Aia Misy Fitondrasan̈a Miôrin̈y Tsara ke Ten̈a Mahavita Mitondra Tanintsika? Ino Raha Koran̈in’ny Baiboly Momba Zen̈y?

Mikorontan̈a mare fitondrasan̈a eran-tany. Ndray fitondrasan̈a amy firenena tazanin̈y karaha milamin̈y mbala mikorontan̈a fo, fôtony arin̈esan̈a mpitondra man̈ano raha mangala baraka, mifankarikitry mare koa isan’ny vato azon’ny lay lany ndreky lay tsy lany, tsy mitovy hevitry irô antokon-pôlitiky aby io, aviô man̈ano grevo maresaka koa vahoaka.

Baiboly mivolan̈a fa misy fitondrasan̈a araiky miôrin̈y tsara. Anao mety efa naharen̈y momba fitondrasan̈a araiky zen̈y. Izio araiky nikoran̈in’i Jesosy tamy vavaka nampianariny in̈y.

• “Karaha ty ataova koa fa mivavaka: ‘Babanay an-dan̈itry an̈y, irarian̈a an̈aran̈anao ho masin̈y! Irarian̈a Fanjakan̈anao ho avy! Irarian̈a koa sitrapônao hatao ambony tany eto, karaha an-dan̈itry an̈y!’ ”​—Matio 6:9, 10.

Ino raha koran̈in’ny Baiboly momba Fanjakan̈a io?

Fanjakan̈an’ny Zan̈ahary fitondrasan̈a miôrin̈y tsarabe

Baka an-dan̈itry an̈y Fanjakan̈a io mitondra.

• “Fanjakan̈an’ny lan̈itry” nikahian’i Jesosy fitondrasan̈a io. (Matio 4:17; 5:3, 10, 19, 20) Zen̈y nahavy izy nivolan̈a karaha ty: “Fanjakan̈anaka tsy an̈isan’ny donia ty.”​—Jaona 18:36.

Fanjakan̈a io hisolo fitondrasan̈an’olombelon̈o jiaby.

• Ho Baiboly: “Fanjakan̈a io ... hanôrotôro ndreky han̈afoan̈a fanjakan̈a [nin’olombelon̈o] jiaby, ke izio zaraiky fo ho tavela mandrakizay.”​—Daniela 2:44.

Jesosy Kristy Mpanjakan’izio, ke Fanjakan̈a io tsy ho ravan̈a foeky.

• Karaha ty volan̈in’ny Baiboly: “Fitondrasan̈anany io tsy handalo fo fa hahadin̈y mandrakizay, aviô fanjakan̈anany io koa tsy ho rongana foeky.”​—Daniela 7:13, 14.

Fanjakan̈a io hampilamin̈y tany ty ke hanjary tsisy raha hampavozo eky eto.

• Baiboly mivolan̈a: “Olo jiaby samby hipetraka milamin̈y ambanin’ny rezaindrô ndreky aviavindrô, aviô tsisy raha hampavozo irô.”​—Mika 4:4, Fandikan-tenin’ny Vaovao Tsara, angiley.

Ianara raha momba Fanjakan̈a io

Tamy Jesosy tambonin’ny tany teto, ankamarozan’ny fotoan̈anany nampiasainy ‘nitorian̈a vaovao tsara momba Fanjakan̈an’ny Zan̈ahary.’ (Matio 9:35) Karaha ty koa raha efa nivolan̈iny:

• “Hitorian̈a amy tany jiaby vaovao tsara momba Fanjakan̈a ty, amy zen̈y firenena jiaby haharen̈y, zay vo ho avy farany.”​—Matio 24:14.

Amy ziôty, vaovao tsaran’ny Fanjakan̈an’ny Zan̈ahary io efa torin̈y amy tany mandilatran’ny 240. Ke zahay mikaiky anao hianatra raha momba fitondrasan̈a io ndreky handiniky ino aby hatsaran̈a ho azonao lera izio mitondra.

Azafady zahava video Karakory ma Fanjakan̈any Zan̈ahary Zen̈y?