Nan̈ino ma Anaro Mandroaka Olo Miaraka Mivavaka Aminaro?

Izikoa Vavolombelon̈o Jehovah araiky vita batisa efa tsy mitory na tsy mivory eky, zahay mbala mikoran̈a aminany fo. Mifen̈y zahay mandrisiky izy hihavan̈a ndraiky amy Zan̈ahary.

Ndray olo nahavita adisovan̈a maventy, mbala tsy voatery roasin̈y fo koa. Izikoa ndraiky izy efa vita batisa, ke nanjary zatra tsy man̈araka volan̈a Baiboly momba fitondranten̈a, izy roasin̈y, olo tsy mivolan̈a aminany eky. Mazava volan̈a Baiboly: “Adosoa aminaro olo pan̈ano ratsy io.”—1 Korintianina 5:13.

Karakory fo ataonaro izikoa lelahy araiky voaroaka, fa ry vadiny ndreky zanany mbala Vavolombelon̈o Jehovah? Iro mivolan̈a aminany fo, fa iro tsy miaraka aminany eky, izikoa fa man̈ano raha momba fanompoan̈a Zan̈ahary.

Olo voaroaka zen̈y mbala mety mivory miaraka aminay fo. Iro antipan̈ahy amy fiangonan̈anay koa mety man̈amia torohevitry izy, izikoa tiany. Dikany an̈anovan̈a zen̈y, baka izy hahafeno raha takin̈y, ke hipody Vavolombelon̈o Jehovah ndraiky. Izikoa misy olo efa voaroaka miala amy raha ratsy nahazatra izy, ke hita fa ten̈a man̈iry han̈araka volan̈a Baiboly, izy raisinay ndraiky.