Mbala Ten̈a Ilain̈a ma Fahamarin̈ana Zen̈y?

Hitanao mahaisarotro fo ma man̈avaka raha marin̈y ndreky raha diso? Olo amy iziôty efa tsy mandiniky ino raha marin̈y na ino raha ten̈a misy, fa fôndrô ndreky jerindrô tômpiny fo mitondra irô. Olo eran-tany mihevitry fa efa tsisy eky raha marin̈y zen̈y.

Efa tsy vaovao fomba fihevitry karaha zen̈y. Kadiriny 2 000 taon̈o lôso zay, Pontio Pilato Governera romanin̈y nan̈ontany Jesosy karaha ty: ‘Ino ma ny marin̈y?’ (Jaona 18:38) Marin̈y fa Pilato tsy niambin̈y hahazo valiny fan̈ontanian̈a zen̈y, kanefa ten̈a maventy fan̈ontanian̈anany io. Mety hahafa-pô anao valiny amezan’ny Baiboly, aviô izio mety han̈ampy anao hahay ino ny marin̈y ino ny diso.

Raha mba ten̈a misy ndraiky raha marin̈y zen̈y?

Ia misy tsarabe! Baiboly koa fa mampiasa volan̈a “fahamarin̈ana”, izio manondro raha ten̈a misy, raha misy porofo ndreky mifan̈araka amy raha tôkony ho izy. Baiboly mampianatra fa Zan̈ahary Jehovaha Loharanon’ny ten̈a fahamarin̈ana. Izy ao kahian̈a ‘Zan̈aharin’ny fahamarin̈ana.’ (Salamo 31:5) Amy Baiboly ao misy fahamarin̈ana baka amy Zan̈ahary. Fahamarin̈ana io ampiran̈iny amin’ny hazavan̈a, fôtony izio mahavita man̈ambara atsika raha tôkony hataontsika amy donia efa tsy ahaizan̈a ny marin̈y ty.​—Salamo 43:3; Jaona 17:17.

Akôry ataonao hahita ny marin̈y?

Tsy tian’ny Zan̈ahary izikoa atsika tsy mandiniky fa man̈ekin̈eky fahatany fahamarin̈ana an̈atin’ny Baiboly. Tiany izikoa atsika mampiasa jerintsika ke mandiniky raha an̈atin’izio ao tsarabe, fa tsy raha indesin’ny fô fo. (Romanina 12:1) Atsika tiany hahay izy ndreky ho tia izy amy ‘jerintsika jiaby’, aviô tiany atsika ho resy lahatra fa marin̈y raha ianarantsika amy Baiboly.​—Matio 22:37, 38; Asan’ny Apostoly 17:11.

Baka aia ma navian’ny vandy?

Baiboly mivolan̈a fa baka amy fahavalon’ny Zan̈ahary araiky kahian̈a Satana Devoly navian’ny vandy. “Baban’ny vandy” ikahian̈a izy. (Jaona 8:44) Izy navandy momba Zan̈ahary tamin’olombelon̈o voanalohany. (Genesisy 3:1-6, 13, 17-19; 5:5) Nanomboko tamy zen̈y, Satana tsy vôly man̈aparitaka vandy ndreky manitriky raha ten̈a marin̈y momba Zan̈ahary.​—Apokalypsy 12:9.

Nan̈ino ma mahaimaro fo olo mavandy amy iziôty?

“Andra farany” ikahian’ny Baiboly andra misy atsika iziôty. Ke amy iziôty, mahaimaro fo olo voafitakan’i Satana. Olo efa zatra mavandy han̈araraotan̈a olo na hamitahan̈a olo. (2 Timoty 3:1, 13) Maro koa fivavahan̈a mavandy. Baiboly efa nan̈ambara tsialohaloha fa olo ‘hifidy mpampianatra metimety amindrô, amy zen̈y raha tian’ny sofin̈indrô fo ho ren̈indrô’, aviô irô hifidy ‘tsy hitandren̈y fahamarin̈ana eky.’​—2 Timoty 4:3, 4.

Nan̈ino ma fahamarin̈ana io ten̈a ilain̈a?

Baka amy fahamarin̈ana mahavy olo mifampatoky. Izikoa olo tsy mifampatoky, ravan̈a fihavan̈ana. Baiboly mivolan̈a fa tian’ny Zan̈ahary izikoa fanompoantsika izy miôrin̈y amy fahamarin̈ana. Karaha ty ho izy ao: “Zay olo mivavaka aminany [Zan̈ahary] tsy maintsy mivavaka mifan̈araka amy fan̈ahy ndreky fahamarin̈ana.” (Jaona 4:24) Izikoa anao tihahay amy karakôry fahamarin̈ana koran̈in’ny Baiboly afaka man̈ampy anao hahita vandy ampianarin’ny fivavahan̈a ndreky ho afaka amy zen̈y, vakia lahatsoratra mifampitohy “Ino aby ma Vandy Volan̈inolo Momba Zan̈ahary?”

Nan̈ino ma zaho tian’ny Zan̈ahary hahay ny marin̈y?

Anao tian’ny Zan̈ahary ho avotro, ke anao mila mianatra ny marin̈y momba izy amy zen̈y anao ho avotro. (1 Timoty 2:4) Hifandray marikitry aminany anao izikoa mianatra fitsipikinany momba ny tsara ndreky ratsy aviô man̈araka raha aby zen̈y amy fiain̈ananao. (Salamo 15:1, 2) Nalefan’ny Zan̈ahary tambony tany tatỳ Jesosy baka han̈ampy olo hahay ny marin̈y. Tian’ny Zan̈ahary atsika hitandren̈y raha nampianarin’i Jesosy.​—Matio 17:5; Jaona 18:37.

Mbala hifoan̈an’ny Zan̈ahary ma vandy jiaby?

Ia. Halan’ny Zan̈ahary olo man̈araraotro naman̈a sady mavandy. Izy nampan̈anten̈a fa hadosony ambony tany eto lan̈iany olo tsy vôly mavandy. (Salamo 5:6) Amy fotoan̈a zen̈y, hitantirahiny fampan̈antinan̈anany ty: ‘Vavan’olo mivolan̈a ny marin̈y fo haharitry mandrakizay.’​—Ohabolana 12:19.