Mampitandrin̈y Momba Faviany Aramagedona iro Pan̈ano Politiky aby Io​—Ino Raha Koran̈iny Baiboly Momba Zen̈y?

Tamy 10 Oktobra 2022 maraindrain̈y, nisy bala afomanga na misilindro maramila russes aby io latsaka tamy tanàna maromaro ta Ukraine, fotony andra aroe talohanio iro maramila ta Ukraine nandatsaka baomby tamy pô mampitohy tanànany Crimée ndreky Russie. Ny raha nisy koa, andra vitsivitsy talohany raha nandalo io, nivolan̈a iro pan̈ano politiky aby io fa hatahoran̈a handravan̈a donia ty “Aramagedona.” Amindro, Aramagedona zen̈y ady nikleaira maventy sady mahavita mandravan̈a donia ty.

• Karaha ty nambarany Prezidan Joe Biden tamy 6 Oktobra 2022: “Taminy andrany [Prezidan amerikain John F.] Kennedy ndreky tamy krizy momba bala afomanga ta Cuba farany atsika nieritreritry momba Aramagedona zen̈y. […] Fahitako izy, atsika koa hampiasa fitaovan̈a nikleaira, atsika tsy maintsy ho avy aminy Aramagedona fo.”

• Ty raha nivolan̈iny Zelensky Prezidany Ukraine tamy BBC News, tamy 8 Oktobra 2022: “Zaho man̈eky fa Aramagedona izity! Hatahoran̈a ho potiky aby tany jiaby.”

Ten̈a hitariky aminy Aramagedona ankitin̈y ma fampiasan̈a fitaovan̈a findesin̈y miady nikleaira aby io? Ino raha koran̈iny Baiboly momba zen̈y?

Hitariky aminy Aramagedona ma fampiasan̈a iro fitaovan̈a findesin̈y miady nikleaira aby io?

Aha, tsy zen̈y. Indraiky fo volan̈a “Aramagedona” io hita amy Baiboly ao, aminy Apokalypsy 16:16. Izio tsy ady ataondro firenena aby amindro samby iro, fa ady handeha hataony Zan̈ahary amindro ‘panjaka jiaby ambony tany ty.’ (Apokalypsy 16:14) Aminy Aramagedona, Zan̈ahary han̈afoan̈a fitondrasan̈anolombelon̈o jiaby.​—Daniela 2:44.

Izikoa tianao ho hay han̈ano akory hiafarany tany ty, lera avy Aramagedona io, vakia lahatsoratra Inona no Atao hoe Ady Haramagedona?

Hisy ady nikleaira ma handravan̈a tany ty ndreky hamono olo jiaby?

Aha. Marin̈y ndraiky fa hampiasa fitaovan̈a findesin̈y miady nikleaira iro pitondra olombelon̈o aby io. Ndray zen̈y, tsy hambelany Zan̈ahary ho potiky foeky tany ty. Baiboly mivolan̈a:

• ‘Tany ty mahadin̈y mandrakizay.’​—Mpitoriteny 1:4.

• ‘Olo marin̈y handova tany, ke hipetraka iô mandrakizay.’​—Salamo 37:29.

Izikoa dinihin̈y faminanian̈any Baiboly ndreky vaovao misy amy zioty, hita fa mandalo fotoan̈a miavaka amy tantaranolombelon̈o atsika. (Matio 24:3-7; 2 Timoty 3:1-5) Izikoa tianao ho hay han̈ano akory marin̈y hiafarany donia ty ndreky olombelon̈o, mampirisiky anao zahay hiaraka hianatra Baiboly aminay. Tsy man̈efa mianatra izio.