Tokony Han̈ano Politiky ma Fivavahan̈a?

Maro olo miaboko ho pan̈aradia Jesosy Kristy kanefa iro miditry laliny amy politiky, erantany. Sasany ndraiky mampiasa raha inoany fivavahan̈andro ndreky fitsipikindro hanohanan̈a kandidà na antoko politiky aby io. Ke matetiky ny raha misy, iro pan̈ano politiky aby io koa tihandresy, iro mandrisiky fivavahan̈a han̈araka fitsipikindro momba fitondranten̈a ndreky raha misy amy fiarahamonin̈y. Misy aby olo pitariky fivavahan̈a manan̈a plasy politiky. Amy tany sasany koa, iro fivavahan̈a miaboko ho Kristianin̈y aby io iken̈a hanjary fivavahampanjakan̈a.

Akory hevitrinao? Olo pan̈aradia Jesosy ma tokony han̈ano politiky? Ho hitanao baka amy raha nataony Jesosy valinizen̈y. Ho izy: “Modely izy namiako anaro in̈y, baka han̈anaovanaro karaha nataoko taminaro in̈y koa.” (Jaona 13:15) Ino ma modely namezany Jesosy amy resaka politiky?

Jesosy ma nan̈ano politiky?

Aha. Jesosy tsy nan̈ano politiky foeky.

Jesosy tsy nitady fahifan̈a tamy fitondrasan̈a arapolitiky. Satana koa fa nampan̈anten̈a fa han̈amia Jesosy ‘fanjakan̈a jiaby ambony tany’, Jesosy tsy nety hatao pitondra amy fitondrasan̈anolombelon̈o. (Matio 4:8-10)a Tandraraiky, tseky hitirendro han̈ano politiky Jesosy, fotony hitandro izy olo ten̈a tsara toetry. Karaha ty koran̈iny Baiboly: “Koa fa hainy Jesosy fa iro efa ho avy hangala izy hitiren̈y hatao panjaka, izy niala tio, baka io izy zaraiky nimpody tamy bongo tan̈y.” (Jaona 6:15) Jesosy tsy nety nan̈ano sitraponolo aby io. Izy tsy nety nan̈ano politiky foeky.

Jesosy tsy nanohan̈a pan̈ano politiky aby io. Ohatra, nisy fotoan̈a iro Jiosy aby io neloko mare tamy fitondrasan̈aromanin̈y, fotony iro nitiren̈a han̈efa latety. Ten̈a tsy rariny fahitandro raha zen̈y. Ke iro koa fa nila hampiditry Jesosy taminy adihevitry io, Jesosy tsy niditry tamy malondro pan̈ano politiky aby io. Izy tsy nan̈azava rariny sa tsy rariny raha nataony fitondrasan̈a io. Ho izy tamindro: “Ifà amy Kaisara lan̈iany raha niny Kaisara, fa amy Zan̈ahary lan̈iany niny Zan̈ahary.” (Marka 12:13-17) Izy tsy nilan̈y taminy antoko politiky nisy tamy zen̈y foeky, fa nambarany iro mazava fa iro mila man̈efa latety takiny manampahifan̈a sivily ta Roma. Hita baka tamy volan̈anany io koa fa misy erany fo fan̈arahan̈a volan̈any fanjakan̈a. Ke tsy tokony hamian̈a fanjakan̈a raha tokony hamian̈a Zan̈ahary, an̈atinizen̈y fanompoan̈a Zan̈ahary.—Matio 4:10; 22:37, 38.

Jesosy nanohan̈a Fanjakan̈any Zan̈ahary andan̈itry an̈y ndreky nampianatra olo raha momba izio. (Lioka 4:43) Jesosy tsy nan̈ano politiky foeky, fotony hainy fa tsy fanjakan̈anolombelon̈o han̈atanteraka fikasan̈any Zan̈ahary amy tany ty, fa Fanjakan̈any Zan̈ahary. (Matio 6:10) Hainy Jesosy koa fa tsy miaraka miasa Fanjakan̈any Zan̈ahary ndreky fanjakan̈anolombelon̈o, avio Fanjakan̈any Zan̈ahary hisolo izio.—Daniela 2:44.

Asa mba nan̈ano politiky iro Kristianin̈y tamy taonjato voanalohany?

Ehe. Iro pan̈aradia Jesosy aby io nan̈araka volan̈any Jesosy “tsy an̈isany donia ty.” (Jaona 15:19) Iro nan̈araka modely namiany ke tsy nibidabida raha momba politikiny donia ty foeky. (Jaona 17:16; 18:36) Iro tsy niditry tamy raha momba politiky, fa iro nan̈ano asa nan̈irahany Jesosy iro, nitory ndreky nampianatra olo raha momba Fanjakan̈any Zan̈ahary.—Matio 28:18-20; Asan’ny Apostoly 10:42.

Fan̈arahan̈a volan̈any Zan̈ahary raha ten̈a maventy tamindro Kristianin̈y tamy taonjato voanalohany. Fa ndray zen̈y, iro ndraiky nan̈aja manampahifan̈a. (Asan’ny Apostoly 5:29; 1 Petera 2:13, 17) Iro nan̈araka lalàn̈a ndreky nan̈efa latety. (Romanina 13:1, 7) Iro nata tsy nan̈ano politiky, iro nampiasa lalàn̈any fanjakan̈a niarovan̈a vahoaka ndreky nahazo hatsaran̈a baka taminy asa nataony fanjakan̈a.—Asan’ny Apostoly 25:10, 11; Filipianina 1:7.

Kristianin̈y voanalohany ndreky politiky: Ino raha nivolan̈iny manampahifan̈a aby io?

“Kristianin̈y tsy nety nan̈ano raha sasany nampan̈anovin̈y iro olompirenena romanin̈y aby io. ... Iro tsy mety namian̈a plasy politiky.”—Amy Lalan̈a Mandeha amy Fandrosoan̈a, pazy 238.
“Tsiary ndraiky nisy porofo ivolan̈ana fa Jesosy tia nan̈ano politiky ndreky nan̈ano maramila zen̈y. Tsisy ny hafa amy zen̈y koa iro pianatranany aby io.”—Jesosy Ndreky Jodaisma, pazy 231.
“Tamindro Kristianin̈y aby io, fivavahan̈a tsy nampiarasin̈y tamy politiky foeky. Fivavahan̈a raha ten̈a maventy tamindro fa tsy politiky.”—Kaisara Ndreky Kristy, pazy 647.
“Tiany apostoly Paoly nampiasa zompirenena romanin̈y nanan̈any niarovany ain̈inany tamy fitsaran̈a, fa izy tsy nanohan̈a politiky ndreky tsy nitaon̈o olo han̈ano zen̈y. ... Iro ndray nino fa iro tsy maintsy nan̈aja manampahifan̈a, iro tsy nety niditry tamy politiky foeky.” Raha Ambadikiny Fan̈irian̈a Tsara—Fahitany Baiboly Resaka Politiky, pazy 122-123.
Maro Kristianin̈y nino fa iro tsy tokony hitana plasy politiky foeky. Vo tsy ela zay, tamy fanombohany taonjato fahatelo, Hippolyte nivolan̈a fa izikoa nisy olo araiky manampahifan̈a tihanjary Kristianin̈y, izy tsy maintsy niala tamy toeran̈anany io.”—Tantarany Kristianin̈y, Boky 1, pazy 253.

Kristianin̈y amy zioty tsy milan̈y amy politiky

Baiboly man̈ambara mazava fa samby tsy nan̈ano politiky na Jesosy na iro pan̈aradia izy taloha tan̈y. Baka amy zen̈y mahavy Vavolombelon̈o Jehovah erantany tsy mibidabida raha momba politiky foeky, karaha nataondro Kristianin̈y tamy taonjato voanalohany fo ataondro. Iro man̈ano asa nan̈irahany Jesosy, mitory ‘vaovao tsarany Fanjakan̈any Zan̈ahary.’—Matio 24:14.

a Jesosy tsy nan̈eky io tsy nivolan̈a fa Satana tsy manan̈a fahifan̈a amy donia ty, fotony tafaranizin̈y, Jesosy nivolan̈a fa Satana “pitondra donia ty.”—Jaona 14:30.