika an̈y manompo Jehovah, mianatra momba izy, aviô mifampahery. (Heb. 2:12; 10:24, 25) Ke fivorian̈antsika milamin̈y ndreky mikoran̈a raha ten̈a ilaintsika, fa tsy feno fombafomba. (1 Kor. 14:40) Tsotra fo koa Tran̈o Fivorian̈antsika, fôtony handeha hianatra diantsika an̈y. Aviô atsika koa tsy mikoran̈a raha momba politiky an̈atin’ny fivorian̈a ao fôtony atsika tsy man̈ano politiky. Aviô atsika koa tsy man̈ano lagrevo na miditry amy malo zen̈y. Mety aboakantsika mpianatra io koa video Ino ma Raha Atao amy Tran̈o Fivorian̈a An̈y? lera atsika mitaon̈o izy hivory. Karaha in̈y efa haihainy ino raha ho hitany an̈y.

9-10. Ino raha mety koran̈intsika amin’olo baka izy tsy havozo handeha hivory? (Zahava koa sary.)

⁹ Olo sasany misalasala hivory, fôtony irô mavozo tsao tahômintsika hifindra amintsika. Ke ameza toky irô fa atsika an̈y mahay mandray vahiny, ndreky tsy miforse olo hifindra amintsika, aviô tsy miforse olo hanangan-tan̈ana koa. Mety avy olo tran̈o araiky, firaka amy tsaiky madiniky. Amy fivorian̈antsika io tsisy fampianaran̈a efa natokan̈a niny tsaiky fo zen̈y, fa raimandreny ndreky zanaka miaraka mipetraka, aviô samy mitandren̈y. Antony nan̈anovan̈a zen̈y, baka raimandreny afaka man̈aramaso zanakandrô ndreky maharen̈y raha ampianarin̈y irô. (Deot. 31:12) Tsisy tanty rakitry an̈y, aviô tsisy anvelopy ampandalôvin̈y zen̈y. Fa atsika man̈araka volan̈an’i Jesosy ty: ‘Anarô nahazo maimaim-poan̈a, ke man̈ameza maimaim-poan̈a.’ (Mat. 10:8) Mety volan̈inao amin’olo io koa fa tsy mila lamba lafo be zay vo mandeha mivory. Zan̈ahary mizaha raha an̈aty fôn’olo fa tsy mizaha sanjin’olo.​—1 Sam. 16:7.

¹⁰ Izikoa olo io avy mivory, ataova raha hahatsapany fa izy raisin̈y tsara. Indesa mikoran̈a amin’ny anti-pan̈ahy sasany ndreky amy rahalahy ndreky ranabavy sasany izy. Izikoa izy nahatsapa fa niraisin̈y tsara, izy tsy maintsy mbala ho avy ndraiky koa amy man̈araka. Izikoa fa mandeha fivorian̈a, ampizahava Baibolinao izy, koa izy tsisy Baiboly. Aviô hazavà aminany kabaro mandeha iô ndreky fianaran̈a ataontsika miaraka an̈y.

IZIKOA FA MANOMBOKO FAMPIANARAN̈A BAIBOLY

11. Akôry an̈aboahanao fa anao man̈aja fotoan̈a namezan’ny tômpin-tran̈o anao?

¹¹ Ino raha tsy mila hadin̈antsika izikoa atsika fa manomboko fampianaran̈a Baiboly? Hajà fotoan̈a namezan’ny tômpin-tran̈o anao. Ohatra, izikoa anarô nan̈ano randevò, mavia amy lera fo, nata olo amy tany misy anarô an̈y tsy zatra man̈aja lera. Fan̈ampin’izen̈y koa, tsara izikoa ataonao fôhiky fo antsendriky fianaran̈anarô amy voanalohany. Irô mpitory efa zaha-draraha aby io man̈amia soso-kevitry fa tsara man̈ano karaha zen̈y, nata izy mbala tihanohy. Aviô aza be koran̈a. Ambilà tômpin-tran̈o io hikoran̈a.​—Ohab. 10:19.

12. Ino raha tôkony hataontsika tanjon̈o rango amy voanalohan’ny atsika mitariky fampianaran̈a Baiboly?

¹² Rango amy voanalohany, tanjon̈onao tôkony han̈ampy olo mitandren̈y anao hahay Jehovah ndreky Jesosy, aviô ho tia irô. Baka havitanao zen̈y, sarita amy Volan̈a Zan̈ahary sain̈in’olo fa tsy aminao ndreky amy fahaizanao Baiboly. (Asa. 10:25, 26) Matetiky apostoly Paoly koa fa nampianatra, izy nisariky sain̈in’olo tamy Jesosy Kristy fôtony izy nirahin’i Jehovah han̈ampy atsika hahay ndreky ho tia Jehovah. (1 Kor. 2:1, 2) Naboakan’i Paoly tsarabe koa fa ten̈a raha maventy mifen̈y han̈ampy irô mpianatra aby io hanan̈a toetry tsara karaha volamena, volafotsy ndreky vatosoa maro valera. (1 Kor. 3:11-15) An̈isan’ny toetry aby zen̈y finoan̈a, fahendrena, fahaizan̈a mandiniky ndreky fahavozoan̈a Jehovah. (Sal. 19:9, 10; Ohab. 3:13-15; 1 Pet. 1:7) Aleva tahaka fomba fampianaran’i Paoly, ke ampia olo ampianarinao, baka izy ho fatatra finoan̈a sady hifandray marikitry amy Babany ten̈a tia izy an-dan̈itry an̈y.​—2 Kor. 1:24.

13. Akôry an̈aboahantsika fa atsika manan̈a faharetan̈a ndreky mahay mandanjalanja? (2 Korintianina 10:4, 5) (Zahava koa sary.)

¹³ Aleva tahaka fomba fampianaran’i Jesosy ke manàn̈a faharetan̈a ndreky mahaiza mandanjalanja. Aza man̈ontany raha tsy mampahazo ain̈y olo. Izikoa ilain̈a, tohiza fo fianaran̈a nata mbala misy raha tsy mazava aminany, fa anarô mbala mety mimpody amizio afara an̈y. Aza miforse izy han̈eky raha tsy iken’ny sain̈inany, fa ambilà mandeha fo fotoan̈a, baka hilentiky an̈aty fônany fahamarin̈ana io. (Jaona 16:12; Kol. 2:6, 7) Ampiran̈in’ny Baiboly amy fandronganan̈a raha araiky efa miôrin̈y mare, fan̈adosoan̈a olo hiala amy fampianaran̈a diso. (Vakia 2 Korintianina 10:4, 5) Mila ampianarintsika hatoky Jehovah antsendriky olo io, amy zen̈y ho moramora aminany hiala amy fampianaran̈a efa mahazatra izy ndreky tiany mare io.​—Sal. 91:9.

IZIKOA MISY OLO VAOVAO AVY MIVORY

14. Karakôry tôkony handraisantsika olo vo sambany avy mivory?

¹⁴ Tian’i Jehovah atsika tsy han̈avaka olo, na ino fombanany, toeran̈anany amy fiaraha-monin̈y ndreky karazan̈anany. (Jak. 2:1-4, 9) Ke akôry an̈aboahantsika amin’olo vo avy mivory io fa izy tiantsika?

15-16. Akôry mety han̈ampiantsika irô olo vaovao hahatsiaro niraisin̈y tsara?

¹⁵ Olo sasany avy mivory, fôtony tihizaha akôry ataontsika mivory. Na koa misy olo baka antany hafa nan̈iraka izy handeha hivory. Izikoa anao mahita olo karaha zen̈y, ataon̈a izy. Aza atao raha mampavozo izy fa raisa tsara izy. Tahoma hiaraka mipetraka aminao izy. An̈aboaha Baiboly ndreky fitaovan̈a fianarantsika izy, na ameza araiky izy. Diniha koa ino raha mety hataonao, baka izy hahazo ain̈y tsara. Nisy lelahy araiky nivolan̈a tamy rahalahy araiky nandray izy fa, niasaloha izy navy tamy Tran̈o Fivorian̈a, fôtony lambanany tsy pare. Nataon’ny rahalahy io raha nampahazo ain̈y izy, ke nazavainy tamin’olo io fa Vavolombelon̈on’i Jehovah karaha olo jiaby fo. Lelahy io nandroso firaka tamy batisa, aviô tsy adin̈any volan̈an’ny rahalahy in̈y taminany. Fa tandrema anao koa mikoran̈a amin’olo vo sambany nivory, lera aloha na afaran’ny fivorian̈a, tsao miditry amy fiain̈ananany manokan̈a.​—1 Pet. 4:15.

¹⁶ Misy raha hafa koa tôkony hataontsika baka olo vo sambany nivory io hahatsapa fa niraisin̈y tsara. Ohatra, mila mitandrin̈y atsika izikoa fa mikoran̈a momba olo tsy Vavolombelon̈on’i Jehovah na raha inoandrô lera atsika mikoran̈a, na mamaly teny, na man̈ano anjara amy fivorian̈a. Aza man̈ano raha hampameloko irô na raha hahavy irô hahatsapa karaha voatihitihy. (Tit. 2:8; 3:2) Ohatra, atsika tsy tôkony hivolan̈a finoan̈andrô tsy am-pan̈ajan̈a. (2 Kor. 6:3) Irô rahalahy man̈ano kabaro koa ten̈a mila mitandrin̈y amy raha zen̈y. Tôkony tsy hadin̈andrô fa misy olo tsy Vavolombelon̈o ao, lera irô man̈azava hevitry na volan̈a tsy mahazatra olo.

17. Ino tanjon̈ontsika izikoa atsika tôjy olo ‘manan̈a toe-tsain̈y tsara’ lera mitory?

¹⁷ Mahaimeky fo asa fampianaran̈a ataontsika io arakaraka andihanan’ny andra, aviô atsika tsy vôly hitady olo manan̈a “toe-tsain̈y tsara hazahoan̈a fiainan̈a mandrakizay.” (Asa. 13:48) Lera atsika man̈ano zen̈y, atsika tsy tôkony hisalasala hitaon̈o irô hianatra Baiboly ndreky hikaiky irô han̈aton̈o fivorian̈a. Fan̈anaovantsika zen̈y, han̈ampy irô hikômansy han̈araka “lalan̈a mandeha amy fiain̈ana.”​—Mat. 7:14.