Karakôry ma Mariazin’ny Vavolombelon̈on’i Jehovah?

Matetiky mariazin’ny Vavolombelon̈on’i Jehovah tsotra fa mendriky, aviô misy kabaro baka amy Baiboly. Izikoa fa ravan̈a baka amy kabaro io, mety misy fety ndreky fihinanan̈a atao.a Jesosy koa efa navy nan̈aton̈o fetin’ny mariazy karaha zen̈y, ta Kana tan̈y, tamin’izy nanomboko fanompoan̈anany.​—Jaona 2:1-11.

• Ino ma raha atao amy mariazy io?

• Aia ma an̈anaovan̈a mariazin’ny Vavolombelon̈on’i Jehovah?

• Azôvy aby mety man̈aton̈o mariazy io?

• Karakôry lamba atao, izikoa fa man̈aton̈o mariazy io?

• Olo man̈aton̈o mariazy io ma mila mitondra kadô?

• Mety mifampikon̈o vera ma an̈y?

• Mety ma man̈atsipy vary fotsy na raha miramira amy zen̈y?

• Misy fihinanan̈a ndreky figiahan̈a ma an̈y?

• Misy hira ndreky tsinjaka ma an̈y?

• Vavolombelon̈on’i Jehovah ma man̈ano aniverseran’ny mariazy?

Ino ma raha atao amy mariazy io?

An̈isan’ny raha maventy amy mariazy io kabaro baka amy Baiboly mahadin̈y 30 minity. Vavolombelon̈on’i Jehovah man̈ano kabaro io. Izio kabaro mafana ndreky mankahery. Hazavain̈a amizio karakôry an̈ampian’ny Baiboly irô vady vao io baka hahadin̈y, hisy fitiavan̈a ndreky ho sambatra vadian̈andrô.​—Efesianina 5:33.

Amy tany maro, fanjakan̈a man̈amia lalan̈a mpiandraikitry amy Vavolombelon̈on’i Jehovah hanoratra vadian̈an’olo. Amy faran’ny kabaro io, vady vao io man̈ano voady. Irô koa mety mifan̈apetaka peratra. Koa fa vita zen̈y, mpiandraikitry io mivolan̈a amindrô fa irô efa fivadiany ara-dalàn̈a.

Amy tany sasany ndraiky, lalàn̈an’ny fanjakan̈a mivolan̈a fa vady vao io mila mandeha misoratra amy birôn’ny fanjakan̈a. Aloha helin’ny han̈anaovan̈a kabaron’ny mariaży amy Vavolombelon̈on’i Jehovah an̈y han̈anaovandrô zen̈y. Izikoa irô tamy birôn’ny fanjakan̈a tan̈y tsendriky nan̈ano voady, irô mety man̈ano izio amy faran’ny kabaro io. Izikoa ndraiky irô efa nahavita voady tamin’irô nisoratra tan̈y, irô mbala mety man̈ampody voady io ndraiky amy faran’ny kabaro io izikoa tiandrô. Mila amboarindrô hely fo fomba fivolan̈andrô izy, atao raha efa vita. Farany amy zay misy vavaka, hangatahan̈a amy Zan̈ahary hitahy vady vao io.

Aia ma an̈anaovan̈a mariazin’ny Vavolombelon̈on’i Jehovah?

Maro amy Vavolombelon̈on’i Jehovah man̈ano mariazy mifidy han̈ano kabaron’ny mariazindrô amy Tran̈o Fivorian̈a, izikoa misy izio amy tany misy irô.b Izikoa irô han̈ano fety afaran’izen̈y, tsy ao an̈anaovan̈a izio fa an-tany hafa.

Azôvy aby mety man̈aton̈o mariazy io?

Izikoa amy Tran̈o Fivorian̈a an̈anaovan̈a kabaro io, olo jiaby mety avy, nata olo tsy Vavolombelon̈on’i Jehovah. Fa amy fety ataondrô afaran’izio fo, irô fivadiany fo mifidy olo han̈aton̈o fety io.

Karakôry lamba atao, izikoa fa man̈aton̈o mariazy io?

Vavolombelon̈on’i Jehovah mifen̈y man̈araka raha koran̈in’ny Baiboly izikoa fa mifidy lamba atao, ke irô man̈ano lamba mendriky ndreky mihaja. Tiandrô izikoa olo jiaby man̈aton̈o mariaży io man̈ano karaha zen̈y koa. (1 Timoty 2:9) Mira zen̈y koa amy fetin’ny mariaży, izikoa vady vao io mifidy han̈ano fety.

Olo man̈aton̈o mariazy io ma mila mitondra kadô?

Baiboly mandrisiky atsika ho tia man̈amia raha olo. (Salamo 37:21) Vavolombelon̈on’i Jehovah ravoravo izikoa fa man̈amia kadôn’ny mariazy ndreky amian’olo kadô. (Lioka 6:38) Fa irô tsy mangataka kadô ndreky tsy manon̈ono an̈aran’olo nan̈amia kadô irô amason’olo jiaby iô. (Matio 6:3, 4; 2 Korintianina 9:7; 1 Petera 3:8) Tsy mifan̈araka amy Soratra Masin̈y baka raha karaha zen̈y, aviô mety ho hafahafa amin’olo avy ao koa.

Mety mifampikon̈o vera ma an̈y?

Baiboly tsy mandrova olo hifampikon̈o vera, fa vady vao sasany fo mety hivolan̈a amin’olo ainvitendrô tsy han̈ano zen̈y, tsao ho hafahafa amin’olo.​—Romanina 14:21.

Mety ma man̈atsipy vary fotsy na raha miramira amy zen̈y?

Tsy mety. Amy tany sasany olo man̈atsipy vary fotsy na raha miramira amy zen̈y amy vady vao. Irô mino fa raha aby io hampisy anjara, hampasambatra ndreky hampaela velon̈o vady vao io. Vavolombelon̈on’i Jehovah tsy mirary olo ho hisy “anjara” zen̈y, fôtony izio tsy mifan̈araka amy raha volan̈in’ny Baiboly.​—Isaia 65:11.

Misy fihinanan̈a ndreky figiahan̈a ma an̈y?

Amy kabaro atao amy Tran̈o Fivorian̈a an̈y, tsisy fihinanan̈a ndreky figiahan̈a zen̈y. Olo sasany man̈ano mariazy izikoa mifidy han̈ano fety, amy tany an̈anaovandrô fety an̈y irô mihina ndreky migiaka. (Mpitoriteny 9:7) Izikoa ndraiky irô manapa-kevitry han̈isy toaka, tôkony ho azondrô antoko fa tsy be loatra toaka ao, aviô olo efa ampy taon̈o fo tôkony higiaka izio.​—Lioka 21:34; Romanina 13:1, 13.

Misy hira ndreky tsinjaka ma an̈y?

Izikoa irô fivadiany mifidy han̈isy fety, irô mety man̈isy hira ndreky tsinjaka. (Mpitoriteny 3:4) Mety ataondrô mifan̈araka amy tiandrô ndreky kolontsain̈indrô hira io, fa izy fo mila pare tsarabe ndreky misy vokany tsara amin’olo ainvitendrô. Fa matetiky, amy kabaro amy Tran̈o Fivorian̈a an̈y koa misy hira mifan̈araka amy Soratra Masin̈y.

Vavolombelon̈on’i Jehovah ma man̈ano aniverseran’ny mariazy?

Baiboly tsy mandrisiky sady tsy mandrova olo han̈ano aniverseran’ny mariazy, ke anjaran’ny olo fivadiany Vavolombelon̈on’i Jehovah manapa-kevitry han̈ano na tsy han̈ano aniverseran’ny mariazindrô. Fa izikoa irô mifidy han̈ano izio, mety irô roe fo han̈ano izio na miaraka amy kamarady ndreky havandrô.